(1)

L-Artikolu 10 tar-Regolament Delegat tal-Kummissjoni (UE) 2018/389 (2) jipprevedi eżenzjoni mir-rekwiżit stabbilit fl-Artikolu 97 tad-Direttiva (UE) 2015/2366 biex tiġi applikata awtentikazzjoni qawwija tal-konsumatur meta utent ta’ servizzi ta’ pagament ikun qed jaċċessa l-bilanċ u t-tranżazzjonijiet reċenti ta’ kont ta’ pagament mingħajr divulgazzjoni ta’ data sensittiva dwar il-pagamenti. F’dak il-każ, il-fornituri ta’ servizzi ta’ pagament jitħallew ma japplikawx awtentikazzjoni qawwija tal-konsumatur biex jaċċessaw l-informazzjoni dwar il-kont, dment li tkun ġiet applikata awtentikazzjoni qawwija tal-konsumatur meta l-informazzjoni dwar il-kont tkun ġiet aċċessata għall-ewwel darba, u mill-inqas kull 90 jum wara dan.

(2)

L-użu ta’ dik l-eżenzjoni wassal għal prattiki diverġenti ħafna fl-applikazzjoni tar-Regolament Delegat (UE) 2018/389, fejn xi fornituri ta’ servizzi ta’ pagament li jamministraw il-kont jitolbu awtentikazzjoni qawwija tal-konsumatur kull 90 jum, oħrajn f’intervalli ta’ żmien iqsar, u xi wħud ma applikawx l-eżenzjoni u jitolbu awtentikazzjoni qawwija tal-konsumatur għal kull aċċess għal kont. Dik id-diverġenza wasslet għal stress mhux mixtieq fl-esperjenza tal-klijent meta juża servizzi ta’ informazzjoni dwar il-kontijiet u għal impatt negattiv fuq is-servizzi tal-fornituri ta’ servizzi ta’ informazzjoni dwar il-kontijiet.

(3)

Sabiex jiġi żgurat bilanċ xieraq bejn l-objettivi tad-Direttiva (UE) 2015/2366 li tittejjeb is-sigurtà, tiġi ffaċilitata l-innovazzjoni u tissaħħaħ il-kompetizzjoni fis-suq intern, jeħtieġ li tiġi speċifikata aktar l-applikazzjoni tal-eżenzjoni stabbilita fl-Artikolu 10 tar-Regolament Delegat (UE) 2018/389, għal każijiet fejn l-informazzjoni dwar il-kont tiġi aċċessata permezz ta’ fornitur ta’ servizzi ta’ informazzjoni dwar il-kontijiet. Għaldaqstant, f’każ bħal dan, il-fornituri ta’ servizzi ta’ pagament jenħtieġ li ma jitħallewx jagħżlu jekk japplikawx jew le l-awtentikazzjoni qawwija tal-konsumatur, u l-eżenzjoni jenħtieġ li ssir obbligatorja, soġġetta għal kundizzjonijiet li għandhom l-għan li jiżguraw li s-sikurezza u s-sigurtà tad-data tal-utenti ta’ servizzi ta’ pagament tkun qed tiġi ssodisfata.

(4)

L-eżenzjoni jenħtieġ li tkun limitata għall-aċċess għall-bilanċ u t-transazzjonijiet reċenti ta’ kont tal-ħlas mingħajr ma tiġi żvelata data sensittiva dwar il-pagamenti. L-eżenzjoni jenħtieġ li tapplika biss meta l-awtentikazzjoni qawwija tal-konsumatur tkun diġà ġiet applikata mill-fornituri ta’ servizzi ta’ pagament għall-ewwel aċċess permezz tal-fornitur ta’ servizzi ta’ informazzjoni dwar il-kontijiet rispettiv u jenħtieġ li tiġġedded perjodikament.

(5)

Sabiex jiġu żgurati s-sikurezza u s-sigurtà tad-data tal-utenti ta’ servizzi ta’ pagament, jenħtieġ li fi kwalunkwe ħin l-fornituri ta’ servizzi ta’ pagament jitħallew japplikaw awtentikazzjoni b’saħħitha tal-konsumatur meta jkollhom raġunijiet ġustifikati oġġettivament u evidenzjati kif xieraq relatati ma’ aċċess mhux awtorizzat jew frodulenti. Dan jista’ jkun il-każ fejn il-mekkaniżmi ta’ monitoraġġ tat-tranżazzjonijiet tal-fornitur ta’ servizzi ta’ pagament li jamministra l-kont jidentifikaw riskju għoli ta’ aċċess mhux awtorizzat jew frodulenti. Sabiex tiġi żgurata applikazzjoni konsistenti tal-eżenzjoni, il-fornituri ta’ servizzi ta’ pagament li jamministraw il-kont jenħtieġ li f’każijiet bħal dawn jiddokumentaw u jiġġustifikaw kif xieraq lill-awtorità kompetenti nazzjonali tagħhom, meta titlobhom jagħmlu dan, ir-raġunijiet għall-applikazzjoni tal-awtentikazzjoni qawwija tal-konsumatur.

(6)

Meta l-utent ta’ servizzi ta’ pagament jaċċessa direttament l-informazzjoni dwar il-kont, il-fornituri ta’ servizzi ta’ pagament jenħtieġ li jkomplu jitħallew jagħżlu jekk japplikawx l-awtentikazzjoni qawwija tal-konsumatur. Dan għaliex f’każijiet bħal dawn ma ġiet osservata l-ebda kwistjoni partikolari li teħtieġ emenda tal-eżenzjoni stabbilita fl-Artikolu 10 tar-Regolament Delegat (UE) 2018/389, għall-kuntrarju tal-każ ta’ aċċess permezz ta’ fornitur ta’ servizz ta’ informazzjoni dwar il-kontijiet.

(7)

Sabiex jiġu żgurati kundizzjonijiet ekwi fost il-fornituri kollha ta’ servizzi ta’ pagament, u f’konformità mal-objettivi tad-Direttiva (UE) 2015/2366 li tippermetti l-iżvilupp ta’ servizzi faċli għall-utent u innovattivi, huwa proporzjonat li tiġi stabbilita l-istess skeda ta’ żmien ta’ 180 jum kemm għat-tiġdid tal-awtentikazzjoni qawwija tal-konsumatur għall-aċċess għall-informazzjoni dwar il-kont direttament mal-fornitur ta’ servizzi ta’ pagament li jamministra l-kont kif ukoll permezz ta’ fornitur ta’ servizzi ta’ informazzjoni dwar il-kontijiet. It-tiġdid tal-awtentikazzjoni qawwija tal-konsumatur fil-frekwenza attwali jista’ jikkawża tensjoni mhux mixtieqa fl-esperjenza tal-klijent u jipprevjeni lill-fornituri ta’ servizzi ta’ informazzjoni dwar il-kontijiet milli joffru s-servizzi tagħhom u lill-utenti milli jingħataw dawk is-servizzi.

(8)

Il-fornituri ta’ servizzi ta’ pagament li jamministraw il-kont li joffru interfaċċa ddedikata u li jkunu implimentaw mekkaniżmu ta’ kontinġenza kif stabbilit fl-Artikolu 33(4) tar-Regolament Delegat (UE) 2018/389 jenħtieġ li ma jkunux obbligati jimplimentaw l-eżenzjoni obbligatorja l-ġdida fl-interfaċċi diretti tal-klijenti tagħhom għall-fini tal-mekkaniżmu ta’ kontinġenza, dment li ma japplikawx l-eżenzjoni stabbilita fl-Artikolu 10 tar-Regolament Delegat (UE) 2018/389 fl-interfaċċi diretti tal-klijenti tagħhom. Ikun sproporzjonat li l-fornituri ta’ servizzi ta’ pagament li jamministraw il-kont li joffru interfaċċja ddedikata li fiha jkollhom jimplimentaw l-eżenzjoni obbligatorja l-ġdida, ikunu meħtieġa jimplimentaw ukoll l-eżenzjoni fl-interfaċċi diretti tal-klijenti tagħhom għall-fini tal-mekkaniżmu ta’ kontinġenza.

(9)

Sabiex jiġi żgurat li l-fornituri ta’ servizzi ta’ pagament ikollhom biżżejjed żmien biex jagħmlu l-bidliet meħtieġa fis-sistemi tagħhom, il-fornituri ta’ servizzi ta’ pagament li jamministraw il-kont jenħtieġ li jqiegħdu għad-dispożizzjoni tal-fornituri ta’ servizzi ta’ pagament il-bidliet magħmula fl-ispeċifikazzjonijiet tekniċi tal-interfaċċi tagħhom sabiex jikkonformaw ma’ dan ir-Regolament mhux inqas minn xahrejn qabel ma jiġu implimentati dawn il-bidliet.

(10)

Għalhekk, ir-Regolament Delegat (UE) 2018/389 jenħtieġ li jiġi emendat skont dan.

(11)

Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea.

(12)

L-Awtorità Bankarja Ewropea wettqet konsultazzjonijiet pubbliċi miftuħin dwar l-abbozz tal-istandards tekniċi regolatorji li dan ir-Regolament huwa bbażat fuqhom, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (3).

(13)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u ta l-kummenti formali fis-7 ta’ Ġunju 2022.

(14)

Sabiex tkun tista’ ssir tranżizzjoni bla xkiel lejn ir-rekwiżiti l-ġodda stabbiliti f’dan ir-Regolament, il-fornituri tas-servizzi ta’ pagament li jkunu applikaw l-eżenzjoni stabbilita fl-Artikolu 10 tar-Regolament Delegat (UE) 2018/389 qabel id-data tal-applikazzjoni ta’ dan ir-Regolament jenħtieġ li jitħallew ikomplu japplikaw dik l-eżenzjoni sa 90 jum mill-aħħar darba li tkun ġiet applikata l-awtentikazzjoni qawwija tal-konsumatur,

(1)

L-Artikolu 10 huwa sostitwit b’dan li ġej:

(2)

jiddaħħal l-Artikolu 10 a li ġej:

(3)

fl-Artikolu 30, jiddaħħal il-paragrafu 4a li ġej: