REGOLAMENT TA’ IMPLIMENTAZZJONI TAL-KUMMISSJONI (UE) 2023/980

tas-16 ta’ Mejju 2023

li jemenda r-Regolament ta’ Implimentazzjoni (UE) 2016/799 fir-rigward ta’ takografu intelliġenti tranżizzjonali u l-użu tiegħu għall-Awtentikazzjoni tal-Messaġġi ta’ Navigazzjoni b’Servizz Miftuħ ta’ Galileo u li jemenda r-Regolament ta’ Implimentazzjoni (UE) 2021/1228

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 165/2014 tal-Parlament Ewropew u tal-Kunsill tal-4 ta’ Frar 2014 dwar takografi fit-trasport bit-triq (1), u b’mod partikolari l-Artikolu 11 tiegħu,

Billi:

(1)	Ir-Regolament (UE) Nru 165/2014 introduċa takografi intelliġenti, li jinkludu konnessjoni mas-sistema globali ta’ navigazzjoni bis-satellita (“GNSS”).

(2)	L-ispeċifikazzjonijiet tekniċi għall-kostruzzjoni, l-ittestjar, l-installazzjoni, l-operazzjoni u t-tiswija tat-takografi u l-komponenti tagħhom huma stabbiliti fir-Regolament ta’ Implimentazzjoni tal-Kummissjoni (UE) 2016/799 (2).

(3)

Ir-Regolament (UE) 2020/1054 tal-Parlament Ewropew u tal-Kunsill (3) introduċa rekwiżiti ġodda għat-takografu intelliġenti, li kienu jesiġu li jiġu emendati l-ispeċifikazzjonijiet tekniċi tiegħu. Ir-Regolament ta’ Implimentazzjoni tal-Kummissjoni (UE) 2021/1228 (4) għalhekk emenda r-Regolament (UE) 2016/799 biex jintroduċi t-tieni verżjoni tat-takografu intelliġenti.

(4)

Ir-Regolament ta’ Implimentazzjoni (UE) 2021/1228 introduċa l-użu obbligatorju tal-Awtentikazzjoni tal-Messaġġi ta’ Navigazzjoni b’Servizz Miftuħ (“OSNMA”) ta’ Galileo minn takografi intelliġenti, biex jippermetti l-awtentikazzjoni tal-pożizzjonijiet irreġistrati mit-takografu permezz tal-użu tas-Sistema Globali ta’ Navigazzjoni bis-Satellita (GNSS) ta’ Galileo.

(5)

L-OSNMA bħalissa tinsab f’fażi ta’ ttestjar pubbliku, b’dikjarazzjoni tas-servizz mistennija biss wara d-data tal-introduzzjoni tat-tieni verżjoni tat-takografu intelliġenti f’vetturi rreġistrati ġodda. Dan jagħmel l-approvazzjoni tat-tip tal-unitajiet tal-vettura inċerta, kif ukoll l-imġiba tat-takografi intelliġenti tat-tieni verżjoni wara bidla fil-futur tas-sinjali fl-ispazju fi ħdan l-OSNMA.

(6)	Sabiex tiġi żgurata armonija fil-kundizzjonijiet tal-ittestjar u tal-approvazzjoni tat-tip kif ukoll fl-imġiba tal-unitajiet tal-vetturi, hemm bżonn li jiġi żgurat funzjonament komuni tat-takografi intelliġenti tat-tieni verżjoni, kemm qabel kif ukoll wara d-dikjarazzjoni tas-servizz tal-OSNMA.

(7)

It-tieni verżjoni inizjali tat-takografi intelliġenti jenħtieġ li tkun approvata għat-tip abbażi tas-sinjali fl-ispazju u tal-materjal kriptografiku disponibbli għall-fażi tal-ittestjar pubbliku tas-servizz. Sabiex jiġi żgurat li wara l-bidla għas-sinjal fl-ispazju operazzjonali s-sewwieq ma jiġix imfixkel, jenħtieġ li dawn it-takografi jinjoraw l-OSNMA sakemm ikunu jistgħu jiġu aġġornati biex jużaw bis-sħiħ is-servizz tal-OSNMA. Dan joħloq perjodu tranżizzjonali għat-takografi intelliġenti tat-tieni verżjoni fir-rigward tal-użu tal-OSNMA.

(8)	Dawn it-takografi tranżizzjonali jenħtieġ li jiżguraw il-funzjonalitajiet kollha stabbiliti fil-Kapitolu II tar-Regolament (UE) Nru 165/2014.

(9)

Huwa mistenni li ma tkun meħtieġa l-ebda bidla fil-hardware ladarba d-dikjarazzjoni tas-servizz tal-OSNMA sseħħ biex it-takografu jiffunzjona bis-servizz operazzjonali OSNMA. Għalhekk jenħtieġ li jkun possibbli li s-software ta’ takografu tranżizzjonali jiġi aġġornat biex jagħmel użu sħiħ mill-OSNMA ladarba jkun disponibbli.

(10)

Fid-dawl ta’ żviluppi futuri rigward id-disponibbiltà u l-funzjonament tal-OSNMA, il-fattibbiltà tal-aġġornament tat-takografu f’workshop, jew tekniki possibbli ta’ manipulazzjoni identifikati mat-takografu fuq il-post, il-Kummissjoni tista’ tevalwa mill-ġdid jekk l-ispeċifikazzjonijiet tekniċi jenħtieġx li jiġu riveduti, inkluż jekk huwiex meħtieġ rekwiżit biex it-takografu intelliġenti tranżizzjonali jagħmel użu sħiħ mill-kapaċità tal-OSNMA tiegħu.

(11)

Jenħtieġ li l-industrija tingħata biżżejjed żmien biex timplimenta l-miżuri tranżizzjonali. Għalhekk jenħtieġ li t-talba għall-approvazzjoni tat-tip ta’ takografi tranżizzjonali tkun possibbli mill-inqas sal-31 ta’ Diċembru 2023. Jenħtieġ li jkun possibbli wkoll li t-takografi tranżizzjonali jkomplu jiġu installati għal perjodu limitat ta’ żmien wara d-Dikjarazzjoni tas-Servizz tal-OSNMA.

(12)	Jenħtieġ li ladarba jintemm il-perjodu tranżizzjonali, l-awtoritajiet tal-infurzar ikunu jistgħu jirrikonoxxu jekk it-takografu intelliġenti installat ikunx mgħammar b’verżjoni tas-software li tippermettilu jagħmel użu mill-OSNMA ta’ Galileo.

(13)

Id-data attwali tal-applikazzjoni stabbilita fl-Artikolu 2 tar-Regolament ta’ Implimentazzjoni (UE) 2021/1228 tipprevjeni lill-awtoritajiet tal-approvazzjoni tat-tip milli jagħtu approvazzjoni tat-tip lit-tagħmir skont ir-Regolament ta’ Implimentazzjoni (UE) 2016/799 f’konformità mal-emendi stabbiliti fir-Regolament ta’ Implimentazzjoni (UE) 2021/1228 qabel il-21 ta’ Awwissu 2023. Madankollu, skont l-Artikoli 8(1) u 11 tar-Regolament (UE) Nru 165/2014, minn dik id-data l-vetturi rreġistrati għall-ewwel darba fi Stat Membru għandhom ikunu mgħammra bil-verżjoni l-ġdida tat-takografu intelliġenti. Għalhekk, jenħtieġ li r-Regolament ta’ Implimentazzjoni (UE) 2021/1228 jiġi emendat biex hekk kif dan ir-Regolament jidħol fis-seħħ, jippermetti li tingħata l-approvazzjoni tat-tip.

(14)	Il-miżuri previsti f’dan ir-Regolament huma f’konformità mal-opinjoni tal-Kumitat stabbilit bl-Artikolu 42(1) tar-Regolament (UE) Nru 165/2014,

ADOTTAT DAN IR-REGOLAMENT:

Artikolu 1

L-Anness IC tar-Regolament ta’ Implimentazzjoni (UE) 2016/799 huwa emendat f’konformità mal-Anness ta’ dan ir-Regolament.

Artikolu 2

Il-paragrafu li ġej jiżdied fl-Artikolu 2 tar-Regolament ta’ Implimentazzjoni (UE) 2021/1228:

“Madankollu, mill-25 ta’ Mejju 2023, l-awtoritajiet nazzjonali ma għandhomx jirrifjutaw li jagħtu approvazzjoni tat-tip tal-UE għal tip ġdid ta’ takografu, komponent tat-takografu, jew kard tat-takografu, jew jagħtu estensjoni għal tip eżistenti ta’ takografu, komponent tat-takografu, jew kard tat-takografu, jew jipprojbixxu r-reġistrazzjoni, it-tqegħid fis-suq jew id-dħul fis-servizz ta’ takografu, komponent tat-takografu, jew kard tat-takografu ġodda meta t-tagħmir ikkonċernat ikun jikkonforma mar-Regolament ta’ Implimentazzjoni (UE) 2016/799 kif emendat b’dan ir-Regolament, jekk manifattur jitlob dan.”

Artikolu 3

Dan ir-Regolament għandu jidħol fis-seħħ fit-tielet jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-21 ta’ Awwissu 2023.

Madankollu, mill-25 ta’ Mejju 2023, l-awtoritajiet nazzjonali ma għandhomx jirrifjutaw li jagħtu approvazzjoni tat-tip tal-UE għal tip ġdid ta’ takografu, komponent tat-takografu, jew kard tat-takografu, jew jagħtu estensjoni għal tip eżistenti ta’ takografu jew komponent tat-takografu, jew kard tat-takografu, jew jipprojbixxu r-reġistrazzjoni, it-tqegħid fis-suq jew id-dħul fis-servizz ta’ takografu, komponent tat-takografu, jew kard tat-takografu ġodda meta t-tagħmir ikkonċernat ikun jikkonforma mar-Regolament ta’ Implimentazzjoni (UE) 2016/799 kif emendat bir-Regolament ta’ Implimentazzjoni (UE) 2021/1228 u dan ir-Regolament, jekk manifattur jitlob dan.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-16 ta’ Mejju 2023.

Għall-Kummissjoni

Il-President

Ursula VON DER LEYEN

(1) ĠU L 60, 28.2.2014, p. 1.

(2) Ir-Regolament ta’ Implimentazzjoni tal-Kummissjoni (UE) 2016/799 tat-18 ta’ Marzu 2016 li jimplimenta r-Regolament (UE) Nru 165/2014 tal-Parlament Ewropew u tal-Kunsill li jistabbilixxi r-rekwiżiti għall-kostruzzjoni, l-ittestjar, l-istallazzjoni, l-operazzjoni u t-tiswija ta’ takografi u l-komponenti tagħhom (ĠU L 139, 26.5.2016, p. 1).

(3) Ir-Regolament (UE) 2020/1054 tal-Parlament Ewropew u tal-Kunsill tal-15 ta’ Lulju 2020 li jemenda r-Regolament (KE) Nru 561/2006 fir-rigward ta’ rekwiżiti minimi dwar il-ħinijiet massimi ta’ sewqan kuljum u kull ġimgħa, il-pawżi minimi u l-perjodi ta’ mistrieħ kuljum u kull ġimgħa u r-Regolament (UE) Nru 165/2014 fir-rigward tal-pożizzjonament permezz ta’ takografi (ĠU L 249, 31.7.2020, p. 1).

(4) Ir-Regolament ta’ Implimentazzjoni tal-Kummissjoni (UE) 2021/1228 tas-16 ta’ Lulju 2021 li jemenda r-Regolament ta’ Implimentazzjoni (UE) 2016/799 fir-rigward tar-rekwiżiti għall-kostruzzjoni, l-ittestjar, l-installazzjoni, l-operazzjoni u t-tiswija ta’ takografi intelliġenti u l-komponenti tagħhom (ĠU L 273, 30.7.2021, p. 1).

ANNESS

Fl-Anness IC tar-Regolament ta’ Implimentazzjoni (UE) 2016/799 jiżdied l-Appendiċi 17 li ġej:

“Appendiċi 17

DISPOŻIZZJONIJIET TRANŻIZZJONALI RELATATI mal-UŻU TAL-OSNMA MIT-TAKOGRAFI

1. DEFINIZZJONIJIET U AKRONIMI

1.1. Definizzjonijiet

Dikjarazzjoni tas-Servizz tal-Awtentikazzjoni tal-Messaġġi ta’ Navigazzjoni b’Servizz Miftuħ (OSNMA) ta’ Galileo hija d-dikjarazzjoni tal-Kummissjoni Ewropea li OSNMA ta’ Galileo daħlet fil-fażi operazzjonali tagħha.

Unità tranżizzjonali tal-vettura Unità tal-vettura li tikkonforma mad-dispożizzjonijiet ta’ dan l-Appendiċi.

L-unitajiet tranżizzjonali tal-vettura jinbnew f’konformità mas-SIS ICD u mal-linji gwida tar-riċevitur tal-OSNMA applikabbli għall-fażi tal-ittestjar pubbliku tal-OSNMA. Fihom riċevitur tal-GNSS li huwa kapaċi juża l-OSNMA disponibbli matul il-fażi tal-ittestjar pubbliku tiegħu.

Madankollu, l-unitajiet tranżizzjonali tal-vettura ma jistgħux jawtentikaw il-messaġġi ta’ navigazzjoni disponibbli wara d-Dikjarazzjoni tas-Servizz tal-OSNMA, minħabba aġġornament meħtieġ tal-materjal kriptografiku fl-unità tal-vettura. Hemm bżonn li jiġi applikat aġġornament xieraq tas-software, sabiex ikunu jistgħu jibdew jużaw l-OSNMA, u jikkonformaw mar-rekwiżiti kollha tal-Anness IC u l-Appendiċijiet 1 sa 16 tiegħu. Qabel ma jiġu aġġornati, l-unitajiet tranżizzjonali tal-vettura jimplimentaw il-funzjonalitajiet relatati mal-OSNMA kif speċifikat f’dan l-Appendiċi. Il-funzjonalitajiet mhux relatati mal-OSNMA jibqgħu l-istess.

Jekk jiġi applikat l-aġġornament xieraq tas-software, l-unitajiet tranżizzjonali tal-vettura jimplimentaw is-SIS ICD u l-linji gwida tar-riċevitur tal-OSNMA applikabbli għall-fażi operazzjonali tal-OSNMA, u jikkonformaw mar-rekwiżiti kollha tal-Anness IC u l-Appendiċijiet 1 sa 16 tiegħu, bl-użu tal-OSNMA disponibbli matul il-fażi operazzjonali.

Takografu tranżizzjonali: takografu li jinkludi unità tranżizzjonali tal-vettura.

1.2. Akronimi

ICD	Dokument ta’ Kontroll tal-Interfaċċa
OSNMA	Awtentikazzjoni tal-Messaġġi ta’ Navigazzjoni b’Servizz Miftuħ ta’ Galileo
SIS	Sinjal fl-Ispazju
VU	Unità tal-Vettura

2. KUNSIDERAZZJONIJIET ĠENERALI RELATATI MAL-OSNMA

Sabiex il-vetturi rreġistrati għall-ewwel darba jkunu jistgħu jiġu mgħammra bil-verżjoni 2 tat-takografi tat-tieni ġenerazzjoni, sa mid-data ta’ introduzzjoni mitluba kif definit fil-punt (ccc) tat-Taqsima 1 tal-Anness IC tar-Regolament ta’ Implimentazzjoni (UE) 2016/799, hemm bżonn li l-unitajiet tal-vettura jiġu approvati għat-tip, prodotti u kkummerċjalizzati qabel id-Dikjarazzjoni tas-Servizz tal-OSNMA. Għal dawn l-unitajiet tal-vettura, imsejħa unitajiet tranżizzjonali tal-vettura, hemm bżonn li r-rekwiżiti relatati mal-OSNMA tal-Anness IC u l-Appendiċijiet 1 sa 16 tiegħu jiġu adattati, sabiex ikunu jistgħu jiġu approvati għat-tip u jintużaw fil-qasam.

Id-dispożizzjonijiet stabbiliti f’dan l-Appendiċi jiddefinixxu r-rekwiżiti speċifiċi applikabbli għall-unitajiet tranżizzjonali tal-vettura. Dawn japplikaw biss għall-unitajiet tal-vettura b’riċevitur tal-GNSS intern.

3. REKWIŻITI APPLIKABBLI GĦAR-RIĊEVITUR TAL-GNSS TA’ TAKOGRAFI TRANŻIZZJONALI

TRA_001

L-unitajiet tranżizzjonali tal-vettura għandhom jinkludu riċevitur tal-GNSS li kapaċi juża l-OSNMA disponibbli matul il-fażi tal-ittestjar pubbliku tiegħu.

TRA_002

Ir-rekwiżiti tal-Appendiċi 12 japplikaw għar-riċevitur tal-GNSS inkluż fl-unitajiet tranżizzjonali tal-vettura, bl-interpretazzjonijiet li ġejjin:

—

Is-SIS ICD u l-linji Gwida tar-Riċevitur tal-OSNMA msemmija huma d-dokumenti disponibbli għall-fażi tal-ittestjar pubbliku:

—	Galileo Open Service Navigation Message Authentication (OSNMA) User ICD for the Test Phase, Verżjoni 1.0, Novembru 2021,

—	Galileo Open Service Navigation Message Authentication (OSNMA) Receiver Guidelines for the Test Phase, Verżjoni 1.0, Novembru 2021,

—	OSNMA huwa s-servizz disponibbli matul il-fażi tal-ittestjar pubbliku,

—	SIS huwa s-Sinjal fl-Ispazju disponibbli matul il-fażi tal-ittestjar pubbliku,

TRA_003

Ir-riċevitur tal-GNSS inkluż fl-unitajiet tranżizzjonali tal-vettura għandu jkun iddisinjat b’tali mod li wara l-aġġornament tas-software tiegħu, applikat permezz ta’ aġġornament tas-software tal-unità tal-vettura, ikun jikkonforma bis-sħiħ mar-rekwiżiti tal-Anness 12, bl-użu tal-OSNMA disponibbli matul il-fażi operazzjonali tiegħu.

4. REKWIŻITI APPLIKABBLI GĦALL-UNITAJIET TRANŻIZZJONALI TAL-VETTURA

L-unitajiet tranżizzjonali tal-vettura jistgħu jipproċessaw is-sinjal tal-OSNMA disponibbli matul il-fażi tal-ittestjar pubbliku tiegħu, iżda ma jistgħux jirrapportaw l-Istatus tal-Awtentikazzjoni tal-Messaġġi ta’ Navigazzjoni mis-SIS disponibbli matul il-fażi operazzjonali tal-OSNMA, sakemm jiġi applikat aġġornament xieraq tas-software. Għalhekk jassumu li l-pożizzjonijiet standard ipprovduti mir-riċevitur tal-GNSS ikunu dejjem awtentikati.

Ir-rekwiżiti tal-Anness IC u l-Appendiċijiet 1 sa 16 tiegħu japplikaw, bl-interpretazzjonijiet li ġejjin.

TRA_004

L-Anness IC, 3.9.15 l-event ta’ “Kunflitt tal-ħin”, ir-rekwiżit 86, għandu jinftiehem bħala:

Dan l-event għandu jiġi attivat, meta l-modalità tal-kalibrazzjoni ma tkunx qed topera, meta l-VU tidentifika diskrepanza bejn il-ħin tal-funzjoni tal-kejl tal-ħin tal-unità tal-vettura u l-ħin li joriġina mill-pożizzjonijiet standard trażmessi mir-riċevitur tal-GNSS jew mill-faċilità tal-GNSS esterna. Tiġi identifikata “diskrepanza fil-ħin” jekk id-differenza fil-ħin taqbeż ± 3 sekondi li jikkorrespondu għall-akkuratezza tal-ħin stabbilita fir-rekwiżit 41a, b’din tal-aħħar tkun żdiedet bil-ħin massimu ta’ deriva kull ġurnata. Dan l-event għandu jiġi rrekordjat flimkien mal-valur tal-arloġġ intern tal-apparat tar-rekordjar. Il-VU għandha twettaq il-verifika għall-attivazzjoni tal-event ta’ “kunflitt tal-ħin” eżatt qabel ma l-VU terġa’ taġġusta awtomatikament l-arloġġ intern tal-VU, f’konformità mar-rekwiżit 211.

TRA_005

L-Anness IC, 3.9.18 l-event “anomalija tal-GNSS”, ir-rekwiżit 88a, għandu jinftiehem bħala:

Dan l-event għandu jiġi attivat, meta l-modalità tal-kalibrazzjoni ma tkunx qed topera, meta r-riċevitur tal-GNSS jidentifika attakk , kif speċifikat fl-Appendiċi 12. Wara li jkun ġie attivat event ta’ anomalija tal-GNSS, il-VU ma għandhiex tiġġenera eventi oħrajn ta’ anomalija tal-GNSS għall-10 minuti li jkun imiss.

TRA_006

Anness IC, 3.12.5 Reġistrazzjoni u ħżin fil-memorja tad-data, Postijiet u pożizzjonijiet fejn il-perjodi tax-xogħol ta’ kuljum jibdew, jintemmu, u/jew fejn jiġu akkumulati 3 sigħat ta’ ħin ta’ sewqan, ir-rekwiżit 110, għandu jinftiehem bħala:

Flimkien ma’ kull post jew pożizzjoni, l-apparat tar-rekordjar għandu jirrekordja u jaħżen fil-memorja tad-data tiegħu:

—	in-numru tal-kard tas-sewwieq u/jew tal-kosewwieq u l-Istat Membru li joħroġ il-kard,

—	il-ġenerazzjoni tal-kards,

—	id-data u l-ħin tal-entrata,

—	it-tip ta’ entrata (bidu, tmiem jew 3 sigħat ta’ ħin ta’ sewqan akkumulat),

—	l-akkuratezza, id-data u l-ħin tal-GNSS relatati, jekk applikabbli,

—	il-valur tal-odometru tal-vettura.

—	indikatur li jindika jekk il-pożizzjoni ġietx preżunta bħala awtentikata,

TRA_007

L-Anness IC, 3.12.17 Reġistrazzjoni u ħżin fil-memorja tad-data, Qsim tal-fruntieri, ir-rekwiżit 133b, għandu jinftiehem bħala:

Flimkien mal-pajjiżi u l-pożizzjoni, l-apparat tar-rekordjar għandu jirrekordja u jaħżen fil-memorja tad-data tiegħu:

—	in-numru tal-kard tas-sewwieq u/jew tal-kosewwieq u l-Istat Membru li joħroġ il-kard,

—	il-ġenerazzjoni tal-kards,

—	l-akkuratezza, id-data u l-ħin tal-GNSS relatati,

—	indikatur li jindika jekk il-pożizzjoni ġietx preżunta bħala awtentikata,

—	il-valur tal-odometru tal-vettura fil-ħin tad-detezzjoni tal-qsim tal-fruntiera.

TRA_008

Anness IC, 3.12.18 Reġistrazzjoni u ħżin fil-memorja tad-data, Operazzjonijiet ta’ tagħbija/ħatt, ir-rekwiżit 133 g, għandu jinftiehem bħala:

Flimkien mat-tip ta’ operazzjoni u pożizzjoni, l-apparat tar-rekordjar għandu jirrekordja u jaħżen fil-memorja tad-data tiegħu:

—	in-numru tal-kard tas-sewwieq u/jew tal-kosewwieq u l-Istat Membru li joħroġ il-kard,

—	il-ġenerazzjoni tal-kards,

—	id-data u l-ħin tal-operazzjoni ta’ tagħbija/ħatt,

—	l-akkuratezza, id-data u l-ħin tal-GNSS relatati, jekk applikabbli,

—	indikatur li jindika jekk il-pożizzjoni ġietx preżunta bħala awtentikata,

—	il-valur tal-odometru tal-vettura.

TRA_009

L-Anness IC, 3.23 l-event “Aġġustament tal-ħin”, ir-rekwiżit 211, għandu jinftiehem bħala:

L-issettjar tal-ħin tal-arloġġ intern tal-VU għandu jiġi aġġustat mill-ġdid awtomatikament f’intervalli ta’ ħin varjabbli. L-aġġustament mill-ġdid tal-ħin awtomatiku li jmiss għandu jiġi attivat bejn 72h u 168h wara dak preċedenti, u wara li l-VU tkun tista’ taċċessa l-ħin tal-GNSS permezz ta’ messaġġ validu ta’ pożizzjoni standard f’konformità mal-Appendiċi 12. Madankollu, l-aġġustament tal-ħin qatt ma għandu jkun akbar mid-deriva tal-ħin massima akkumulata għal kull jum, kif ikkalkolata mill-manifattur tal-VU f’konformità mar-rekwiżit 41b. Jekk id-differenza bejn il-ħin intern tal-arloġġ tal-VU u l-ħin tar-riċevitur tal-GNSS tkun akbar mid-deriva tal-ħin massima akkumulata għal kull jum, mela l-aġġustament tal-ħin għandu jġib l-arloġġ intern tal-VU qrib kemm jista’ jkun tal-ħin tar-riċevitur tal-GNSS. L-issettjar tal-ħin jista’ jsir biss jekk il-ħin ipprovdut mir-riċevitur tal-GNSS jinkiseb bl-użu ta’ messaġġi tal-pożizzjoni standard kif stabbilit fl-Appendiċi 12. Ir-referenza tal-ħin għall-issettjar awtomatiku tal-ħin tal-arloġġ intern tal-VU għandha tkun il-ħin ipprovdut fil-messaġġ tal-pożizzjoni standard.

TRA_010

L-Anness IC, 3.23 l-event “Aġġustament tal-ħin”, ir-rekwiżit 212, għandu jinftiehem bħala:

Il-funzjoni tal-aġġustament tal-ħin għandha tippermetti wkoll l-aġġustament attivat tal-ħin kurrenti fil-modalità tal-kalibrazzjoni.

Il-workshops jistgħu jaġġustaw il-ħin:

—	jew billi jiktbu valur taż-żmien fil-VU, billi jużaw is-servizz WriteDataByIdentifier f’konformità mat-taqsima 6.2 tal-Appendiċi 8,

—

jew inkella billi jitolbu allinjament tal-arloġġ tal-VU mal-ħin ipprovdut mir-riċevitur tal-GNSS. Dan jista’ jsir biss jekk il-ħin ipprovdut mir-riċevitur tal-GNSS jinkiseb bl-użu ta’ messaġġi ta’ pożizzjoni standard. F’dan l-aħħar każ, is-servizz RoutineControl għandu jintuża f’konformità mat-taqsima 8 tal-Appendiċi 8.

TRA_011

Appendiċi 4, 2. L-ispeċifikazzjoni tal-blokok tad-data, l-ewwel paragrafu, is-seba’ inċiż, għandu jinftiehem bħala:

Meta tiġi stampata wara l-lonġitudni u l-latitudni ta’ pożizzjoni rrekordjata, jew wara l-kronogramma meta tkun ġiet iddeterminata l-pożizzjoni, il-pittogramma

tindika li din il-pożizzjoni ġiet ippreżunta awtentika.

TRA_012

Appendiċi 8, 8.1 Servizz ta’ RoutineControl (Aġġustament tal-ħin), Deskrizzjoni tal-messaġġ, ir-rekwiżit CPR_065a, għandu jinftiehem bħala:

Is-servizz ta’ RoutineControl (TimeAdjustment) jipprovdi l-kapaċità li jiġi attivat allinjament tal-arloġġ tal-VU mal-ħin ipprovdut mir-riċevitur tal-GNSS.

Għat-twettiq tas-servizz RoutineControl (TimeAdjustment), il-VU trid tkun fil-modalità ta’ KALIBRAZZJONI.

Prekundizzjoni: jiġi żgurat li l-VU tkun tista’ tirċievi messaġġi ta’ pożizzjoni standard mir-riċevitur tal-GNSS.

Sakemm l-aġġustament tal-ħin ikun għadu għaddej, il-VU għandha tirrispondi għat-talba RoutineControl, is-subfunzjoni requestRoutineResults, b’routineInfo = 0x78.

Nota: l-aġġustament tal-ħin jista’ jieħu xi żmien. It-tester dijanjostiku għandu jitlob l-istatus ta’ aġġustament tal-ħin billi juża s-subfunzjoni requestRoutineResults.

TRA_013

Fl-Appendiċi 12, 3 Sentenzi pprovduti mir-riċevitur tal-GNSS, ir-rekwiżit GNS_4a:

Id-data li tinsab fis-sentenzi tal-AMC ipprovduti mir-riċevitur tal-GNSS, jekk ikun hemm, ma għandhiex tintuża mill-unità tal-vettura, ħlief għall-valuri tal-Istatus li ġejjin:

J = jamming [imblukkar] jew O = other GNSS attack [attakk ieħor tal-GNSS] (permezz ta’ kontrolli ta’ konsistenza implimentati skont il-GNS_3a),

V = Void [null] (il-pożizzjoni awtentikata mhijiex disponibbli għal xi raġuni oħra).

TRA_014

Fl-Appendiċi 12, 3 Sentenzi pprovduti mir-riċevitur tal-GNSS, ir-rekwiżit GNS_5:

Id-data li tinsab fis-sentenzi tal-ASA pprovduti mir-riċevitur tal-GNSS, jekk ikun hemm, ma għandhiex tintuża mill-unità tal-vettura.

TRA_015

Fl-Appendiċi 12, 5.2 Unità tal-Vettura mingħajr faċilità tal-GNSS esterna, Trasferiment ta’ informazzjoni mir-riċevitur tal-GNSS lill-VU, ir-rekwiżiti GNS_34 u 36:

Il-proċessur tal-VU ma għandux juża informazzjoni estratta mis-sentenza tal-AMC, ħlief għall-valuri tal-Istatus li ġejjin:

J = jamming [imblukkar] jew O = other GNSS attack [attakk ieħor tal-GNSS] (permezz ta’ kontrolli ta’ konsistenza implimentati skont il-GNS_3a),

V = Void [null] (il-pożizzjoni awtentikata mhijiex disponibbli għal xi raġuni oħra).

Il-proċessur tal-VU ma għandux juża informazzjoni estratta mis-sentenza tal-ASA.

TRA_016

Appendiċi 12, 6 L-ipproċessar u r-reġistrazzjoni tad-data tal-pożizzjoni mill-VU, ir-rekwiżit GNS_39, għandu jinftiehem bħala:

Id-data dwar il-pożizzjoni għandha tinħażen fil-VU, flimkien ma’ indikatur li jindika jekk il-pożizzjoni ġietx preżunta bħala awtentikata. Meta jkun hemm bżonn li d-data dwar il-pożizzjoni tiġi rrekordjata fil-VU, għandhom japplikaw ir-regoli li ġejjin:

(a)	Jekk il-pożizzjoni standard tkun valida, il-pożizzjoni standard u l-akkuratezza tagħha għandhom jiġu rrekordjati fil-VU u l-indikatur għandu jiġi ssettjat għal “awtentikat”.

TRA_017

Appendiċi 12, 6 L-ipproċessar u r-reġistrazzjoni tad-data tal-pożizzjoni mill-VU, ir-rekwiżit GNS_40, għandu jinftiehem bħala:

Meta l-valur tal-Istatus f’sentenza tal-AMC riċevuta jiġi ssettjat għal “J” jew “O” f’konformità mar-rekwiżit GNS_4a, il-VU għandha tiġġenera u tirrekordja event ta’ anomalija tal-GNSS, kif definit fir-rekwiżit 88a tal-Anness IC u l-Appendiċi 1 (EventFaultType), L-Unità tal-vettura tista’ twettaq kontrolli addizzjonali qabel taħżen l-event ta’ anomalija tal-GNSS wara li tirċievi setting ta’ “J” jew “O”.

TRA_018

Appendiċi 12, 8 Kunflitt fil-moviment tal-vettura, ir-rekwiżit GNS_42, Kundizzjoni ta’ attivazzjoni 2, l-ewwel u t-tieni inċiż wara l-formula għandhom jinftiehmu bħala:

—	GnssDistance hija d-distanza bejn il-pożizzjoni attwali tal-vettura u dik preċedenti, it-tnejn miksuba minn messaġġi validi ta’ pożizzjoni standard , mingħajr ma jiġi kkunsidrat l-għoli,

—	OdometerDifference hija d-differenza bejn il-valur attwali tal-odometru u l-valur tal-odometru li jikkorrispondi għall-messaġġ validu ta’ pożizzjoni standard preċedenti,

TRA_019

Ir-rekwiżiti tal-Protokoll tad-DSRC tal-Appendiċi 14, 5.4.5 għall-RTMElements tal-RtmData, l-azzjonijiet imwettqa u d-definizzjonijiet, ir-rekwiżit DSC_41, it-Tabella 14.3, it-tieni ċellola fir-ringiela tal-RTM20, għandha tinftiehem bħala:

Il-VU għandha tiġġenera valur ta’ numru sħiħ (timeReal mill-Appendiċi 1) għall-element tad-data RTM20.

Il-VU għandha tissettja l-valur tal-RTM20 għall-ħin li fih kienet disponibbli l-aħħar pożizzjoni tal-vettura standard mir-riċevitur tal-GNSS.

Jekk qatt ma kienet disponibbli pożizzjoni tal-vettura standard mir-riċevitur tal-GNSS, il-VU għandha tissettja l-valur tal-RTM20 għal 0.

TRA_020

Il-manifattur ta’ unità tranżizzjonali tal-vettura tranżizzjonali approvata għat-tip għandu jinforma lill-Kummissjoni dwar il-verżjonijiet tas-software tiegħu. Il-Kummissjoni għandha tippubblika dawn il-verżjonijiet tas-software fuq sit web disponibbli għall-pubbliku.

5. DISPOŻIZZJONIJIET SPEĊIFIĊI GĦALL-APPROVAZZJONI TAT-TIP U GĦALL-UŻU TA’ TAKOGRAFI TRANŻIZZJONALI

TRA_021

L-unitajiet tranżizzjonali tal-vettura għandhom ikunu approvati għat-tip skont ir-rekwiżiti tal-Anness IC u l-Annessi 1 sa 16 tiegħu, issupplimentati bid-dispożizzjonijiet ta’ dan l-Appendiċi.

TRA_022

Iċ-ċertifikati tal-approvazzjoni tat-tip tal-unitajiet tranżizzjonali tal-vettura u t-takografi tranżizzjonali jistgħu jintalbu biss sal-31 ta’ Diċembru 2023 jew sad-data tad-Dikjarazzjoni tas-Servizz tal-OSNMA, skont liema minnhom tkun l-aktar reċenti.

TRA_023

Jistgħu jitwaħħlu unitajiet tranżizzjonali tal-vettura f’vetturi rreġistrati għall-ewwel darba biss sal-31 ta’ Mejju 2024 jew 5 xhur wara d-data tad-Dikjarazzjoni tas-Servizz tal-OSNMA, skont liema minnhom tkun l-aktar riċenti.

”