REGOLAMENT TA’ IMPLIMENTAZZJONI TAL-KUMMISSJONI (UE) 2022/2123

tat-13 ta’ Lulju 2022

li jistabbilixxi standards tekniċi ta’ implimentazzjoni għall-applikazzjoni tar-Regolament (UE) 2020/1503 tal-Parlament Ewropew u tal-Kunsill fir-rigward tal-formoli, il-mudelli u l-proċeduri standard għan-notifiki tar-rekwiżiti nazzjonali ta’ kummerċjalizzazzjoni applikabbli għall-fornituri ta’ servizzi ta’ finanzjament kollettiv mill-awtoritajiet kompetenti lill-ESMA

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2020/1503 tal-Parlament Ewropew u tal-Kunsill tas-7 ta’ Ottubru 2020 dwar fornituri Ewropej ta’ servizzi ta’ finanzjament kollettiv għan-negozji, u li jemenda r-Regolament (UE) 2017/1129 u d-Direttiva (UE) 2019/1937 (1), u b’mod partikolari it-tielet subparagrafu tal-Artikolu 28(5) tiegħu,

Billi:

(1)

Id-diverġenzi regolatorji bejn l-Istati Membri rigward ir-rekwiżiti nazzjonali dwar il-komunikazzjonijiet ta’ kummerċjalizzazzjoni jistgħu joħolqu ostakli għall-fornituri ta’ servizzi ta’ finanzjament kollettiv li joperaw madwar l-Unjoni. Formoli, mudelli u proċeduri standard għan-notifiki mill-awtoritajiet nazzjonali kompetenti lill-ESMA jiżguraw li l-pubblikazzjonijiet li għandhom isiru mill-ESMA skont l-Artikolu 28(6) tar-Regolament (UE) 2020/1503 ikunu ċari u jnaqqsu l-inċertezza legali. Sabiex jiġi ffaċilitat l-ipproċessar ta’ dawk in-notifiki u tiġi ffaċilitata l-ESMA biex tissodisfa r-rekwiżiti ta’ pubblikazzjoni stabbiliti fl-Artikolu 28(6) tar-Regolament (UE) 2020/1503, jenħtieġ li l-awtoritajiet kompetenti jkunu meħtieġa jinnotifikaw lill-ESMA, permezz ta’ indirizz iddedikat, f’perjodi ta’ żmien speċifiċi u bl-użu ta’ formoli u mudelli standard armonizzati.

(2)	Sabiex jiġi ffaċilitat l-ipproċessar tan-notifiki mill-ESMA, l-awtoritajiet kompetenti jenħtieġ li jużaw waħda miż-żewġ mudelli differenti, skont jekk jagħmlux notifika skont l-Artikolu 28(2) jew (3) tar-Regolament (UE) 2020/1503.

(3)	Dan ir-Regolament huwa bbażat fuq l-abbozz tal-istandards tekniċi ta’ implimentazzjoni ppreżentati mill-ESMA lill-Kummissjoni.

(4)

L-ESMA wettqet konsultazzjonijiet pubbliċi miftuħa dwar l-abbozz tal-istandards tekniċi ta’ implimentazzjoni li huma l-bażi ta’ dan ir-Regolament, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Interessati tat-Titoli u s-Swieq stabbilit f’konformità mal-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (2).

(5)	Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 tal-Parlament Ewropew u tal-Kunsill (3) u ta l-opinjoni tiegħu fl-1 ta’ Ġunju 2022,

ADOTTAT DAN IR-REGOLAMENT:

Artikolu 1

Punt ta’ kuntatt

L-ESMA għandha tikkomunika lill-awtoritajiet kompetenti d-dettalji ta’ kuntatt, inkluż l-indirizz elettroniku, li għandhom jintużaw għan-notifiki skont l-Artikolu 28(2) u (3) tar-Regolament (UE) 2020/1503.

Artikolu 2

Perjodu ta’ żmien

1. L-awtoritajiet kompetenti għandhom jagħmlu n-notifika msemmija fl-Artikolu 28(2) tar-Regolament (UE) 2020/1503 fi żmien xahrejn wara t-28 ta’ Novembru 2022.

2. L-awtoritajiet kompetenti għandhom jagħmlu n-notifika msemmija fl-Artikolu 28(3) tar-Regolament (UE) 2020/1503 qabel id-data tal-applikazzjoni fl-Istat Membru rilevanti tal-bidla li tkun qed tiġi nnotifikata.

Artikolu 3

Mudelli u sottomissjoni

1. Meta jagħmlu notifika skont l-Artikolu 28(2) tar-Regolament (UE) 2020/1503, l-awtoritajiet kompetenti għandhom jużaw il-mudell stabbilit fl-Anness I ta’ dan ir-Regolament.

2. Meta jagħmlu notifika skont l-Artikolu 28(3) tar-Regolament (UE) 2020/1503, l-awtoritajiet kompetenti għandhom jużaw il-mudell stabbilit fl-Anness II ta’ dan ir-Regolament.

3. L-awtoritajiet kompetenti għandhom jissottomettu l-mudelli msemmija fil-paragrafi 1 u 2 billi jużaw l-indirizz elettroniku pprovdut mill-ESMA skont l-Artikolu 1.

Artikolu 4

Dħul fis-seħħ

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-13 ta’ Lulju 2022.

Għall-Kummissjoni

Il-President

Ursula VON DER LEYEN

(1) ĠU L 347, 20.10.2020, p. 1.

(2) Ir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (ĠU L 331, 15.12.2010, p. 84).

(3) Ir-Regolament (UE) 2018/1725 tal-Parlament Ewropew u tal-Kunsill tat-23 ta’ Ottubru 2018 dwar il-protezzjoni ta’ persuni fiżiċi fir-rigward tal-ipproċessar ta’ data personali mill-istituzzjonijiet, korpi, uffiċċji u aġenziji tal-Unjoni u dwar il-moviment liberu ta’ tali data, u li jħassar ir-Regolament (KE) Nru 45/2001 u d-Deċiżjoni Nru 1247/2002/KE (ĠU L 295, 21.11.2018, p. 39).

ANNESS I

Mudell għan-notifiki msemmija fl-Artikolu 28(2) tar-Regolament (UE) 2020/1503

TAQSIMA A

Informazzjoni ġenerali

Data tan-notifika:

MINGĦAND:

Stat Membru:

Awtorità kompetenti:

Indirizz legali:

Dettalji tal-persuna responsabbli għan-notifika:

Isem:

Telefon:

Indirizz Elettroniku:

TAQSIMA B

Informazzjoni dwar il-liġijiet nazzjonali notifikati, regolamenti u d-dispożizzjonijiet amministrattivi applikabbli għall-komunikazzjonijiet ta’ kummerċjalizzazzjoni

Qasam	Sottoqasam		Deskrizzjoni
1	F’każ li notifika tinvolvi diversi miżuri nazzjonali, is-sottoqsma 1 sa 7 għandhom jiġu ripetuti u mimlija għal kull miżura nazzjonali notifikata.
	1	Tip ta’ miżura nazzjonali	Spjega jekk il-miżura nazzjonali notifikata hijiex liġi, regolament jew dispożizzjoni amministrattiva.
	2	Titolu uffiċjali bil-lingwa oriġinali tal-liġi, regolament jew dispożizzjoni amministrattiva nazzjonali notifikata applikabbli għall-komunikazzjonijiet ta’ kummerċjalizzazzjoni tal-fornituri ta’ servizzi ta’ finanzjament kollettiv
	3	Traduzzjoni tat-titolu uffiċjali tal-liġi, regolament jew dispożizzjoni amministrattiva prevista fil-punt 2 f’lingwa abitwali fl-isfera tal-finanzi internazzjonali
	4	Data tad-dħul fis-seħħ fis-sistema legali nazzjonali tal-liġi, regolament jew dispożizzjoni amministrattiva notifikati
	5	Iperlink għat-taqsima rilevanti tas-sit web uffiċjali tal-Istat Membru li fiha t-test sħiħ tal-liġi, regolament jew dispożizzjoni amministrattiva nazzjonali.
	6	Traduzzjoni tat-titolu uffiċjali tal-liġi, regolament jew dispożizzjoni amministrattiva nazzjonali (f’lingwa abitwali fl-isfera tal-finanzi internazzjonali)
	7	Informazzjoni addizzjonali (mhix obbligatorja)

ANNESS II

Mudell għan-notifiki msemmija fl-Artikolu 28(3) tar-Regolament (UE) 2020/1503