(1)

Permezz tar-Regolament ta’ Implimentazzjoni tal-Kummissjoni (UE) 2019/159 (3) l-Unjoni tapplika miżura ta’ salvagwardja kontra l-importazzjonijiet ta’ ċerti prodotti tal-azzar. Il-miżura tieħu l-forma ta’ kwota tariffarja (tariff-rate quota, “TRQ”), b’importazzjonijiet permessi mingħajr dazju fi kwota bbażata fuq flussi kummerċjali storiċi. Il-kwota mingħajr dazju hija applikabbli għall-importazzjonijiet fit-territorju tal-Unjoni. Dazju ta’ salvagwardja ta’ 25 % japplika għall-importazzjonijiet li jsiru lil hinn mill-kwota applikabbli.

(2)

Ir-Regolament (UE) 2023/1321 (4) emenda r-Regolament (UE) 2020/2170 tal-Parlament Ewropew u tal-Kunsill (5) dwar l-applikazzjoni ta’ kwoti tariffarji tal-Unjoni u ta’ kwoti oħra tal-importazzjoni.

(3)

B’riżultat ta’ din l-emenda, il-kategoriji tal-azzar 7 (Pjanċi Kwarto Mhux Illigati u Oħrajn Illigati (6)) u 17 (Angoli, Forom u Qatgħat tal-Ħadid jew tal-Azzar Mhux Illigat (7)) fil-miżura ta’ salvagwardja, elenkati fl-Anness 1 tar-Regolament (UE) 2020/2170, li joriġinaw mir-Renju Unit u miġjuba fl-Irlanda ta’ Fuq permezz ta’ trasport dirett minn partijiet oħra tar-Renju Unit għandhom ikunu eliġibbli għal trattament skont il-kwoti tariffarji rilevanti tal-Unjoni jekk dawk il-prodotti jiġu rilaxxati għaċ-ċirkolazzjoni libera fit-territorju tal-Irlanda ta’ Fuq.

(4)

Fit-30 ta’ Marzu 2023, il-Kummissjoni ppubblikat Avviż f’Il-Ġurnal Uffiċjali tal-Unjoni Ewropea li jispjega li, wara l-emenda tar-Regolament (UE) 2020/2170 kien meħtieġ li l-Kummissjoni temenda r-regolament tal-UE ta’ salvagwardja billi toħloq TRQ ġdida limitata għal trasferimenti lejn l-Irlanda ta’ Fuq tal-kategoriji ta’ prodotti inklużi fl-Anness tar-Regolament (UE) 2023/1321 li joriġinaw mir-Renju Unit u kkonsenjati direttament minn partijiet oħra tar-Renju Unit. B’dan il-mod, it-trasferimenti ta’ ta’ prodotti li huma f’dawn il-kategoriji ta’ prodotti li joriġinaw mir-Renju Unit u kkonsenjati direttament minn partijiet oħra tar-Renju Unit setgħu jidħlu fl-Irlanda ta’ Fuq mingħajr dazju sakemm tiġi eżawrita l-kwota allokata. Minn tali kwota, japplika dazju ta’ salvagwardja ta’ 25 %. Il-partijiet interessati ngħataw il-possibbiltà li jikkummentaw dwar il-kontenut tan-Notifika.

(5)

Biex tikkalkula l-volum adegwat ta’ TRQs li jiżguraw, kif previst fir-Regolament (UE) 2023/1321, il-vijabbiltà ekonomika ta’ dawn it-trasferimenti diretti lejn l-Irlanda ta’ Fuq minn partijiet oħra tar-Renju Unit, fid-dawl taċ-ċirkostanzi speċifiċi fl-Irlanda ta’ Fuq, il-Kummissjoni analizzat l-istatistika disponibbli (8) biex tikkalkula l-volum ta’ trasferimenti lejn l-Irlanda ta’ Fuq minn partijiet oħra tar-Renju Unit.

(6)

It-TRQs li nħolqu minn dan ir-Regolament għandhom jintużaw esklużivament minn prodotti li joriġinaw mir-Renju Unit, kif elenkati fl-Anness tar-Regolament (UE) 2023/1321, u li jinġiebu fl-Irlanda ta’ Fuq permezz ta’ trasport dirett minn partijiet oħra tar-Renju Unit u jiġu rilaxxati għaċ-ċirkolazzjoni libera fit-territorju tal-Irlanda ta’ Fuq. Għalhekk, dawn it-TRQs ġodda ma jaffettwawx l-allokazzjoni jew il-volumi tat-TRQs eżistenti għal pajjiżi terzi fit-territorju tal-Unjoni.

(7)

In-Notifika ta’ Bidu tat il-possibbiltà lill-partijiet interessati jippreżentaw il-kummenti fi skadenza stipulata. Il-Kummissjoni ma rċeviet l-ebda kumment mingħand l-ebda parti interessata.

(8)

Il-miżuri previsti f’dan ir-Regolament huma f’konformità mal-opinjoni tal-Kumitat dwar is-Salvagwardji stabbilit skont l-Artikolu 3(3) tar-Regolament (UE) 2015/478 u l-Artikolu 22(3) tar-Regolament (UE) 2015/755 rispettivament,