11.5.2005   

MT

Il-Ġurnal Uffiċjali ta’ l-Unjoni Ewropea

C NaN/33

POŻIZZJONI KOMUNI (KE) Nru 18/2005

adottata mill-Kunsill fl-24 ta' Jannar 2005

bil-għan li tigi adottata Direttiva 2005/…/KE tal-Parlament Ewropew u tal-Kunsill tal-… temenda d-Direttiva tal-Kunsill 74/408/KEE fuq l-approssimazzjoni tal-liġijiet ta' l-Istati Membri dwar vetturi bil-mutur fir-rigward tas-sedili, l-ankoraġġi u t-trażżin tar-ras tagħhom

(Test b'rilevanza għaż-ŻEE)

(2005/C 111 E/05)

IL-PARLAMENT EWROPEW U L-KUNSILL TA' L-UNJONI EWROPEA,

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 95 tiegħu,

Wara li kkunsidraw il-proposta mill-Kummissjoni,

Wara li kkunsidraw l-opinjoni tal-Kumitat Ekonomiku u Soċjali (1),

Waqt li jaġixxu skond il-proċedura stabbilita fl-Artikolu 251 tat-Trattat (2),

Billi:

(1)

Ir-riċerka wriet li l-użu taċ-ċintorini tas-sigurtà u s-sistemi tat-trażżin jistgħu jikkontribwixxu għal tnaqqis sostanzjali fin-numru ta' mwiet u fil-gravità tal-korrimenti fil-każ ta' inċident, anke f'każi fejn jinqalbu l-vetturi. Il-preżenza tagħhom fil-kategoriji kollha ta' vetturi ikun żgur pass importanti 'il quddiem biex tiżdied is-sigurtà fit-toroq u, għaldaqstant jiġu salvati aktar ħajjiet.

(2)

Jista' jinkiseb benefiċċju sostanzjali għas-soċjetà, li kieku l-vetturi kollha jkunu mgħammra b'ċinturini tas-sigurtà.

(3)

Fir-riżoluzzjoni tiegħu tat-18 ta' Frar 1986 dwar miżuri komuni biex jitnaqqsu l-inċidenti fit-toroq, bħala parti mill-programm tal-Komunità għas-sigurtà fit-toroq (3), il-Parlament Ewropew saħaq fuq il-ħtieġa li jsir obbligatorju għal kull passiġġier li jilbes iċ-ċinturin tas-sigurtà, inklużi t-tfal, ħlief f'vetturi ta' servizz pubbliku. Għaldaqstant, għandha ssir distinzjoni bejn karozzi tal-linja li jagħtu servizz pubbliku u vetturi oħra rigward l-istallazzjoni obbligatorja ta' ċinturini tas-sigurtà u/jew sistemi ta' trażżin.

(4)

Skond id-Direttiva tal-Kunsill 70/156/KEE tas-6 ta' Frar 1970 dwar l-approssimazzjoni tal-liġijiet ta' l-Istati Membri li għandhom x'jaqsmu ma' l-approvazzjoni tat-tip ta' vetturi bil-mutur u l-karrijiet tagħhom (4), is-sistema Komunitarja ta' approvazzjoni tat-tip ġiet implimentata biss għall-vetturi ġodda kollha tal-kategorija M1 mill-1 ta' Jannar 1998. B'konsegwenza, dawn il-vetturi biss għandhom ikunu mgħammra b'sedili, ankoraġġi tas-sedili u trażżin tar-ras li jissodifaw id-disposizzjonijiet tad-Direttiva tal-Kunsill 76/115/KEE (5).

(5)

Sakemm is-sistema Komunitarja ta' approvazzjoni tat-tip tiġi estiża għall-kategoriji kollha ta' vetturi, l-istallazzjoni ta' sedili u ankoraġġi ta' sedili kompatibbli ma' l-istallazzjoni ta' ankoraġġi ta' ċinturini tas-sigurtà għandhom ikunu meħtieġa, fl-interess tas-sigurtà fit-toroq, f'vetturi li jaqgħu taħt kategoriji oħra minbarra M1.

(6)

Id-Direttiva 74/408/KEE diġa tipprovdi għad-disposizzjonijiet tekniċi u amministrattivi kollha li jippermettu l-approvazzjoni tat-tip ta' vetturi ta' kategoriji oħra minbarra M1. Għaldaqstant, l-Istati Membri ma jeħtieġux l-introduzzjoni ta' disposizzjonijiet ulterjuri.

(7)

Mid-dħul fis-seħħ tad-Direttiva tal-Kummissjoni 96/37/KE tas-17 ta' Ġunju 1996 li tadatta għall-progress tekniku d-Direttiva tal-Kunsill 74/408/KEE (6), bosta Stati Membri diġa għamlu obbligatorji d-disposizzjonijiet li hemm fiha fir-rigward ta' ċerti kategoriji oħra ta' vetturi minbarra M1. Għaldaqstant, il-manifatturi u l-fornituri tagħhom żviluppaw teknoloġija xierqa.

(8)

Ir-riċerka uriet li mhux possibbli tipprovdi sedili li jħarsu lejn il-ġenb tal-vettura b'ċinturini tas-sigurtà li jiżguraw l-istess livell ta' sigurtà lill-okkupanti daqs sedili li jħarsu 'l quddiem. Għal raġunijiet ta' sigurtà, jeħtieġ li dawk is-sedili jiġu projbiti f'ċerti kategoriji ta' vetturi.

(9)

Id-Direttiva 74/408/KEE għandha tiġi hekk emendata.

(10)

Minħabba li l-għan ta' din id-Direttiva, jiġifieri t-titjib tas-sigurtà fit-toroq bl-introduzzjoni tat-tagħmir obbligatorju b'ċinturini tas-sigurtà f'ċerti kategoriji ta' vetturi, ma jistgħux jintlaħqu b'mod suffiċjenti mill-Istati Membri u jistgħu, għalhekk, minħabba d-daqs ta' l-azzjoni, jintlaħqu aħjar fuq il-livell Komunitarju, il-Komunità tista' tadotta miżuri, f'konformità mal-prinċipju ta' sussidjarjetà kif stabbilit fl-Artikolu 5 tat-Trattat. F'konformità mal-prinċipju ta' proporzjonalitá, kif stabbilit f'dak l-Artikolu, din id-Direttiva ma tmurx lil hinn minn dak li hu meħtieġ sabiex jinkiseb dak l-għan,

ADOTTAW DIN ID-DIRETTIVA:

Artikolu 1

Emendi għad-Direttiva 76/115/KEE

Id-Direttiva 76/115/KEE hija b'dan emendata kif ġej:

(1)

Fl-Artikolu 2, għandu jiġi miżjud il-paragrafu li ġej:

 

“Vetturi tal-kategorija M2 u M3 għandhom ikunu suddiviżi fi klassijiet kif spjegat fis-sezzjoni 2 ta' l-Anness I għad-Direttiva 2001/85/KE tal-Parlament Ewropew u tal-Kunsill ta' l-20 ta' Novembru 2001 li tirrigwardja d-disposizzjonijiet speċjali għal vetturi wżati għat-trasport ta' pasiġġieri li jkollhom aktar minn tminn sedili minbarra dak tas-sewwieq (7).

 

Il-paragrafu 2 għandu jinbidel b'dan li ġej:

“2.   Din id-Direttiva m' għandiex tapplika għal sedili li jħarsu lura.”.

2)

L-Artikolu li ġej għandu jiġi mdaħħal:

“Artikolu 3a

1.   Għandha tkun projbita l-istallazzjoni ta' sedili li jħarsu lejn il-ġenb tal-vettura f'vetturi tal-kategoriji M1, N1, M2 (ta' klassi III jew B) u M3 (ta' klassi III jew B).

2.   Il-paragrafu 1 m' għandux japplika għal ambulanzi jew vetturi mniżżla fl-Artikolu 8(1) l-ewwel inċiż tad-Direttiva 70/156/KEE .”.

3)

L-Anness II għandu jiġi emendat kif ġej:

(a)

Punt 1.1 għandu jinbidel bis-segwenti:

“1.1.

Il-ħtiġijiet ta' dan l-Anness ma japplikawx għal sedili li jħarsu lura, jew għal kwalunkwe trażżin tar-ras installat fuq tali sedili.”;

(b)

Punt 2.3 għandu jinbidel bis-segwenti:

“2.3.

‘sedil’ ifisser struttura li tista tkun integrata ma' l-istruttura tal-vettura jew le, kompluta bir-raqam, maħsubha biex takkomoda persuna waħda adulta. It-terminu jkopri kemm sedil individwali kif ukoll parti minn bank maħsub li jakkomoda persuna waħda.

Skond l-orjentazzjoni tiegħu, sedil huwa definit kif ġej:

2.3.1.

‘sedil li jħares 'il quddiem’ ifisser sedil li jista' jintuża waqt li l-vettura qiegħda f'moviment u li jħares lejn in-naħa ta' quddiem tal-vettura b'tali mod li l-pjan vertikali ta' simetrija tas-sedil jifforma angolu ta' inqas minn +10o jew -10o mal-pjan vertikali tas-simetrija tal-vettura;

2.3.2.

‘sedil li jħares lura’ ifisser sedil li jista' jintuża waqt li l-vettura qiegħda f'moviment u li jħares lejn in-naħa ta' wara tal-vettura b'tali mod li l-pjan vertikali ta' simetrija tas-sedil jifforma angolu ta' inqas minn +10o jew -10o mal-pjan vertikali tas-simetrija tal-vettura;

2.3.3.

‘sedil li jħares lejn il-ġenb’ ifisser sedil li, fir-rigward ta' l-allinjament tiegħu mal-pjan vertikali ta' simetrija tal-vettura, ma jilħaq ebda tifsira mogħtija f'2.3.1. jew 2.3.2. hawn fuq;”;

(ċ)

punt 2.9. għandu jiġi mħassar.

4)

fl-Anness III, il-punt 2.5 għandu jinbidel mis-segwenti:

“2.5.

‘sedil’ ifisser struttura li x' aktarx tkun ankrata ma' l-istruttura tal-vettura, inkluż ir-raqam u l-aċċessorji tagħha, maħsubha biex tintuża f'vettura u li takkomoda persuna adulta waħda jew aktar.

Skond l-orjentazzjoni tiegħu, sedil huwa definit kif ġej:

2.5.1.

‘sedil li jħares 'il quddiem’ ifisser sedil li jista' jintuża waqt li l-vettura qiegħda f'moviment u li jħares lejn in-naħa ta' quddiem tal-vettura b'tali mod li l-pjan vertikali ta' simetrija tas-sedil jifforma angolu ta' inqas minn +10o jew -10o mal-pjan vertikali tas-simetrija tal-vettura;

2.5.2.

‘sedil li jħares lura’ ifisser sedil li jista' jintuża waqt li l-vettura qiegħda f'moviment u li jħares lejn in-naħa ta' wara tal-vettura b'tali mod li l-pjan vertikali ta' simetrija tas-sedil jifforma angolu ta' inqas minn +10o jew -10o mal-pjan vertikali tas-simetrija tal-vettura;

2.5.3.

‘sedil li jħares lejn il-ġenb’ ifisser sedil li, fir-rigward ta' l-allinjament tiegħu mal-pjan vertikali ta' simetrija tal-vettura, ma jilħaq ebda tifsira mogħtija f'2.5.1. jew 2.5.2. hawn fuq;”;

5)

L-Anness IV għandu jiġi emendat kif ġej:

(a)

Il-punt 1.1. għandu jiġi mibdul bis-segwenti:

“1.1.

Il-ħtiġijiet stabbiliti f'dan l-Anness japplikaw għal vetturi fil-Kategoriji N1, N2 u N3 u għal dawk fil-kategoriji M2 u M3 mhux koperti mill-ambitu ta' l-Anness III. Bl-eċċezzjoni tad-disposizzjonijiet ta' punt 2.5 ta' l-Anness IV il-ħtiġijiet japplikaw ukoll għal sedili li jħarsu lejn il-ġenb tal-kategoriji kollha ta' vetturi.”;

(b)

Punt 2.4, għandu jiġi mibdul bis-segwenti:

“2.4.

Is-sedili kollha li jistgħu jinqalbu 'l quddiem jew li għandhom dahar li jingħalaq 'il quddiem iridu jkunu jissakkru awtomatikament fil-pożizzjoni normali. Din il-ħtieġa ma tapplikax għal sedili stallati fl-ispazji għas-siġġijiet tar-roti ta' vetturi ta' kategorija M2 jew M3 ta' klassi I, II jew A.”.

Artikolu 2

Implimentazzjoni

1.   Mill-… (8), fir-rigward tas-sedili, l-ankoraġġi tagħhom u t-trażżin tar-ras, li jikkonformaw mal-ħtiġijiet stabbiliti fid-Direttiva 74/408/KEE kif emendata b'din id-Direttiva, l-Istati Membri m' għandhomx:

(a)

jirrifjutaw li jagħtu approvazzjoni tat-tip tal-KE, jew approvazzjoni tat-tip nazzjonali, rigward tip ta' vettura;

(b)

jipprojbixxu r-reġistrazzjoni, il-bejgħ jew id-dħul fis-servizz ta' vetturi ġodda.

2.   Mill-… (9), fir-rigward tas-sedili, l-ankoraġġi tagħhom u t-trażżin tar-ras, li ma jikkonformawx mal-ħtiġijiet stabbiliti fid-Direttiva 74/408/KEE kif emendata b'din id-Direttiva, l-Istati Membri għandhom, fir-rigward ta' tip ġdid ta' vettura:

(a)

ma jibqgħux jagħtu approvazzjoni tat-tip tal-KE;

(b)

jirrifjutaw li jagħtu approvazzjoni tat-tip nazzjonali.

3.   Mill-… (10), fir-rigward tas-sedili, l-ankoraġġi tagħhom u t-trażżin tar-ras, li ma jikkonformawx mal-ħtiġijiet stabbiliti fid-Direttiva 74/408/KEE kif emendata b'din id-Direttiva, l-Istati Membri għandhom:

(a)

jikkunsidraw iċ-ċertifikati ta' konformità li jakkumpanjaw vetturi ġodda bħala li ma għadhomx validi għall-għan ta' l-Artikolu 7(1) tad-Direttiva 70/156/KEE;

(b)

jirrifjutaw ir-reġistrazzjoni, il-bejgħ jew id-dħul fis-servizz ta' vetturi ġodda, ħlief f'każijiet fejn jiġu invokati d-disposizzjonijiet ta' l-Artikolu 8(2) tad-Direttiva 70/156/KEE.

Artikolu 3

Traspożizzjoni

1.   L-Istati Membri għandhom jadottaw u jippubblikaw il-liġijiet, ir-regolamenti u d-disposizzjonijiet amministrattivi meħtieġa biex jikkonformaw ma' din id-Direttiva qabel … (11). Għandhom jinformaw lill-Kummissjoni b'dan minnufih.

2.   Għandhom japplikaw dawn id-disposizzjonijiet mill-… (12).

3.   Meta l-Istati Membri jadottaw dawn id-disposizzjonijiet, għandu jkollhom referenza għal din id-Direttiva jew ikunu akkumpanjati b'tali referenza meta jkunu ppublikati uffiċjalment. Il-metodi ta' kif issir tali referenza għandhom jiġu stabbiliti mill-Istati Membri.

4.   L-Istati Membri għandhom jikkomunikaw lill-Kummissjoni t-testi tad-disposizzjonijiet ewlenin tal-liġi nazzjonali, li huma jadottaw fil-qasam kopert minn din id-Direttiva.

Artikolu 4

Id-Dħul fis-seħħ

Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha fil-Ġurnal Uffiċjali ta' l-Unjoni Ewropea.

Artikolu 5

Id-Destinatarji

Din id-Direttiva hija indirizzata lill-Istati Membri.

Magħmula fi Brussel,

Għall-Parlament Ewropew

Il-President

Għall-Kunsill

Il-President

(1)  ĠU C 80, tat-30.3.2004, p. 6.

(2)  Opinjoni tal-Parlament Ewropew tas-17 ta' Diċembru 2003 (ĠU C 91 E, tal-15.4.2004, p. 487), Pożizzjoni Komuni tal-Kunsill ta' l-24 ta' Jannar 2004 u Pożizzjoni tal-Parlament Ewropew tal-…(għadha mhix pubblikata fil-Ġurnal Uffiċjali).

(3)  ĠU C 68, ta' l-24.3.1986, p. 35.

(4)  ĠU L 42, tat-23.2.1970, p 1. Direttiva kif emendata l-aħħar mid-Direttiva tal-Kummissjoni 2004/78/KE (ĠU L 153, tat-30.4.2004, p. 103).

(5)  ĠU L 24, tat-30.1.1976, p.6. Direttiva kif emendata l-aħħar mid-Direttiva tal-Kummissjoni 96/38/EC (ĠU L 187, tas-26.7.1996, p. 95).

(6)  ĠU L 186, tal-25.7.1996, p. 28.

(7)  ĠU L 42, tat-13.2.2002, p. 1.”

(8)  Data msemmija fl-Artikolu 3(2).

(9)  Sitt xhur wara d-data msemmija fil-paragrafu 1.

(10)  18 il-xahar wara d-data msemmija fil-paragrafu 1.

(11)  Sitt xhur wara d-data tad-dħul fis-seħħ ta' din id-Direttiva

(12)  Sitt xhur u jum wara d-data tad-dħul fis-seħħ ta' din id-Direttiva

DIKJARAZZJONI TAR-RAĠUNIJIET TAL-KUNSILL

I.   INTRODUZZJONI

Id-Direttiva proposta, ippreżentata mill-Kummissjoni fl-20 ta' Ġunju 2003 (1), hija bbażata fuq l-Artikolu 95 tat-Trattat tal-KE.

Il-Kumitat Ekonomiku u Soċjali Ewropew ta Opinjoni (2) fl-10 ta' Diċembru 2003.

Il-Parlament Ewropew temm l-ewwel qari tiegħu u ta Opinjoni fis-17 ta' Diċembru 2003 (3).

Fl-24 ta' Jannar 2005 l-Kunsill adotta l-Posizzjoni Komuni tiegħu kif stabbilita fid-dok. 11935/04.

II.   GĦAN

Id-Direttiva proposta għandha l-għan li temenda d-Direttiva tal-Kunsill 74/408/KEE tat-22 ta' Lulju 1974, kif l-aħħar emendata bid-Direttiva tal-Kummissjoni 96/37/KE, dwar l-approssimazzjoni tal-liġijiet ta' l-Istati Membri rigward sedili għal vetturi bil-mutur sabiex jiġi impost l-immuntar ta' ċinturini ta' sigurtà fil-vetturi bil-mutur li mhumiex karozzi tal-passiġġieri.

Iż-żewġ Direttivi li ġejjin jikkonċernaw ukoll l-istallazzjoni ta' ċinturini ta' sigurtà fir-rigward ta' vetturi:

—

id-Direttiva tal-Kunsill 77/541/KEE tat-28 ta' Ġunju 1977, kif l-aħħar emendata bid-Direttiva tal-Kummissjoni 2003/3/KE, dwar l-approssimazzjoni tal-liġijiet ta' l-Istati Membri rigward ċinturini ta' sigurtà u sistemi ta' trażżin ta' vetturi bil-mutur;

—

id-Direttiva tal-Kunsill 76/115/KEE tat-18 ta' Diċembru 1975, kif l-aħħar emendata bid-Direttiva tal-Kummissjoni 96/38/KE, dwar l-approssimazzjoni tal-liġijiet ta' l-Istati Membri rigward ankoraġġi għal ċinturini ta' sigurtà ta' vetturi bil-mutur.

Bil-ħsieb ta' l-istallazzjoni obbligatorja ta' ċinturini ta' sigurtà fil-vetturi kollha, il-Kummissjoni pproponiet li temenda t-tliet Direttivi simultanjament, għal raġunijiet tekniċi.

B'kont meħud li l-għan aħħari ta' l-azzjoni proposta hu li titjieb is-sigurtà fit-toroq, id-Direttivi għandhom jiġu adottati fl-istess ħin u jiġu implimentati fl-istess data.

III.   ANALIŻI TAL-POSIZZJONI KOMUNI KIF STABBILITA FID-DOK. 7418/04.

1.   Ġenerali

Fil-Posizzjoni Komuni li ġiet adottata unanimament, il-Kunsill:

—

immodifika l-Artikolu1, bl-inklużjoni ta' sedili li jintwew fil-firxa ta' applikazzjoni tad-Direttiva u l-inseriment ta' definizzjonijiet li jikkategorizzaw id-diversi orjentazzjonijiet tas-sedili;

—

ippospona diversi dati ta' dħul fis-seħħ fl-Artikolu 2;

—

irrifjuta t-tliet emendi tal-PE:

—

L-Emenda nru 3 tal-PE li tipproponi l-ħolqien ta' premessa 8a) ġdida li tikkonċerna testijiet la ġenba biex jiġu eżaminati mill-Kummissjoni ġiet rifjutata għax il-Kunsill ma jemminx li jinħtieġu aktar testijiet biex jiġi konkluż li sedili li jħarsu la ġenba huma perikolużi għal okkupanti ta' kull tip ta' vettura;

—

L-Emendi nru 1 u 2 tal-PE li jirrestrinġu fl-Artikolu. 1 il-projbizzjoni ta' l-istallazzjoni ta' sedili li jħarsu la ġenba għal ċerti kategoriji ta' vetturi bil-mutur ġew rifjutati billi l-Kunsill jaqbel mat-tħassib tal-Kummissjoni li jirrigwarda l-projbizzjoni ta' sedili laterali f'kull tip ta' vettura għas-sigurtà tal-passiġġieri.

2.   Elementi ġodda li jinsabu fil-Posizzjoni Komuni kif imqabbla mal-proposta tal-Kummissjoni

Artikolu, punt 1

Tneħħija tar-referenza għan-non-applikazzjoni tad-Direttiva għal “sedili li jintwew”.

Punt 2

—

l-obbligu ta' l-Istati Membri li jipprojbixxu l-immuntar ta' sedili li jħarsu la ġenba ġie trasferit għall-Artikoluikolu 2 li jikkonċerna l-implimentazzjoni;

—

il-firxa ta' applikazzjoni tal-projbizzjoni fuq sedili li jħarsu la ġenba ġiet ikkjarifikata;

Ġew inseriti żewġ punti ġodda (punti 3 u 4) biex jiġu definiti d-diversi orjentazzjonijiet tas-sedili: sedili li jħarsu 'l quddiem, sedili li jħarsu lura u sedili li jħarsu la ġenba.

Punt 5 (ex-punt 3)

Paragrafu ġdid jispeċifika li s-sistema ta' imblukkar awtomatiku meħtieġ fuq sedili li jintwew ma tapplikax għal sedili li jintwew immuntati fl-ispazji għal siġġijiet tar-roti ta' vetturi tal-kategoriji M2 jew M3 tal-klassi I, II jew A (xarabanks urbani).

Artikolu 2

Id-dati kollha li jikkonċernaw l-implimentazzjoni tad-Direttiva ġew posposti u sostitwiti b'dati mobbli li jiddependu mid-data ta' l-adozzjoni ta' din id-Direttiva ġdida.

IV.   KONKLUŻJONI

Il-Posizzjoni Komuni, li b'mod ġenerali taqbel mal-proposta tal-Kummissjoni, ġiet adottata unanimament mill-Kunsill. Il-bidliet prinċipali għall-proposta tal-Kummissjoni jikkonċernaw l-inklużjoni min-naħa waħda tas-sedili li jintwew fil-firxa ta' applikazzjoni tad-Direttiva u min-naħa l-oħra ta' definizzjonijiet ta' diversi orjentazzjonijiet tas-sedili. Barra minn dan, id-dati ta' trasposizzjoni u ta' dħul fis-seħħ ta' din id-Direttiva ġew adattati.

(1)  Dok. 10888/03 ENT 115 CODEC 909

(2)  ĠU C 80, tat-30.3.2004, p. 6.

(3)  ĠU C 91 E, tal-15.4.2004, p. 487.