(1)

Id-Direttiva tal-Kummissjoni 2008/127/KE (2) inkludiet l-approvazzjoni tal-karbonat tal-kalċju u tal-ġebla tal-ġir bħala sustanzi attivi fl-Anness I tad-Direttiva tal-Kunsill 91/414/KEE (3).

(2)

Skont l-Artikolu 78(3) tar-Regolament (KE) Nru 1107/2009, is-sustanzi attivi inklużi fl-Anness I tad-Direttiva 91/414/KEE jitqiesu li ġew approvati skont ir-Regolament (KE) Nru 1107/2009. L-approvazzjoni tas-sustanza attiva karbonat tal-kalċju, kif stabbilit fil-Parti A tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (4), kellha tiskadi inizjalment fil-31 ta’ Awwissu 2022. L-approvazzjoni tas-sustanza attiva ġebla tal-ġir, kif stabbilita fil-Parti A tal-Anness tal-istess Regolament, kellha tiskadi fil-31 ta’ Awwissu 2019.

(3)

Ir-Regolament ta’ Implimentazzjoni tal-Kummissjoni (UE) 2021/1448 (5) ġedded l-approvazzjoni tas-sustanza attiva b’riskju baxx karbonat tal-kalċju sal-31 ta’ Ottubru 2036 u emenda l-Anness tar-Regolament ta’ Implimentazzjoni (UE) Nru 540/2011 kif xieraq.

(4)

Fil-11 ta’ Awwissu 2017, AgroRadomysl a.s. ressqet applikazzjoni liċ-Ċekja, bħala l-Istat Membru relatur, għall-approvazzjoni tas-sustanza attiva ġebla tal-ġir f’konformità mal-Artikolu 7(1) tar-Regolament (KE) Nru 1107/2009.

(5)

Fis-26 ta’ Lulju 2019, l-Istat Membru relatur innotifika lill-applikant, lill-Istati Membri l-oħra, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) dwar l-ammissibbiltà tal-applikazzjoni, f’konformità mal-Artikolu 9(3) tar-Regolament (KE) Nru 1107/2009.

(6)

L-Istat Membru relatur iffinalizza l-valutazzjoni tiegħu, fil-forma ta’ abbozz ta’ rapport ta’ valutazzjoni, u bagħatha lill-Kummissjoni u lill-Awtorità fil-11 ta’ Settembru 2020. L-abbozz tar-rapport ta’ valutazzjoni kien jinkludi rakkomandazzjoni dwar id-deċiżjoni li kellha tittieħed fir-rigward tal-approvazzjoni tal-ġebla tal-ġir għall-użi rappreżentattivi appoġġati mill-applikant.

(7)

L-Awtorità għamlet id-dossier tas-sommarju supplimentari disponibbli għall-pubbliku. L-Awtorità ċċirkolat ukoll l-abbozz tar-rapport ta’ valutazzjoni lill-applikant u lill-Istati Membri għall-kummenti u nediet konsultazzjoni pubblika dwaru. L-Awtorità għaddiet il-kummenti li rċeviet lill-Kummissjoni.

(8)

Fit-8 ta’ April 2022 (6), l-Awtorità kkomunikat lill-Kummissjoni l-konklużjoni tagħha (7) dwar jekk jistax ikun mistenni li l-ġebla tal-ġir tissodisfa l-kriterji ta’ approvazzjoni previsti fl-Artikolu 4 tar-Regolament (KE) Nru 1107/2009.

(9)

Fil-konklużjoni tagħha, l-Awtorità ddikjarat li ż-żewġ sustanzi, il-karbonat tal-kalċju u l-ġebla tal-ġir, huma kimikament l-istess sustanza.

(10)

Il-Kummissjoni ppreżentat abbozz tar-rapport ta’ rieżami dwar il-ġebla tal-ġir (bħala speċifikazzjoni addizzjonali tal-karbonat tal-kalċju) fit-8 ta’ Diċembru 2022 u abbozz ta’ dan ir-Regolament li jemenda t-tiġdid tal-approvazzjoni tal-karbonat tal-kalċju lill-Kumitat Permanenti dwar il-Pjanti, l-Annimali, l-Ikel u l-Għalf fit-23 ta’ Marzu 2023.

(11)

Il-Kummissjoni stiednet lill-applikant biex iressaq il-kummenti tiegħu dwar il-konklużjoni tal-Awtorità u, f’konformità mal-Artikolu 13(1) tar-Regolament (KE) Nru 1107/2009, dwar l-abbozz tar-rapport ta’ rieżami. L-applikant ressaq il-kummenti tiegħu, li ġew eżaminati bir-reqqa.

(12)

Skont ir-Regolament (KE) Nru 1107/2009, “sustanzi” jenħtieġ li jinftiehmu bħala elementi kimiċi u l-komposti tagħhom, hekk kif iseħħu naturalment jew permezz tal-manifattura. Peress li l-ġebla tal-ġir hija magħmula mill-karbonat tal-kalċju u hija kimikament l-istess sustanza, jixraq li l-ġebla tal-ġir tiġi inkluża fl-istess entrata bħall-“karbonat tal-kalċju”.

(13)

Peress li l-karbonat tal-kalċju u l-ġebla tal-ġir huma kimikament l-istess sustanza, il-Kummissjoni tqis li l-kriterji ta’ riskju baxx għall-karbonat tal-kalċju skont l-Artikolu 22 u l-punt 5.1 tal-Anness II tar-Regolament (KE) Nru 1107/2009 huma applikabbli bis-sħiħ għall-ġebla tal-ġir ukoll.

(14)

Għalhekk jeħtieġ li jiġu emendati l-kundizzjonijiet tal-approvazzjoni tal-karbonat tal-kalċju sabiex jinkludu l-ispeċifikazzjoni tal-ġebla tal-ġir. Għalhekk, jenħtieġ li r-Regolament ta’ Implimentazzjoni (UE) Nru 540/2011 jiġi emendat skont dan.

(15)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,