(1)

L-Artikolu 5 tar-Regolament (UE) 2019/787 jipprevedi d-definizzjoni tal-alkoħol etiliku ta’ oriġini agrikola, li l-industrija tgħidlu wkoll alkoħol agrikolu, alkoħol newtrali jew alkoħol rettifikat, u r-rekwiżiti għalih. Dik id-definizzjoni teknika u dawk ir-rekwiżiti ġew riportati mingħajr ebda bidla sostanzjali minn dawk stabbiliti fil-punt 1 tal-Anness I tar-Regolament (KE) Nru 110/2008 tal-Parlament Ewropew u tal-Kunsill (2).

(2)

Madankollu, id-definizzjoni tal-alkoħol etiliku ta’ oriġini agrikola u r-rekwiżiti għalih previsti fl-Artikolu 5 tar-Regolament (UE) 2019/787 huma parzjalment skaduti mil-lat tekniku u xjentifiku. B’mod partikolari, il-livelli massimi ta’ ċerti residwi jeħtieġ li jinġiebu f’konformità mal-parametri tekniċi użati bħalissa mill-industrija u mill-biċċa l-kbira tal-laboratorji tal-analiżi. Għalhekk, il-progress teknoloġiku f’dan il-qasam jiġġustifikaw il-ħtieġa ta’ dik id-definizzjoni u dawk ir-rekwiżiti jiġu emendati.

(3)

Ir-referenzi għal “aċidità totali”, “bażijiet volatili li fihom in-nitroġenu” u “estratt niexef” previsti fl-Artikolu 5(d)(i), (vi) u (vii) tar-Regolament (UE) 2019/787 ma għadhomx rilevanti peress li normalment ma jintużawx bħala parametri tekniċi tal-proċessi, minħabba li l-preżenza ta’ tali residwi f’alkoħol b’saħħa ta’ 96 % skont il-volum hija negliġibbli u x’aktarx ma tinstabx fl-alkoħol etiliku ta’ oriġini agrikola.

(4)

Fir-rigward tal-“esteri”, tal-“aldeidi” u tal-“alkoħols ogħla”, il-livelli massimi previsti fl-Artikolu 5(d)(ii), (iii) u (iv) tar-Regolament (UE) 2019/787 huma nieqsa mill-ispeċifiċità u bħalissa jirrikjedu metodi mxarrba tal-kimika, li mhumiex iddefiniti fid-dritt tal-Unjoni. Definizzjoni aktar preċiża tas-sustanzi li għalihom japplikaw il-limiti tar-residwi tista’ ttejjeb ir-riżultati tal-analiżijiet li jridu jitwettqu fuq l-alkoħol etiliku ta’ oriġini agrikola b’metodi bħall-kromatografija b’fażi gassuża, u tkun ta’ benefiċċju għall-analisti peress li ħafna mit-tekniki ta’ analiżi aktar antiki jeħtieġu l-użu ta’ sustanzi kimiċi perikolużi.

(5)

B’mod partikolari, huwa xieraq li l-esteri jiġu limitati għall-“aċetat etiliku” biss. Filwaqt li ħafna esteri jistgħu jiġu ffurmati fil-proċess ta’ fermentazzjoni, dak li jeżisti fl-ogħla konċentrazzjoni huwa l-aċetat etiliku, filwaqt li l-esteri l-oħra li jistgħu jkunu preżenti fl-alkoħol etiliku ta’ oriġini agrikola x’aktarx li ma jkunux jistgħu jiġu detetti bl-użu ta’ tekniki analitiċi standard u l-kontribuzzjoni tagħhom għall-ammont totali tal-esteri huwa negliġibbli. Il-kejl tal-aċetat etiliku jenħtieġ li jkun ibbażat fuq il-metodu ta’ referenza stabbilit fir-Regolament tal-Kummissjoni (KE) Nru 2870/2000 (3) peress li dan huwa metodu stabbilit li bħalissa qed jintuża għall-analiżi ta’ għadd ta’ xarbiet spiritużi.

(6)

Bl-istess mod, l-aldeid ewlieni li jikkontribwixxi għall-aldeidi totali huwa l-“aċetaldeid”. Għalhekk huwa xieraq li jintuża biss l-aċetaldeid bħala l-parametru f’din id-determinazzjoni. Peress li l-aċetaldeid huwa f’ekwilibriju ma’ 1,1 dietossietan, jiġifieri ż-żewġ molekuli huma t-tnejn preżenti u jikkonvertu waħda fl-oħra minħabba l-kundizzjonijiet fiżiċi kimiċi, jenħtieġ ukoll li tingħadd il-frazzjoni tal-aċetaldeid li tinsab fl-aċetal. Il-kejl tal-aċetaldeid għandu jkun ibbażat fuq il-metodu ta’ referenza stabbilit fir-Regolament (KE) Nru 2870/2000 peress li dan huwa metodu stabbilit li qed jintuża bħalissa għall-analiżi ta’ għadd ta’ xarbiet spiritużi.

(7)

Wara l-fermentazzjoni jkun hemm preżenti ammonti sostanzjali ta’ alkoħols ogħla. Madankollu, fl-alkoħol etiliku ta’ oriġini agrikola jkun hemm preżenti ammont żgħir biss ta’ alkoħols ogħla peress li l-alkoħols ogħla huma faċilment distillati minħabba l-punti tat-togħlija ogħla. Il-kejl tal-alkoħol ogħla għandu jkun ibbażat fuq il-metodu ta’ referenza stabbilit fir-Regolament (KE) Nru 2870/2000 peress li dan huwa metodu stabbilit li qed jintuża bħalissa għall-analiżi ta’ għadd ta’ xarbiet spiritużi.

(8)

Fir-rigward tal-“furfural”, ir-rekwiżit attwali li ma huwiex detettabbli jirreferi għal metodu kimiku mxarrab li ma għadux jintuża fil-biċċa l-kbira tal-Istati Membri, u b’hekk jipprevjeni metodi u riżultati ta’ analiżi uniformi u ddefiniti. Peress li bħalissa ma hemm l-ebda metodu ta’ referenza ddefinit għall-analiżi tal-furfural fl-alkoħol etiliku ta’ oriġini agrikola, huwa xieraq li jiġi ddefinit limitu li jista’ jinkiseb bil-metodi diversi li jintużaw bħalissa fil-biċċa l-kbira tal-laboratorji fl-Istati Membri, li huma aktar preċiżi mill-inklużjoni oriġinali ta’ dak ir-rekwiżit. Il-kejl tal-furfural għandu jkun ibbażat fuq il-metodu tal-kromatografija likwida għall-komposti tal-injam stabbilit fir-Regolament (KE) Nru 2870/2000.

(9)

Barra minn hekk, għal raġunijiet ta’ kompletezza u f’konformità mad-definizzjoni ta’ distillat ta’ oriġini agrikola stabbilita fl-Artikolu 4(7) tar-Regolament (UE) 2019/787, huwa xieraq li jiġi previst li l-alkoħol etiliku ta’ oriġini agrikola jkun ir-riżultat tad-distillazzjoni, wara l-fermentazzjoni alkoħolika, ta’ prodotti agrikoli.

(10)

Għalhekk jenħtieġ li r-Regolament (UE) 2019/787 jiġi emendat skont dan,