27.6.2023 |
MT |
Il-Ġurnal Uffiċjali tal-Unjoni Ewropea |
L 161/68 |
DEĊIŻJONI TAL-KUNSILL (PESK) 2023/1305
tas-26 ta’ Ġunju 2023
li temenda d-Deċiżjoni 2013/233/PESK dwar il-Missjoni tal-Unjoni Ewropea ta’ Assistenza għall-Ġestjoni Integrata tal-Fruntieri fil-Libja (EUBAM Libya)
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea, u b’mod partikolari l-Artikolu 42(4) u l-Artikolu 43(2) tiegħu,
Wara li kkunsidra l-proposta tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,
Billi:
(1) |
Fit-22 ta’ Mejju 2013, il-Kunsill adotta d-Deċiżjoni 2013/233/PESK (1) li tistabbilixxi l-Missjoni tal-Unjoni Ewropea ta’ Assistenza għall-Ġestjoni Integrata tal-Fruntieri fil-Libja (EUBAM Libya). |
(2) |
Fit-18 ta’ Ġunju 2021, il-Kunsill adotta d-Deċiżjoni (PESK) 2021/1009 (2), li temenda l-mandat ta’ EUBAM Libya u li testendih sat-30 ta’ Ġunju 2023. |
(3) |
Fil-kuntest tar-Rieżami Strateġiku tal-Missjoni, il-Kumitat Politiku u ta’ Sigurtà (KPS) qabel li EUBAM Libya jenħtieġ li tiġi estiża b’sentejn sat-30 ta’ Ġunju 2025 u li f’dan il-perjodu l-Missjoni jenħtieġ li tikkontribwixxi għat-tisħiħ tal-kapaċità tal-awtoritajiet u l-aġenziji Libjani rilevanti għall-ġestjoni tal-fruntieri tal-Libja, għall-ġlieda kontra l-kriminalità transfruntiera, inkluż it-traffikar tal-bnedmin u l-faċilitazzjoni ta’ dħul klandestin ta’ migranti, u għall-ġlieda kontra t-terroriżmu. |
(4) |
Il-perjodu kopert mill-ammont ta’ referenza finanzjarja previst mid-Deċiżjoni (PESK) 2021/1009 jenħtieġ li jiġi estiż sat-30 ta’ Settembru 2023. Il-Kunsill jenħtieġ li jiddeċiedi fi stadju aktar tard dwar ammont ta’ referenza għall-perjodu mill-1 ta’ Ottubru 2023 sat-30 ta’ Ġunju 2025. |
(5) |
Jenħtieġ li d-Deċiżjoni 2013/233/PESK tiġi emendata skont dan. |
(6) |
EUBAM Libya ser titmexxa fil-kuntest ta’ sitwazzjoni li tista’ tiddeterjora u li tista’ timpedixxi l-kisba tal-objettivi tal-azzjoni esterna tal-Unjoni kif jinsab fl-Artikolu 21 tat-Trattat, |
ADOTTA DIN ID-DEĊIŻJONI:
Artikolu 1
Id-Deċiżjoni 2013/233/PESK hija emendata kif ġej:
(1) |
L-Artikolu 2 huwa sostitwit b’dan li ġej: “Artikolu 2 Objettiv EUBAM Libya għandha tikkontribwixxi għat-tisħiħ tal-kapaċità tal-awtoritajiet u l-aġenziji Libjani rilevanti għall-ġestjoni tal-fruntieri tal-Libja, għall-ġlieda kontra l-kriminalità transfruntiera, inkluż it-traffikar tal-bnedmin u l-faċilitazzjoni ta’ dħul klandestin ta’ migranti, u għall-ġlieda kontra t-terroriżmu.” |
(2) |
fl-Artikolu 3, il-paragrafi 1 u 1a huma sostitwiti b’dan li ġej: “1. Sabiex jintlaħaq l-objettiv stipulat fl-Artikolu 2, EUBAM Libya għandha:
1a. Fit-twettiq tal-kompiti tagħha, EUBAM Libya għandha tipprovdi pariri tekniċi, attivitajiet ta’ tisħiħ tal-kapaċitajiet fil-livelli operazzjonali u tekniċi u għandha twettaq proġetti, ikkomplementati kif xieraq u skont il-każ permezz ta’ taħriġ speċjalizzat. Barra minn hekk, EUBAM Libya għandha tipprovdi pariri strateġiċi meta mitluba mill-awtoritajiet Libjani.” |
(3) |
fl-Artikolu 13(1), l-aħħar subparagrafu huwa sostitwit b’dan li ġej: “L-ammont ta’ referenza finanzjarja maħsub biex ikopri n-nefqa ta’ EUBAM Libya mill-1 ta’ Lulju 2021 sat-30 ta’ Settembru 2023 għandu jkun ta’ EUR 84 850 000. L-ammont ta’ referenza finanzjarja maħsub biex ikopri n-nefqa ta’ EUBAM Libya mill-1 ta’ Ottubru 2023 sat-30 ta’ Ġunju 2025 għandu jkun deċiż mill-Kunsill.”; |
(4) |
fl-Artikolu 16, it-tieni sentenza hija sostitwita b’dan li ġej: “Sat-30 ta’ Ġunju 2024, il-KPS għandu jwettaq valutazzjoni strateġika ta’ EUBAM Libya u l-mandat tagħha. Għandu jitwettaq rieżami strateġiku ta’ EUBAM Libya fi żmien xieraq qabel l-iskadenza ta’ din id-Deċiżjoni. Din id-Deċiżjoni għandha tapplika sat-30 ta’ Ġunju 2025.”. |
Artikolu 2
Din id-Deċiżjoni għandha tidħol fis-seħħ fid-data tal-adozzjoni tagħha.
Għandha tapplika mill-1 ta’ Lulju 2023.
Magħmul fil-Lussemburgu, is-26 ta’ Ġunju 2023.
Għall-Kunsill
Il-President
J. BORRELL FONTELLES
(1) Deċiżjoni tal-Kunsill 2013/233/PESK tat-22 ta’ Mejju 2013 dwar il-Missjoni tal-Unjoni Ewropea ta’ Assistenza għall-Ġestjoni Integrata tal-Fruntieri fil-Libja (EUBAM Libya) (ĠU L 138, 24.5.2013, p. 15).
(2) Id-Deċiżjoni tal-Kunsill (PESK) 2021/1009 tat-18 ta’ Ġunju 2021 li temenda d-Deċiżjoni 2013/233/PESK dwar il-Missjoni tal-Unjoni Ewropea ta’ Assistenza għall-Ġestjoni Integrata tal-Fruntieri fil-Libja (EUBAM Libya) (ĠU L 222, 22.6.2021, p. 18).