Proposta għal DEĊIŻJONI TAL-KUNSILL li temenda r-Regolament (KE) 998/2003 biex iqis l-adeżjoni ta' Malta

(preżentata mill-Kummissjoni)

MEMORANDUM TA' SPJEGAZZJONI

Ċerti atti adottati mill-Unjoni Ewropea jeħtieġu adattament minħabba l-Adeżjoni, u li għall-adattamenti neċessarji ma sarux provvedimenti fl-Att ta' Adeżjoni.

Ir-Regolament (KE) Nru 998/2003 hu wieħed minn dawn l-atti u jistabbilixxi kundizzjonijiet veterinarji applikabbli għal spostament mhux kummerċjali ta' klieb, qtates u inmsa domestiċi.

Il-gżira ta' Malta baqgħet iżżomm sistema ta' 6 xhur kwarantina għal speċi kompatibbli importati sal-ġurnata ta' llum, iżda bħala Stat Membru ġdid li ngħaqad mal-Komunità Ewropea, se jkollha tabbanduna din is-sistema biex minflok iddaħħal u timplimenta r-Regolament (KE) Nru 998/2003 b'effett mit-3 ta' Lulju 2004.

Fin-negozjati tat-tkabbir, Malta sostniet li bħala gżira bi status ta' saħħa ħieles mir- rabja bħal dak ta' l-Isvezja, l-Irlanda u r-Renju Unit, Malta għandha tiġi ttrattata fl-istess kategorija bħal dawn it-tliet Stati Membri u din il-pożizzjoni kienet aċċettata fil-Kunsill fil-proċess tan-negozjati ma' l-Istati Membri kollha.

Ir-Regolament (KE) Nru 998/2003 jaqsam l-Istati Membri f'żewġ kategoriji skond l-istorja tal-kontrolli tagħhom kontra r-rabja, u lill-Isvezja, l-Irlanda u r-Renju Unit ippermettielhom perjodu ta' transizzjoni ta' ħames snin għall-kontrolli fuq klieb, qtates u inmsa li jkunu deħlin fit-territorju tagħhom.

Għalhekk Malta għandha tiżdied fil-lista kurrenti tat-tliet Stati Membri - l-Isvezja, l-Irlanda u r-Renju Unit, li ngħataw perjodu ta' transizzjoni bis-saħħa ta' dan ir-Regolament; matul dan il-perjodu l-istess miżuri li japplikaw għal spostamenti lejn dawn it-tliet Stati Membri fir-rigward ta' spostamenti mhux kummerċjali ta' klieb, qtates u inmsa domestiċi, għandhom japplikaw għal spostamenti lejn f'Malta.

Ir-Regolament (KE) Nru 998/2003 għandu jiġi emendat f'dan is-sens.

Proposta għal DEĊIŻJONI TAL-KUNSILL li temenda r-Regolament (KE) 998/2003 biex iqis l-adeżjoni ta' Malta (Test b'relevanza għall-EEA)

IL-KUNSILL TA' L-UNJONI EWROPEA,

Konformi mat-Trattat li jistabbilixxi l-Komunità Ewropea,

Konformi ma' l-Att ta' l-Adeżjoni tar-Repubblika Ċeka, l-Estonja, Ċipru, il-Latvja, il-Litwanja, l-Ungerija, Malta, il-Polonja, is-Slovenja u s-Slovakkja [1], u b'mod partikulari, Artikolu 57 ta' dan,

[1] OJ L 236, 23.9.2003, p. 33.

Billi:

(1) Għal ċerti atti adottati mill-Unjoni Ewropea, li jibqgħu validi wara l-1 ta' Mejju 2004, u li jeħtieġu adattament minħabba l-adeżjoni, l-adattamenti neċessarji ma sarux provvedimenti għalihom fl-Att ta' l-Adeżjoni, b'mod partikulari f'Anness II ta' dan.

(2) Ir-Regolament (KE) Nru 998/2003 [2] jistabbilixxi kundizzjonijiet veterinarji li japplikaw għal spostamenti mhux kummerċjali ta' klieb, qtates u inmsa domestiċi, u hu wieħed minn dawn l-atti li jrid jiġi adattat.

[2] OJ L 146, 13.6.2003, p. 1. Ir-Regolament kif emendat l-aħħar mir-Regolament tal-Kummissjoni (KE) Nru 592/2004 (OJ L 94, 31.3.2004, p. 7).

(3) Malta baqgħet iżżomm sistema ta' 6 xhur kwarantina għall-ispeċi kkonċernati importati sal-ġurnata ta' llum, iżda għandha tabbanduna din is-sistema biex minflok iddaħħal u timplimenta r-Regolament (KE) Nru 998/2003 b'effett mit-3 ta' Lulju 2004.

(4) Fil-proċess tan-negozjati tat-tkabbir kien aċċettat li peress li Malta hija gżira bi status ta' saħħa ħieles mir-rabja bħal dak ta' l-Irlanda, ir-Renju Unit u l-Isvezja, għandha tiġi ttrattata fl-istess kategorija bħal dawn it-tliet Stati Membri.

(5) Ir-Regolament (KE) Nru 998/2003 jaqsam l-Istati Membri f'żewġ kategoriji skond l-istorja tal-kontrolli tagħhom kontra r-rabja, u jagħti lill-Isvezja, l-Irlanda u r-Renju Unit perjodu ta' transizzjoni ta' ħames snin għal kontrolli fuq klieb, qtates u inmsa li jkunu deħlin fit-territorju tagħhom.

(6) Għalhekk Malta għandha tiżdied fil-lista ta' Stati Membri li ngħataw perjodu ta' transizzjoni bis-saħħa ta' dan ir-Regolament.

(7) Ir-Regolament (KE) Nru 998/2003 għandu jiġi emendat f'dan is-sens.

ADOTTA DIN ID-DEĊIŻJONI:

Artikolu 1

Ir-Regolament (KE) Nru 998/2003 dwar ir-rekwiżiti ta' saħħet l-annimali applikabbli għal spostament mhux kummerċjali ta' annimali domestiċi u li jemenda d-Direttiva tal-Kunsill 92/65/KEE hu emendat kif ġej:

1. F'Artikolu 6.1 l-ewwel sentenza tar-Regolament (KE) Nru 998/2003 il-kelma "Malta," tiżdied wara l-kelma "Irlanda".

2. F'Artikolu 6.1 it-tielet paragrafu l-kliem "dawn it-tliet Stati Membri" jiġu sostitwiti bil-kliem "dawn l-erba' Stati Membri".

3. F'Anness II parti A fil-lista ta' pajjiżi u territorji, il-kelma "Malta," tiżdied wara "l-Irlanda".

Artikolu 2

Din id-Deċiżjoni għandha tidħol fis-seħħ 20 jum wara d-data tal-pubblikazzjoni fil-Ġurnal Uffiċjali ta' l-Unjoni Ewropea.

Artikolu 3

Din id-Deċiżjoni hija indirizzata lill-Istati Membri.

Magħmula fi Brussell,

Għall-Kunsill

Il-President