(1)

Il-linji gwida li jinsabu fl-Arranġament dwar il-Krediti għall-Esportazzjoni Uffiċjalment Appoġġati (l-“Arranġament”), żviluppati fi ħdan il-qafas tal-Organizzazzjoni għall-Kooperazzjoni u l-Iżvilupp Ekonomiċi (‘OECD’), inkluż il-Ftehim Settorjali dwar il-Krediti għall-Esportazzjoni għall-Enerġija Rinnovabbli, il-Mitigazzjoni tat-Tibdil fil-Klima u l-Adattament għalih, u l-Proġetti tal-Ilma (il-“Ftehim Settorjali dwar it-Tibdil fil-Klima”) li jinsab fl-Anness IV tal-Arranġament, ġew trasposti u għalhekk saru legalment vinkolanti fl-Unjoni permezz tar-Regolament (UE) Nru 1233/2011 tal-Parlament Ewropew u tal-Kunsill (1).

(2)

Il-Parteċipanti fl-Arranġament (il-“Parteċipanti”)għandhom jaqblu dwar emendi għall-Ftehim Settorjali dwar it-Tibdil fil-Klima bl-objettiv li l-kamp ta’ applikazzjoni tiegħu jitkabbar u li l-Anness III tiegħu jiġi eżaminat mill-ġdid. Jenħtieġ li kull emenda tkun konformi mal-impenji internazzjonali tal-Unjoni skont il-Ftehim ta’ Pariġi u l-politika dwar il-klima tal-Unjoni.

(3)

Bħalissa, il-Ftehim Settorjali dwar it-Tibdil fil-Klima, li ġie aġġornat l-aħħar fl-2014, jiffoka biss fuq xi setturi tal-ġenerazzjoni u t-trażmissjoni tal-enerġija. Il-kamp ta’ applikazzjoni tal-Ftehim Settorjali dwar it-Tibdil fil-Klima jillimita l-impatt tal-Ftehim Settorjali dwar it-Tibdil fil-Klima u ma jappoġġax b’mod effettiv l-impenji tal-Parteċipanti skont il-Ftehim ta’ Pariġi jew l-ambizzjonijiet tal-Unjoni kif espressi fil-Patt Ekoloġiku Ewropew.

(4)

L-emendi proposti għall-Ftehim Settorjali dwar it-Tibdil fil-Klima jwessgħu l-kamp ta’ applikazzjoni tiegħu biex jiġu inklużi esportazzjonijiet minn setturi tal-industrija li bħalissa mhumiex koperti minnu. B’hekk, l-emendi jippermettu li l-esportazzjonijiet li jissodisfaw il-kriterji applikabbli minn firxa usa’ ta’ setturi tal-industrija jibbenefikaw mit-termini u l-kondizzjonijiet stabbiliti skont il-Ftehim Settorjali dwar it-Tibdil fil-Klima. Dan imbagħad jippermetti lill-aġenziji tal-kreditu għall-esportazzjoni mill-Unjoni u Parteċipanti oħra jkollhom rwol akbar fl-appoġġ tat-tranżizzjoni ekoloġika u jikkontribwixxu għall-kisba tal-objettivi tal-Ftehim ta’ Pariġi.

(5)

Skont l-Artikolu 9 tal-Ftehim Settorjali dwar it-Tibdil fil-Klima, il-Parteċipanti għandhom iwettqu rieżami tal-Appendiċi III sa tmiem l-2020, bil-ħsieb li jiġu vvalutati l-inizjattivi internazzjonali relatati mal-adattament, il-kundizzjonijiet tas-suq, u l-korp ta’ esperjenza żviluppat mill-proċess ta’ notifika biex jiġi ddeterminat jekk id-definizzjonijiet, il-kriterji, il-patti u l-kundizzjonijiet tal-proġett għandhomx jitkomplew u/jew jiġu emendati. Bħala parti mir-rieżami, deher ċar li l-kriterji għall-identifikazzjoni ta’ proġetti ta’ adattament, li bħalissa jirrikjedu li l-adattament ikun l-objettiv prinċipali tal-proġett, mhumiex adatti għal tranżazzjonijiet ta’ kreditu għall-esportazzjoni, li normalment jinvolvu wkoll attivitajiet kummerċjali biex jiġġeneraw fluss tal-flus. Konsegwentement, huwa xieraq li jiġu emendati l-kriterji għall-proġetti ta’ adattament stabbiliti fl-Appendiċi III tal-Ftehim Settorjali dwar it-Tibdil fil-Klima billi jiġu allinjati aktar mill-qrib mal-istandards użati mill-banek tal-iżvilupp.

(6)

Jixraq li tiġi stabbilita l-pożizzjoni li trid tittieħed f’isem l-Unjoni rigward id-deċiżjoni tal-Parteċipanti dwar emendi għall-Ftehim Settorjali dwar it-Tibdil fil-Klima, peress li d-deċiżjoni ser tkun vinkolanti fuq l-Unjoni u tista’ tinfluwenza b’mod determinanti l-kontenut tad-dritt tal-Unjoni, skont l-Artikolu 2 tar-Regolament (UE) Nru 1233/2011.

(7)

Jenħtieġ għaldaqstant li l-pożizzjoni tal-Unjoni tkun li jiġu appoġġati l-emendi abbażi tal-abbozz tal verżjoni konsolidata mehmuża tal-Ftehim Settorjali dwar it-Tibdil fil-Klima,