(1)

Skont l-Artikolu 67(1) tar-Regolament (KE) Nru 1107/2009, l-utenti professjonali tal-prodotti għall-protezzjoni tal-pjanti għandhom iżommu rekords ta’ dawk il-prodotti li jużaw, li jkun fihom l-isem tal-prodott, il-ħin u d-doża tal-applikazzjoni, l-erja ttrattata u l-għalla fejn intuża l-prodott.

(2)

Skont l-Artikolu 67(1) tar-Regolament (KE) Nru 1107/2009, l-utenti professjonali għandhom ukoll jagħmlu l-informazzjoni rilevanti disponibbli għall-awtorità kompetenti fuq talba. Barra minn hekk, partijiet terzi jistgħu jitolbu lill-awtoritajiet kompetenti biex jipprovdu aċċess għal dik l-informazzjoni u l-awtoritajiet kompetenti għandhom jipprovdu tali aċċess f’konformità mal-liġi nazzjonali jew tal-Unjoni applikabbli.

(3)

L-Istrateġija mill-Għalqa sal-Platt għal sistema tal-ikel ġusta, tajba għas-saħħa u favur l-ambjent (“l-Istrateġija mill-Għalqa sal-Platt”) (2), adottata mill-Kummissjoni fl-2020, għandha l-għan li tnaqqas l-użu u d-dipendenza fuq il-prodotti kimiċi għall-protezzjoni tal-pjanti. Ir-reġistrazzjoni adegwata tal-użu tal-prodotti għall-protezzjoni tal-pjanti, u l-attivitajiet ta’ monitoraġġ u kontroll tal-awtoritajiet nazzjonali abbażi ta’ tali rekords, huma għalhekk strumentali għall-kisba tal-objettivi tal-Istrateġija mill-Għalqa sal-Platt.

(4)

Hemm differenzi bejn ir-reġimi nazzjonali fir-rigward tar-rekords miżmuma mill-utenti professjonali tal-prodotti għall-protezzjoni tal-pjanti skont l-Artikolu 67(1) tar-Regolament (KE) Nru 1107/2009 u jekk dawn jinżammux b’mod elettroniku. Għalhekk, dan ir-Regolament jistabbilixxi regoli dettaljati dwar il-kontenut u l-format ta’ dawk ir-rekords.

(5)

Dawk ir-regoli jiddefinixxu kif għandhom jiġu rreġistrati l-elementi elenkati fl-Artikolu 67(1) tar-Regolament (KE) Nru 1107/2009 relatati mal-użu ta’ prodotti għall-protezzjoni tal-pjanti (l-isem tal-prodott, il-ħin, id-doża, l-erja u l-għalla tal-applikazzjoni), sabiex tiġi żgurata l-kwalità adegwata u uniformi tar-rekords miżmuma skont dak l-Artikolu fl-Unjoni kollha.

(6)

Peress li l-użu tal-prodotti għall-protezzjoni tal-pjanti minn utenti professjonali ħafna drabi jseħħ bħala parti minn attivitajiet agrikoli u sabiex ikun hemm allinjament mar-rekwiżiti eżistenti rilevanti għall-agrikoltura, meta possibbli, l-identifikazzjoni tal-post tal-erja jew tal-faċilità fejn intuża l-prodott għall-protezzjoni tal-pjanti jenħtieġ li ssir permezz tal-unità tal-art fil-kamp ta’ applikazzjoni tal-applikazzjoni għall-għajnuna ġeospazjali tas-sistema integrata ta’ amministrazzjoni u kontroll kif imsemmi fir-Regolament ta’ Implimentazzjoni tal-Kummissjoni (UE) 2022/1173 (3). Meta dan ma jkunx possibbli, l-Istati Membri jenħtieġ li jipprovdu lill-utenti professjonali b’metodi alternattivi xierqa għall-identifikazzjoni tal-post tal-erja fejn intuża l-prodott għall-protezzjoni tal-pjanti, u, fejn rilevanti, il-post ġeospazjali.

(7)

Sabiex tinkiseb l-uniformità tar-rekords, l-ismijiet tal-għelejjel, is-sitwazzjonijiet jew l-użi tal-art jenħtieġ li jiġu rreġistrati, fejn applikabbli, f’konformità mal-kodiċijiet użati mill-Organizzazzjoni Ewropea u Mediterranja għall-Protezzjoni tal-Pjanti (“il-kodiċijiet tal-EPPO”) u l-istadji tat-tkabbir tal-pjanti, fejn applikabbli, f’konformità mal-monografija BBCH (4).

(8)

Sabiex jiġi evitat li l-utenti professjonali jkunu meħtieġa joħolqu settijiet multipli ta’ rekords għall-istess użu biex jikkonformaw ma’ obbligi differenti, huwa xieraq li jiġi ċċarat li l-Istati Membri għandhom il-possibbiltà li jirrikjedu li l-utenti jinkludu informazzjoni oħra flimkien mar-rekords meħtieġa skont l-Artikolu 67(1) tar-Regolament (KE) Nru 1107/2009.

(9)

Ir-rekords jenħtieġ li jinżammu b’mod elettroniku, peress li l-mezzi elettroniċi għaż-żamma tar-rekords huma l-aktar adattati biex jippermettu applikazzjoni uniformi tal-obbligu taż-żamma tar-rekords. Dan jiżgura affidabbiltà akbar tar-rekords, jiffaċilita l-ġbir u l-verifika tagħhom mill-awtoritajiet kompetenti u fl-aħħar mill-aħħar jappoġġa attivitajiet preċiżi, effiċjenti u effettivi ta’ monitoraġġ u kontroll mill-Istati Membri. Għal dan l-għan, il-formati elettroniċi użati jenħtieġ li jkunu jistgħu jinqraw ukoll minn magna kif definit fid-Direttiva (UE) 2019/1024 tal-Parlament Ewropew u tal-Kunsill (5).

(10)

Biex jitnaqqas il-piż amministrattiv, l-utenti professjonali jenħtieġ li jkollhom biżżejjed żmien bejn ir-reġistrazzjoni ta’ kull użu tal-prodotti għall-protezzjoni tal-pjanti u t-trasferiment tar-rekords f’format elettroniku.

(11)

Utent professjonali jista’ juża prodotti għall-protezzjoni tal-pjanti taħt arranġamenti kuntrattwali għal persuna fiżika jew ġuridika oħra. F’dawk il-każijiet, l-utent professjonali jenħtieġ li jipprovdi aċċess għal jew kopja tar-rekords rilevanti miżmuma lil dik il-persuna mingħajr ebda dewmien jew restrizzjoni bla bżonn.

(12)

Dan ir-Regolament huwa mingħajr preġudizzju għall-użu tad-data li tinsab fir-rekords għal finijiet oħra barra mill-kamp ta’ applikazzjoni tar-Regolament (KE) Nru 1107/2009 f’konformità mal-liġi tal-Unjoni jew dik nazzjonali. Id-disponibbiltà ta’ rekords elettroniċi armonizzati tista’ tiffaċilita l-użu tal-informazzjoni għal skopijiet leġittimi oħra, u b’hekk tiġi evitata d-duplikazzjoni tal-isforzi u jitnaqqas il-piż fuq l-utenti professjonali u l-awtoritajiet pubbliċi.

(13)

Sabiex l-utenti professjonali jkunu jistgħu jħejju ruħhom biex jissodisfaw ir-rekwiżiti stabbiliti f’dan ir-Regolament, jenħtieġ li jingħataw żmien raġonevoli qabel ma jsiru applikabbli r-rekwiżiti tiegħu.

(14)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,