(1)

Fl-2021, diversi Stati Membri nnotifikaw lill-Kummissjoni dwar il-preżenza kkonfermata uffiċjalment, fil-kunsinni ta’ pjanti, prodotti tal-pjanti u oġġetti oħrajn li joriġinaw minn pajjiżi terzi, ta’ pesti li mhumiex elenkati bħala pest ta’ kwarantina fl-Unjoni, bħala pest ta’ kwarantina f’żona protetta jew bħala pest irregolat mhux ta’ kwarantina fl-Unjoni f’konformità mar-Regolament ta’ Implimentazzjoni tal-Kummissjoni (UE) 2019/2072 (2) u li mhumiex irregolati skont l-Artikolu 30(1) tar-Regolament (UE) 2016/2031.

(2)

Abbażi tad-data mill-valutazzjonijiet preliminari tar-riskju jew mill-analiżijiet tar-riskju mwettqa s’issa mill-awtoritajiet u l-organizzazzjonijiet kompetenti, il-Kummissjoni tikkonkludi li dawk il-pesti jissodisfaw il-kriterji stabbiliti fis-Sottotaqsima 2 tat-Taqsima 3 tal-Anness I tar-Regolament (UE) 2016/2031.

(3)

Chloridea virescens, Leucinodes orbonalis, Leucinodes pseudorbonalis, Resseliella citrifrugis u Spodoptera ornithogalli huma fost il-pesti li għalihom ittieħdu azzjonijiet mill-awtoritajiet kompetenti skont l-Artikolu 29(1) tar-Regolament (UE) 2016/2031. Dawk il-pesti ġew interċettati diversi drabi fil-fruntieri tal-Unjoni u mhumiex magħrufa li huma preżenti fit-territorju tal-Unjoni.

(4)

In-Netherlands wettqu valutazzjoni preliminari tar-riskju għall-Chloridea virescens (3) u analiżi tar-riskju tal-pesti għall-ispeċi Spodoptera Amerikana, li tinkludi l-iSpodoptera ornithogalli (4) , għat-territorju tal-Unjoni. It-tnejn li huma jikkonkludu li dawk il-pesti jissodisfaw il-kriterji għall-pesti ta’ kwarantina stabbiliti fit-Taqsima 1 tal-Anness I tar-Regolament (UE) 2016/2031, fir-rigward tat-territorju tal-Unjoni. Madankollu, hija meħtieġa valutazzjoni tar-riskju ulterjuri biex tiġi appoġġata l-inklużjoni tagħhom fl-Anness II tar-Regolament ta’ Implimentazzjoni (UE) 2019/2072.

(5)

Abbażi tal-kategorizzazzjonijiet tal-pesti mwettqa mill-Awtorità Ewropea dwar is-Sigurtà fl-Ikel (“l-Awtorità”) għal-Leucinodes orbonalis (5) u l-Leucinodes pseudorbonalis (6), dawk il-pesti jissodisfaw il-kriterji għall-pesti ta’ kwarantina stabbiliti fit-Taqsima 1 tal-Anness I tar-Regolament (UE) 2016/2031, fir-rigward tat-territorju tal-Unjoni. Madankollu, ġew indikati xi inċertezzi dwar l-impatt tagħhom minħabba l-adegwatezza klimatika. Valutazzjoni ulterjuri tal-adegwatezza klimatika, il-valutazzjoni tal-effett tat-tibdil fil-klima fuq l-istabbiliment ta’ dawk il-pesti fl-Unjoni u l-impatt sussegwenti tagħhom għadhom għaddejjin.

(6)

Abbażi tal-kategorizzazzjoni tal-pesti mwettqa mill-Awtorità, ir-Resseliella citrifrugis (7) jissodisfa l-kriterji għall-pesti ta’ kwarantina stabbiliti fit-Taqsima 1 tal-Anness I tar-Regolament (UE) 2016/2031, fir-rigward tat-territorju tal-Unjoni. Bħalissa għadha għaddejja valutazzjoni tar-riskju ulterjuri fir-rigward tal-mogħdijiet tad-dħul u tat-tixrid ta’ dan il-pest.

(7)

Dawk il-pesti ġew interċettati diversi drabi fil-fruntieri tal-Unjoni u volumi kbar tal-pjanti ospitanti tagħhom għadhom qed jiġu importati minn pajjiżi fejn dawk il-pesti huma magħrufa li huma preżenti, filwaqt li jippreżentaw riskju fitosanitarju għoli għat-territorju tal-Unjoni. Għalhekk jitqies li jeżisti periklu imminenti ta’ dħul ta’ dawk il-pesti fit-territorju tal-Unjoni. Għalhekk huwa xieraq li tittieħed il-miżura ta’ projbizzjoni temporanja tad-dħul tagħhom fl-Unjoni sakemm jitwettqu l-analiżijiet tar-riskju kollha. Jenħtieġ li dawk il-pesti jkunu soġġetti wkoll għal stħarriġiet ibbażati fuq ir-riskju fir-rigward tas-sinjali jew tas-sintomi tagħhom kif stabbilit fl-Artikolu 22(1) tar-Regolament (UE) 2016/2031.

(8)

Dan ir-Regolament jenħtieġ li japplika għal tul ta’ żmien suffiċjenti biex jippermetti t-tlestija ta’ dawk il-valutazzjonijiet u l-analiżijiet tar-riskju.

(9)

Id-dispożizzjonijiet ta’ dan ir-Regolament huma skont l-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,