(1)

Abbażi ta’ valutazzjoni preliminari tar-riskji, ir-Regolament ta’ Implimentazzjoni tal-Kummissjoni (UE) 2018/2019 (2) jistabbilixxi lista ta’ pjanti, prodotti tal-pjanti u oġġetti oħra ta’ riskju għoli.

(2)

Ir-Regolament ta’ Implimentazzjoni tal-Kummissjoni (UE) 2018/2018 (3) jistabbilixxi regoli speċifiċi dwar il-proċedura li trid tiġi segwita sabiex issir valutazzjoni tar-riskji fuq il-pjanti, fuq il-prodotti tal-pjanti u fuq oġġetti oħra ta’ riskju għoli msemmija fl-Artikolu 42(4) tar-Regolament (UE) 2016/2031.

(3)

Wara valutazzjoni preliminari tar-riskji, fl-Anness tar-Regolament ta’ Implimentazzjoni (UE) 2018/2019 iddaħħlu 34 ġeneru u speċi waħda ta’ pjanti għat-tħawwil li joriġinaw mill-pajjiżi terzi kollha, bħala pjanti ta’ riskju għoli, li fosthom hemm il-ġeneru Prunus L..

(4)

Fit-18 ta’ Ottubru 2019, l-Ukrajna ressqet talba lill-Kummissjoni għall-esportazzjoni lejn l-Unjoni ta’ pjanti għat-tħawwil li jkunu bl-għeruq mikxufin, inattivi, u mingħajr weraq, tal-Prunus domestica mlaqqma fuq is-salvaġġ tal-Prunus cerasifera. It-talba kienet sostnuta mid-dossier tekniku rilevanti.

(5)

Fis-17 ta’ Mejju 2022, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika dwar il-valutazzjoni tar-riskji ta’ komodità tal-pjanti għat-tħawwil tal-Prunus domestica mill-Ukrajna (4). L-awtorità identifikat il-Lopholeucaspis japonica, l-Eotetranychus prunicola, l-Erwinia amylovora u x-Xanthomonas arboricola pv. pruni bħala pesti rilevanti għal dawk il-pjanti għat-tħawwil, evalwat il-miżuri ta’ mitigazzjoni tar-riskji deskritti fid-dossier u stmat il-probabbiltà tal-ħelsien tal-komodità minn dawk il-pesti.

(6)

Il-Lopholeucaspis japonica huwa pest elenkat bħala pest ta’ kwarantina fl-Unjoni fl-Anness II tar-Regolament ta’ Implimentazzjoni tal-Kummissjoni (UE) 2019/2072 (5). L-Erwinia amylovora u x-Xanthomonas arboricola pv. pruni huma elenkati bħala pesti ta’ kwarantina f’żona protetta u bħala pesti rregolati mhux ta’ kwarantina fl-Unjoni fl-Anness III u fl-Anness IV ta’ dak ir-Regolament rispettivament.

(7)

L-Eotetranychus prunicola għadu ma ddaħħalx fil-lista tal-pesti ta’ kwarantina fl-Unjoni. Madankollu, abbażi tal-evidenza pprovduta mill-Istati Membri, l-impatt ta’ dak il-pest fuq il-pjanti li jospitawh fl-Unjoni mhuwiex sinifikanti. Għaldaqstant, ma huma meħtieġa l-ebda rekwiżiti tal-importazzjoni fir-rigward ta’ dak il-pest.

(8)

Abbażi tal-opinjoni tal-Awtorità, ir-riskju fitosanitarju mill-introduzzjoni fl-Unjoni ta’ pjanti għat-tħawwil bl-għeruq mikxufin, inattivi, mingħajr weraq tal-Prunus domestica mlaqqma fuq is-salvaġġ tal-Prunus cerasifera li joriġinaw mill-Ukrajna, jitqies aċċettabbli, dment li jkun hemm konformità mar-rekwiżiti tal-importazzjoni rispettivi stabbiliti fl-Anness VII tar-Regolament ta’ Implimentazzjoni (UE) 2019/2072.

(9)

Għalhekk, huwa xieraq li l-pjanti għat-tħawwil bl-għeruq mikxufin, inattivi, mingħajr weraq tal-Prunus domestica mlaqqma fuq is-salvaġġ tal-Prunus cerasifera li joriġinaw mill-Ukrajna ma għadhomx meqjusa pjanti ta’ riskju għoli.

(10)

Għalhekk jenħtieġ li r-Regolament ta’ Implimentazzjoni (UE) 2018/2019 jiġi emendat kif xieraq.

(11)

Jenħtieġ li sabiex ikun hemm konformità mal-obbligi tal-Unjoni li jirriżultaw mill-Ftehim tal-Organizzazzjoni Dinjija tal-Kummerċ dwar l-Applikazzjoni ta’ Miżuri Sanitarji u Fitosanitarji (6), l-importazzjoni ta’ dawk il-komoditajiet tissokta kemm jista’ jkun malajr. Għalhekk, jenħtieġ li dan ir-Regolament jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

(12)

Il-miżuri previsti f’dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,