(1)

Is-Sistema ta’ Informazzjoni tas-Suq Intern (IMI) ġiet stabbilita bir-Regolament (UE) Nru 1024/2012 tal-Parlament Ewropew u tal-Kunsill (2) bħala għodda elettronika pprovduta mill-Kummissjoni biex tiffaċilita l-kooperazzjoni amministrattiva fost l-atturi tal-IMI.

(2)

Fil-qasam tar-rikonoxximent ta’ kwalifiki professjonali, l-Artikolu 56 tad-Direttiva 2005/36/KE jirrikjedi li l-awtoritajiet kompetenti tal-Istat Membru ospitanti u tal-Istat Membru domiċiljari jużaw l-IMI għall-finijiet ta’ kooperazzjoni amministrattiva.

(3)

L-IMI ġiet żviluppata aktar biex tippermetti lill-awtoritajiet nazzjonali joħorġu ċertifikati ta’ kompetenza għall-istrutturi tal-iski introdotti mill-Artikolu 8 tar-Regolament Delegat tal-Kummissjoni (UE) 2019/907 (3). Għaldaqstant, ir-rekwiżit skont l-Artikolu 8(3) ta’ dak ir-Regolament Delegat li ċ-ċertifikat ta’ kompetenza jkun akkumpanjat minn stiker li għandha titwaħħal fuq il-kard nazzjonali tal-istruttur tal-iski, ma għadux validu. Għalhekk, l-Artikolu 8 tar-Regolament Delegat (UE) 2019/907 jenħtieġ li jiġi emendat biex jirrikjedi l-użu tal-IMI għall-ħruġ ta’ ċertifikati ta’ kompetenza għall-istrutturi tal-iski u biex titħassar ir-referenza għall-istiker.

(4)

Minħabba l-ħruġ tar-Renju Unit mill-Unjoni u tmiem il-perjodu ta’ tranżizzjoni previst fil-Ftehim dwar il-Ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (4), mill-1 ta’ Jannar 2021 ma tista’ tinħareġ l-ebda prova ta’ kwalifiki formali fir-Renju Unit, kif definit fl-Artikolu 3(1), il-punt (c), tad-Direttiva 2005/36/KE. Madankollu, il-prova ta’ kwalifiki formali mogħtija qabel l-1 ta’ Jannar 2021 għadha valida.

(5)

Iċ-ċittadini tal-Unjoni li jkollhom kwalifiki maħruġa qabel l-1 ta’ Jannar 2021 fir-Renju Unit huma eliġibbli biex jieħdu s-CTT.

(6)

Sabiex tiġi pprovduta aktar flessibbiltà, jenħtieġ li jkun possibbli għal kwalunkwe entità kompetenti fi Stat Membru u elenkata fl-Anness I li tirreġistra l-informazzjoni fl-IMI. B’mod ġenerali, din jenħtieġ li tkun l-entità kompetenti responsabbli għas-CTT, inkluż fuq talba minn ċittadin tal-Unjoni fil-pussess ta’ kwalifiki maħruġa qabel l-1 ta’ Jannar 2021 fir-Renju Unit, iżda tista’ tkun kwalunkwe entità kompetenti oħra, pereżempju fil-każ ta’ drittijiet miksuba, inkluż fuq talba minn ċittadin tal-Unjoni fil-pussess ta’ kwalifiki maħruġa qabel l-1 ta’ Jannar 2021 fir-Renju Unit.

(7)

Il-Finlandja talbet li jitneħħa l-“Istitut tal-Isports Vuokatti” mill-Anness I tar-Regolament Delegat (UE) 2019/907 peress li dik l-entità ma tagħtix lill-Finlandja l-kwalifika tal-Livell 3 elenkata f’dak l-Anness.

(8)

Ir-Reġjuni u l-Provinċji Awtonomi ta’ Trento u Bolzano għandhom il-kompetenza esklużiva biex jagħtu l-kwalifika “Maestro di Sci” u jistgħu jiddelegawha lill-entitajiet Taljani l-oħra elenkati fl-Anness I tar-Regolament Delegat (UE) 2019/907.

(9)

L-Assoċjazzjoni Litwana tal-Istrutturi tal-Isport fil-Borra twaqqfet fl-2018. Din tagħti l-Kwalifika “Struttur tal-Iski Livell 4”. L-Anness I tar-Regolament Delegat (UE) 2019/907 jenħtieġ li jiġi emendat biex jirrifletti din il-kwalifika u b’hekk jiġi żgurat li l-istrutturi tal-iski li jkunu temmew b’suċċess it-taħriġ korrispondenti jkunu jistgħu jibbenefikaw mit-Test ta’ Taħriġ Komuni. Min-naħa l-oħra, il-Litwanja talbet li l-Federazzjoni Nazzjonali Russa tal-Istrutturi (National Russian League of Instructors, NRLI) titneħħa minn dak l-Anness.

(10)

Jenħtieġ li l-Anness I tar-Regolament Delegat (UE) 2019/907 jirrifletti l-fatt li l-Assoċjazzjoni Brittanika tal-Istrutturi tal-Isport fil-Borra (British Association of Snow sport Instructors, BASI), elenkata bħala entità kompetenti għar-Renju Unit ma għadhiex kompetenti biex torganizza s-CTT.

(11)

Għaldaqstant jenħtieġ li r-Regolament Delegat (UE) 2019/907 jiġi emendat skont dan,

(1)

L-Artikolu 8 huwa emendat kif ġej:

(2)

L-Anness I huwa emendat f’konformità mal-Anness ta’ dan ir-Regolament.