(1)

Ir-Regolament ta’ Delega tal-Kummissjoni (UE) Nru 153/2013 (2) jistabbilixxi standards tekniċi regolatorji dwar rekwiżiti għall-kontropartijiet ċentrali (central counterparties, CCPs) biex jaċċettaw kollateral likwidu ħafna b’riskju minimu ta’ kreditu u tas-suq.

(2)

L-iżviluppi politiċi u tas-suq riċenti wasslu għal żidiet sinifikanti fil-prezzijiet u fil-volatilità fis-swieq tal-enerġija, li wasslu għal żidiet sostanzjali fil-marġni minn kontropartijiet ċentrali (CCPs) biex ikopru l-iskoperturi relatati. Dawk iż-żidiet fil-marġni ħolqu pressjoni ta’ likwidità fuq kontropartijiet mhux finanzjarji, li tipikament ikollhom inqas assi likwidi biex jissodisfaw ir-rekwiżiti tal-marġini. B’konsegwenza ta’ dan, dawk il-kontropartijiet mhux finanzjarji ġew imġiegħla jnaqqsu l-pożizzjonijiet tagħhom jew iħalluhom mhux iħħeġġjati kif suppost, u dan jesponihom għal aktar varjazzjonijiet fil-prezzijiet.

(3)

Sabiex jiġi żgurat il-funzjonament bla xkiel tas-swieq finanzjarji u tal-enerġija tal-Unjoni fiċ-ċirkustanzi attwali u sabiex tittaffa l-pressjoni tal-likwidità fuq kontropartijiet mhux finanzjarji attivi fis-swieq regolati tal-gass u tal-elettriku kklerjati f’CCPs stabbiliti fl-Unjoni, jenħtieġ li l-aggregazzjoni ta’ kollateral eliġibbli disponibbli għall-membri tal-ikklerjar mhux finanzjarji tiġi estiża temporanjament biex tinkludi garanziji bankarji mhux kollateralizzati.

(4)

Sabiex jitrażżnu l-piżijiet tal-likwidità osservati fis-swieq tad-derivattivi tal-enerġija, jenħtieġ li l-garanziji maħruġa jew sostnuti minn entitajiet pubbliċi jitqiesu wkoll bħala kollateral eliġibbli għal kontropartijiet finanzjarji u mhux finanzjarji mis-CCP, minħabba li dawk il-garanziji għandhom riskju baxx ta’ kreditu tal-kontroparti u huma irrevokabbli, inkondizzjonati u jistgħu jiġu onorati fil-perjodu tal-likwidazzjoni tal-portafoll tal-membru tal-ikklerjar inadempjenti, u għalhekk iġorru riskju limitat ta’ likwidità.

(5)

Ir-riskji relatati ma’ espansjoni ta’ kollateral eliġibbli għal garanziji bankarji mhux kollateralizzati u garanziji pubbliċi huma mistennija li jibqgħu limitati, billi l-espansjoni tkun soġġetta għas-salvagwardji tal-ġestjoni tar-riskju tas-CCP u r-rekwiżiti applikabbli l-oħra kollha, kif stabbiliti fir-Regolament ta’ Delega (UE) Nru 153/2013, ikomplu japplikaw.

(6)

Għaldaqstant, jenħtieġ li r-Regolament ta’ Delega (UE) Nru 153/2013 jiġi emendat skont dan.

(7)

Sabiex jiġu limitati aktar ir-riskji assoċjati mal-aċċettazzjoni ta’ garanziji bankarji mhux kollateralizzati għal membri tal-ikklerjar mhux finanzjarji u garanziji pubbliċi għal membri tal-ikklerjar finanzjarji u mhux finanzjarji bħala kollateral, jenħtieġ li dawk il-miżuri jkunu ta’ natura temporanja u jingħataw għal perjodu ta’ 12-il xahar, filwaqt li jipprovdu solliev lill-parteċipanti fis-suq u jinċentivawhom biex jirritornaw fis-swieq.

(8)

Fid-dawl tal-iżviluppi riċenti tas-suq, huwa meħtieġ li l-aggregazzjoni ta’ kollateral eliġibbli disponibbli għall-membri tal-ikklerjar mhux finanzjarji tiġi estiża malajr kemm jista’ jkun. Għaldaqstant, jenħtieġ li dan ir-Regolament jidħol fis-seħħ b’urġenza.

(9)

Dan ir-Regolament huwa bbażat fuq abbozz ta’ standards tekniċi regolatorji ppreżentat lill-Kummissjoni mill-Awtorità Ewropea tat-Titoli u s-Swieq (ESMA), wara konsultazzjoni mal-Awtorità Bankarja Ewropea, mal-Bord Ewropew dwar ir-Riskju Sistemiku u mas-Sistema Ewropea ta’ Banek Ċentrali.

(10)

L-ESMA ma għamlet ebda konsultazzjoni pubblika miftuħa dwar l-abbozz tal-istandards tekniċi regolatorji li huma l-bażi tar-Regolament, u lanqas ma analizzat il-kostijiet u l-benefiċċji potenzjali billi dan kien ikun sproporzjonat fil-konfront tal-fini u tal-impatt tal-emendi li għandhom jiġu adottati, b’kunsiderazzjoni tan-natura urġenti u l-ambitu limitat tal-bidliet proposti. Minħabba l-urġenza, l-ESMA talbet il-parir tal-Grupp tal-Partijiet Interessati tat-Titoli u s-Swieq stabbilit f’konformità mal-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (3). Il-Grupp tal-Partijiet Interessati tat-Titoli u s-Swieq se jiġi infurmat b’dan skont dik id-dispożizzjoni,

(1)

Fl-Artikolu 39, jiżdied it-tieni paragrafu li ġej:

“Sad-29 ta’ Novembru 2023, għall-finijiet tal-Artikolu 46(1) tar-Regolament (UE) Nru 648/2012, il-garanziji pubbliċi li jissodisfaw il-kundizzjonijiet stabbiliti fl-Anness I għandhom jitqiesu bħala kollateral likwidu ħafna.”;

(2)

Fl-Artikolu 62, it-tieni paragrafu, tiżdied is-sentenza li ġejja:

“Madankollu, it-Taqsima 2, il-paragrafu 1, il-punt (h), tal-Anness I ma għandux japplika fir-rigward ta’ tranżazzjonijiet fuq derivattivi, kif imsemmi fl-Artikolu 2(4), il-punti (b) u (d), tar-Regolament (UE) Nru 1227/2011 mid-29 ta’ Novembru 2022 sad-29 ta’ Novembru 2023.”;

(3)

L-Anness I huwa emendat f’konformità mal-Anness ta’ dan ir-Regolament.