(1)

L-ispeċifikazzjoni ta’ strumenti li jirreferenzjaw sottostanti eżotiku prevista fil-punt (a) tal-Artikolu 325u(2) tar-Regolament (UE) Nru 575/2013 hija ċara biżżejjed biex tippermetti lill-istituzzjonijiet jidentifikaw x’inhu sottostanti eżotiku għall-finijiet tal-kalkolu tar-rekwiżiti ta’ fondi proprji għal riskji residwi stabbiliti fl-Artikolu 325u. Għalhekk, mhi meħtieġa l-ebda speċifikazzjoni ulterjuri tat-tifsira ta’ sottostanti eżotiku.

(2)

B’mod partikolari, ir-riskju ta’ lonġevità, it-temp, id-diżastri naturali u l-volatilità realizzata futura jissodisfaw l-ispeċifikazzjoni ta’ sottostanti eżotiku, f’konformità mal-indikazzjoni pprovduta fil-qafas internazzjonali rilevanti definit mill-Kumitat ta’ Basel dwar is-Superviżjoni Bankarja (BCBS).

(3)

Id-definizzjoni ta’ strumenti li jġorru riskji residwi prevista fil-punt (b) tal-Artikolu 325u(2) tar-Regolament (UE) Nru 575/2013, mhijiex ċara biżżejjed biex tippermetti lill-istituzzjonijiet jidentifikaw ċerti strumenti li jġorru riskji residwi. Għalhekk, jenħtieġ li tiġi speċifikata lista ta’ strumenti li jġorru riskji residwi, għalkemm mhux eżawrjenti, biex jiġi żgurat ċertu livell ta’ armonizzazzjoni u konsistenza fit-trattament ta’ strumenti li jġorru dawk ir-riskji madwar l-Unjoni. L-elementi ta’ tali lista jenħtieġ li jintgħażlu b’kunsiderazzjoni tal-qafas internazzjonali rilevanti tal-BCBS. Għal strumenti oħra bi preżunzjoni li jġorru riskji residwi, jenħtieġ li l-istituzzjonijiet jivvalutaw jekk dawk l-istrumenti jissodisfawx id-definizzjoni stabbilita fl-Artikolu 325u(2), il-punt (b), ta’ dak ir-Regolament.

(4)

Minħabba n-natura mhux standard ta’ ħafna mill-istrumenti li jġorru riskju residwu, jenħtieġ li tiġi speċifikata wkoll lista mhux eżawrjenti ta’ riskji li fihom infushom ma għandhomx jiskattaw l-inklużjoni ta’ strument skont id-definizzjoni ta’ strumenti li jġorru riskji residwi sabiex jipprovdu ċertezza legali u trasparenza akbar. Madankollu, jenħtieġ li l-istituzzjonijiet jivvalutaw jekk strument espost għal dawk ir-riskji jistax jibqa’ jitqies bħala strument espost għal riskju residwu jekk l-istrument jissodisfa waħda mill-kundizzjonijiet l-oħra msemmija fl-Artikolu 325u(2) tar-Regolament (UE) Nru 575/2013.

(5)

Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-Awtorità Bankarja Ewropea.

(6)

L-Awtorità Bankarja Ewropea wettqet konsultazzjonijiet pubbliċi miftuħin dwar l-abbozz tal-istandards tekniċi regolatorji li dan ir-Regolament huwa bbażat fuqhom, analizzat l-ispejjeż u l-benefiċċji potenzjali relatati u talbet il-parir tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (2),

(a)

riskju li jirriżulta minn tranżazzjonijiet fejn l-obbligu ta’ konsenja jista’ jiġi ssodisfat fi ħdan firxa ta’ strumenti konsenjabbli u fejn il-kontroparti għandha l-possibbiltà li twassal l-inqas wieħed minn dawk l-istrumenti li huwa ta’ valur;

(b)

riskju ta’ bidla fil-volatilità implikata ta’ strument b’opzjonalità, relattiva għall-volatilità implikata ta’ strumenti oħra b’opzjonalità bl-istess sottostanti u maturità, iżda flus differenti;

(c)

riskju ta’ korrelazzjoni li jirriżulta minn opzjoni ta’ indiċi, fejn l-indiċi jissodisfa l-kundizzjonijiet stabbiliti fl-Artikolu 325i(3) tar-Regolament (UE) Nru 575/2013;

(d)

riskju ta’ korrelazzjoni li jirriżulta minn opzjoni f’impriża ta’ investiment kollettiv li tittraċċa parametru referenzjarju tal-indiċi, meta t-traċċar jissodisfa l-kundizzjonijiet stabbiliti fl-Artikolu 325j(2) tar-Regolament (UE) Nru 575/2013 u l-indiċi jissodisfa l-kundizzjonijiet stabbiliti fl-Artikolu 325i(3) ta’ dak ir-Regolament;

(e)

riskju ta’ dividendi li jirriżulta minn strument derivattiv li s-sottostanti tiegħu ma jikkonsistix biss f’pagamenti ta’ dividendi.