(1)

Ir-Regolament (UE) 2015/2283 jipprevedi li l-ikel il-ġdid awtorizzat u mniżżel fil-lista tal-Unjoni tal-ikel il-ġdid biss jista’ jiġi introdott fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni ta’ ikel ġdid.

(3)

Il-lista tal-Unjoni stabbilita fl-Anness tar-Regolament ta’ Implimentazzjoni (UE) 2017/2470 tinkludi l-infużjoni mill-weraq tal-kafè ta’ Coffea arabica L. u/jew ta’ Coffea canephora Pierre ex A. Froehner bħala ikel tradizzjonali minn pajjiż terz awtorizzat.

(4)

Ir-Regolament ta’ Implimentazzjoni tal-Kummissjoni (UE) 2020/917 (3) awtorizza l-introduzzjoni fis-suq ta’ infużjoni mill-weraq tal-kafè ta’ Coffea arabica L. u/jew ta’ Coffea canephora Pierre ex A. Froehner bħala ikel tradizzjonali minn pajjiż terz biex jintużaw fl-infużjonijiet erbali.

(5)

Fl-4 ta’ Lulju 2022, il-kumpanija Luigi Lavazza Spa (“l-applikant”) ressqet applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 bil-għan li jinbidlu l-kundizzjonijiet tal-użu tal-infużjoni mill-weraq tal-kafè ta’ Coffea arabica L. u/jew ta’ Coffea canephora Pierre ex A. Froehner. L-applikant talab li l-użu jiġi estiż għal xarbiet mhux alkoħoliċi lesti biex jinxtarbu, u għall-kafè, għal estratti ta’ kafè u ċikwejra, għall-kafè solubbli, għat-tè, għal infużjonijiet tal-ħxejjex aromatiċi u tal-frott, għal sostituti tal-kafè, għal taħlitiet ta’ kafè, u għal taħlitiet solubbli għax-xarbiet (u xarbiet bħalhom b’togħmiet miżjuda) maħsubin għall-popolazzjoni ġenerali.

(6)

Il-Kummissjoni hija tal-fehma li mhuwiex probabbli li l-aġġornament mitlub tal-lista tal-Unjoni jkollu effett fuq is-saħħa tal-bniedem, u li mhijiex meħtieġa evalwazzjoni tas-sikurezza mill-Awtorità Ewropea dwar is-Sigurtà fl-Ikel (“l-Awtorità”) f’konformità mal-Artikolu 10(3) tar-Regolament (UE) 2015/2283. L-użi proposti tal-infużjoni mill-weraq tal-kafè ta’ Coffea arabica L. u/jew ta’ Coffea canephora Pierre ex A. Froehner jirriżultaw f’konsum simili għal dak tal-użi attwalment awtorizzati, li kienu ġew ivvalutati mill-Awtorità u li hija kkunsidrathom sikuri, u li jsostnu l-awtorizzazzjoni tal-ikel tradizzjonali minn pajjiż terz. Għaldaqstant jixraq li jiġu emendati l-kundizzjonijiet tal-użu tal-infużjoni mill-weraq tal-kafè ta’ Coffea arabica L. u/jew ta’ Coffea canephora Pierre ex A. Froehner biex jiġi estiż l-użu tagħha għal xarbiet mhux alkoħoliċi b’togħmiet miżjuda jew mingħajrhom, lesti biex jinxtarbu, u għall-kafè, għal estratti ta’ kafè u ċikwejra, għall-kafè solubbli, għat-tè, għal infużjonijiet tal-ħxejjex aromatiċi u tal-frott, għal sostituti tal-kafè, għal taħlitiet ta’ kafè, u għal taħlitiet solubbli għax-xarbiet (u xarbiet bħalhom b’togħmiet miżjuda).

(7)

L-informazzjoni li ngħatat fl-applikazzjoni tagħti biżżejjed raġuni biex jiġi stabbilit li l-bidliet fil-kundizzjonijiet tal-użu tal-ikel tradizzjonali minn pajjiż terz huma f’konformità mal-kundizzjonijiet stabbiliti fl-Artikolu 12 tar-Regolament (UE) 2015/2283, u jenħtieġ li jiġu approvati.

(8)

Meta titqies din l-estenzjoni tal-użu tal-infużjoni mill-weraq tal-kafè ta’ Coffea arabica L. u/jew ta’ Coffea canephora Pierre ex A. Froehner għal kategoriji tal-ikel addizzjonali, u għall-finijiet ta’ ċarezza u ta’ fehim tal-kategoriji tal-ikel, il-kategorija tal-ikel awtorizzat oriġinali “Infużjonijiet tal-ħxejjex aromatiċi” tinbidel għal “Infużjoni mill-weraq tal-kafè ta’ Coffea arabica L. u/jew ta’ Coffea canephora Pierre ex A. Froehner għall-introduzzjoni fis-suq kif inhuma”, filwaqt li “l-infużjonijiet tal-ħxejjex aromatiċi” jiġu inklużi fil-kategorija tal-ikel “kafè, estratti ta’ kafè u ċikwejra, kafè solubbli, tè, infużjonijiet tal-ħxejjex aromatiċi u tal-frott, sostituti tal-kafè, taħlitiet ta’ kafè, u taħlitiet solubbli għax-xarbiet (u xarbiet bħalhom b’togħmiet miżjuda)”.

(9)

Għalhekk jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat skont dan.

(10)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,