(1)

Ir-Regolament (UE) 2019/1021 jimplimenta l-impenji tal-Unjoni skont il-Konvenzjoni ta’ Stokkolma dwar il-Pollutanti Organiċi Persistenti (2) (“il-Konvenzjoni”) u skont il-Protokoll għall-Konvenzjoni tal-1979 dwar it-Tniġġis Transkonfini u fit-Tul tal-Arja fuq Pollutanti Organiċi Persistenti (3).

(2)

L-Anness A tal-Konvenzjoni fih lista ta’ sustanzi kimiċi li kull Parti għall-Konvenzjoni hija meħtieġa li tipprojbixxi jew li tieħu l-miżuri legali u amministrattivi meħtieġa għall-eliminazzjoni tal-produzzjoni, tal-użu, tal-importazzjoni u tal-esportazzjoni tagħhom, filwaqt li tqis l-eżenzjonijiet speċifiċi applikabbli stabbiliti f’dak l-Anness.

(3)

Ir-Regolament Delegat tal-Kummissjoni (UE) 2020/784 (4) emenda l-Anness I tar-Regolament (UE) 2019/1021 biex jinkludi l-aċidu perfluworoottanojku (PFOA), l-imlieħ tiegħu u l-komposti relatati mal-PFOA.

(4)

L-Anness I tar-Regolament (UE) 2019/1021 fih limitu ta’ kontaminant fi traċċi mhux intenzjonat (UTC) għall-PFOA u l-imlieħ tiegħu fil-mikrotrabijiet tal-politetrafluworoetilen (PTFE) ta’ 1 mg/kg, li għandu jiġi rieżaminat sal-5 ta’ Lulju 2022.

(5)

Il-Kumitat għall-Istima tar-Riskju u l-Kumitat għall-Analiżi Soċjoekonomika tal-Aġenzija Ewropea għas-Sustanzi Kimiċi (ECHA) adottaw opinjoni (5) (“l-opinjoni tal-ECHA”), li kienet tinkludi l-valutazzjoni ta’ żewġ limiti ta’ UTC stabbiliti għall-PFOA, l-imlieħ tiegħu u l-komposti relatati mal-PFOA.

(6)

L-opinjoni tal-ECHA kkonkludiet li ġew żviluppati proċessi biex titnaqqas il-konċentrazzjoni tal-PFOA għal livell taħt il-limitu ġeneriku tal-UTC ta’ 0,025 mg/kg stabbilit fir-Regolament (UE) 2019/1021. Dawk il-proċessi ġew implimentati b’suċċess mill-biċċa l-kbira tal-manifatturi tal-mikrotrabijiet tal-politetrafluworoetilen (PTFE). Il-bqija tal-manifatturi jkunu jistgħu jikkonformaw mal-limitu ta’ 0,025 mg/kg sal-5 ta’ Lulju 2022. Għalhekk, il-limitu speċifiku attwali tal-UTC għall-PFOA u l-imlieħ tiegħu fil-mikrotrabijiet tal-PTFE ta’ 1 mg/kg m’għadux meħtieġ u jenħtieġ li jiskadi fid-data tal-applikazzjoni ta’ dan ir-Regolament.

(7)

Ir-Regolament (UE) 2019/1021 jirreferi għall-Artikolu 3(12) u (24) tar-Regolament (KE) Nru 1907/2006 tal-Parlament Ewropew u tal-Kunsill (6) biex jiddefinixxi “tqegħid fis-suq” u “użu”. It-trattament tal-mikrotrabijiet tal-PTFE jikkwalifika bħala “użu” u t-trasferiment lil entità ġuridika differenti għat-trattament jikkwalifika bħala “tqegħid fis-suq”.

(8)

F’mill-inqas każ wieħed hemm bżonn li l-mikrotrabijiet tal-PTFE jiġu ttrasportati lejn faċilità differenti għat-trattament sabiex titnaqqas il-konċentrazzjoni tal-PFOA u l-imlieħ tiegħu biex jikkonformaw mal-limitu tal-UTC ta’ 0,025 mg/kg. Għalhekk, il-limitu speċifiku kurrenti tal-UTC ta’ 1 mg/kg jenħtieġ li jinżamm biex ikopri l-manifattura, it-tqegħid fis-suq u l-użu tal-PFOA u l-imlieħ tiegħu fil-mikrotrabijiet tal-PTFE biss għall-finijiet tat-trasport u t-trattament tal-mikrotrabijiet tal-PTFE biex titnaqqas il-konċentrazzjoni tal-PFOA.

(9)

Il-komposti relatati mal-PFOA huma preżenti bħala impurità f’sustanzi intermedji iżolati ttrasportati użati fil-manifattura ta’ fluworosustanzi kimiċi b’tul tal-katina tal-perfluworokarbur daqs jew iqsar minn sitt atomi. Sabiex jippermetti l-manifattura u l-użu ta’ sustanzi intermedji iżolati trasportati bħal dawn, ir-Regolament (UE) 2019/1021 jistabbilixxi limitu tal-UTC ta’ 20 mg/kg, li għandu jiġi rieżaminat mhux aktar tard mill-5 ta’ Lulju 2022.

(10)

L-opinjoni tal-ECHA kkonkludiet li l-livell attwali tal-UTC huwa l-aktar baxx li jista’ jiġi osservat, filwaqt li jitqiesu s-soluzzjonijiet teknoloġiċi disponibbli. Għalhekk, ir-rieżami tal-limitu tal-UTC jenħtieġ li jiġi pospost.

(11)

Is-C9-C14 PFCAs huma preżenti wkoll bħala impuritajiet f’sustanzi intermedji iżolati ttrasportati użati fil-manifattura ta’ fluworosustanzi kimiċi b’tul tal-katina tal-perfluworokarbur daqs jew iqsar minn sitt atomi (“alternattivi ta’ C6”). Ir-Regolament tal-Kummissjoni (UE) 2021/1297 (7) jipprevedi restrizzjoni skont ir-Regolament (KE) Nru 1907/2006 li tistabbilixxi limitu fuq il-konċentrazzjoni tagħhom, li għandha tiġi rieżaminata mhux aktar tard mill-25 ta’ Awwissu 2023. It-twaqqit tar-rieżami tal-UTC għall-komposti relatati mal-PFOA f’sustanzi intermedji użati għall-produzzjoni ta’ alternattivi ta’ C6 skont ir-Regolament (UE) 2019/1021 jenħtieġ li jiġi modifikat biex jiġi allinjat mar-rieżami previst fir-restrizzjoni għas-C9-C14 PFCAs skont ir-Regolament (KE) Nru 1907/2006.

(12)

L-Anness I tar-Regolament (UE) 2019/1021 jinkludi eżenzjoni għall-użu tal-PFOA, l-imlieħ tiegħu u l-komposti relatati mal-PFOA fil-manifattura tal-PTFE u tal-fluworur tal-poliviniliden (PVDF) għall-produzzjoni ta’ diversi prodotti.

(13)

Matul il-konsultazzjoni pubblika għat-tħejjija tal-opinjoni tal-ECHA, il-produtturi tal-fluworopolimeri kkummentaw li l-PFOA, l-imlieħ tiegħu u l-komposti relatati mal-PFOA ma għadhomx jintużaw għall-manifattura tal-PTFE u tal-PVDF fl-Unjoni. Abbażi ta’ din l-informazzjoni, dik l-eżenzjoni speċifika ma għadhiex meħtieġa u għalhekk jenħtieġ li titħassar.

(14)

L-applikazzjoni ta’ dan ir-Regolament jenħtieġ li tiġi differita biex il-partijiet ikkonċernati jingħataw biżżejjed żmien biex jadattaw għar-rekwiżiti l-ġodda.

(15)

Għaldaqstant, jenħtieġ li r-Regolament (UE) 2019/1021 jiġi emendat bix-xieraq,