(1)

Il-provvisti tal-Unjoni ta’ ċerti prodotti tas-sajd fil-preżent jiddependu mill-importazzjonijiet minn pajjiżi terzi. F’dawn l-aħħar deċennji, l-Unjoni saret aktar dipendenti fuq l-importazzjonijiet biex tissodisfa l-konsum tal-prodotti tas-sajd. Sabiex ma titqiegħedx f’periklu l-produzzjoni tal-prodotti tas-sajd fl-Unjoni u sabiex tiġi żgurata provvista adegwata għall-industrija tal-ipproċessar tal-Unjoni, jenħtieġ li jitnaqqsu jew li jiġu sospiżi d-dazji tal-importazzjoni għal għadd ta’ prodotti tas-sajd fil-kuntest ta’ kwoti tariffarji ta’ volum xieraq.

(2)

Ir-Regolament tal-Kunsill (UE) 2020/1706 (1) jiftaħ u jipprevedi l-ġestjoni ta’ kwoti tariffarji awtonomi tal-Unjoni għal ċerti prodotti tas-sajd għall-perjodu mill-2021 sal-2023. Ġew stabbiliti volumi xierqa għal kull kwota tariffarja sabiex ikun żgurat li l-industrija tal-iproċessar tal-Unjoni jkollha provvista adegwata għal dak il-perjodu.

(3)

Fid-19 ta’ Lulju 2021, ir-Regolament (UE) 2020/1706 ġie emendat bir-Regolament tal-Kunsill 2021/1203 (2) billi, fost l-oħrajn, żdiedu kwoti ġodda li huma validi sal-31 ta’ Ottubru 2022, minħabba li skadew il-protokolli bilaterali mar-Repubblika tal-Iżlanda u mar-Renju tan-Norveġjali kienu jipprevedu l-kwoti għal ċertu ħut u għal ċerti prodotti tas-sajd.

(4)

Madankollu, in-negozjati ta’ protokolli ġodda addizzjonali mar-Repubblika tal-Iżlanda u mar-Renju tan-Norveġja li jipprevedu kwoti għal ċertu ħut u għal ċerti prodotti tas-sajd mhumiex ser ikunu konklużi qabel il-31 ta’ Ottubru 2022.

(5)

Għaldaqstant huwa neċessarju li jiġu stabbiliti kwoti ġodda li jibqgħu validi sa tmiem l-applikazzjoni tar-Regolament (UE) 2020/1706.

(6)

Għal raġunijiet ta’ urġenza sabiex jiġi evitat nuqqas ta’ materjali tas-sajd mingħajr dazju għall-ipproċessar fl-Unjoni, jenħtieġ li dan ir-Regolament jidħol fis-seħħ fil-jum wara dak tal-pubblikazzjoni tiegħu,