(1)

Ir-Regolament Delegat tal-Kummissjoni (UE) Nru 149/2013 (2) jispeċifika, fost l-oħrajn, il-valuri tal-limiti massimi għall-ikklerjar għall-fini tal-obbligu tal-ikklerjar.

(2)

Skont ir-raba’ subparagrafu tal-Artikolu 10(4) tar-Regolament (UE) Nru 648/2012, l-Awtorità Ewropea tat-Titoli u s-Swieq (European Securities and Markets Authority, ESMA) għandha tirrevedi perjodikament il-valuri ta’ dawk il-limiti minimi għall-ikklerjar u tipproponi standards tekniċi regolatorji biex temendahom. Dak ir-rieżami għandu jkun preċedut minn konsultazzjoni tal-Bord Ewropew dwar ir-Riskju Sistemiku (BERS) u awtoritajiet rilevanti oħra u għandu jqis, fejn meħtieġ, l-interkonnettività tal-kontropartijiet finanzjarji.

(3)

Għal xi ġuriżdizzjonijiet ta’ pajjiżi terzi, għadha ma ġiet adottata l-ebda deċiżjoni ta’ ekwivalenza kif imsemmi fl-Artikolu 2a tar-Regolament (UE) Nru 648/2012. B’riżultat ta’ dan, il-kuntratti eżegwiti fis-swieq f’dawk il-ġuriżdizzjonijiet ta’ pajjiżi terzi jitqiesu bħala OTC u, għalkemm jiġu kklerjati minn CCPs rikonoxxuti, jgħoddu għal-limiti minimi għall-ikklerjar. Barra minn hekk, il-prezzijiet tal-komoditajiet reċentement żdiedu, aggravati b’mod sinifikanti mill-aggressjoni militari Russa mhux provokata u mhux ġustifikata kontra l-Ukrajna. Dawk ir-raġunijiet jitolbu aġġustament korrispondenti tal-limitu minimu attwali għad-derivattivi tal-komoditajiet. Il-valur limitu minimu tal-ikklerjar għal pożizzjonijiet miżmuma f’derivattivi ta’ komoditajiet OTC jenħtieġ għalhekk li jiżdied minn EUR 3 biljun għal EUR 4 biljun.

(4)

Għalhekk, jenħtieġ li r-Regolament ta’ Delega (UE) Nru 149/2013 jiġi emendat skont dan.

(5)

Dan ir-Regolament huwa bbażat fuq rapport u l-abbozz tal-istandards tekniċi regolatorji ppreżentati mill-ESMA lill-Kummissjoni.

(6)

L-ESMA wettqet konsultazzjoni pubblika miftuħa dwar il-limiti minimi għall-ikklerjar għal klassijiet differenti ta’ assi u b’mod partikolari dwar il-limiti minimi għall-ikklerjar għall-klassijiet ta’ assi derivattivi tal-komoditajiet. Minħabba l-ambitu limitat tal-emenda u l-urġenza tagħha fid-dawl tal-prezzijiet tal-komoditajiet li qed jiżdiedu malajr, ikun sproporzjonat ħafna għall-ESMA li twettaq konsultazzjoni pubblika miftuħa addizzjonali dwar dan l-abbozz ta’ standards tekniċi regolatorji. L-ESMA kkonsultat lill-BERS skont ir-raba’ subparagrafu tal-Artikolu 10(4) tar-Regolament (UE) Nru 648/2012 u talbet il-parir tal-Grupp tal-Partijiet Interessati tat-Titoli u s-Swieq stabbilit f’konformità mal-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (3).

(7)

Minħabba ż-żieda reċenti fil-prezzijiet tal-komoditajiet u l-effett tagħha fuq kontropartijiet mhux finanzjarji li jieħdu pożizzjonijiet f’kuntratti tad-derivattivi tal-komoditajiet OTC, huwa meħtieġ li l-valur limitu minimu għall-ikklerjar jiġi aġġustat kemm jista’ jkun malajr għal pożizzjonijiet miżmuma minn kontropartijiet mhux finanzjarji f’derivattivi ta’ komoditajiet OTC. Fid-dawl tal-kriżi attwali tal-enerġija u l-inflazzjoni, l-ESMA għandha tivvaluta l-impatt tal-limitu minimu rivedut u tressaq emendi jekk jitqies meħtieġ u xieraq. Għaldaqstant jenħtieġ li dan ir-Regolament jidħol fis-seħħ b’urġenza,