(1)

L-Artikolu 15 tar-Regolament (UE) Nru 1380/2013 jistabbilixxi obbligu ta’ ħatt l-art għall-qabdiet tal-ispeċijiet kollha li huma soġġetti għal-limiti fuq il-qbid. Skont l-Artikolu 15(1)(d) tar-Regolament (UE) Nru 1380/2013, l-obbligu ta’ ħatt l-art għandu japplika għall-ispeċijiet li jiddefinixxu s-sajd sa mhux aktar tard mill-1 ta’ Jannar 2017. Il-barbun imperjali fil-Baħar l-Iswed huwa wieħed minn dawk l-ispeċijiet.

(2)

Fl-20 ta’ Ottubru 2016, il-Kummissjoni adottat ir-Regolament Delegat tal-Kummissjoni (UE) 2017/87 (2) li jistabbilixxi pjan għall-iskartar għas-sajd tal-barbun imperjali fil-Baħar l-Iswed, li ppreveda eżenzjoni tas-sopravivenza tal-barbun imperjali li jinqabad bl-għeżula tal-qiegħ. Dan kien japplika mill-1 ta’ Jannar 2017 sal-31 ta’ Diċembru 2019. Fil-25 ta’ Awwissu 2021, ġie adottat ir-Regolament Delegat tal-Kummissjoni (UE) 2021/2065 (3) li jistabbilixxi pjan ta’ skartar għas-sajd tal-barbun imperjali fil-Baħar l-Iswed, li japplika mill-1 ta’ Jannar 2022 sal-31 ta’ Diċembru 2022.

(3)

Il-Bulgarija u r-Rumanija għandhom interess ta’ ġestjoni dirett tas-sajd fl-isfruttar tal-barbun imperjali fil-Baħar l-Iswed. Fit-12 ta’ Frar 2021, dawk l-Istati Membri ressqu rakkomandazzjoni konġunta lill-Kummissjoni, fejn talbu t-tiġdid tal-pjan għall-iskartar u għall-eżenzjoni tas-sopravivenza tal-barbun imperjali li jinqabad bl-għeżula tal-qiegħ fil-Baħar l-Iswed. Fil-15 ta’ Lulju 2021, dawk l-Istati Membri ressqu rakkomandazzjoni konġunta aġġornata. F’konformità mal-Artikolu 3(3) tar-Regolament Delegat (UE) 2021/2065, fid-29 ta’ April 2022 u fl-10 ta’ Mejju 2022 dawk l-Istati Membri ressqu data addizzjonali dwar l-istimi tas-sopravivenza relatati mas-sajd bl-għeżula għall-barbun imperjali li jinqabad bl-għeżula tal-qiegħ fil-Baħar l-Iswed.

(4)

Il-Kumitat Xjentifiku, Tekniku u Ekonomiku għas-Sajd (4) (“STECF”) ivvaluta r-rakkomandazzjoni konġunta aġġornata mressqa u laqa’ l-isforzi li saru biex jitwettaq studju dwar is-sopravivenza tal-barbun imperjali fil-Baħar l-Iswed li ħares lejn il-vitalità tal-individwi maqbuda. L-STECF irrikonoxxa wkoll li d-data pprovduta hija siewja għall-valutazzjoni tas-sopravivenza tal-barbun imperjali. L-istudju li sar fl-ilmijiet Bulgari u Rumeni wera rata għolja ta’ vitalità (aktar minn 80 %) ta’ barbun imperjali maqbud f’għeżula tal-monofilamenti. F’dan il-kuntest, l-STECF ikkonkluda li s-sopravivenza hija għolja.

(5)

Fis-7 ta’ Lulju 2022, il-Bulgarija u r-Rumanija ressqu rakkomandazzjoni konġunta aġġornata dwar l-estensjoni tal-eżenzjoni ta’ sopravivenza għolja għall-barbun imperjali mill-obbligu ta’ ħatt l-art fil-Baħar l-Iswed għal sentejn.

(6)

Il-Kummissjoni tqis li l-evidenza ta’ sopravivenza murija fl-istudju msemmi hija għolja biżżejjed. Għalhekk, jenħtieġ li l-eżenzjoni skont l-Artikolu 15(4), il-punt (b), tar-Regolament (UE) Nru 1380/2013 tiġi estiża. Għaldaqstant, jenħtieġ li r-Regolament Delegat (UE) 2021/2065 jiġi emendat skont dan.

(7)

Billi l-miżuri previsti f’dan ir-Regolament għandhom impatt dirett fuq l-attivitajiet ekonomiċi marbuta mal-istaġun tas-sajd tal-bastimenti tal-Unjoni u fuq l-ippjanar ta’ dan l-istaġun tas-sajd, jenħtieġ li dan ir-Regolament jidħol fis-seħħ minnufih wara li jiġi ppubblikat. F’konformità mar-rakkomandazzjonijiet konġunti u meta jitqies il-qafas ta’ żmien stabbilit fl-Artikolu 15(1) tar-Regolament (UE) Nru 1380/2013, jenħtieġ li dan ir-Regolament japplika f’data aktar tard;