(1)

Skont l-Artikolu 18.1 tal-Istatut tas-Sistema Ewropea ta’ Banek Ċentrali u tal-Bank Ċentrali Ewropew, il-Bank Ċentrali Ewropew (BĊE) u l-banek ċentrali nazzjonali tal-Istati Membri li l-munita tagħhom hija l-euro (iktar ’il quddiem il-“BĊNi”) jistgħu jwettqu operazzjonijiet ta’ kreditu ma’ istituzzjonijiet ta’ kreditu u parteċipanti oħrajn fis-suq, bis-self ikun ibbażat fuq kollateral adegwat. Il-kundizzjonijiet ġenerali li taħthom il-BĊE u l-BĊNi jinsabu lesti biex jidħlu f’operazzjonijiet ta’ kreditu, inklużi l-kriterji li jiddeterminaw l-eliġibbiltà ta’ kollateral għall-finijiet ta’ operazzjonijiet ta’ kreditu tal-Eurosistema, huma stabbiliti fil-Linja Gwida (UE) 2015/510 tal-Bank Ċentrali Ewropew (BĊE/2014/60) (1).

(2)

L-assi kollha li huma eliġibbli għal operazzjonijiet ta’ kreditu tal-Eurosistema huma soġġetti għal miżuri speċifiċi tal-kontroll tar-riskju sabiex l-Eurosistema tkun protetta kontra telf finanzjarju f’ċirkustanzi li fihom il-kollateral jkollu jiġi rrealizzat minħabba avveniment ta’ inadempjenza ta’ kontroparti. Il-qafas ta’ kontroll tar-riskju tal-Eurosistema jiġi rrivedut regolarment sabiex tiġi żgurata protezzjoni adegwata. Bħala riżultat ta’ dik ir-reviżjoni regolari, il-Kunsill Governattiv iddeċieda fil-15 ta’ Lulju 2022 li jintroduċi ċerti bidliet fil-qafas tal-kontroll tar-riskju.

(3)

Il-Kunsill Governattiv iddeċieda li jkompli jneħħi gradwalment it-tnaqqis temporanju tal-haircuts fil-valutazzjoni li kienu ġew deċiżi bħala parti mill-miżuri temporanji ta’ taffija tal-kollateral meħuda mill-Eurosistema b’reazzjoni għaċ-ċirkostanzi ekonomiċi u finanzjarji eċċezzjonali assoċjati mat-tixrid tal-marda tal-coronavirus (COVID-19). Dan huwa t-tieni pass tat-tneħħija gradwali fit-tnaqqis tal-haircuts fil-valutazzjoni li ġie deċiż mill-Kunsill Governattiv fit-23 ta’ Marzu 2022, u se jikkonkludi tali tneħħija gradwali.

(4)

Peress li l-profil tar-riskju ta’ bonds koperti leġiżlattivi oħra u ta’ multi cédulas huwa simili għal dak ta’ bonds koperti jumbo, il-Kunsill Governattiv iddeċieda wkoll li jenħtieġ li dawn ikunu soġġetti għall-istess valutazzjonijiet tat-telf impost, u għalhekk il-bonds koperti leġiżlattivi kollha u l-multi cédulas għandhom jiġu inklużi fil-kategorija tal-haircut II u r-referenzi għal bonds koperti jumbo għandhom jitneħħew mil-Linja Gwida (UE) 2016/65 tal-Bank Ċentrali Ewropew (ECB/2015/35) (2).

(5)

Barra minn hekk, il-Kunsill Governattiv iddeċieda li jibdel l-allokazzjoni ta’ strumenti ta’ dejn maħruġa mill-Unjoni Ewropea minn kategorija haircut II għal kategorija haircut I, minħabba l-komparabbiltà tagħhom ma’ strumenti ta’ dejn fil-kategorija tal-aħħar f’termini ta’ pprezzar kif ukoll riskju tas-suq u tal-likwidità, meta jkun qed isir kontroll għall-klassifikazzjoni tal-kreditu jew il-maturità residwa ta’ strument. Dan huwa konformi mal-prinċipji tal-ġestjoni tar-riskju tal-protezzjoni, il-konsistenza, is-sempliċità u t-trasparenza li jirfdu t-tfassil tal-qafas kollaterali tal-Eurosistema, inklużi haircuts fil-valutazzjoni.

(6)

Sabiex ikun jista’ jsir trattament aktar granulari u xieraq tar-riskji assoċjati ma’ strumenti ta’ maturità twila, u b’hekk tittejjeb il-kopertura tar-riskju tal-iskeda ta’ haircuts, ġie deċiż li l-kategorija tal-istrumenti bl-itwal maturità residwa, (jiġifieri aktar minn għaxar snin ([10, ∞)) tinqasam fi tliet kategoriji ġodda, minn għaxar snin sa ħmistax-il sena ([10, 15)), minn ħmistax-il sena sa tletin snin ([15, 30)) u tletin sena jew aktar ([30, ∞)). Din id-deċiżjoni, flimkien mad-deċiżjoni li jiġi applikat tnaqqis fil-valutazzjoni teoretiku dipendenti fuq il-maturità, hija maħsuba wkoll biex ittejjeb il-granularità tal-kopertura tar-riskju ta’ dik il-valutazzjoni teoretika, li hija partikolarment rilevanti għall-istrumenti b’maturitajiet itwal.

(7)

Tqies ukoll neċessarju li tiġi speċifikata u aġġustata aktar id-definizzjoni tal-maturità residwa għall-bonds koperti għall-użu proprju, filwaqt li ssir distinzjoni bejn dawk bi struttura “soft bullet”, u dawk bi struttura pass-through kundizzjonali, sabiex tiġi evitata żieda mhux ġustifikata (jiġifieri mhux iġġustifikata minn kunsiderazzjonijiet ta’ riskju) fil-haircuts fil-valutazzjoni applikati għal dawn tal-aħħar, bħala konsegwenza tal-qsim imsemmi hawn fuq tal-kategorija ta’ strumenti ta’ dejn b’maturità twila fi tliet kategoriji distinti.

(8)

Barra minn hekk, il-Kunsill Governattiv iddeċieda li jissostitwixxi, kemm fil-qafas tal-kollateral permanenti kif ukoll f’dak temporanju, it-tnaqqis fil-valutazzjoni teoretiku fiss attwali ta’ 5 % applikabbli għal assi negozjabbli skont l-Artikolu 134 tal-Linja Gwida (UE) 2015/510 tal-Bank Ċentrali Ewropew (BĊE/2014/60) bi skeda ta’ tnaqqis gradwata fil-maturità, għall-assi negozjabbli kollha teoretikament ivvalutati ħlief dawk li jaqgħu taħt il-kategorija ta’ haircut I. Ir-raġuni għal dan hija li l-kollateral tal-Eurosistema jiġi protett b’mod aktar granulari kontra riskji tal-mudell li jirriżultaw minn valutazzjoni teoretika ta’ assi negozjabbli.

(9)

Barra minn hekk, bil-ħsieb li jiġu riflessi b’mod adegwat ir-riskji ta’ assi negozjabbli b’kupuni varjabbli, u biex tittejjeb il-protezzjoni tar-riskju tal-Eurosistema, ġie deċiż li l-klassifikazzjoni ta’ haircut ta’ assi negozjabbli tiġi allinjata ma’ kupun fiss u dawk b’kupun varjabbli minħabba li wrew livelli komparabbli ta’ riskju totali.

(10)

Għaldaqstant, il-Linja Gwida (UE) 2016/65 (BĊE/2015/35) għandha tiġi emendata kif meħtieġ,

(1)

fl-Artikolu 2, il-punti (a), (b) u (c) huma mibdula b’dan li ġej:

(2)

L-Artikolu 3 huwa mibdul b’dan li ġej:

(3)

L-Artikolu 4 huwa mibdul b’dan li ġej:

(4)

fl-Artikolu 5, il-paragrafu 5 huwa mibdul b’li ġej:

(5)

L-Anness jinbidel bl-Anness ta’ din il-Linja Gwida.