(1)

Skont l-Artikolu 36 tad-Direttiva tal-Kunsill (UE) 2020/262 (3), il-moviment ta’ oġġetti soġġetti għas-sisa rrilaxxati għall-konsum fit-territorju ta’ Stat Membru wieħed u li jiġu trasferiti lejn it-territorju ta’ Stat Membru ieħor sabiex jiġu kkonsenjati hemmhekk għal finijiet kummerċjali, għandu jsir taħt kopertura ta’ dokument amministrattiv elettroniku simplifikat. Dik id-Direttiva b’hekk testendi l-użu tas-sistema kompjuterizzata stipulata fid-Deċiżjoni (UE) 2020/263 tal-Parlament Ewropew u tal-Kunsill (4) għall-monitoraġġ tal-moviment tal-oġġetti soġġetti għas-sisa, li tintuża għall-monitoraġġ tal-moviment tal-oġġetti soġġetti għas-sisa skont il-ftehimiet għas-sospensjoni tas-sisa, għall-monitoraġġ ta’ oġġetti soġġetti għas-sisa rilaxxati għall-konsum fit-territorju ta’ Stat Membru wieħed u li mbagħad jiġu trasferiti lejn it-territorju ta’ Stat Membru ieħor biex jiġu kkonsenjati għal finijiet kummerċjali. Dik l-estensjoni tal-użu tas-sistema kompjuterizzata għandha tibda tapplika fit-13 ta’ Frar 2023.

(2)

Sabiex tiġi riflessa dik l-estensjoni tal-użu tas-sistema kompjuterizzata, hemm bżonn li jiġi estiż il-kamp ta’ applikazzjoni tal-Artikolu 15(1), il-punt (d), l-Artikolu 19(4), l-ewwel subparagrafu, u l-Artikolu 20(1) tar-Regolament tal-Kunsill (UE) Nru 389/2012 (5) għall-oġġetti kollha soġġetti għas-sisa kkonċernati, irrispettivament minn jekk ikunx seħħ arranġament ta’ sospensjoni tad-dazju.

(3)

L-Artikolu 19(2), il-punt (c), tar-Regolament (UE) Nru 389/2012 jirrikjedi li fir-reġistri elettroniċi l-Istati Membri jżommu l-kategorija tal-prodotti soġġetti għas-sisa (CAT) u/jew il-kodiċi tal-prodott tas-sisa (EPC) tal-prodotti koperti mill-awtorizzazzjoni msemmija fl-Anness II, il-lista tal-kodiċijiet 11, tar-Regolament tal-Kummissjoni (KE) Nru 684/2009 (6). Madankollu, mit-13 ta’ Frar 2023, ir-Regolament (KE) Nru 684/2009 se jiġi sostitwit bir-Regolament Delegat tal-Kummissjoni (UE) 2022/1636 (7). Għalhekk huwa xieraq li dik is-sostituzzjoni tiġi riflessa fl-Artikolu 19(2), il-punt (c), tar-Regolament (UE) Nru 389/2012.

(4)

Minħabba li l-objettiv ta’ dan ir-Regolament, jiġifieri li jipprevedi l-iskambju tal-informazzjoni li kull Stat Membru jżomm fir-reġistru elettroniku dwar l-operaturi ekonomiċi li jmexxu oġġetti rilaxxati għall-konsum fit-territorju ta’ Stat Membru wieħed u li mbagħad jitmexxew lejn it-territorju ta’ Stat Membru ieħor sabiex jitwasslu hemmhekk għal finijiet kummerċjali, ma jistax jinkiseb b’mod suffiċjenti mill-Istati Membri iżda minħabba l-iskala tal-azzjoni, jiġifieri l-iżgurar tal-funzjonament armonizzat tas-sistema kompjuterizzata fl-Istati Membri kollha, pjuttost jista’ jinkiseb aħjar fil-livell tal-Unjoni peress li din tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F’konformità mal-prinċipju tal-proporzjonalità kif stabbilit fl-istess Artikolu, dan ir-Regolament ma jmurx lil hinn minn dak li hu meħtieġ biex jintlaħaq dak l-objettiv.

(5)

Dan ir-Regolament jirrispetta d-drittijiet fundamentali u josserva l-prinċipji rikonoxxuti mill-Karta tad-Drittijiet Fundamentali tal-Unjoni Ewropea, b’mod partikolari d-dritt għall-protezzjoni tad-data personali. L-ipproċessar ta’ din id-data mwettaq fil-qafas ta’ dan ir-Regolament ma jmurx lil hinn minn dak li hu meħtieġ u proporzjonat għall-finijiet tal-protezzjoni tal-interess fiskali leġittimu tal-Istati Membri.

(6)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (8).

(7)

Sabiex id-data tal-applikazzjoni ta’ dan ir-Regolament tiġi allinjata mad-data tal-applikazzjoni tal-Kapitolu V, it-Taqsima 2 tad-Direttiva (UE) 2020/262, u sabiex l-Istati Membri jingħataw biżżejjed żmien biex iħejju għall-bidliet li jirriżultaw minn dan ir-Regolament, jenħtieġ li dan japplika mit-13 ta’ Frar 2023.

(8)

Għalhekk ir-Regolament (UE) Nru 389/2012 jenħtieġ li jiġi emendat skont dan,