27.7.2023 |
MT |
Il-Ġurnal Uffiċjali tal-Unjoni Ewropea |
L 188/28 |
REGOLAMENT TA’ IMPLIMENTAZZJONI TAL-KUMMISSJONI (UE) 2023/1547
tas-26 ta’ Lulju 2023
li jdaħħal isem fir-reġistru ta’ denominazzjonijiet ta’ oriġini protetti u indikazzjonijiet ġeografiċi protetti (“Gower Salt Marsh Lamb” (DOP))
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) Nru 1151/2012 tal-Parlament Ewropew u tal-Kunsill tal-21 ta’ Novembru 2012 dwar skemi tal-kwalità għal prodotti agrikoli u oġġetti tal-ikel (1), u b’mod partikolari l-Artikolu 52(3)(b) tiegħu,
Billi:
(1) |
F’konformità mal-Artikolu 50(2)(a) tar-Regolament (UE) Nru 1151/2012, l-applikazzjoni tar-Renju Unit biex jirreġistra l-isem “Gower Salt Marsh Lamb” bħala Denominazzjoni ta’ Oriġini Protetta ġiet ippubblikata f’Il-Ġurnal Uffiċjali tal-Unjoni Ewropea (2). |
(2) |
Fit-8 ta’ Marzu 2022, il-Kummissjoni rċeviet avviż ta’ oppożizzjoni minn Franza. Il-Kummissjoni għaddiet l-avviż ta’ oppożizzjoni lir-Renju Unit fl-10 ta’ Marzu 2022. Fis-6 ta’ Mejju 2022, Franza ppreżentat dikjarazzjoni motivata ta’ oppożizzjoni lill-Kummissjoni. |
(3) |
Wara li eżaminat id-dikjarazzjoni motivata tal-oppożizzjoni u sabet li hija ammissibbli, f’konformità mal-Artikolu 51(3) tar-Regolament (UE) Nru 1151/2012, il-Kummissjoni stiednet lir-Renju Unit u lil Franza, permezz ta’ ittra datata t-30 ta’ Ġunju 2022, biex jipparteċipaw f’konsultazzjonijiet xierqa bil-ħsieb li jintlaħaq ftehim. |
(4) |
Fit-28 ta’ Settembru 2022, fuq talba tar-Renju Unit, il-Kummissjoni estendiet l-iskadenza għall-konsultazzjonijiet b’xahar. Il-konsultazzjonijiet bejn ir-Renju Unit u Franza ntemmu mingħajr ma ntlaħaq ftehim. |
(5) |
Għaldaqstant, jenħtieġ li l-Kummissjoni tieħu deċiżjoni dwar ir-reġistrazzjoni f’konformità mal-proċedura prevista fl-Artikolu 52(3)(b) tar-Regolament (UE) Nru 1151/2012, filwaqt li tqis ir-riżultati ta’ dawn il-konsultazzjonijiet. |
(6) |
L-argumenti ewlenin ta’ Franza kif stabbiliti fid-dikjarazzjoni motivata tal-oppożizzjoni u fil-konsultazzjonijiet li saru mar-Renju Unit jistgħu jitqassru kif ġej. |
(7) |
Franza sostniet li jenħtieġ li jiġi speċifikat, kif meħtieġ mill-Artikolu 7(1)(e) tar-Regolament (UE) Nru 1151/2012, jekk l-iffriżar tal-laħam huwiex awtorizzat. L-opponent iddikjara li jekk l-iffriżar ikun permess, dan jista’ jiddestabbilizza s-suq taż-żewġ DOP Franċiżi “Prés-salés de la baie de Somme” u “Prés-salés du Mont-Saint-Michel” li huma disponibbli fis-suq biss minn Lulju sa Novembru, u jwassal għal kompetizzjoni inġusta. L-ispeċifikazzjonijiet ta’ dawn il-prodotti jipprojbixxu l-iffriżar u t-taħlil tal-laħam. |
(8) |
Barra minn hekk, l-opponent iddikjara li d-dispożizzjonijiet li jiddefinixxu l-marġi salmastri li huma previsti fl-Ispeċifikazzjoni tal-Prodott jenħtieġ li jiżdiedu mad-Dokument Uniku meta jitqies li r-rabta bejn il-prodott iddikjarat bħala DOP u ż-żona ġeografika demarkata teħtieġ li tiġi definita fid-dokument uniku skont l-Artikolu 8(1)(c)(ii) tar-Regolament (UE) Nru 1151/2012. |
(9) |
Ir-Renju Unit speċifika li preferibbilment il-laħam għandu jinbiegħ u jittiekel frisk, għalkemm il-laħam jista’ jiġi ffriżat. Ladarba l-laħam ikun iffriżat, il-laħam irid jinbiegħ iffriżat. L-Ispeċifikazzjoni tal-Prodott kif ukoll tad-Dokument Uniku ġew emendati skont dan. |
(10) |
Ir-Renju Unit inkluda wkoll il-mapep u l-koordinati tal-GPS li jiddemarkaw il-marġi salmastri għad-Dokument Uniku. |
(11) |
Franza qieset dawk l-emendi bħala insuffiċjenti biex jissodisfaw it-talbiet tagħha u talbet aktar kjarifiki dwar il-perjodu li matulu l-prodott ikun disponibbli ffriżat fis-suq. Fir-rigward tad-definizzjoni ta’ marġi salmastri, talbet l-inklużjoni ta’ ċerti partijiet tal-Ispeċifikazzjoni tal-Prodott fid-Dokument Uniku b’mod partikolari d-definizzjoni dettaljata ta’ “marġ salmastru” u r-rekwiżiti speċifiċi relatati. |
(12) |
Il-Kummissjoni vvalutat l-argumenti esposti fid-dikjarazzjoni motivata ta’ oppożizzjoni minn Franza fid-dawl tad-dispożizzjonijiet tar-Regolament (UE) Nru 1151/2012, filwaqt li qieset ir-riżultati tal-konsultazzjonijiet xierqa mwettqa bejn l-applikant u l-avversarju u waslet għall-konklużjonijiet li ġejjin. |
(13) |
Fir-rigward tal-allegat nuqqas ta’ konformità tal-applikazzjoni tad-DOP mal-kundizzjonijiet stabbiliti fl-Artikolu 7(1)(e) tar-Regolament (UE) Nru 1151/2012, l-iffriżar tal-laħam fih innifsu mhuwiex metodu biex jinkiseb il-prodott. L-Artikolu 7(1)(e) tar-Regolament (UE) Nru 1151/2012 ma jeħtieġx l-inklużjoni ta’ regola speċifika dwar il-possibbiltà li l-laħam jiġi ffriżat, u lanqas il-perjodu li matulu l-prodott jista’ jinbiegħ iffriżat. Jitħalla f’idejn l-applikant jekk idaħħalx regoli ta’ dak it-tip. Wara l-oppożizzjoni, l-applikant għażel li jippreċiża s-sistema tal-prodott iffriżat. Ir-regoli dwar l-iffriżar tal-prodott huma rilevanti għad-deskrizzjoni tal-prodott. Fid-dawl ta’ dan ta’ hawn fuq, jenħtieġ li l-kundizzjoni msemmija fl-Artikolu 7(1)(e) tar-Regolament (UE) Nru 1151/2012 titqies bħala ssodisfata. |
(14) |
Fir-rigward tal-pretensjoni dwar l-allegat nuqqas ta’ konformità mal-Artikolu 8(1)(c)(ii) tar-Regolament (UE) Nru 1151/2012, id-Dokument Uniku jiddeskrivi b’mod korrett u eżawrjenti “ir-rabta bejn il-prodott u l-ambjent ġeografiku jew l-oriġini ġeografika”. Il-karatteristiċi u l-kwalità tal-prodott huma influwenzati minn żewġ fatturi ewlenin li jinkludu d-dieta naturali tal-ħaruf li tikkonsisti fir-ragħa tal-veġetazzjoni unika tal-bwar salmastri li tinsab fil-kosta tat-Tramuntana ta’ Gower. Id-Dokument Uniku jkompli jispeċifika li fil-marġi salmastri tikber firxa ta’ pjanti alofitiċi partikolari għal dik iż-żona, iżda l-iżjed li jikbru huma komunitajiet ta’ pjanti tal-livelli tan-nofs u ta’ fuq tal-marġ, u hemm rappreżentanza qawwija taż-żewġ speċijiet elenkati fl-Anness 1 tad-Direttiva tal-Kunsill dwar il-ħabitats u l-Fawna u l-Flora Selvaġġa: il-Mergħat Salmastri Atlantiċi u Salicornia u speċijiet oħra annwali ta’ żoni bit-tajn u bir-ramel. Mappa u koordinati GPS li juru ż-żona koperta minn dawn il-marġi salmastri ġew inklużi wkoll fid-Dokument Uniku mill-applikant bi tweġiba għat-talba magħmula minn Franza. Id-Dokument Uniku huwa sommarju tal-Ispeċifikazzjoni tal-Prodott. L-elementi addizzjonali li l-opponent jitlob li jdaħħal mhumiex elementi essenzjali biex jinftiehem il-metodu ta’ produzzjoni. Fid-dawl ta’ dan ta’ hawn fuq, jenħtieġ li r-rekwiżiti tal-Artikolu 8(1)(c)(ii) tar-Regolament imsemmi jitqiesu bħala ssodisfati. |
(15) |
Fil-kuntest tal-konsultazzjonijiet bejn il-partijiet, kemm id-Dokument Uniku kif ukoll l-Ispeċifikazzjoni tal-Prodott ġew emendati. Minħabba li dawk l-emendi mhumiex meqjusa sostanzjali, b’konformità mal-Artikolu 51(4) tar-Regolament (UE) Nru 1151/2012, il-Kummissjoni ma rrepetietx l-iskrutinju tal-applikazzjoni u kkonkludiet li l-kundizzjonijiet għar-reġistrazzjoni huma ssodisfati. |
(16) |
Fid-dawl ta’ dan ta’ hawn fuq, jenħtieġ li d-denominazzjoni “Gower Salt Marsh Lamb” tiddaħħal fir-reġistru tad-denominazzjonijiet ta’ oriġini protetta u tal-indikazzjonijiet ġeografiċi protetti. Il-verżjoni konsolidata tad-Dokument Uniku jenħtieġ li tiġi ppubblikata għall-informazzjoni biss. |
(17) |
Il-miżuri previsti f’dan ir-Regolament huma f’konformità mal-opinjoni tal-Kumitat tal-Politika dwar il-Kwalità tal-Prodotti Agrikoli, |
ADOTTAT DAN IR-REGOLAMENT:
Artikolu 1
L-isem “Gower Salt Marsh Lamb” (DOP) huwa rreġistrat.
L-isem imsemmi fl-ewwel paragrafu jidentifika prodott tal-Klassi 1.1. Laħam frisk (u ġewwieni), kif speċifikat fl-Anness XI tar-Regolament ta’ Implimentazzjoni tal-Kummissjoni (UE) Nru 668/2014 (3).
Artikolu 2
Id-Dokument Uniku konsolidat huwa stipulat fl-Anness ta’ dan ir-Regolament.
Artikolu 3
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-26 ta’ Lulju 2023.
Għall-Kummissjoni
Il-President
Ursula VON DER LEYEN
(1) ĠU L 343, 14.12.2012, p. 1.
(2) ĠU C 492, 8.12.2021, p. 8.
(3) Ir-Regolament ta’ Implimentazzjoni tal-Kummissjoni (UE) Nru 668/2014 tat-13 ta’ Ġunju 2014 li jistabbilixxi regoli għall-applikazzjoni tar-Regolament (UE) Nru 1151/2012 tal-Parlament Ewropew u tal-Kunsill dwar skemi tal-kwalità għal prodotti agrikoli u oġġetti tal-ikel (ĠU L 179, 19.6.2014, p. 36).
ANNESS
DOKUMENT UNIKU
“Gower Salt Marsh Lamb”
Nru tal-UE: PDO-GB-02452 – 01.04.2019
DOP (X) IĠP ( )
1. Isem/ismijiet [tad-DOP jew tal-IĠP]
“Gower Salt Marsh Lamb”
2. Stat Membru jew Pajjiż Terz
Ir-Renju Unit
3. Deskrizzjoni tal-prodott agrikolu jew tal-oġġett tal-ikel
3.1. Tip ta’ prodott [bħal fl-Anness XI]
Klassi 1.1 Laħam frisk (u l-ġewwieni)
3.2. Deskrizzjoni tal-prodott li għalih japplika l-isem f’(1)
“Gower Salt Marsh Lamb” huwa ħaruf prim li jitwieled, jitrabba u jiġi skarnat fil-penisola ta’ Gower fin-Nofsinhar ta’ Wales. Il-karatteristiċi distintivi tal-laħam jinkisbu mill-ħxejjex uniċi u mill-ambjent singolari tal-marġ salmastru tal-kosta tat-Tramuntana ta’ Gower, fejn jirgħu l-ħrief.
“Gower Salt Marsh Lamb” huwa prodott naturali staġunali li jinsab għall-bejgħ minn Ġunju sa tmiem Diċembru. Ma hemmx restrizzjonijiet dwar liema razez (jew razez x) ta’ nagħaġ jintużaw għall-produzzjoni tal-“Gower Salt Marsh Lamb”. Iżda r-razez li huma l-iżjed addattati huma dawk l-iżjed b’saħħithom, eħfef u aktar aġli li jiffjorixxu fuq l-ikel tal-ħxejjex li jikbru fil-marġ salmastru.
Meta jinqatlu, il-ħrief għall-produzzjoni tal-“Gower Salt Marsh Lamb” ikollhom bejn erba’ u għaxar xhur. Il-ħrief kollha jridu jqattgħu mill-inqas xahrejn b’kollox, (u mill-inqas nofs ħajjithom) jirgħu fil-marġ salmastru, iżda xi wħud jitħallew sa tmien xhur jirgħu fil-marġ.
Il-ħrief jitrabbew fil-beraħ, u billi huma ħielsa li jirgħu fuq medda kbira ta’ art u fuq distanzi twal fil-marġ, jitilgħu b’saħħithom. Dan il-fatt jikkontribwixxi għall-karatteristiċi speċifiċi tal-“Gower Salt Marsh Lamb” billi l-ħrief jimmaturaw bil-mod, u b’hekk jintlaħaq l-aħjar bilanċ possibbli ta’ laħam bejn dgħif u xaħmi, flimkien ma’ “distribuzzjoni konsistenti ta’ għeruq irħamin ta’ xaħam tul il-fibri muskolari”. Il-ġogi tar-riġlejn huma ddefiniti tajjeb b’konformazzjoni tajba tal-muskoli, u l-laħam nej għandu kulur aħmar skur.
Meta jinqatlu l-ħrief tal-“Gower Salt Marsh Lamb”, il-piż mejjet tal-karkassi jkun bejn 16 u 23 kilogramma. Il-klassifikazzjoni EUROP tal-karkassi tal-“Gower Salt Marsh Lamb” hija tal-klassi ta’ xaħam 2L sa 3L u ta’ U sa O tal-klassi tal-konformazzjoni tal-muskoli, u l-biċċa l-kbira tal-ħrief huma kklassifikati R għall-konformazzjoni u 3L għax-xaħam.
Meta l-laħam jissajjar (skont kif deskritt minn bord indipendenti tal-analiżi sensorja) il-“Gower Salt Marsh Lamb” għandu togħma “ekwilibrata tenera, ħlejja u delikata ta’ ħaruf, bi ħjiel ta’ ħaxix, u kemxejn mielħa, u li tħalli togħma pjaċevoli ta’ ħaruf fil-ħalq”. Ix-xaħam (li hu mifrux tajjeb mal-laħam u jibqa’ jidher wara t-tisjir) huwa ta’ kulur il-krema u jirtab waqt it-tisjir, u ma jħallix togħma xaħmija fil-palat. Il-laħam tal-ħaruf għandu riħa ħlejja sottili u huwa sukkulenti u teneru”. Meta ġie vvalutat minn analista tal-konsistenza, il-“Gower Salt Marsh Lamb” instab li jżomm l-integrità tal-fibra muskolari u din tissarraf f'“sukkulenza mal-ewwel gidma”.
Il-“Gower Salt Marsh Lamb” jinbiegħ bħala karkassa sħiħa, inkella bħala qatgħat. Huwa l-aħjar meta jinbiegħ u jittiekel frisk, iżda jista’ wkoll jiġi ffriżat. Kull laħam li huwa ffriżat għandu jinbiegħ bħala ffriżat.
3.3. Għalf (għall-prodotti li joriġinaw mill-annimali biss) u materja prima (għall-prodotti pproċessati biss)
Il-foraġġ kollu, kemm dak li jirgħu l-annimali, kif ukoll dak li jinħażen, irid bilfors joriġina miż-żona ddefinita u l-intenzjoni hi li mija fil-mija tal-għalf jinkiseb minn hemm. Iżda f’ċirkostanzi eċċezzjonali, huwa permess li jintuża massimu ta’ 25 % fis-sena ta’ għalf niexef mixtri. Dan jiġi awditjat mir-rekords tar-ragħa u tal-ħażna u billi jinżamm djarju mill-produtturi, fejn jiġi rreġistrat l-għalf miżjud li jkun iddaħħal fl-azjenda agrikola mid-djarji li jżommu l-produtturi.
3.4. Passi speċifiċi tal-produzzjoni li jridu jsiru fiż-żona ġeografika ddefinita
Il-ħrief kollha tar-razza “Gower Salt Marsh Lamb” iridu jitwieldu, jitrabbew u jiġu skarnati fiż-żona ddefinita.
3.5. Regoli speċifiċi dwar it-tqattigħ, it-taħkik, l-ippakkjar, eċċ.
—
3.6. Regoli speċifiċi dwar it-tikkettar
—
4. Definizzjoni fil-qosor taż-żona ġeografika
Il-Penisola ta’ Gower
Il-Penisola ta’ Gower fin-Nofsinhar ta’ Wales kif inhi demarkata mill-konfini tal-kostitwenzi elettorali elenkati hawn taħt u kif jidhru fil-Mappa A:-
Il-Konfini tal-Kostitwenzi Elettorali tal-Penisola ta’ Gower |
Gorseinon, Llwchrwr, Gowerton, Dunvant, Killay, Upper Killay, Mumbles, Bishopston, Pennard, Llanrhidian Higher, Llanrhidian Lower, Ilston, Penrice, Reynoldstone, Port Eynon, Rhossili, Llangennith, Llanmadoc, Port Eynon, Rhossili, Llangennith, Llanmadoc, Cheriton |
Mappa A
Dehra tal-konfini tal-kostitwenzi elettorali tal-Penisola ta’ Gower
Il-Penisola ta’ Gower tinkludi l-marġi salmastri kostali fuq il-kosta tat-Tramuntana tal-penisola kif muri fil-Mappa B hawn taħt:
Mappa B
Dehra tal-marġi salmastri tat-Tramuntana ta’ Gower
Kif jidher mill-mappa ta’ hawn fuq, fit-totalità tagħhom, dawn il-marġi salmastri jkopru żona fil-Lvant ta’ Whitford Burrows lejn il-Loughor Bridge fuq l-A484. Din l-erja hija magħmula minn:
1) |
il-marġ salmastru ta’ Llanrhidian u Landimore — fil-Lvant ta’ Whitford Burrow sa Salt house Point
|
2) |
il-marġ salmastru ta’ Penclawdd u Crofty — minn Salthouse Point sal-Loughor Bridge
|
3) |
il-marġ salmastru ta’ CWM Ivy — kif muri bil-blu skur fuq il-Mappa B u l-Mappa C hawn taħt.
|
Mappa Ċ
Il-marġ salmastru ta’ Cwm Ivy
5. Rabta maż-żona ġeografika
Il-“Gower Salt Marsh Lamb” għandu reputazzjoni bħala prodott ta’ kwalità li jitwieled, jitrabba u jiġi skarnat fil-penisola ta’ Gower fin-Nofsinhar ta’ Wales. Huwa prodott naturali staġunali li jinsab għall-bejgħ minn Ġunju sa tmiem Diċembru.
Il-laħam tal-ħaruf jiġi prodott b’sistema ta’ trobbija estensiva tradizzjonali li permezz tagħha, il-karatteristiċi u l-kwalitajiet tal-prodott finali huma influwenzati miż-żewġ fatturi ewlenin li ġejjin:-
— |
Id-dieta naturali tal-ħrief, li tikkonsisti mir-ragħa fuq il-ħxejjex partikolari tal-marġ salmastru li jikbru tul il-kosta tat-Tramuntana ta’ Gower. |
— |
Il-bażi tal-għarfien u l-ħiliet tal-produtturi li żviluppat maż-żmien u li ilha relattivament l-istess għal bosta ġenerazzjonijiet. |
Dawn il-fatturi jikkostitwixxu rabta qawwija bejn iż-żona ġeografika u l-prodott finali, u jikkontribwixxu għat-togħma u għall-karatteristiċi partikolari tal-prodott.
Il-ħrief tal-“Gower Salt Marsh Lamb” iqattgħu mill-inqas xahrejn jirgħu fil-marġ salmastru mal-kosta tat-Tramuntana tal-penisola ta’ Gower, iżda xi wħud minnhom jitħallew jirgħu hemm anki sa tmien xhur. Dan il-marġ salmastru fih madwar 4 000 ettaru u jirrappreżenta daqs 22 % tar-riżorsa tal-marġ salmastru ta’ Wales.
Il-ħxejjex naturali tal-marġ salmastru evolvew permezz tal-kombinazzjoni tal-klima u t-tip ta’ ħamrija. Is-salinità u l-pH tal-ħamrija jinfluwenzaw it-tip uniku u d-distribuzzjoni tal-ħxejjex. Il-marġ salmastru huwa aċiduż minnu, u l-pH tipiku tiegħu huwa ta’ 4. Karatteristika partikolari tal-marġ salmastru tat-Tramuntana ta’ Gower hija li fih kontenut kbir ta’ ramel u b’hekk jiskula tajjeb. Dan il-fatt jinkoraġġixxi li b’mod predominanti jikbru ħxejjex tal-marġ salmastru, u minħabba f’hekk il-marġ huwa riżorsa tajba għar-ragħa tal-“Gower Salt Marsh Lamb”, li fuqu jiffjorixxi.
Fil-marġi salmastri tikber firxa ta’ pjanti alofitiċi partikolari għal dik iż-żona, iżda l-iżjed li jikbru huma komunitajiet ta’ pjanti tal-livelli tan-nofs u ta’ fuq tal-marġ, u hemm rappreżentanza qawwija taż-żewġ speċijiet elenkati fl-Anness 1 tad-Direttiva tal-KE dwar il-Ħabitats u l-Fawna u l-Flora Selvaġġa:-
— |
Il-Mergħat Salmastri Atlantiċi |
— |
Salicornia u speċijiet oħra annwali ta’ żoni bit-tajn u bir-ramel. |
Hija d-dieta tal-ħrief, li jieklu diversità tal-alofiti mifruxa mal-marġ salmastru tat-Tramuntana ta’ Gower, li tikkontribwixxi għat-“togħma aromatika ta’ ħxejjex bi ħjiel melħin” tal-laħam tal-“Gower Salt Marsh Lamb”.
Il-valur nutrittiv li jinkiseb mill-marġ huwa baxx meta mqabbel mar-ragħa ssupplimentat mill-agrikultura. Il-ħrief huma liberi jirgħu fuq spazji kbar miftuħin, u b’hekk laħamhom ma fihx wisq xaħam, il-muskoli jiżviluppaw sew, u l-ġogi ta’ riġlejhom huma ddefiniti tajjeb. Din is-sistema estensiva ta’ ragħa twassal biex il-ħrief “Gower Salt Marsh Lamb” idumu iżjed biex jimmaturaw minn dawk li jitrabbew b’sistemi intensivi, u dan jikkontribwixxi għall-karatteristiċi tal-karkassi tagħhom u għall-kwalitajiet li jagħmlu l-laħam tagħhom tant tajjeb għall-ikel. Billi jikbru bil-mod, il-laħam tal-ħrief “Gower Salt Marsh Lamb” jilħaq jiżviluppa kompletament “it-togħma ekwilibrata, tenera, ħlejja u delikata” bi “ħjiel ta’ ħaxix, ta’ ħxejjex aromatiċi u kemxejn mielħa” mid-dieta tagħhom ta’ speċijiet diversi ta’ ħxejjex alofitiċi.
It-trobbija u l-produzzjoni tal-ħrief “Gower Salt Marsh Lamb” jirrikjedu għarfien partikolari u kompetenzi speċifiċi għaliex l-annimali jirgħu fuq terren singolari li joffrilhom sfida fiżika. Dawn il-ħiliet u t-tradizzjonijiet żviluppaw maż-żmien, u ntirtu minn ġenerazzjoni għal oħra. Il-ħiliet speċifiċi huma elenkati hawn taħt:
— |
L-għarfien tal-imġiba tal-marġ salmastru u tal-meded tal-marea, biex dak li jkun jipproteġi n-nagħaġ u l-ħrief mill-marea. Xogħol il-produttur, u ż-żmien meta jrid isir ċertu xogħol importanti, huma ddettati mill-marea, u mill-kalendarju tagħha.
|
Il-ħrief ilhom mill-Medju Evu jirgħu fil-marġ salmastru, u s-sistema tar-ragħa ftit li xejn inbidlet minn dak iż-żmien. Fl-1976 kien hemm 30 bidwi bid-dritt li jħallu n-nagħaġ jirgħu fil-marġ salmastru ta’ Gower, u l-marġ kien isostni eluf ta’ nagħaġ. Fl-2018, fil-marġ salmastru tħallew jirgħu madwar 3 500 ħaruf minn tmien produtturi.
Referenza għall-pubblikazzjoni tal-Ispeċifikazzjoni tal-Prodott
Gower Salt Marsh Lamb - GOV.UK (www.gov.uk)