|
23.5.2023 |
MT |
Il-Ġurnal Uffiċjali tal-Unjoni Ewropea |
L 135/118 |
DEĊIŻJONI TAL-KUNSILL (PESK) 2023/993
tat-22 ta’ Mejju 2023
li tniedi l-Missjoni ta’ Sħubija tal-Unjoni Ewropea fil-Moldova (EUPM Moldova)
IL-KUNSILL TAL-UNJONI EWROPEA,
Wara li kkunsidra t-Trattat dwar l-Unjoni Ewropea u b’mod partikolari l-Artikolu 42(4) u l-Artikolu 43(2) tiegħu,
Wara li kkunsidra d-Deċiżjoni tal-Kunsill (PESK) 2023/855 tal-24 ta’ April 2023 dwar Missjoni ta’ Sħubija tal-Unjoni Ewropea fil-Moldova (EUPM Moldova) (1),
Wara li kkunsidra l-proposta mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,
Billi:
|
(1) |
Fl-24 ta’ April 2023, il-Kunsill adotta d-Deċiżjoni (PESK) 2023/855. |
|
(2) |
Fis-16 ta’ Mejju 2023, il-Kumitat Politiku u ta’ Sigurtà qabel li l-Pjan Operazzjonali (OPLAN), għal EUPM Moldova jenħtieġ li jiġi approvat. |
|
(3) |
Wara r-rakkomandazzjoni tal-Kmandant tal-Operazzjoni Ċivili ta’ EUPM Moldova, il-Missjoni jenħtieġ li titnieda fit-22 ta’ Mejju 2023. |
|
(4) |
Id-Deċiżjoni (PESK) 2023/855 ipprovdiet ammont ta’ referenza finanzjarja biex ikopri n-nefqa relatata ma’ EUPM Moldova matul l-ewwel erba’ xhur wara d-dħul fis-seħħ ta’ dik id-Deċiżjoni. L-ammont ta’ referenza jenħtieġ li jiġi rivedut biex ikopri t-tul tal-Missjoni, jiġifieri sal-21 ta’ Mejju 2025. Id-Deċiżjoni (PESK) 2023/855 jenħtieġ li tiġi emendata skont dan. |
|
(5) |
EUPM Moldova ser titwettaq fil-kuntest ta’ sitwazzjoni li tista’ tiddeterjora u li tista’ timpedixxi l-kisba tal-objettivi tal-azzjoni esterna tal-Unjoni kif stipulati fl-Artikolu 21 tat-Trattat dwar l-Unjoni Ewropea, |
ADOTTA DIN ID-DEĊIŻJONI:
Artikolu 1
L-OPLAN għal EUPM Moldova huwa b’dan approvat.
Artikolu 2
EUPM Moldova għandha titnieda fit-22 ta’ Mejju 2023.
Artikolu 3
Il-Kmandant tal-Operazzjoni Ċivili ta’ EUPM Moldova huwa b’dan awtorizzat b’effett immedjat biex jagħti bidu għall-eżekuzzjoni tal-Missjoni.
Artikolu 4
L-Artikolu 13(1) tad-Deċiżjoni (PESK) 2023/855 huwa b’dan sostitwit b’dan li ġej:
“1. L-ammont ta’ referenza finanzjarja maħsub biex ikopri n-nefqa relatata ma’ EUPM Moldova għall-perjodu mill-24 ta’ April 2023 sal-21 ta’ Mejju 2025 għandu jkun ta’ EUR 13 356 508,08. L-ammont ta’ referenza finanzjarja għal kull perjodu sussegwenti għandu jiġi deċiż mill-Kunsill.”.
Artikolu 5
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, it-22 ta’ Mejju 2023.
Għall-Kunsill
Il-President
J. BORRELL FONTELLES