(1)

Ir-Regolament ta’ Implimentazzjoni tal-Kummissjoni (UE) Nru 571/2014 (2) approva l-ipkonażol bħala sustanza attiva f’konformità mar-Regolament (KE) Nru 1107/2009 u elenkah fil-Parti B tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (3).

(2)

Wara l-preżentazzjoni tad-data konfermatorja dwar ir-riskju fit-tul għall-għasafar granivori, kif meħtieġ mill-Artikolu 1 flimkien mal-Anness I tar-Regolament ta’ Implimentazzjoni (UE) Nru 571/2014, l-Istat Membru relatur oriġinali, ir-Renju Unit (4), wettaq evalwazzjoni tad-data, li ġiet rieżaminata mill-Istati Membri u mill-Awtorità Ewropea dwar is-Sigurtà fl-Ikel (“l-Awtorità”). Abbażi tal-informazzjoni mressqa, l-Awtorità kkonkludiet li hemm riskju għoli fit-tul għall-għasafar għall-użi rappreżentattivi tal-ipkonażol (5).

(3)

Fid-9 ta’ Marzu 2018, il-Kumitat għall-Istima tar-Riskji tal-Aġenzija Ewropea għas-Sustanzi Kimiċi adotta opinjoni (6) f’konformità mal-Artikolu 37(4) tar-Regolament (KE) Nru 1272/2008 tal-Parlament Ewropew u tal-Kunsill (7) fejn ikkonkluda, fost l-oħrajn, li l-ipkonażol jissodisfa l-kriterji biex jiġi kklassifikat bħala tossiku għar-riproduzzjoni kategorija 1B.

(4)

Ir-Regolament Delegat tal-Kummissjoni (UE) 2020/1182 (8) konsegwentement emenda l-Anness VI tar-Regolament (KE) Nru 1272/2008 u kklassifika l-ipkonażol bħala tossiku għar-riproduzzjoni kategorija 1B.

(5)

F’konformità mal-Artikolu 4(3), il-punt (e)(ii), tar-Regolament (KE) Nru 1107/2009, sustanza attiva tista’ tiġi approvata biss jekk prodott għall-protezzjoni tal-pjanti li jkun fih din is-sustanza ma jkollux effetti inaċċettabbli fuq l-ambjent, b’mod partikolari fuq speċijiet mhux fil-mira, li jinkludu l-għasafar.

(6)

Skont il-punt 3.6.4 tal-Anness II tar-Regolament (KE) Nru 1107/2009, sustanza attiva għandha tiġi approvata biss jekk mhijiex jew ma għandhiex tiġi kklassifikata f’konformità mad-dispożizzjonijiet tar-Regolament (KE) Nru 1272/2008 bħala tossika għar-riproduzzjoni kategorija 1B, sakemm l-esponiment tal-bnedmin għal dik is-sustanza fi prodott għall-protezzjoni tal-pjanti fil-kundizzjonijiet tal-użu realistiċi proposti ma jkunx negliġibbli.

(7)

F’konformità mal-Artikolu 21(1) tar-Regolament (KE) Nru 1107/2009, il-Kummissjoni infurmat lill-Istati Membri, lill-Awtorità u lill-applikant li hija tqis li l-kriterji ta’ approvazzjoni stabbiliti fl-Artikolu 4(3), il-punt (e)(ii), ta’ dak ir-Regolament u fil-punt 3.6.4 tal-Anness II ta’ dak ir-Regolament jistgħu ma jibqgħux issodisfati minħabba li ġie identifikat riskju għoli fit-tul għall-għasafar u li l-ipkonażol huwa kklassifikat bħala tossiku għar-riproduzzjoni kategorija 1B. Il-Kummissjoni stiednet lill-applikant iressaq il-kummenti tiegħu.

(8)

L-applikant ipprovda kummenti u informazzjoni addizzjonali li ġew ikkunsidrati u vvalutati mill-Istat Membru relatur il-ġdid, il-Belġju.

(9)

Il-Kummissjoni talbet lill-Awtorità tikkunsidra l-informazzjoni pprovduta mill-applikant, filwaqt li tqis il-valutazzjoni mill-Istat Membru relatur il-ġdid, u speċifikament tqis ir-riskji għall-għasafar mill-użi rappreżentattivi tal-ipkonażol u jekk ir-rekwiżiti dwar l-esponiment negliġibbli għall-bnedmin (esponiment djetetiku u mhux djetetiku) stabbiliti fil-punt 3.6.4 tal-Anness II tar-Regolament (KE) Nru 1107/2009 jistgħux jitqiesu ssodisfati.

(10)

Fl-1 ta’ Frar 2022, l-Awtorità kkomunikat lill-Kummissjoni d-dikjarazzjoni tagħha (9) li fiha indikat li għalkemm ir-residwi tal-ipkonażol fl-ikel huma taħt il-valur prestabbilit ta’ 0,01 mg/kg u għalhekk l-esponiment djetetiku għall-ipkonażol huwa mistenni li jkun negliġibbli, hemm inċertezzi dwar l-esponiment għall-operaturi u għall-ħaddiema minħabba l-limitazzjonijiet fl-istudji sottomessi. B’mod partikolari, għall-operaturi, il-kejl tal-esponiment matul it-tindif tat-tagħmir ma ġiex inkluż fl-istudju u l-esponiment matul l-ippakkjar ġie minimizzat minħabba proċess awtomatizzat ħafna, u għalhekk ġiet limitata r-rappreżentattività tal-istudju meta jitqiesu l-prattiki tat-trattament taż-żrieragħ użati b’mod komuni fl-Unjoni. Għalhekk, l-istudju kien ta’ użu limitat. Barra minn hekk, fir-rigward tal-ħaddiema, l-istudju pprovdut kien ta’ valur limitat peress li kien jinkludi biss data għal żewġ ħaddiema. Addizzjonalment, għal wieħed minn dawk il-ħaddiema, l-esponiment ma setax jitqies negliġibbli, anki jekk jitqies l-użu ta’ tagħmir ta’ protezzjoni personali.

(11)

Barra minn hekk, l-Awtorità kkonkludiet li hemm riskju għoli fit-tul għall-għasafar mill-użi rappreżentattivi tal-ipkonażol anki wara li jitqies l-irfinar xieraq kollu fil-valutazzjoni tar-riskji.

(12)

Il-Kummissjoni stiednet lill-applikant iressaq il-kummenti tiegħu dwar id-dikjarazzjoni tal-Awtorità u dwar il-proposta tagħha li tirtira l-approvazzjoni tal-ipkonażol minħabba t-tħassib identifikat mill-Awtorità. L-applikant ressaq il-kummenti tiegħu, li ġew eżaminati bir-reqqa.

(13)

Il-Kummissjoni tqis li l-ipkonażol ma għadux jissodisfa l-kriterji għall-approvazzjoni stabbiliti fl-Artikolu 4(3), il-punt (e)(ii), tar-Regolament (KE) Nru 1107/2009 u fil-punt 3.6.4 tal-Anness II ta’ dak ir-Regolament.

(14)

Għalhekk jixraq li tiġi rtirata l-approvazzjoni tal-ipkonażol.

(15)

Għalhekk ir-Regolament ta’ Implimentazzjoni (UE) Nru 540/2011 jenħtieġ li jiġi emendat skont dan u r-Regolament ta’ Implimentazzjoni (UE) Nru 571/2014 jenħtieġ li jitħassar.

(16)

Jenħtieġ li l-Istati Membri jingħataw biżżejjed żmien biex jirtiraw l-awtorizzazzjonijiet għall-prodotti għall-protezzjoni tal-pjanti li fihom l-ipkonażol.

(17)

Għall-prodotti għall-protezzjoni tal-pjanti li fihom l-ipkonażol, meta jingħata xi perjodu ta’ grazzja mill-Istati Membri f’konformità mal-Artikolu 46 tar-Regolament (KE) Nru 1107/2009, jenħtieġ li dak il-perjodu jkun qasir kemm jista’ jkun u jiskadi mhux aktar tard minn 9 xhur wara d-data tad-dħul fis-seħħ ta’ dan ir-Regolament.

(18)

Dan ir-Regolament ma jipprevjenix is-sottomissjoni ta’ applikazzjoni ġdida għall-approvazzjoni tal-ipkonażol skont l-Artikolu 7 tar-Regolament (KE) Nru 1107/2009.

(19)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,