(1)

Ir-Regolament (UE) 2018/1861 u r-Regolament (UE) 2018/1862 jistabbilixxu r-regoli l-ġodda dwar l-istabbiliment, it-tħaddim u l-użu tas-Sistema ta’ Informazzjoni ta’ Schengen. Dawn iżidu l-effettività u jsaħħu l-effiċjenza teknika u operattiva tas-Sistema ta’ Informazzjoni ta’ Schengen u jestendu l-użu tagħha billi jintroduċu kategoriji u funzjonalitajiet ġodda ta’ twissija. Barra minn dan, ir-Regolament (UE) 2018/1860 tal-Parlament Ewropew u tal-Kunsill (3) stabbilixxa tip ġdid ta’ twissija mar-ritorn ta’ ċittadini ta’ pajjiżi terzi.

(2)

Ir-Regolament (UE) 2018/1861 jikkostitwixxi l-bażi legali għas-Sistema ta’ Informazzjoni ta’ Schengen fir-rigward ta’ kwistjonijiet li jaqgħu fil-kamp ta’ applikazzjoni tal-Kapitolu 2 tat-Titolu V tat-Tielet Parti tat-Trattat u r-Regolament (UE) 2018/1862 jikkostitwixxi l-bażi legali għas-Sistema ta’ Informazzjoni ta’ Schengen fir-rigward ta’ kwistjonijiet li jaqgħu fil-kamp ta’ applikazzjoni tal-Kapitoli 4 u 5 tat-Titolu V tat-Tielet Parti tat-Trattat. Il-fatt li l-bażi legali għas-Sistema ta’ Informazzjoni ta’ Schengen tikkonsisti fi strumenti separati ma jaffettwax il-prinċipju li s-Sistema ta’ Informazzjoni ta’ Schengen tikkostitwixxi sistema waħda ta’ informazzjoni li jeħtieġ li topera bħala tali.

(3)

Mid-dħul fis-seħħ tar-Regolamenti (UE) 2018/1860, (UE) 2018/1861 u (UE) 2018/1862, il-Kummissjoni, l-Istati Membri u l-Aġenzija tal-Unjoni Ewropea għat-Tmexxija Operattiva tas-Sistemi tal-IT Fuq Skala Kbira fl-Ispazju ta’ Libertà, Sigurtà u Ġustizzja (eu-LISA) lestew l-arranġamenti tekniċi u legali meħtieġa biex jimplimentaw ir-regoli l-ġodda kemm fil-livell ċentrali kif ukoll f’dak nazzjonali, biex ikunu jistgħu jipproċessaw id-data u jiskambjaw informazzjoni supplimentari skont ir-regoli l-ġodda.

(4)

Skont ir-Regolament (UE) 2018/1861 u r-Regolament (UE) 2018/1862, ir-regoli l-ġodda għandhom japplikaw fi stadji suċċessivi sabiex ikun hemm biżżejjed żmien biex jiġu stabbiliti l-miżuri u l-arranġamenti legali, operazzjonali u tekniċi meħtieġa. Fuq dik il-bażi, diversi dispożizzjonijiet tar-Regolamenti (UE) 2018/1861 u (UE) 2018/1862 bdew japplikaw fit-28 ta’ Diċembru 2018, fit-28 ta’ Diċembru 2019 u fit-28 ta’ Diċembru 2020, rispettivament. Fir-rigward tal-bidu tal-applikazzjoni tad-dispożizzjonijiet li jipprevedu l-aktar bidliet kumplessi li għandhom impatt ġenerali fuq l-implimentazzjoni teknika u l-operazzjonijiet tas-Sistema ta’ Informazzjoni ta’ Schengen, dawk ir-Regolamenti jipprevedu mekkaniżmu speċifiku għal bidu differit tal-applikazzjoni biex jiġi żgurat li dawk l-elementi jsiru applikabbli biss wara li jkunu ttieħdu l-passi preparatorji meħtieġa li jippermettu l-operazzjonijiet kontinwi u mhux interrotti tas-sistema.

(5)

F’konformità ma’ dak il-mekkaniżmu, il-Kummissjoni għandha tistabbilixxi d-data li fiha jibdew l-operazzjonijiet tas-Sistema ta’ Informazzjoni ta’ Schengen, wara verifika li l-kundizzjonijiet legali, tekniċi u operazzjonali stabbiliti fir-Regolamenti (UE) 2018/1860, (UE) 2018/1861 u (UE) 2018/1862 huma ssodisfati.

(6)

Il-Kummissjoni vverifikat li l-atti ta’ implimentazzjoni meħtieġa għall-applikazzjoni tar-Regolamenti (UE) 2018/1860, (UE) 2018/1861 u (UE) 2018/1862 ġew adottati; li l-Istati Membri nnotifikaw lill-Kummissjoni li huma għamlu l-arranġamenti tekniċi u legali meħtieġa biex jipproċessaw id-data tas-Sistema ta’ Informazzjoni ta’ Schengen u jiskambjaw informazzjoni supplimentari skont ir-Regolamenti msemmija u li eu-LISA nnotifikat lill-Kummissjoni dwar it-tlestija b’suċċess tal-attivitajiet kollha ta’ ttestjar fir-rigward tas-SIS Ċentrali u l-interazzjoni bejn funzjoni ta’ appoġġ tekniku tas-SIS Ċentrali (CS-SIS) u s-sistemi nazzjonali (N.SIS). Għalhekk huwa xieraq li tiġi stabbilita d-data li fiha għandhom jibdew l-operazzjonijiet tas-Sistema ta’ Informazzjoni ta’ Schengen skont ir-Regolamenti (UE) 2018/1860, (UE) 2018/1861 u (UE) 2018/1862.

(7)

Bis-saħħa tal-Artikolu 66(5) tar-Regolament (UE) 2018/1861 tal-Parlament Ewropew u tal-Kunsill u l-Artikolu 79(5) tar-Regolament (UE) 2018/1862 tal-Parlament Ewropew u tal-Kunsill, dawn ir-regolamenti għandhom japplikaw mid-data stabbilita f’din id-Deċiżjoni. Barra minn hekk, bis-saħħa tal-Artikolu 20 tar-Regolament (UE) 2018/1860 tal-Parlament Ewropew u tal-Kunsill, id-dispożizzjonijiet li jistabbilixxu tip ġdid ta’ twissija dwar ir-ritorn ta’ ċittadini ta’ pajjiżi terzi fis-Sistema ta’ Informazzjoni ta’ Schengen prevista f’dak ir-Regolament għandhom japplikaw mid-data ta’ bidu stabbilita f’din id-Deċiżjoni.

(8)

Peress li l-Kummissjoni għandha tistabbilixxi data futura li fiha jibdew l-operazzjonijiet tas-Sistema ta’ Informazzjoni ta’ Schengen, ma hemm l-ebda ħtieġa għal xi perjodu ta’ żmien intermedju bejn id-data tal-pubblikazzjoni u d-data tad-dħul fis-seħħ ta’ din id-Deċiżjoni. Għalhekk, din id-Deċiżjoni jenħtieġ li tidħol fis-seħħ fil-jum tal-pubblikazzjoni tagħha,

(9)

F’konformità mal-Artikoli 1 u 2 tal-Protokoll Nru 22 dwar il-pożizzjoni tad-Danimarka, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, id-Danimarka ma ħaditx sehem fl-adozzjoni tar-Regolament (UE) 2018/1861 u r-Regolament (UE) 2018/1862 u ma hijiex marbuta bihom jew soġġetta għall-applikazzjoni tagħhom. Madankollu, minħabba li r-Regolament (UE) 2018/1861 u r-Regolament (UE) 2018/1862 jimxu fuq il-passi tal-acquis ta’ Schengen, id-Danimarka, f’konformità mal-Artikolu 4 ta’ dak il-Protokoll, fis-26 ta’ April 2019 innotifikat id-deċiżjoni tagħha li timplimenta r-Regolament (UE) 2018/1861 u r-Regolament (UE) 2018/1862 fil-liġi nazzjonali tagħha. Għaldaqstant, id-Danimarka hija marbuta bid-dritt internazzjonali li timplimenta din id-Deċiżjoni.

(10)

L-Irlanda qed tieħu sehem f’din id-Deċiżjoni sa fejn tikkonċerna r-Regolament (UE) 2018/1862, f’konformità mal-Artikolu 5(1) tal-Protokoll Nru 19 dwar l-acquis ta’ Schengen integrat fil-qafas tal-Unjoni Ewropea, anness mat-Trattat dwar l-Unjoni Ewropea u mat-Trattat dwar il-Funzjonament tal-Unjoni Ewropea, u l-Artikolu 6(2) tad-Deċiżjoni tal-Kunsill 2002/192/KE (4), moqri flimkien mad-Deċiżjoni ta’ Implimentazzjoni tal-Kunsill (UE) 2020/1745 (5).

(11)

Fir-rigward tal-Iżlanda u n-Norveġja, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen fis-sens tal-Ftehim konkluż mill-Kunsill tal-Unjoni Ewropea u mir-Repubblika tal-Iżlanda u mir-Renju tan-Norveġja dwar l-assoċjazzjoni ta’ dawn tal-aħħar mal-implimentazzjoni, mal-applikazzjoni u mal-iżvilupp tal-acquis (6) ta’ Schengen li jaqgħu fi ħdan il-qasam imsemmi fil-punt (G) tal-Artikolu 1 tad-Deċiżjoni tal-Kunsill 1999/437/KE (7).

(12)

Fir-rigward tal-Iżvizzera, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen skont is-sens tal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, l-applikazzjoni u l-iżvilupp tal-acquis (8) ta’ Schengen, li jaqgħu fil-qasam imsemmi fl-Artikolu 1, il-punt G, tad-Deċiżjoni 1999/437/KE, moqri flimkien mal-Artikolu 3 tad-Deċiżjoni tal-Kunsill 2008/146/KE (9) u l-Artikolu 3 tad-Deċiżjoni tal-Kunsill 2008/149/ĠAI (10).

(13)

Fir-rigward tal-Liechtenstein, din id-Deċiżjoni tikkostitwixxi żvilupp tad-dispożizzjonijiet tal-acquis ta’ Schengen fis-sens tat-tifsira tal-Protokoll bejn l-Unjoni Ewropea, il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar l-adeżjoni tal-Prinċipat tal-Liechtenstein mal-Ftehim bejn l-Unjoni Ewropea, il-Komunità Ewropea u l-Konfederazzjoni Żvizzera dwar l-assoċjazzjoni tal-Konfederazzjoni Żvizzera mal-implimentazzjoni, mal-applikazzjoni u mal-iżvilupp tal-acquis (11) ta’ Schengen, li jaqgħu fi ħdan il-qasam imsemmi fil-punt (G) tal-Artikolu 1 tad-Deċiżjoni 1999/437/KE moqri flimkien mal-Artikolu 3 tad-Deċiżjoni tal-Kunsill 2011/350/UE (12) u l-Artikolu 3 tad-Deċiżjoni tal-Kunsill 2011/349/UE (13).

(14)

Fir-rigward tal-Bulgarija u tar-Rumanija, din id-Deċiżjoni tikkostitwixxi att li jibni fuq l-acquis ta’ Schengen jew li huwa b’xi mod ieħor relatat miegħu fis-sens tal-Artikolu 4(2) tal-Att tal-Adeżjoni tal-2005, u jenħtieġ li jinqara flimkien mad-Deċiżjonijiet tal-Kunsill 2010/365/UE (14) u (UE) 2018/934 (15).

(15)

Fir-rigward ta’ Ċipru, din id-Deċiżjoni tikkostitwixxi att li jibni fuq l-acquis ta’ Schengen jew li b’xi mod ieħor huwa relatat miegħu skont is-sens tal-Artikolu 3(2) tal-Att ta’ Adeżjoni tal-2003,