REGOLAMENT DELEGAT TAL-KUMMISSJONI (UE) 2023/735

tat-30 ta’ Jannar 2023

li jemenda r-Regolament Delegat (UE) 2020/760 fir-rigward tar-rekwiżit li jiġu ppreżentati fatturi biex tiġi stabbilita l-kwantità referenzjali, u li jiċċara xi kwistjonijiet li jikkonċernaw is-sistema elettronika tar-Reġistrazzjoni u l-Identifikazzjoni tal-Operaturi tal-Liċenzji (LORI)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (1), u b’mod partikolari l-Artikolu 186 tiegħu,

Billi:

(1)	Ir-Regolament Delegat tal-Kummissjoni (UE) 2020/760 (2) jissupplimenta r-Regolament (UE) Nru 1308/2013 fir-rigward tar-regoli għall-amministrazzjoni tal-kwoti tariffarji tal-importazzjoni u tal-esportazzjoni ta’ prodotti agrikoli soġġetti għal-liċenzji.

(2)

F’konformità mal-Artikolu 10(2) tar-Regolament Delegat (UE) 2020/760, l-operaturi jridu jippreżentaw fattura lill-awtorità li toħroġ il-liċenzji għall-istabbiliment tal-kwantità referenzjali. Sa issa l-kwantità referenzjali kienet tiġi stabbilita abbażi tad-dispożizzjoni tranżitorja prevista fl-Artikolu 26, l-ewwel paragrafu, ta’ dak ir-Regolament Delegat, u għalhekk id-dispożizzjoni inkwistjoni ma kinitx tintuża. Peress li ntwera li karatteristiċi oħra li jikkonċernaw il-ġestjoni tal-kwoti tariffarji introdotti minn dak ir-Regolament Delegat huma effiċjenti u sabiex jitnaqqas il-piż amministrattiv għall-operaturi u għall-awtoritajiet li joħorġu l-liċenzji, huwa rakkomandabbli li jitneħħa l-obbligu tal-operaturi li jippreżentaw fattura lill-awtorità li toħroġ il-liċenzji għall-istabbiliment tal-kwantità referenzjali.

(3)

Skont l-Artikolu 13(12) tar-Regolament Delegat (UE) 2020/760, l-operaturi jinnotifikaw lill-awtorità kompetenti li toħroġ il-liċenzji kwalunkwe bidla li taffettwa r-rekord tar-Reġistrazzjoni u tal-Identifikazzjoni tal-Operaturi tal-Liċenzji (LORI) tagħhom fi żmien 10 ijiem kalendarji mid-data tal-effettività ta’ tali bidliet. Jenħtieġ li dik l-iskadenza tiġi estiża minħabba t-tul tal-implimentazzjoni ta’ tali bidliet u d-diffikultajiet għall-operaturi biex jinnotifikawhom fil-ħin.

(4)

Barra minn hekk, jenħtieġ li tiġi ċċarata d-diskrepanza li teżisti fl-Artikoli 3(5) u 13(13) tar-Regolament Delegat (UE) 2020/760 bejn l-obbligu u l-għażla fir-rigward tar-reġistrazzjoni minn qabel tal-operaturi f’każ ta’ sospensjoni tar-rekwiżit tal-kwantità referenzjali f’konformità mal-Artikolu 9(9) ta’ dak ir-Regolament Delegat.

(5)

L-Artikolu 14 tar-Regolament Delegat (UE) 2020/760 jistabbilixxi regoli fir-rigward tal-ilmenti għal reġistrazzjoni mhux xierqa ta’ operatur. Ir-rwoli tal-awtoritajiet li joħorġu l-liċenzji tal-Istat Membru fejn l-operatur ikkontrollat ikun stabbilit u rreġistrat għall-finijiet tal-VAT, u dawk tal-Istat Membru li jkun irċieva lment, jenħtieġ li jiġu ċċarati b’tali mod li l-kontroll isir mill-Istat Membru fejn ikun stabbilit l-operatur ikkontrollat.

(6)	Għaldaqstant jenħtieġ li r-Regolament Delegat (UE) 2020/760 jiġi emendat skont dan,

ADOTTAT DAN IR-REGOLAMENT:

Artikolu 1

Emendi għar-Regolament Delegat (UE) 2020/760

Ir-Regolament Delegat (UE) 2020/760 huwa emendat kif ġej:

(1)

L-Artikolu 10 huwa emendat kif ġej:

(a)

il-paragrafu 2 huwa sostitwit b’dan li ġej:

“2. L-operatur għandu jiżgura li kopja ċċertifikata tad-dikjarazzjoni doganali għaċ-ċirkolazzjoni libera fl-Unjoni, u li huwa juża biex jistabbilixxi l-kwantità referenzjali, ikun fiha n-numru tal-fattura msemmija fl-Artikolu 145 tar-Regolament ta’ Implimentazzjoni (UE) 2015/2447.”

;

(b)

il-paragrafu 3 huwa sostitwit b’dan li ġej:

“3. L-awtoritajiet li joħorġu l-liċenzji għandhom iqabblu l-informazzjoni dwar il-liċenzji tal-importazzjoni u d-dikjarazzjonijiet doganali. Id-dokumenti ma għandux ikun fihom diskrepanzi fir-rigward tal-identità tal-importatur jew tad-dikjarant u d-deskrizzjoni tal-prodott. Il-verifiki ta’ dawk id-dokumenti għandhom isiru abbażi tal-analiżi tar-riskju tal-Istati Membri.”

;

(c)	il-paragrafu 4 jitħassar;

(2)

L-Artikolu 13 huwa emendat kif ġej:

(a)	fil-paragrafu 12, l-ewwel sentenza hija sostitwita b’dan li ġej: “L-operatur għandu jinnotifika lill-awtorità kompetenti li toħroġ il-liċenzji, kull bidla li taffettwa r-rekord LORI tiegħu fi żmien 30 jum kalendarju mid-data tal-effettività ta’ tali bidliet.”;

(b)	fil-paragrafu 13, l-ewwel subparagrafu huwa sostitwit b’dan li ġej: “Il-Kummissjoni għandha tissospendi r-rekwiżit tar-reġistrazzjoni minn qabel tal-operaturi fis-sistema elettronika LORI meta r-rekwiżit tal-kwantità referenzjali jkun ġie sospiż skont l-Artikolu 9(9).”;

(3)

L-Artikolu 14(2) huwa sostitwit b’dan li ġej:

“2. Jekk l-awtorità li toħroġ il-liċenzji tal-Istat Membru fejn ikun stabbilit l-ilmentatur issib li l-ilment huwa fondat, din għandha ssegwih bil-kontrolli li tqis xierqa. Meta l-operatur ikkontrollat ikun stabbilit u rreġistrat għall-finijiet tal-VAT fi Stat Membru differenti minn dak tal-awtorità li toħroġ il-liċenzji li tkun irċeviet l-ilment, dik l-awtorità li toħroġ il-liċenzji għandha malajr kemm jista’ jkun tipprovdi l-assistenza meħtieġa lill-awtorità li toħroġ il-liċenzji tal-Istat Membru li fih l-operatur ikun stabbilit u rreġistrat għall-finijiet tal-VAT u li tkun qed twettaq il-kontroll. Ir-riżultat tal-kontroll għandu jiġi rreġistrat mill-awtorità li toħroġ il-liċenzji tal-Istat Membru fejn l-operatur ikkonċernat ikun stabbilit u rreġistrat għall-finijiet tal-VAT, fis-sistema elettronika LORI, bħala parti mir-rekord LORI tiegħu.”

Artikolu 2

Dħul fis-seħħ

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-30 ta’ Jannar 2023.

Għall-Kummissjoni

Il-President

Ursula VON DER LEYEN

(1) ĠU L 347, 20.12.2013, p. 671.

(2) Ir-Regolament Delegat tal-Kummissjoni (UE) 2020/760 tas-17 ta’ Diċembru 2019 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill fir-rigward tar-regoli għall-amministrazzjoni tal-kwoti tariffarji tal-importazzjoni u l-esportazzjoni soġġetti għal liċenzji u li jissupplimenta r-Regolament (UE) Nru 1306/2013 tal-Parlament Ewropew u tal-Kunsill fir-rigward tad-depożitu ta’ garanziji fl-amministrazzjoni tal-kwoti tariffarji (ĠU L 185, 12.6.2020, p. 1).