(1)

Ir-Regolament tal-Kummissjoni (UE) Nru 231/2012 (3) jistabbilixxi l-ispeċifikazzjonijiet għall-addittivi tal-ikel elenkati fl-Annessi II u III tar-Regolament (KE) Nru 1333/2008.

(2)

L-ispeċifikazzjonijiet tal-addittivi tal-ikel jistgħu jiġu aġġornati f’konformità mal-proċedura komuni msemmija fl-Artikolu 3(1) tar-Regolament (KE) Nru 1331/2008, fuq inizjattiva tal-Kummissjoni jew wara applikazzjoni minn Stat Membru jew minn parti interessata.

(3)

L-ossidu tal-etilen huwa sustanza kimika importanti li għandha diversi użi, inkluż l-użu bħala aġent tal-isterilizzazzjoni kif ukoll bħala materja prima fil-manifattura ta’ diversi prodotti. L-ossidu tal-etilen, madankollu, huwa sustanza ta’ tħassib ikklassifikata bħala karċinoġenika, mutaġenika u tossika għar-riproduzzjoni f’konformità mar-Regolament (KE) Nru 1272/2008 tal-Parlament Ewropew u tal-Kunsill (4). La huwa approvat bħala prodott bijoċidali skont ir-Regolament (UE) Nru 528/2012 tal-Parlament Ewropew u tal-Kunsill (5) u lanqas bħala sustanza attiva għall-użu fil-prodotti għall-protezzjoni f’konformità mar-Regolament (KE) Nru 1107/2009 tal-Parlament Ewropew u tal-Kunsill (6).

(4)

Ir-Regolament (UE) Nru 231/2012 jipprevedi li l-ossidu tal-etilen ma jistax jintuża għal għanijiet ta’ sterilizzazzjoni fl-addittivi tal-ikel. Madankollu, ma hemm l-ebda limitu kwantifikat għall-preżenza tal-ossidu tal-etilen fir-rigward tal-addittivi kollha tal-ikel. F’konformità ma’ dak ir-Regolament, huwa stabbilit limitu ta’ mhux aktar minn 0,2 mg/kg tal-ossidu tal-etilen għal dawk l-addittivi tal-ikel biss, li fil-produzzjoni tagħhom jintuża l-ossidu tal-etilen. Dak il-limitu ġie stabbilit għall-ewwel darba permezz tad-Direttiva tal-Kummissjoni 2003/95/KE (7), abbażi tal-Opinjoni tal-Kumitat Xjentifiku dwar l-Ikel tas-6 ta’ Mejju 2002 (8), li kkonkludiet li filwaqt li l-konsum stmat mill-ftit addittivi tal-ikel manifatturati bl-użu tal-ossidu tal-etilen huwa baxx ħafna, jenħtieġ li l-konsum mis-sorsi tal-ikel ikun baxx kemm jista’ jkun peress li l-ossidu tal-etilen huwa kemm ġenotossiku kif ukoll karċinoġeniku.

(5)

Dan l-aħħar, kien hemm diversi notifiki tal-RASFF dwar is-sejbiet tal-ossidu tal-etilen f’għadd ta’ prodotti tal-ikel, u b’mod partikolari f’għadd ta’ addittivi tal-ikel użati għall-manifattura ta’ varjetà ta’ prodotti tal-ikel. Abbażi ta’ dawk in-notifiki u tal-informazzjoni rigward il-kontrolli uffiċjali mwettqa mill-Istati Membri, ir-Regolament ta’ Implimentazzjoni tal-Kummissjoni (UE) 2021/2246 (9) stabbilixxa miżuri fir-rigward tal-oġġetti ta’ oriġini mhux mill-annimali li jidħlu fl-Unjoni minn ċerti pajjiżi terzi sabiex tiġi protetta s-saħħa tal-bniedem b’rabta mal-possibbiltà tar-riskju tal-kontaminazzjoni bl-ossidu tal-etilen. Madankollu, fir-rigward tal-addittivi tal-ikel, l-infurzar tad-dritt tal-Unjoni jista’ joħloq diffikultajiet, peress li huwa diffiċli li jiġi stabbilit jekk il-preżenza tal-ossidu tal-etilen tirriżultax mill-użu tiegħu fl-isterilizzazzjoni tal-addittivi tal-ikel, bi ksur tar-Regolament (UE) Nru 231/2012 jew minn kwalunkwe raġuni oħra.

(6)

Sabiex jiġu evitati dawk id-diffikultajiet u jiġi żgurat livell għoli ta’ protezzjoni tas-saħħa tal-bniedem, huwa xieraq li jiġi stabbilit li l-preżenza tal-ossidu tal-etilen, irrispettivament mill-oriġini tiegħu, mhuwiex awtorizzat għall-addittivi kollha tal-ikel. Għal dan l-iskop, jenħtieġ li jiġi stabbilit limitu massimu għar-residwi tal-ossidu tal-etilen, li jkun speċifiku għall-addittivi tal-ikel. Dan il-limitu massimu għandu jiġi stabbilit fil-limitu tal-kwantifikazzjoni f’dawk il-prodotti, jiġifieri, il-konċentrazzjoni tar-residwu l-aktar baxxa vvalidata, li attwalment tista’ tiġi kkwantifikata u rrapportata permezz tal-monitoraġġ ta’ rutina b’metodi ta’ kontroll ivvalidati. Sabiex tiġi żgurata l-konsistenza mar-Regolament (KE) Nru 396/2005 tal-Parlament Ewropew u tal-Kunsill (10), b’mod partikolari, mal-limiti li jistabbilixxi għall-materja prima użata għall-produzzjoni tal-addittivi tal-ikel, jenħtieġ li r-residwi tal-ossidu tal-etilen jiġu definiti bl-istess termini bħal f’dak ir-Regolament.

(7)

Filwaqt li jitqies li l-emenda tal-ispeċifikazzjonijiet mhux mistennija li jkollha l-ebda effett negattiv fuq is-saħħa tal-bniedem, mhix meħtieġa evalwazzjoni tas-sikurezza mill-Awtorità Ewropea dwar is-Sigurtà fl-Ikel, f’konformità mal-Artikolu 3(2) tar-Regolament (KE) Nru 1331/2008.

(8)

Għalhekk, jenħtieġ li l-Anness tar-Regolament (UE) Nru 231/2012 jiġi emendat skont dan.

(9)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,