(1)

Sabiex jitkejjel il-livell adegwat ta’ likwidità li d-ditti tal-investiment għandhom iżommu, huwa meħtieġ li jiġu stabbiliti kriterji komuni biex jiġu stmati l-ħtiġijiet ta’ likwidità korrispondenti f’ċirkostanzi normali u ta’ stress, u biex jiġi ddeterminat jekk hemmx xi lakuni bejn il-livell ta’ assi likwidi miżmuma mid-ditti tal-investiment u l-ħtiġijiet ta’ likwidità identifikati.

(2)

Id-ditti tal-investiment li jissodisfaw il-kundizzjonijiet biex jikkwalifikaw bħala ditti tal-investiment żgħar u mhux interkonnessi stabbiliti fl-Artikolu 12(1) tar-Regolament (UE) 2019/2033 (2) jitqiesu li għandhom biss riskju limitat ta’ likwidità meta mqabbel ma’ ditti tal-investiment oħrajn. Huwa għalhekk li l-awtoritajiet kompetenti, skont it-tieni subparagrafu tal-Artikolu 43(1) tar-Regolament (UE) 2019/2033, jistgħu jeżentaw tali ditti tal-investiment mir-rekwiżit ta’ likwidità stabbilit fl-ewwel subparagrafu tal-Artikolu 43(1) ta’ dak ir-Regolament. Madankollu, din l-eżenzjoni hija fakultattiva. Sabiex jiġu koperti ditti tal-investiment żgħar u mhux interkonnessi li ma jkunux ġew eżentati mill-awtorità kompetenti tagħhom minn dak ir-rekwiżit ta’ likwidità, ikun sproporzjonat li dawk id-ditti tal-investiment jiġu soġġetti għall-istess rekwiżiti ta’ likwidità bħad-ditti tal-investiment akbar u interkonnessi. Għalhekk huwa xieraq li jiġi stabbilit li l-awtoritajiet kompetenti, meta jkejlu r-riskju tal-likwidità u l-elementi tar-riskju tal-likwidità msemmija fil-punt (a) tal-ewwel subparagrafu tal-Artikolu 42(1) tad-Direttiva (UE) 2019/2034, jenħtieġ li jkejlu biss ir-riskju tal-likwidità jew l-elementi tar-riskju tal-likwidità li jirriżultaw minn dawk l-attivitajiet u minn fatturi oħra, speċifiċi għal ditti tal-investiment żgħar u mhux interkonnessi, li x’aktarx iwasslu għal riskju ta’ likwidità li jkun materjali u li mhuwiex kopert mir-rekwiżiti tal-likwidità stabbiliti fil-Parti Ħamsa tar-Regolament (UE) 2019/2033. Dawk il-fatturi jinkludu attivitajiet ta’ forniment ta’ ġestjoni tal-portafoll, it-tħaddim ta’ faċilità multilaterali tan-negozjar kif definit fil-punt (22) tal-Artikolu 4 tad-Direttiva 2014/65/UE tal-Parlament Ewropew u tal-Kunsill (3) jew faċilità organizzata tan-negozjar kif definita fil-punt (23) tal-Artikolu 4 ta’ dik id-Direttiva, l-għoti ta’ krediti u self lill-investituri, kif ukoll ir-riskju ta’ finanzjament, u r-rilevanza tal-istruttura tal-grupp għar-riskju tal-likwidità.

(3)

L-Artikolu 7(3) tar-Regolament (UE) 2019/2033 jirrikjedi li d-ditti tal-investiment prinċipali tal-Unjoni, il-kumpaniji azzjonarji ta’ investiment prinċipali tal-Unjoni u l-kumpaniji azzjonarji finanzjarji mħallta prinċipali tal-Unjoni jikkonformaw mar-rekwiżiti ta’ likwidità stabbiliti fil-Parti Ħamsa ta’ dak ir-Regolament fil-livell konsolidat. Ditta tal-investiment omm tal-Unjoni, kumpanija azzjonarja ta’ investiment omm tal-Unjoni u kumpanija azzjonarja finanzjarja mħallta omm tal-Unjoni jistgħu jkunu esposti, f’sitwazzjoni konsolidata, għal riskju ta’ likwidità jew għal elementi ta’ riskju ta’ likwidità li huma materjali u li mhumiex koperti jew mhumiex koperti biżżejjed minn dawk ir-rekwiżiti ta’ likwidità. Bl-istess mod, ditta tal-investiment omm tal-Unjoni, kumpanija azzjonarja ta’ investiment omm tal-Unjoni u kumpanija azzjonarja finanzjarja mħallta omm tal-Unjoni jistgħu ma jissodisfawx, f’sitwazzjoni konsolidata, ir-rekwiżiti stabbiliti fl-Artikoli 24 u 26 tad-Direttiva (UE) 2019/2034, filwaqt li miżuri amministrattivi oħra x’aktarx li ma jtejbux biżżejjed l-arranġamenti, il-proċessi, il-mekkaniżmi u l-istrateġiji msemmija fil-punt (b) tal-Artikolu 42(1) tad-Direttiva (UE) 2019/2034 f’perjodu ta’ żmien xieraq. Għalhekk, jenħtieġ li l-awtoritajiet kompetenti, għal tali ditti tal-investiment omm tal-Unjoni, kumpaniji azzjonarji ta’ investiment omm tal-Unjoni u kumpaniji azzjonarji finanzjarji mħallta omm tal-Unjoni, ikejlu fuq bażi konsolidata jekk l-iskopertura ta’ dawk id-ditti u l-kumpaniji għar-riskju tal-likwidità hijiex materjali u mhux koperta mir-rekwiżiti ta’ likwidità stabbiliti fil-Parti Ħamsa tar-Regolament (UE) 2019/2033.

(4)

Attivitajiet differenti tad-ditti tal-investiment jistgħu jaffettwaw il-profil tal-likwidità tagħhom b’modi differenti. Il-bidliet fil-valur tal-prezzijiet tal-assi jistgħu jiġġeneraw telf u jaffettwaw il-karti bilanċjali u l-pożizzjoni tal-likwidità tad-ditti tal-investiment, minkejja li dawk id-ditti ma jżommux l-assi tal-klijenti f’isimhom stess. Id-ditti tal-investiment li jipprovdu servizzi ta’ ġestjoni tal-portafoll jistgħu jkunu sensittivi għall-fluttwazzjonijiet tas-suq li jistgħu joħolqu jew itejbu d-diskrepanzi fil-fluss tal-flus bejn il-flussi ta’ dħul minn pagamenti ta’ tariffi tipikament riċevuti fuq bażi trimestrali jew semiannwali u flussi ta’ ħruġ għall-ħlas ta’ obbligazzjonijiet hekk kif isiru dovuti. Għalhekk huwa xieraq li għal kull servizz jew attività ta’ investiment elenkati fit-Taqsima A tal-Anness I għad-Direttiva 2014/65/UE jiġu speċifikati l-kriterji li l-awtoritajiet kompetenti għandhom jikkunsidraw meta jkejlu jekk ir-riskju tal-likwidità jew l-elementi tar-riskju tal-likwidità ta’ ditta tal-investiment humiex koperti biżżejjed mir-rekwiżit tal-likwidità stabbilit fil-Parti Ħamsa tar-Regolament (UE) 2019/2033. L-awtoritajiet kompetenti jenħtieġ li b’mod partikolari jkunu meħtieġa jikkunsidraw dawk is-servizzi jew l-attivitajiet ta’ investiment li huma l-aktar sensittivi għall-fluttwazzjonijiet tas-suq minħabba li tali fluttwazzjonijiet huma imprevedibbli kemm fiż-żmien kif ukoll fl-iskala, u jistgħu jaffettwaw ir-riskju tal-likwidità b’modi differenti, inklużi sejħiet għal marġni ogħla, profitti aktar baxxi u tariffi mnaqqsa.

(5)

Id-ditti tal-investiment li huma awtorizzati jagħtu krediti jew self lill-investituri bħala servizz anċillari huma esposti għal riskju speċifiku tal-likwidità. Ir-ripagament tard tad-djun mill-investituri jista’ jfixkel il-kapaċità ta’ ditta tal-investiment li tissodisfa l-obbligi tagħha, filwaqt li l-likwidazzjoni ta’ kollaterali bi profil ta’ likwidità deterjorat tista’ tirriżulta f’inqas assi likwidi biex jiġu skjerati fuq operazzjonijiet ordinarji. Għalhekk, jenħtieġ li l-awtoritajiet kompetenti jivvalutaw ir-riskju akbar għad-ditti tal-investiment li jwettqu tali servizzi.

(6)

Il-finanzjament huwa sors primarju ta’ likwidità għad-ditti tal-investiment, u l-aċċess limitat jew sospiż għall-finanzjament jista’ jirriżulta fit-twaqqif tas-servizzi tad-ditti tal-investiment, b’impatt negattiv potenzjali fuq is-swieq u l-klijenti. Meta jitqiesu d-differenzi bejn il-finanzjament tad-ditti tal-investiment u l-finanzjament tal-istituzzjonijiet ta’ kreditu li jieħdu d-depożiti, u meta jitqies li l-aċċess għall-finanzjament minn tali ditti tal-investiment jista’ jinvolvi riskji f’ċerti ċirkostanzi, huwa meħtieġ li jiġu speċifikati l-elementi li l-awtoritajiet kompetenti għandhom iqisu meta jistabbilixxu rekwiżiti speċifiċi tal-likwidità għal tali ditti tal-investiment.

(7)

Id-deterjorament tas-sitwazzjonijiet makroekonomiċi u ġeopolitiċi jista’ jwassal biex id-ditti tal-investiment jiffaċċjaw restrizzjonijiet severi fl-aċċess għall-finanzjament. Għalhekk, jenħtieġ li l-awtoritajiet kompetenti jivvalutaw il-konsegwenzi li tali deterjorament jista’ jkollu fuq is-sorsi ta’ finanzjament tad-ditti tal-investiment, inkluż il-finanzjament bl-ingrossa u l-linji ta’ kreditu. F’dan l-isfond, huwa meħtieġ li jiġu speċifikati l-elementi li l-awtoritajiet kompetenti jeħtieġ li jivvalutaw fir-rigward ta’ avvenimenti esterni avversi, li l-okkorrenza tagħhom tista’ żżid ir-riskju tal-likwidità tad-ditti tal-investiment.

(8)

Sabiex l-awtoritajiet kompetenti jkunu jistgħu jiddeterminaw liema avvenimenti operazzjonali jista’ jkollhom impatt materjali fuq il-likwidità tad-ditti tal-investiment, huwa meħtieġ li jiġu speċifikati l-avvenimenti operazzjonali li huma mistennija li jkunu l-aktar rilevanti għad-ditti tal-investiment bħala subsett tal-lista tat-tipi ta’ avvenimenti ta’ telf imsemmija fl-Artikolu 324 tar-Regolament (UE) Nru 575/2013 (4).

(9)

Riskju akbar ta’ likwidità jista’ jirriżulta minn riskju għar-reputazzjoni, li min-naħa tiegħu jista’ jaffettwa l-operazzjonijiet tad-ditti tal-investiment. Filwaqt li xi effetti tar-riskju għar-reputazzjoni mhumiex faċilment prevedibbli, oħrajn bħal aċċess imnaqqas għas-suq jew aċċess għal-likwidità mill-kontropartijiet jistgħu jiġu antiċipati. Għalhekk, jenħtieġ li l-awtoritajiet kompetenti jivvalutaw l-impatt ta’ tali effetti prevedibbli tar-riskju għar-reputazzjoni fuq ir-riskju tal-likwidità tad-ditti tal-investiment.

(10)

Minħabba l-impatt potenzjali tar-riskju tal-likwidità fuq il-funzjonament ta’ ditta tal-investiment, id-ditti tal-investiment għandhom jimmonitorjaw mill-qrib dan ir-riskju. F’konformità mal-Artikolu 29 tad-Direttiva (UE) 2019/2034, id-ditti tal-investiment għandu jkollhom fis-seħħ strateġiji, politiki u proċessi robusti, inkluż il-monitoraġġ tar-riskju tal-likwidità u l-konfrontazzjoni tan-nuqqas ta’ likwidità. Huwa għalhekk meħtieġ li jiġi speċifikat liema awtoritajiet kompetenti għandhom jivvalutaw biex jevalwaw l-effettività tal-ġestjoni tar-riskju tal-likwidità u l-kontroll tad-ditti tal-investiment.

(11)

Billi grupp jista’ jipprovdi likwidità addizzjonali lil ditta tal-investiment, tali grupp jista’ juża wkoll riżorsi likwidi sinifikanti li jappartjenu lid-ditta tal-investiment permezz ta’ ftehimiet u mekkaniżmi oħra tat-trasferiment tal-assi bejn id-ditta tal-investiment, minn naħa waħda, u l-impriża prinċipali jew kwalunkwe entità oħra tal-grupp, min-naħa l-oħra. Għalhekk, l-awtoritajiet kompetenti għandhom ikunu meħtieġa jivvalutaw l-istruttura ġenerali tal-grupp u jikkunsidraw l-implikazzjonijiet li tali ftehimiet u mekkaniżmi oħra ta’ trasferiment ta’ assi jista’ jkollhom fuq ir-riskju tal-likwidità tad-ditti tal-investiment li huma parti minn tali grupp.

(12)

Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea.

(13)

L-Awtorità Bankarja Ewropea wettqet konsultazzjonijiet pubbliċi miftuħin dwar l-abbozz tal-istandards tekniċi regolatorji li dan ir-Regolament huwa bbażat fuqhom, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit bl-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (5),

(a)

id-disponibbiltà ta’ sorsi ta’ finanzjament eżistenti u l-aċċess għal sorsi ta’ finanzjament ta’ emerġenza rranġati minn qabel;

(b)

jekk tali sorsi ta’ finanzjament humiex garantiti jew le;

(c)

il-munita ta’ tali sorsi ta’ finanzjament;

(d)

l-ammont ta’ assi mhux gravati li jkunu disponibbli biex jinkiseb finanzjament garantit;

(e)

il-maturitajiet differenti ta’ tali sorsi ta’ finanzjament skont l-eqreb data ta’ maturità tagħhom u l-eqreb data li jistgħu jintalbu kuntrattwalment;

(f)

ir-riskju ta’ tfixkil fil-flussi tal-flus ta’ kuljum tad-ditta tal-investiment ikkawżat minn interruzzjoni fil-faċilitajiet ta’ kreditu tad-ditta tal-investiment;

(g)

sorsi oħra ta’ finanzjament impenjati iżda mhux prelevati pprovduti lid-ditta tal-investiment.

(a)

in-nuqqas ta’ disponibbiltà tas-sistemi tad-ditta tal-investiment użati għall-aċċess għas-suq jew għas-sorsi ta’ finanzjament;

(b)

interruzzjoni ta’ servizzi ta’ kustodji u korrispondenti ta’ flus kontanti;

(c)

frodi esterni jew interni;

(d)

kumpensi u talbiet relatati ma’ żbalji fl-eżekuzzjoni tal-ordnijiet.

(a)

l-aċċess għas-suq tad-ditta tal-investiment jitnaqqas;

(b)

is-sorsi ta’ finanzjament tad-ditta tal-investiment jitnaqqsu mill-kontropartijiet tagħha;

(c)

il-kontropartijiet tas-suq inaqqsu l-iskoperturi tagħhom għad-ditta tal-investiment f’operazzjonijiet barra l-Borża.

(a)

is-sistemi għall-kejl, il-ġestjoni u r-rappurtar tar-riskju tal-likwidità u l-qafas ta’ governanza tad-ditta tal-investiment, inkluża l-adegwatezza tal-funzjoni tal-ġestjoni tar-riskju tagħha;

(b)

kwalunkwe azzjoni ta’ mitigazzjoni, inkluż it-tnaqqis tal-attivitajiet tad-ditta tal-investiment li jeħtieġu flussi kbar ta’ ħruġ ta’ flus, l-istabbiliment tal-linji ta’ kreditu tagħha, iż-żieda fil-kapital tagħha fi flus kontanti u l-użu tagħha ta’ assi bħala kollateral fi tranżazzjonijiet repo;

(c)

ir-robustezza tal-pjan ta’ rkupru tad-ditta tal-investiment, fejn japplika l-obbligu li jitfassal u jinżamm pjan ta’ rkupru skont l-Artikolu 5(1) tad-Direttiva 2014/59/UE tal-Parlament Ewropew u tal-Kunsill (6).