(1)

Il-Ftehim dwar it-Trasport bl-Ajru bejn il-Komunità Ewropea u l-Istati Membri tagħha, min-naħa l-waħda, u l-Istati Uniti tal-Amerika, min-naħa l-oħra (1) (“il-Ftehim dwar it-Trasport bl-Ajru bejn l-UE u l-US”) ġie ffirmat fil-25 u fit-30 ta’ April 2007 (2) wara l-adozzjoni tad-Deċiżjoni 2007/339/KE tal-Kunsill u tar-Rappreżentanti tal-Gvernijiet tal-Istati Membri tal-Unjoni Ewropea, imlaqqgħin fi ħdan il-Kunsill. Dan ġie applikat b’mod provviżorju mit-30 ta’ Marzu 2008 u ġie konkluż permezz tad-Deċiżjoni tal-Kunsill (UE) 2020/1110 (3).Daħal fis-seħħ fid-29 ta’ Ġunju 2020. Ġie emendat permezz tal-Protokoll li jemenda l-Ftehim dwar it-Trasport bl-Ajru, iffirmat fil-25 u t-30 ta’ April 2007 (4) (‘il-Protokoll’), tal-24 ta’ Ġunju 2010, li daħal fis-seħħ fil-5 ta’ Mejju 2022. Il-Protokoll jipprevedi għall-adeżjoni ta’ pajjiżi terzi għall-Ftehim dwar it-Trasport bl-Ajru bejn l-UE u l-US.

(2)

L-Iżlanda u n-Norveġja huma membri kompletament integrati tas-suq uniku Ewropew tal-avjazzjoni permezz tal-Ftehim dwar iż-Żona Ekonomika Ewropea. Huma talbu formalment li jissieħbu fil-Ftehim dwar it-Trasport bl-Ajru bejn l-UE u l-US fl-2007. F’konformità mal-Artikolu 18(5) tal-Ftehim dwar it-Trasport bl-Ajru bejn l-UE u l-US, fil-laqgħa tiegħu tas-16 ta’ Novembru 2010 il-Kumitat Konġunt ippropona Ftehim dwar it-Trasport bl-Ajru bejn l-Istati Uniti tal-Amerika, bħala l-ewwel parti, l-Unjoni Ewropea u l-Istati Membri tagħha, bħala t-tieni parti, l-Iżlanda, bħala t-tielet parti, u r-Renju tan-Norveġja, bħala r-raba’ parti, (“il-Ftehim ta’ Adeżjoni”).

(3)

Il-Kummissjoni nnegozjat Ftehim Anċillari bejn l-Unjoni Ewropea u l-Istati Membri tagħha, bħala l-ewwel parti, l-Iżlanda, bħala t-tieni parti, u r-Renju tan-Norveġja, bħala t-tielet parti, dwar l-applikazzjoni tal-Ftehim dwar it-Trasport bl-Ajru bejn l-Istati Uniti tal-Amerika, bħala l-ewwel parti, l-Unjoni Ewropea u l-Istati Membri tagħha, bħala t-tieni parti, l-Iżlanda, bħala t-tielet parti, u r-Renju tan-Norveġja, bħala r-raba’ parti, (“il-Ftehim Anċillari”).

(4)

Fit-2 ta’ Mejju 2011, il-Kummissjoni adottat proposta għal deċiżjoni tal-Kunsill dwar l-iffirmar, f’isem l-Unjoni, u l-applikazzjoni provviżorja tal-Ftehim ta’ Adeżjoni u tal-Ftehim Anċillari.

(5)

Fis-16 ta’ Ġunju 2011, il-Kunsill u r-Rappreżentanti tal-Gvernijiet tal-Istati Membri tal-Unjoni Ewropea, imlaqqgħin fi ħdan il-Kunsill, adottaw id-Deċiżjoni 2011/708/UE (5) dwar l-iffirmar, f’isem l-Unjoni, u l-applikazzjoni provviżorja tal-Ftehim ta’ Adeżjoni (6) u tal-Ftehim Anċillari (7). L-Artikolu 3 ta’ dik id-Deċiżjoni pprovda għall-applikazzjoni provviżorja kemm tal-Ftehim ta’ Adeżjoni u kemm tal-Ftehim Anċillari mid-data tal-firma li seħħet fl-21 ta’ Ġunju 2011. Minn dik id-data dawn iż-żewġ ftehimiet qed jiġu applikati b’mod provviżorju.

(6)

Fis-sentenza tagħha tat-28 ta’ April 2015 fil-kawża C-28/12, Il-Kummissjoni vs Il-Kunsill (is-‘sentenza’) (8), il-Qorti tal-Ġustizzja annullat id-Deċiżjoni 2011/708/UE fuq il-bażi li l-Kunsill ma setax legalment jawtorizza l-iffirmar u l-applikazzjoni provviżorja tal-Ftehim ta’ Adeżjoni u tal-Ftehim Anċillari f’att adottat flimkien mar-rappreżentanti tal-Gvernijiet tal-Istati Membri imlaqqgħin fi ħdan il-Kunsill. Il-Qorti żammet l-effetti tad-Deċiżjoni 2011/708/UE sad-dħul fis-seħħ, fi żmien raġonevoli mill-għoti tas-sentenza, ta’ deċiżjoni ġdida li tiġi adottata mill-Kunsill skont l-Artikolu 218(5) u (8) tat-Trattat dwar il-Funzjonament tal-Unjoni Ewropea.

(7)

Sabiex ikun konformi mas-sentenza, il-Kunsill jenħtieġ li jadotta deċiżjoni ġdida dwar l-iffirmar u l-applikazzjoni provviżorja tal-Ftehim ta’ Adeżjoni u tal-Ftehim Anċillari, soġġett għall-konklużjoni tagħhom f’data aktar tard,