(1)

L-Artikolu 14(2), l-ewwel subparagrafu, tat-Trattat dwar l-Unjoni Ewropea (TUE) jistabbilixxi l-kriterji għall-kompożizzjoni tal-Parlament Ewropew, jiġifieri li n-numru tar-rappreżentanti taċ-ċittadini tal-Unjoni ma għandux jaqbeż is-seba’ mija u ħamsin, minbarra l-President, li r-rappreżentanza għandha tkun proporzjonalment digressiva, b’limitu minimu ta’ sitt membri għal kull Stat Membru, u li l-ebda Stat Membru ma għandu jiġi allokat iktar minn sitta u disgħin siġġu.

(2)

L-Artikolu 10 TUE jipprevedi, fost l-oħrajn, li l-funzjonament tal-Unjoni għandu jkun ibbażat fuq id-demokrazija rappreżentattiva, fejn iċ-ċittadini jkunu rappreżentati direttament fil-livell tal-Unjoni fil-Parlament Ewropew u l-Istati Membri jkunu rappreżentati mill-gvernijiet tagħhom, li huma stess ikunu demokratikament responsabbli lejn il-Parlamenti nazzjonali jew lejn iċ-ċittadini tagħhom, fil-Kunsill.

(3)

L-Artikolu 14(2) TUE għalhekk japplika fil-kuntest tal-arranġamenti istituzzjonali usa’ stabbiliti fit-Trattati, li jinkludu wkoll id-dispożizzjonijiet dwar teħid ta’ deċiżjonijiet fil-Kunsill.

(4)

Sa tmiem l-2026 u qabel il-proposta dwar il-kompożizzjoni tiegħu, jenħtieġ li l-Parlament Ewropew jipproponi metodu ta’ distribuzzjoni tas-siġġijiet oġġettiv, ġust, dejjiemi u trasparenti li jimplimenta l-prinċipju ta’ proporzjonalità digressiva, mingħajr preġudizzju għall-prerogattivi tal-istituzzjonijiet skont it-Trattati. Filwaqt li jitqies l-impatt ta’ żviluppi futuri possibbli, jenħtieġ li metodu bħal dan jissalvagwardja għadd massimu sostenibbli ta’ membri tal-Parlament Ewropew

(5)

L-awtorità baġitarja u l-Kummissjoni, fl-eżerċizzju tal-prerogattivi tagħhom skont il-proċedura baġitarja annwali, jenħtieġ li jiżguraw li ż-żieda fin-numru ta’ siġġijiet prevista minn din id-Deċiżjoni tkun newtrali għall-baġit fi ħdan it-Taqsima 1 tal-baġit ġenerali tal-Unjoni,

—

in-numru totali ta’ siġġijiet fil-Parlament Ewropew ma għandux jaqbeż is-750, minbarra l-President;

—

l-allokazzjoni tas-siġġijiet lill-Istati Membri għandha tkun digressivament proporzjonali b’limitu minimu ta’ sitt siġġijiet u limitu massimu ta’ 96 siġġu għal kull Stat Membru, filwaqt li tirrifletti kemm jista’ jkun id-daqsijiet tal-popolazzjonijiet rispettivi tal-Istati Membri;

—

il-proporzjonalità digressiva hija definita kif ġej: il-proporzjon bejn il-popolazzjoni u n-numru ta’ siġġijiet ta’ kull Stat Membru qabel l-ittondjar ’il fuq jew ’l isfel għall-eqreb numru sħiħ għandu jvarja skont il-popolazzjonijiet rispettivi tagħhom b’tali mod li kull Membru tal-Parlament Ewropew minn Stat Membru b’popolazzjoni ikbar jirrappreżenta iktar ċittadini minn kull Membru tal-Parlament Ewropew minn Stat Membru b’popolazzjoni iżgħar u, min-naħa l-oħra, iktar ma tkun kbira l-popolazzjoni ta’ Stat Membru, ikbar ikun id-dritt tiegħu għal numru kbir ta’ siġġijiet fil-Parlament Ewropew;

—

l-allokazzjoni tas-siġġijiet fil-Parlament Ewropew għandha tqis l-iżviluppi demografiċi fl-Istati Membri.