bil-ħsieb ta' l-adozzjoni tad-Deċiżjoni Nru.../2005/KE tal-Parlament Ewropew u tal-Kunsill, ta'...., li tistabbilixxi programm pluriennali tal-Komunitá sabiex il-kontenut diġitali jsir iktar aċċessibli u jista' jiġi wżat u sfruttat aktar

Wara li kkunsidraw it-Trattat li jistabbilixxi l-Komunità Ewropea, u b'mod partikolari l-Artikolu 157(3) tiegħu,

1. Din id-Deċiżjoni tistabbilixxi programm Komunitarju għall-perijodu 2005-2008 sabiex il-kontenut diġitali fl-Ewropa jsir iżjed aċċessibbli u jkun jista' jiġi wżat u sfruttat iktar, b'hekk jiġu ffaċilitati l-ħolqien u d-diffużjoni ta' l-informazzjoni - f'oqsma ta' interess pubbliku - fuq livell Komunitarju.

Il-programm għandu jkun magħruf bħala l-programm “eContentplus” (minn issa `l quddiem “il-Programm”)

2. Sabiex jintlaħaq il-għan ġenerali tal-Programm, il-linji ta' azzjoni li ġejjin għandhom jiġu ttrattati:

L-attivitajiet li għandhom jitwettqu taħt dawk il-linji ta' azzjoni jiffukaw fuq oqsma ta' informazzjoni tas-settur pubbliku, data spazjali u kontenut edukattiv, kulturali u xjentifiku kif stabbilit fl-Anness I. Il-programm għandu jiġi implimentat skond l-Anness II.

1. Il-Parteċipazzjoni fil-Programm għandha tkun miftuħa għal entijiet legali stabbiliti fl-Istati Membri. Għandha wkoll tkun miftuħa għall-parteċipazzjoni ta' entijiet legali stabbiliti fil-pajjiżi kandidati skond ftehim bilaterali eżistenti jew li għad iridu jiġu konklużi ma' dawk il-pajjiżi.

2. Il-parteċipazzjoni fil-Programm tista' tkun miftuħa għal entijiet legali stabbiliti fl-Istati ta' l-EFTA li huma partijiet kontraenti għall-Ftehim taż-ŻEE, skond id-dispożizzjonijiet ta' dak il-Ftehim.

3. Il-parteċipazzjoni fil-Programm tista' tkun miftuħa, mingħajr sostenn finanzjarju mill-Komunità, għal entijiet legali stabbiliti f'pajjiżi terzi u għal organizzazzjonijiet internazzjonali, fejn din il-parteċipazzjoni tikkontribwixxi b'mod effettiv għall-implimentazzjoni tal-Programm. Id-deċiżjoni biex tiġi permessa din il-parteċipazzjoni għandha tiġi adottata skond il-proċedura msemmija fl-Artikolu 4(2).

1. Il-Kummissjoni għandha tkun responsabbli għall-implimentazzjoni tal-Programm.

2. Il-Kummissjoni għandha tfassal programm ta' ħidma fuq il-bażi ta' din id-Deċiżjoni.

3. Fl-implimentazzjoni tal-Programm, il-Kummissjoni għandha, f'kooperazzjoni mill-qrib ma' l-Istati Membri, tiżgura konsistenza u komplementarità ġenerali ma' politika, programmi u azzjonijiet oħra rilevanti tal-Komunità li għandhom effett fuq l-iżvilupp u l-użu tal-kontenut diġitali Ewropew u l-promozzjoni tad-diversità lingwistika fis-soċjetà ta' l-informazzjoni, b'mod partikolari l-programmi ta' riċerka u żvilupp teknoloġiku tal-Komunità, IDA, eTEN, eInclusion, eLearning, MODINIS u Internet Aktar Sikur.

4. Il-Kummissjoni għandha taġixxi skond il-proċedura msemmija fl-Artikolu 4(2) għall-iskopijiet ta' dan li ġej:

5. Il-Kummissjoni għandha tinforma lill-kumitat imsemmi fl-Artikolu 4 dwar il-progress fl-implimentazzjoni tal-Programm.

2. Fejn hemm riferiment għal dan il-paragrafu, l-Artikoli 4 u 7 tad-Deċiżjoni 1999/468/KE għandhom japplikaw, filwaqt li jittieħed kont tad-dispożizzjonijiet ta' l-Artikolu 8 tagħha.

Il-perijodu stabbilit fl-Artikolu 4(3) tad-Deċiżjoni 1999/468/KE għandu jkun stabbilit għal tliet xhur.

1. Sabiex tiżgura li l-għajnuna Komunitarja tiġi wżata b'mod effiċjenti, il-Kummissjoni għandha tiżgura li azzjonijiet taħt din id-Deċiżjoni jkunu suġġett għal stima minn qabel, segwitu u valutazzjoni sussegwenti.

2. Il-Kummissjoni għandha twettaq monitoraġġ ta' l-implimentazzjoni ta' proġetti taħt il-Programm. Il-Kummissjoni għandha tivvaluta l-mod li bih ġew imwettqa l-proġetti u l-impatt ta' l-implimentazzjoni tagħhom sabiex tistma jekk intlaħqux l-għanjiet oriġinali

3. Il-Kummissjoni għandha tirraporta dwar l-implimentazzjoni tal-linji ta' azzjoni msemmija fl-Artikolu 1(2) lill-Parlament Ewropew, il-Kunsill, il-Kumitat Ekonomiku u Soċjali Ewropew u l-Kumitat tar-Reġjuni sa mhux aktar tard minn nofs l-2006. F'dan il-kuntest, il-Kummissjoni għandha tirraporta dwar il-konsistenza ta' l-ammont għall-2007-2008 mal-perspettiva finanzjarja. Jekk applikabbli, il-Kummissjoni għandha tieħu l-passi meħtieġa fil-proċeduri tal-budget għall-2007-2008 biex tiżgura l-konsistenza ta' l-appropjazzjonijiet annwali mal-perspettiva finanzjarja. Il-Kummissjoni għandha tissottometti rapport finali ta' valutazzjoni fl-aħħar tal-Programm.

4. Il-Kummissjoni għandha tgħaddi r-riżultati tal-valutazzjonijiet kwantitativi u kwalitativi tagħha lill-Parlament Ewropew u lill-Kunsill flimkien ma' proposti xierqa biex din id-Deċiżjoni tiġi emendata. Ir-riżultati għandhom ikunu mgħoddija qabel il-presentazzjoni ta' l-abbozz tal-budget ġenerali ta' l-Unjoni Ewropea għas-snin 2007 u 2009 rispettivament.

1. Il-qafas finanzjarju għall-implimentazzjoni ta' l-azzjonijiet Komunitarji taħt din id-Deċiżjoni għall-perijodu mill-1 ta' Jannar 2005 sal-31 ta' Diċembru 2008 huwa hawnhekk stabbilit għal EUR 135 miljun, li EUR 55,6 miljun minnhom huwa għall-perijodu sal-31 ta' Diċembru 2006.

2. Għall-perijodu wara il-31 ta' Diċembru 2006, l-ammont għandu jitqies konfermat jekk ikun konsistenti għal din il-fażi mal-perspettiva finanzjarja fis-seħħ għall-perijodu li jibda fl-2007.

3. L-approprjazzjonijiet annwali għall-perijodu mill-2005 sa l-2008 għandhom jiġu awtorizzati mill-awtorità tal-budget fil-limiti tal-perspettiva finanzjarja. Tqassim indikattiv ta' l-infiq jinsab fl-Anness III.

(2) Opinjoni tal-Parlament Ewropew tat-22 ta' April 2004 (ĠU C 104E, 30.4.2004), Pożizzjoni Komuni tal-Kunsill ta' l-24 ta' Settembru 2004 u Pożizzjoni tal-Parlament Ewropew ta' (għadha mhix ippublikata fil-Ġurnal Uffiċjali).

(4) Direttiva 2003/98/KE tal-Parlament Ewropew u tal-Kunsill tas-17 ta' Novembru 2003 dwar l-użu mill-ġdid ta' informazzjoni tas-settur pubbliku (ĠU L 345, 31.12.2003, p. 90).

(5) Direttiva 2001/29/KE tal-Parlament Ewropew u tal-Kunsill tat-22 ta' Mejju 2001 dwar l-armonizzazzjoni ta' ċerti aspetti tad-drittijiet ta' l-awtur u drittijiet relatati fis-soċjetà ta' l-informazzjoni (ĠU L 167, 22.6.2001, p. 10).

(6) Direttiva 96/9/KE tal-Parlament Ewropew u tal-Kunsill tal-11 ta' Marzu 1996 dwar il-protezzjoni legali ta' databases (ĠU L 77, 27.3.1996, p. 20).

(7) Direttiva 95/46/KE tal-Parlament Ewropew u tal-Kunsill ta' l-24 ta' Ottubru 1995 dwar il-protezzjoni ta' individwi fir-rigward ta' l-ipproċessar ta' data personali u dwar il-moviment liberu ta' dik id-data (ĠU L 281, 23.11.1995, p. 31). Direttiva kif emendata mir-Regolament (KE) Nru 1882/2003 (ĠU L 284, 31.10.2003, p. 1).

(8) Direttiva 2002/58/KE tal-Parlament Ewropew u tal-Kunsill tat-12 ta' Lulju 2002 dwar l-ipproċessar tad-data personali u l-protezzjoni tal-privatezza fis-settur tal-komunikazzjoni elettronika(Direttiva dwar il-privatezza u l-komunikazzjoni elettronika) (ĠU L 201, 31.7.2002, p. 37).

ANNESS I

AZZJONIJIET

I. INTRODUZZJONI

eContentplus għandu l-għan globali li jagħmel il-kontenut diġitali fl-Ewropa iżjed aċċessibbli u li jkun jista' jiġi wżat u sfruttat iktar, u b'hekk jiffaċilita l-ħolqien u d-diffużjoni ta' l-informazzjoni - f'oqsma ta' interess pubbliku – fuq il-livell tal-Komunità.

Dan joħloq kondizzjonijiet aħjar għall-aċċess u l-amministrazzjoni ta' kontenut u servizzi diġitali f'ambjenti multilingwistiċi u multikulturali. Dan iwessgħa l-għażla ta' l-utenti u jsostni modi ġodda ta' interazzjoni ma' kontenut diġitali msaħħaħ b'tagħrif, karatteristika li qed issir essenzjali biex il-kontenut isir iżjed dinamiku u mfassal għal kuntesti speċifiċi (tagħlim, kultura, persuni bi bżonnijiet speċjali, eċċ.).

Il-Programm iħejji t-triq għal qafas strutturat għal kontenut diġitali ta' kwalità fl-Ewropa - Iż-Żona Ewropea ta' Kontenut Diġitali - billi jiffaċilita t-trasferiment ta' esperjenzi, l-aħjar prattika u inkroċjament bejn setturi ta' kontenut u fornituri u utenti tal-kontenut.

Huma previsti tliet linji ta' azzjoni:

(a)	il-faċilitatazzjoni fuq livell Komunitarju ta' l-aċċess għall-kontenut diġitali, l-użu u l-isfruttament tiegħu;

(b)	il-faċilitazzjoni tat-titjib tal-kwalità u t-tisħiħ ta' l-aħjar prattika relatata mal-kontenut diġitali bejn il-fornituri u l-utenti tal-kontenut, u bejn is-setturi;

(ċ)	ir-rafforzar tal-kooperazzjoni bejn il-partijiet li għandhom interess fil-kontenut diġitali u l-għarfien.

II. LINJI TA' AZZJONI

A. Il-faċilitazzjoni ta' l-aċċess fuq livell Komunitarju għall-kontenut diġitali, l-użu u l-isfruttament tiegħu

L-attivitajiet li għandhom jitwettqu taħt din il-linja ta' azzjoni jkopru l-istabbiliment ta' rettikolati u allejanzi bejn il-partijiet li għandhom interess, u b'hekk iħeġġu l-ħolqien ta' servizzi ġodda.

L-informazzjoni tas-settur pubbliku, id-data spazjali u l-kontenut edukattiv u kulturali huma l-oqsma mmirati.

Ikun hemm iffukar fuq:

(a)

is-sostenn ta' rikonoxximent usa' ta' l-importanza ta' l-informazzjoni tas-settur pubbliku (PSI), il-valur kummerċjali tagħha u l-implikazzjonijiet għas-soċjetà assoċjati ta' l-użu tagħha. L-attivitajiet għandhom itejbu l-użu u l-isfruttament transkonfini effettiv tal-PSI bejn organizzazzjonijiet tas-settur pubbliku u kumpaniji privati, inklużi s-SMEs, għal prodotti u servizzi ta' informazzjoni ta' valur miżjud;

(b)

l-inkoraġġiment għal użu usa' ta' data spazjali mill-korpi tas-settur pubbliku, kumpaniji privati, inklużi s-SMEs, u ċittadini permezz ta' mekkaniżmi ta' koperazzjoni f'livell Ewropew. L-attivitajiet għandhom jittrattaw kwistjonijiet kemm tekniċi kif ukoll organizzattivi, filwaqt li jevitaw duplikazzjonijiet u gruppi ta' data spazjali mhux żviluppati biżżejjed. Għandhom jippromwovu l-interoperabiltà transkonfini, filwaqt li jsostnu l-koordinazzjoni bejn aġenziji kartografiċi u t-trawwim ta' servizzi ġodda fuq livell Ewropew għal utenti mobbli. Għandhom isostnu wkoll l-użu ta' standards miftuħa;

(ċ)

it-trawwim tal-proliferazzjoni ta' ġabriet ta' tagħrif Ewropej miftuħa ta' oġġetti diġitali, għal komunitajiet ta' edukazzjoni u ta' riċerka, kif ukoll għall-individwu. L-attivitajiet isostnu l-ħolqien ta' servizzi ta' sensarija trans-Ewropej għal kontenut diġitali ta' tagħlim, b'mudelli kummerċjali relatati. L-attivitajiet għandhom ukoll iħeġġu l-użu ta' standards miftuħa, u l-ħolqien ta' gruppi kbar ta' utenti li janaliżżaw u jittestjaw skemi ta' qabel l-istandardizzazzjoni u ta' speċifikazzjoni bil-għan li jgħaddu l-aspetti multilingwistiċi u multikulturali Ewropej fil-proċess ta' definizzjoni ta' standards globali għall-kontenut diġitali ta' tagħlim;

(d)

il-promozzjoni ta' l-emerġenza ta' infrastrutturi ta' informazzjoni trans-Ewropej għall-aċċess u l-użu ta' riżorsi diġitali kulturali u xjentifiċi Ewropej ta' kwalita għolja permezz tal-kollegament ta' libreriji virtwali, memorji komunitarji, eċċ. L-attivitajiet għandhom ikopru approċċi koordinati għad-diġitizzazzjoni u l-bini ta' kollezzjonijiet, il-konservazzjoni ta' oġġetti diġitali u inventarji ta' riżorsi diġitali kulturali u xjentifiċi. Għandhom itejbu l-aċċess għall-assi diġitali kulturali u xjentifiċi permezz ta' skemi ta' liċenzji effettivi u l-awtorizzazzjoni kollettiva minn qabel tad-drittijiet.

B. Il-faċilitazzjoni tat-titjib tal-kwalità u tisħiħ ta' l-aħjar prattika relatata mal-kontenut diġitali bejn il-fornituri u l-utenti tal-kontenut, u bejn is-setturi.

L-attivitajiet li għandhom jitwettqu taħt din il-linja ta' azzjoni huma maħsuba sabiex jiffaċilitaw l-identifikazzjoni u d-diffużjoni fil-wisa' ta' l-aħjar prattika fil-metodi, proċessi u operazzjonijiet biex jinkisbu kwalità ogħla, effiċjenza u effikaċja akbar fil-ħolqien, l-użu u d-distribuzzjoni ta' kontenut diġitali.

Dawn l-attivitajiet ikopru esperimenti li juru li l-kontenut diġitali jista' jiġi mfittex, użat, użat mill-ġdid, kompost u interoperat fil-kuntest tal-qafas legali eżistenti filwaqt li mill-istadju bikri tal-proċess jilħqu l-ħtiġiet ta' gruppi mmirati u swieq differenti f'ambjent dejjem iżjed multilingwistiku u multikulturali, u jestendu lil hinn minn sempliċi teknoloġiji ta' lokalizzazzjoni.

Dawn l-attivitajiet jisfruttaw il-benefiċċji tat-tisħiħ tal-kontenut diġitali b'data li tinftiehem mill-makni (metadata mfissra sew min-naħa semantika bbażati fuq terminoloġija deskrittiva, lessiċi u ontoloġiji rilevanti).

L-esperimenti jitwettqu fi gruppi tematiċi. Il-ġbir, disseminazzjoni u l-inkroċjament bejn is-setturi ta' tagħrif miksub ikunu parti integrali ta' l-esperimenti.

L-informazzjoni tas-settur pubbliku, d-data spazjali, il-kontenut diġitali edukattiv u kulturali, kif ukoll il-kontenut diġitali xjentifiku u akkademiku huma l-oqsma mmirati ta' applikazzjoni.

Ċ. Ir-rafforzar tal-koperazzjoni bejn il-partijiet li għandhom interess fil-kontenut diġitali u l-għarfien.

L-attivitajiet li għandhom jitwettqu taħt din il-linja ta' azzjoni jinkludu miżuri li jakkompanjaw leġiżlazzjoni rilevanti li għandha x'taqsam mal-kontenut diġitali, u li jrawwmu kollaborazzjoni akbar bejn il-partijiet li għandhom interess fil-kontenut diġitali, kif ukoll il-bini ta' għarfien. Dawn l-attivitajiet isostnu l-iżvilupp ta' għodda għal benchmarking, monitoraġġ u analiżi, l-istima ta' l-impatt tal-Programm u id-disseminazzjoni ta' riżultati. Huma jidentifikaw u janalizzaw opportunitajiet u problemi emerġenti (e.g. fiduċja, immarkar tal-kwalità, drittijiet ta' proprjetà intellettwali fl-edukazzjoni) u jipproponu soluzzjonijiet, kif ikun meħtieġ.

ANNESS II

IL-MEZZI GĦALL-IMPLIMENTAZZJONI TAL-PROGRAMM

1.	Il-Kummissjoni timplimenta l-Programm skond il-kontenut tekniku speċifikat fl-Anness I.

Il-Programm jiġi mwettaq permezz ta' azzjoni indiretta li tinkludi:

(a)

azzjonijiet bi spejjeż maqsuma

(i)

Progetti mfassla biex jiżdied it-tagħrif sabiex jittejjbu l-prodotti, proċessi u/jew servizzi eżistenti u/jew jintlaħqu l-ħtiġijiet ta' politika Komunitarja. Normalment, il-finanzjament Komunitarju ma jkunx aktar minn 50 % tal-kost tal-proġett. Il-korpi tas-settur pubbliku jistgħu jiġu rimborżati abbażi ta' 100 % ta' l-ispejjeż addizzjonali;

(ii)

Azzjonijiet ta' l-aħjar prattika biex jinfirex it-tagħrif. Normalment għandhom jitwettqu fi gruppi tematiċi u kollegati permezz ta' rettikolati tematiċi. Il-kontribuzzjoni Komunitarja għall-miżuri stabbiliti taħt dan il-punt tkun limitata għall-ispejjeż diretti meqjusa meħtieġa jew xierqa biex jintlaħqu għanjiet speċifiċi ta' l-azzjoni;

(iii)

Rettikolati tematiċi: rettikolati li jġibu flimkien varjetà ta' partijiet li għandhom interess madwar għan teknoloġiku u organizzattiv speċifiku, sabiex jiffaċilitaw attivitajiet ta' koordinazzjoni u t-trasferiment ta' tagħrif. Jistgħu jkunu kollegati ma' azzjonijiet ta' l-aħjar prattika. Jingħata sostenn għall-ispejjeż addizzjonali eliġibbli tal-koordinazzjoni u l-implimentazzjoni tar-rettikolat. Il-parteċipazzjoni Komunitarja tista' tkopri l-ispejjeż addizzjonali eliġibbli ta' dawn il-miżuri.

(b)

miżuri ta' akkompanjament

Miżuri ta' akkompanjament jikkontribwixxu għall-implimentazzjoni tal-Programm jew it-tħejjija ta' attivitajiet futuri. Miżuri ddedikati għall-kummerċjalizzazzjoni ta' prodotti, proċessi jew servizzi, attivitajiet ta' marketing u promozzjoni tal-bejgħ huma esklużi.

(i)	studji li jagħtu sostenn lill-Programm, inkluża t-tħejjija ta' attivitajiet futuri;

(ii)	skambju ta' informazzjoni, konferenzi, seminars, workshops jew laqgħat oħra u l-amministrazzjoni ta' attivitajiet miġbura;

(iii)

attivitajiet ta' disseminazzjoni, informazzjoni u komunikazzjoni.

3.	L-għażla ta' azzjonijiet bi spejjeż maqsuma tkun ibbażata fuq sejħiet għal proposti ppubblikati fuq is-sit ta' l-Internet tal-Kummissjoni skond id-dispożizzjonijiet finanzjarji fis-seħħ.

4.	Applikazzjonijiet għal sostenn Komunitarju għandhom jipprovdu, fejn xieraq, pjan finanzjarju li jelenka l-elementi kollha tal-finanzjament tal-proġetti, inklużi s-sostenn finanzjarju mitlub mill-Komunità, u kwalunkwe talba oħra għal jew għotjiet ta' sostenn minn għejjun oħra.

5.	Miżuri ta' akkompanjament jiġu implimentati permezz ta' sejħiet għall-offerti skond id-dispożizzjonijiet finanzjarji fis-seħħ.

DIKJARAZZJONI TAR-RAĠUNIJIET TAL-KUNSILL

I. INTRODUZZJONI

1.	Fit-13 ta' Frar 2004 il-Kummissjoni adottat il-proposta msemmija hawn fuq għal Deċiżjoni tal-Parlament Ewropew u l-Kunsill (1). Il-proposta hi bbażata fuq l-Artikolu 157(3) tat-Trattat.

2.	Il-Parlament Ewropew ta' l-Opinjoni tiegħu fit-22 ta' April 2004, il-Kumitat Ekonomiku u Soċjali fid-29 ta' April 2004 u l-Kumitat tar-Reġjuni rrinunzja milli jagħti Opinjoni.

3.	Il-Kummissjoni bagħtet il-proposta ememdata tagħha lill-Parlament Ewropew u l-Kunsill fl-4 ta' Mejju 2004.

4.	Fl-24 ta' Settembru 2004 il-Kunsill adotta l-pożizzjoni komuni tiegħu skond l-Artikolu 251 tat-Trattat.

II. GĦAN

L-għan ta' din il-proposta hu li toħloq kondizzjonijiet għall-aċċess iktar wiesá għal u użu tal- kontenut diġitali u fejn meħtieġ għal profit ekonomiku ikbar minn servizzi bbażati fuq aċċess u użu mill-ġdid ta' kontenut diġitali billi jsir kontribut sinifikanti għall-istrateġija eEurope f'setturi bħal tagħlim elettroniku, gvern elettroniku ecc. (programm suċċessiv għal programm eContent attwali li jiskadi fl-aħħar ta' 2004).

III. ANALIŻI TAL-POŻIZZJONI KOMUNI

Il-pożizzjoni komuni taqsam l-għan ġenerali tal-proposta sottomessa mill-Kummissjoni, kif ukoll, f'termini ġenerali, il-mezzi proposti biex jintlaħaq dak l-għan. Iżda, fil-kors tad-diskussjoni fi ħdan il-Kunsill, il-kliem fit-test tal-proposta ġie mibdul b'mod parzjali. Il-punti ewlenin tal-pożizzjoni komuni li huma differenti mill-proposta tal-Kummissjoni u l-emendi tal-Parlament Ewropew (ara punt IV hawn isfel) huma kif ġej:

Wara li ttieħed kont tad-daqs tal-proġetti previsti fil-proposta, il-Kunsill ikkunsidra xieraq li jagħmel referenza għal SMEs u l-attenzjoni partikolari li għandha tingħata lill-parteċipazzjoni tagħhom (Reċiti 5 u 6 kif ukoll l-Anness I.II.A). Barra minn hekk, referenza għal nies bi bżonnijiet speċjali kienet miżjuda għar-Reċita 5 u l-Anness I.I.

2.	Il-pożizzjoni komuni timmodifika l-Artikolu 3 billi żżid paragrafu ġdid li jispeċifika l-konsistenza u kumplimentarjetà tal-programm ma' politiki, programmi u azzjonijiet rilevanti oħra tal-Komunità.

Il-Kunsill jikkunsidra li fl-implimentazzjoni tal-programm, il-Kummissjoni għandha taħdem f'koperazzjoni stretta ma' l-Istati Membri u tiżgura t-trasparenza. B'hekk il-pożizzjoni komuni mmodifikat l-Artikoli 3 u 4 safejn il-komitoloġija hi konċernata favur proċedura ta' amministrazzjoni. Dawn il-bidliet huma ċċarati iktar fir-Reċita 14.

Safejn il-qafas finanzjarju (Artikolu 6) tal-programm hu konċernat, il-pożizzjoni komuni tnaqqas l-ammont totali propost mill-Kummissjoni. Il-Kummissjoni kienet proponiet żieda sostanzjali tal-budget mill-programm attwali u, waqt li l-Istati Membri kollha rrikonoxxew l-importanza tal-programm, żieda inqas ġiet kkunsidrata xierqa. Skond leġislazzjoni oħra klawżola ta' rexissjoni ġiet inserita biex tinżamm dixxiplina tal-budget hekk kif il-programm jestendi lil hinn mill-perspettiva finanzjarja attwali.

5.	Il-pożizzjoni komuni timmodifika wkoll analiżi statistika ta' l-infiq indikattiva fl-Anness III. Il-Kunsill jikkonsidra xieraq li jagħti iktar impetu dwar linja ta' Azzjoni 1.

IV. EMENDI TAL-PARLAMENT EWROPEW

1. L-emendi tal-Parlament Ewropew aċċettati mill-Kummissjoni u adottati mill-Kunsill

—	Emenda 1 ġie nkorporat fil-pożizzjoni komuni bħal reċita 6 b'żieda mill-Kunsill dwar l-SMEs.

—	L-Emenda 2 ġie nkorporat fl-Artikolu 1(1).

—

L-Emendi 3, 4 u 5 ġew nkorporati fl-Artikolu 1 (2) tal-pożizzjoni komuni ħlief ir-referenza għal 'oqsma għal interess pubbliku' li l-Kunsill ikkunsidra li diġà kienu koperti fil-paragrafu 1 ta' l-istess artikolu. Barra minn hekk, il-Kunsill żamm ir-referenza għal 'kuxjenza' fil-paragrafu 2, li jikkunsidra importanti. Dan hu validu wkoll għall-emendi relatati 11, 12, 13, 14 u 16 li l-Kunsill inkorpora fl-Annessi I u III.

—	Il-Kunsill inkorpora l-emendi 6 u 7 fl-Artikolu 5 tal-pożizzjoni komuni tiegħu, għalkemm fi kliem li reġa' ġie kemmxejn abbozzat għall-emenda 6.

—	L-emendi 8, 9 u 10 ġew inkorporati kollha fl-Artikolu 6 tal-pożizzjoni komuni ħlief għall-ammont totali tal-qafas finanzjarju, li l-Kunsill biddel skond ir-raġunijiet li ngħataw fuq.

2. L-emendi tal-Parlament Ewropew aċċettati mill-Kummissjoni iżda mhux adottati mill-Kunsill

—	Il-Kunsill ma adottax l-emenda 15 għax iħoss li l-bini ta' kuxjenza hu parti importanti tal-programm.

(1) ĠU C 98, 23.4.2004, p. 39.