DEĊIŻJONI TAL-KUNSILL (UE) 2023/1794

tat-18 ta’ Settembru 2023

li tistabbilixxi l-pożizzjoni li għandha tittieħed f’isem l-Unjoni Ewropea fil-Kumitat dwar l-Akkwist Pubbliku dwar l-adozzjoni tar-regoli ta’ proċedura tiegħu għall-għażla tal-President

(Test b’rilevanza għaż-ŻEE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 207(4), l-ewwel subparagrafu, flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)

Il-Ftehim dwar l-Akkwist Pubbliku huwa ftehim plurilaterali, fi ħdan il-qafas tal-Organizzazzjoni Dinjija tal-Kummerċ, li għandu l-għan li jiftaħ is-swieq tal-akkwist pubbliku b’mod reċiproku fost il-Partijiet tiegħu. Il-verżjoni riveduta ta’ dak il-Ftehim daħlet fis-seħħ fis-6 ta’ April 2014 (“il-GPA Rivedut”).

(2)	L-Artikolu XXI:1 tal-GPA Rivedut jistabbilixxi Kumitat dwar l-Akkwist Pubbliku (“il-Kumitat”) bl-għan li jagħti l-opportunità lill-Partijiet li jikkonsultaw dwar kwalunkwe kwistjoni relatata mal-operat tal-GPA Rivedut jew mat-tkomplija tal-objettivi tiegħu.

(3)	L-Artikolu XXI:1 tal-GPA Rivedut jistipula li l-Kumitat għandu jeleġġi l-President tiegħu stess.

(4)	L-abbozz tar-regoli ta’ proċedura għall-għażla tal-President tqassam mill-Kumitat fit-12 ta’ Mejju 2023.

(5)	Jixraq li tiġi stabbilita l-pożizzjoni li għandha tittieħed f’isem l-Unjoni fil-Kumitat dwar l-adozzjoni tar-regoli ta’ proċedura tiegħu peress li dawk ir-regoli se jkunu vinkolanti għall-Unjoni.

(6)	Għalhekk, l-abbozz tar-regoli ta’ proċedura għall-għażla tal-President, imqassma mill-Kumitat fit-12 ta’ Mejju 2023, jenħtieġ li jiġu adottati sabiex jirregolaw il-funzjonament tal-Kumitat,

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed f’isem l-Unjoni Ewopea fil-Kumitat dwar l-Akkwist Pubbliku stabbilit mill-Ftehim dwar l-Akkwist Pubbliku għandha tkun li tappoġġa l-adozzjoni tar-regoli ta’ proċedura tiegħu għall-għażla tal-President.

It-test ta’ dawk ir-regoli ta’ proċedura huwa mehmuż ma’ din id-Deċiżjoni.

Artikolu 2

Din id-Deċiżjoni għandha tidħol fis-seħħ fid-data tal-adozzjoni tagħha.

Magħmul fi Brussell, it-18 ta’ Settembru 2023.

Għall-Kunsill

Il-President

L. PLANAS PUCHADES

Regoli ta' Proċedura għall-għażla tal-President tal-Kumitat tad-WTO dwar l-Akkwist Pubbliku (il-“Kumitat”)

(1)

Il-Partijiet għandhom jagħżlu President minn fost ir-rappreżentanti tagħhom fil-Kumitat dwar l-Akkwist Pubbliku fuq bażi annwali.

(2)

Il-Partijiet jistgħu jiddeċiedu li jestendu t-terminu tal-President, abbażi tal-pjan ta' ħidma tal-President għas-sena ta' wara.

(3)

Kandidat għandu jintgħażel bħala President abbażi tal-kapaċità, l-esperjenza, id-disponibbiltà u l-kompetenzi tal-kandidat biex jaqdi r-responsabbiltajiet assoċjati. Il-President ser iservi fil-kapaċità personali.

(4)

Il-President uxxenti għandu jagħmel konsultazzjonijiet biex jiffaċilita l-għażla. Jekk ma jkunx hemm President, il-Partijiet jistgħu jaħtru President interim bil-konsensus, jew jistiednu lill-Parti li kienet ipprovdiet il-President preċedenti biex tagħmel dawn il-konsultazzjonijiet.

(5)

Qabel il-konsultazzjonijiet jew matulhom, il-kandidat(i) għall-pożizzjoni tal-President għandhom jingħataw l-opportunità li jippreżentaw il-pjanijiet proposti lill-Partijiet għall-perjodu tal-presidenza tal-Kumitat.

(6)

Il-ħatra għandha ssir fl-ewwel laqgħa regolari tas-sena tal-Kumitat. Jekk il-kariga ta' President issir vakanti f'nofs sena, il-Partijiet għandhom ifittxu li jsibu sostituzzjoni fl-iqsar żmien possibbli.

(7)

Il-ħatra għandha tidħol fis-seħħ fi tmiem il-laqgħa prevista fil-paragrafu preċedenti. Jekk ma jkun hemm l-ebda President f'dak iż-żmien, il-ħatra għandha tidħol fis-seħħ immedjatament.

(8)

Il-President għandu jibqa' fil-kariga sa tmiem l-ewwel laqgħa regolari tas-sena kalendarja ta' wara, għajr meta l-President ma jkunx jista' jibqa' jservi jew jirriżenja qabel.

(9)

Jekk il-Partijiet ma jkunux jistgħu jilħqu konsensus dwar l-għażla ta' President, b'tali mod li l-Kumitat ma jkunx jista' jissodisfa l-obbligu tiegħu li jiltaqa' mill-inqas darba fis-sena, il-Kumitat jista' jaħtar President interim minn fost il-kandidati bil-konsensus, jew inkella jistieden lill-Parti li kienet ipprovdiet il-President preċedenti biex tiffaċilita il-laqgħat tal-Kumitat b'mod temporanju, sakemm ikun jista' jinħatar President.

(10)

Il-Partijiet jistgħu jiddeċiedu li jkomplu jikkumplimentaw dawn ir-regoli ta' proċedura. Ir-regoli ta' proċedura jistgħu jiġu rieżaminati fi żmien ħames snin mill-adozzjoni tagħhom.