(1)

Ir-Regolament (UE) 2017/625 jistabbilixxi l-qafas għall-kontrolli uffiċjali u għal attivitajiet uffiċjali oħrajn biex tiġi vverifikata l-konformità mal-leġiżlazzjoni tal-Unjoni dwar il-katina agroalimentari.

(2)

L-Artikolu 21 tar-Regolament (UE) 2017/625 jistabbilixxi regoli speċifiċi dwar il-kontrolli uffiċjali u għall-azzjoni li għandha tittieħed mill-awtoritajiet kompetenti fir-rigward tar-rekwiżiti tal-benessri tal-annimali, inklużi dawk stabbiliti fir-Regolament tal-Kunsill (KE) Nru 1/2005 (2).

(3)

F’dan il-kuntest, il-Kummissjoni wettqet sensiela ta’ awditi dwar is-sistemi ta’ konformità tal-Istati Membri biex tipproteġi l-benessri tal-annimali matul it-trasport lejn pajjiżi terzi jekk parti mill-vjaġġ tinvolvi l-użu ta’ bastimenti tal-bhejjem. Waħda mill-konklużjonijiet ewlenin mill-awditi tal-Kummissjoni hija li l-mod li bih l-Istati Membri jwettqu spezzjonijiet dwar it-tagħbija u l-ħatt tal-annimali f’konformità mal-Artikolu 20 ta’ dak ir-Regolament, ġeneralment mhuwiex biżżejjed biex jimminimizza r-riskju għall-benessri tal-annimali inerenti f’dak it-tip ta’ trasport.

(4)

L-awditi tal-Kummissjoni sabu dgħufijiet fis-sistemi ta’ konformità tal-Istati Membri fir-rigward tal-pjanijiet ta’ kontinġenza f’każ ta’ emerġenzi. Għal din ir-raġuni, l-awtoritajiet kompetenti fil-post tat-tluq jenħtieġ li jiżguraw li t-trasportatur ikollu pjan ta’ kontinġenza fil-każ ta’ emerġenzi u li l-pjan ta’ kontinġenza jissodisfa r-rekwiżiti rilevanti.

(5)

Skont id-Direttiva 2009/16/KE tal-Parlament Ewropew u tal-Kunsill (3), l-Istati Membri kollha b’portijiet marittimi għandhom iwettqu spezzjonijiet ta’ kontroll tal-Istat tal-port ta’ bastimenti li jidħlu fil-portijiet tagħhom. Ir-riżultati tal-ispezzjonijiet ta’ kontroll tal-Istat tal-port jistgħu jkunu rilevanti għall-ispezzjonijiet meħtieġa mill-Artikolu 20(1) tar-Regolament (KE) Nru 1/2005, bħal nuqqasijiet misjuba relatati mal-impermeabbiltà, mal-ventilazzjoni, mal-kapaċità ta’ żamma f’wiċċ l-ilma jew mat-tagħmir għat-tifi tan-nar. Huwa għalhekk meħtieġ li l-awtorità kompetenti tqis ir-riżultati ta’ dawn l-ispezzjonijiet meta tispezzjona l-bastimenti tal-bhejjem matul it-tagħbija u l-ħatt.

(6)

L-ispetturi mill-awtoritajiet kompetenti li jwettqu spezzjonijiet fuq il-bastimenti tal-bhejjem huma fil-biċċa l-kbira veterinarji uffiċjali. Il-kompetenza veterinarja waħedha mhijiex biżżejjed biex tivverifika l-funzjonament tas-sistemi mekkaniċi u ta’ ġestjoni tal-bastimenti tal-bhejjem li jista’ jkollhom impatt fuq il-benessri tal-annimali li jkunu qed jiġu ttrasportati. Kif propost fid-dokument (4) tan-Network, it-timijiet li jwettqu spezzjonijiet fuq it-tagħbija ta’ kunsinni ta’ annimali ħajjin, previsti fl-Artikolu 20 tar-Regolament (KE) Nru 1/2005, jenħtieġ li jkunu jikkonsistu minn veterinarji uffiċjali u esperti marittimi b’għarfien espert xieraq dwar dawk is-sistemi mekkaniċi u ta’ ġestjoni u esperjenza prattika tal-operat tal-bastimenti tal-bhejjem.

(7)

Meta l-bhejjem jiġu ppreżentati għat-tagħbija u l-ħatt fuq bastimenti tal-bhejjem f’punti ta’ ħruġ fil-portijiet, jenħtieġ li l-awtoritajiet kompetenti jkollhom biżżejjed żmien biex jivvalutaw jekk il-bastimenti tal-bhejjem jissodisfawx il-kundizzjonijiet stabbiliti fl-Artikolu 20 tar-Regolament (KE) Nru 1/2005 u fl-Artikolu 21(2), il-punt (c) tar-Regolament (UE) 2017/625. L-organizzatur ta’ vjaġġ jenħtieġ għalhekk jipprovdi lil dawk l-awtoritajiet kompetenti d-dokumentazzjoni rilevanti mill-inqas ħamest ijiem tax-xogħol qabel id-data tal-ispezzjoni jew id-data tal-kontrolli uffiċjali tal-bastiment tal-bhejjem.

(8)

L-awtoritajiet kompetenti fil-punti ta’ ħruġ fil-portijiet jenħtieġ li jwettqu wkoll spezzjoni fiżika wara li jgħabbu l-annimali fuq il-bastiment tal-bhejjem biex jivverifikaw li d-distribuzzjoni tal-annimali fl-imwieqel tkun konformi mal-kwoti ta’ spazju stabbiliti fil-Kapitolu VII tal-Anness I tar-Regolament (KE) Nru 1/2005.

(9)

Sabiex jinżamm rekord viżiv tal-istat tal-bastiment tal-bhejjem u l-bhejjem maħsubin għat-tagħbija, l-ispetturi mill-awtoritajiet kompetenti jenħtieġ li jieħdu evidenza permezz ta’ ritratti jew filmati ta’ nuqqas ta’ konformità abbord u kwalunkwe element ieħor li x’aktarx jaffettwa b’mod negattiv it-trattament xieraq tal-annimali. Dawk ir-ritratti jew filmati jenħtieġ li jinżammu mill-awtoritajiet kompetenti għat-tul tal-perjodu ta’ validità taċ-ċertifikat ta’ approvazzjoni tal-bastiment tal-bhejjem.