21.6.2022   

MT

Il-Ġurnal Uffiċjali tal-Unjoni Ewropea

L 165/30


REGOLAMENT TA’ IMPLIMENTAZZJONI TAL-KUMMISSJONI (UE) 2022/959

tas-16 ta’ Ġunju 2022

li jemenda l-Anness VII tar-Regolament ta’ Implimentazzjoni (UE) 2019/2072 fir-rigward tar-rekwiżiti għall-introduzzjoni fl-Unjoni ta’ ċertu frott ta’ Capsicum (L.), Citrus L., Citrus sinensis Pers., Prunus persica (L.) Batsch u Punica granatum L.

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2016/2031 tal-Parlament Ewropew u tal-Kunsill tas-26 ta’ Ottubru 2016 dwar il-miżuri protettivi kontra pesti tal-pjanti, li jemenda r-Regolamenti (UE) Nru 228/2013, (UE) Nru 652/2014 u (UE) Nru 1143/2014 tal-Parlament Ewropew u tal-Kunsill u li jħassar id-Direttivi tal-Kunsill 69/464/KEE, 74/647/KEE, 93/85/KEE, 98/57/KE, 2000/29/KE, 2006/91/KE u 2007/33/KE (1), u b’mod partikolari l-Artikolu 41(2) tiegħu,

Billi:

(1)

Ir-Regolament ta’ Implimentazzjoni tal-Kummissjoni (UE) 2019/2072 (2) jistabbilixxi l-lista ta’ pesti ta’ kwarantina fl-Unjoni mhux magħrufa li jseħħu fit-territorju tal-Unjoni, fil-Parti A tal-Anness II. Ir-Regolament ta’ Implimentazzjoni (UE) 2019/2072 għandu l-għan li jipprevjeni d-dħul, l-istabbiliment u t-tixrid ta’ tali pesti ta’ kwarantina fit-territorju tal-Unjoni, billi jistabbilixxi rekwiżiti speċjali, fl-Anness VII tiegħu, għall-introduzzjoni fit-territorju tal-Unjoni ta’ ċerti pjanti, prodotti mill-pjanti u oġġetti oħra.

(2)

Thaumatotibia leucotreta (Meyrick) (“il-pest speċifikat”) huwa elenkat fil-Parti A tal-Anness II tar-Regolament ta’ Implimentazzjoni (UE) 2019/2072 bħala pest ta’ kwarantina fl-Unjoni, li mhuwiex magħruf li jeżisti fl-Unjoni. Huwa elenkat ukoll bħala pest ta’ prijorità fl-Anness tar-Regolament Delegat tal-Kummissjoni (UE) 2019/1702 (3). Il-pest speċifikat huwa polifagu u ġie interċettat fuq għadd ta’ pjanti ospitanti waqt il-kontrolli fil-fruntieri tat-territorju tal-Unjoni.

(3)

Jeżistu rekwiżiti speċifiċi għall-importazzjoni tal-frott ta’ Capsicum (L.), Citrus L., għajr għal Citrus aurantiifolia (Christm.) Swingle u Citrus limon (L.) Osbeck, tal-frott ta’ Prunus persica (L.) Batsch u ta’ Punica granatum L. biex it-territorju tal-Unjoni jitħares minn pesti speċifiċi (4). Citrus L. hija kategorija li tkopri l-frott ta’ Citrus sinensis Pers.

(4)

Skont ir-rekwiżiti eżistenti tal-importazzjoni, jeħtieġ li qabel il-kummerċ tiġi kkomunikata l-informazzjoni dwar il-ħelsien tal-pajjiż, il-ħelsien taż-żona mill-pest speċifikat, u l-użu ta’ approċċ ibbażat fuq is-sistemi u kull trattament ta’ wara l-ħsad flimkien mal-evidenza dokumentarja tal-effettività ta’ dawk ir-rekwiżiti. Din l-informazzjoni jenħtieġ li tippermetti evalwazzjoni aktar faċli tal-effettività tar-rekwiżiti speċjali attwali. Dik l-effettività jenħtieġ li titkejjel skont l-għadd ta’ nuqqasijiet ta’ konformità minħabba l-pest speċifikat fuq il-komoditajiet ospitanti importati.

(5)

Peress li waqt il-kontrolli fil-fruntieri tat-territorju tal-Unjoni, għadhom iseħħu nuqqasijiet ta’ konformità tal-kunsinni mar-rekwiżiti speċifiċi tal-importazzjoni minħabba l-preżenza tal-pest speċifikat fuq il-komoditajiet ospitanti, huwa ġġustifikat li jiġu emendati r-rekwiżiti speċjali stabbiliti fl-Anness VII tar-Regolament ta’ Implimentazzjoni (UE) 2019/2072. B’mod partikolari, ir-rekwiżiti speċjali relatati mal-ħelsien mill-pest tal-post tal-produzzjoni, mal-użu ta’ trattamenti ta’ wara l-ħsad u mal-approċċ ibbażat fuq is-sistemi, jenħtieġ li jiġu emendati biex joffru garanziji aħjar tal-ħelsien mill-pesti tal-prodotti tal-frott ikkummerċjalizzati.

(6)

L-emendar tar-rekwiżiti speċjali huwa bbażat fuq l-informazzjoni xjentifika u teknika tal-analiżi tar-riskju tal-pesti mwettqa mill-Organizzazzjoni Ewropea u Mediterranja għall-Protezzjoni tal-Pjanti (“EPPO”), huwa bbażat fuq il-valutazzjonijiet tar-riskju tal-komoditajiet imwettqa mill-Awtorità Ewropea dwar is-Sigurtà fl-Ikel fuq il-frott ta’ Citrus spp. importat mill-Iżrael (5) u mill-Afrika t’Isfel (6), huwa bbażat fuq il-letteratura xjentifika rilevanti, u fuq il-kummenti li waslu minn pajjiżi terzi wara konsultazzjoni fl-Organizzazzjoni Dinjija tal-Kummerċ (il-Ftehim dwar il-Miżuri Sanitarji u Fitosanitarji).

(7)

L-approvazzjoni rispettiva tal-faċilitajiet, tar-rekwiżiti għall-faċilitajiet tat-trattament, tal-monitoraġġ, l-awditjar, il-proċeduri ta’ dokumentazzjoni u ż-żamma tar-rekords tat-trattament applikat jenħtieġ li jiġu żgurati, sabiex jiġu ggarantiti s-sikurezza u t-traċċabbiltà fitosanitarji.

(8)

Bħalissa, ir-rekwiżiti stabbiliti fl-Anness VII tar-Regolament ta’ Implimentazzjoni (UE) 2019/2072 għall-frott ta’ Citrus L huma applikabbli wkoll għal Citrus sinensis Pers. Abbażi tad-data dwar in-nuqqas ta’ konformità minħabba l-preżenza tal-pest speċifikat fuq il-frott ta’ Citrus, il-frott ta’ Citrus sinensis Pers. jenħtieġ li jkun soġġett għal rekwiżiti separati, u mhux għall-istess rekwiżiti bħal frott ieħor ta’ Citrus L. Dan huwa importanti sabiex ikun iżjed żgur li dan ikun ħieles mill-pest speċifikat. Tali rekwiżiti jenħtieġ li jinkludu approċċ ibbażat fuq is-sistemi b’reġim speċifiku ta’ trattament kiesaħ, possibbilment bi stadju ta’ tkessiħ minn qabel sabiex tiġi żgurata l-ikbar probabbiltà possibbli ta’ ħelsien mill-pesti.

(9)

Sabiex l-awtoritajiet kompetenti u l-operaturi professjonisti jkunu jistgħu jadattaw għall-approċċ ibbażat fuq is-sistemi, għal Citrus sinensis Pers., jenħtieġ li sal-31 ta’ Diċembru 2022 jiġi previst rekwiżit alternattiv u temporanju ta’ approċċ ibbażat fuq is-sistemi, li jinkludi stadju ta’ tkessiħ minn qabel tal-polpa tal-frott sa 5 °C, segwit minn trattament kiesaħ għal mill-inqas 25 jum f’temperatura stabbilita bejn –1 °C u + 2 °C.

(10)

Fil-każ ta’ Citrus sinensis Pers., meta t-trattament kiesaħ jiġi applikat waqt it-trasport tal-frott ikkonċernat, jenħtieġ li jinżammu r-rekords tal-applikazzjoni ta’ dak it-trattament, u li dawn ikunu disponibbli meta jintalbu.

(11)

Jenħtieġ li dan ir-Regolament jidħol fis-seħħ u japplika malajr kemm jista’ jkun sabiex ir-rekwiżiti msaħħa, li jżidu l-protezzjoni tal-Unjoni kontra dan il-pest, jiġu implimentati fl-iqsar żmien, sabiex jitqiesu l-kunsinni tal-frott speċifikat fi triqthom lejn l-Unjoni fiż-żmien tad-dħul fis-seħħ ta’ dan ir-Regolament.

(12)

Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

L-Anness VII tar-Regolament ta’ Implimentazzjoni (UE) 2019/2072 huwa emendat f’konformità mal-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-14 ta’ Lulju 2022.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-16 ta’ Ġunju 2022.

Għall-Kummissjoni

Il-President

Ursula VON DER LEYEN


(1)   ĠU L 317, 23.11.2016, p. 4.

(2)  Ir-Regolament ta’ Implimentazzjoni tal-Kummissjoni (UE) 2019/2072 tat-28 ta’ Novembru 2019 li jistabbilixxi l-kundizzjonijiet uniformi għall-implimentazzjoni tar-Regolament (UE) 2016/2031 tal-Parlament Ewropew u tal-Kunsill rigward il-miżuri protettivi kontra l-pesti tal-pjanti, u li jħassar ir-Regolament tal-Kummissjoni (KE) Nru 690/2008 u jemenda r-Regolament ta’ Implimentazzjoni tal-Kummissjoni (UE) 2018/2019 (ĠU L 319, 10.12.2019, p. 1).

(3)  Ir-Regolament Delegat tal-Kummissjoni (UE) 2019/1702 tal-1 ta’ Awwissu 2019 li jissupplimenta r-Regolament (UE) 2016/2031 tal-Parlament Ewropew u tal-Kunsill billi jistabbilixxi l-lista ta’ pesti ta’ prijorità (ĠU L 260, 11.10.2019, p. 8).

(4)  EPPO (2013) Pest risk analysis for Thaumatotibia leucotreta. EPPO, Paris. https://pra.eppo.int/pra/9305d7ed-2788-46dc-882d-b4641fa24fff

(5)  Scientific Opinion on the commodity risk assessment of Citrus L. fruits from Israel for Thaumatotibia leucotreta under a systems approach. EFSA Journal 2021;19(3):6427, 36 pp. https://doi.org/10.2903/j.efsa.2021.6427

(6)  Scientific Opinion on the commodity risk assessment of Citrus L. fruits from South Africa for Thaumatotibia leucotreta under a systems approach. EFSA Journal;19(8):6799, 63 pp. https://doi.org/10.2903/j.efsa.2021.6799


ANNESS

It-tabella fl-Anness VII tar-Regolament ta’ Implimentazzjoni (UE) 2019/2072 hija emendata kif ġej:

(1)

il-punt 62 huwa sostitwit b’dan li ġej:

“62.

Frott ta’ Capsicum (L.), Citrus L., għajr Citrus aurantiifolia (Christm.) Swingle Citrus limon (L.) Osbeck. u Citrus sinensis Pers., Prunus persica (L.) Batsch u Punica granatum L.

0709 60 10

0709 60 91

0709 60 95

0709 60 99

ex 0805 10 80 ex 0805 21 10 ex 0805 21 90 ex 0805 22 00 ex 0805 29 00 ex 0805 40 00 ex 0805 50 10 ex 0805 90 00  0809 30 10

0809 30 90

ex 0810 90 75

Pajjiżi tal-kontinent Afrikan, Cabo Verde, Saint Helena, Madagascar, Réunion, Mauritius, u -Iżrael

Stqarrija uffiċjali li:

(a)

il-frott oriġina minn pajjiż rikonoxxut bħala ħieles minn Thaumatotibia leucotreta (Meyrick) f’konformità mal-Istandards Internazzjonali għall-Miżuri Fitosanitarji rilevanti, dment li dan l-istatus ta’ ħelsien ikun ġie kkomunikat bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

jew

(b)

il-frott oriġina f’minn żona stabbilita bħala ħielsa minn Thaumatotibia leucotreta (Meyrick), mill-organizzazzjoni nazzjonali għall-protezzjoni tal-pjanti fil-pajjiż tal-oriġini, f’konformità mal-Istandard Internazzjonali għall-Miżuri Fitosanitarji ISPM 4(*). Iż-żona ħielsa mill-pesti tissemma fiċ-ċertifikat fitosanitarju u jissemma’ wkoll l-istatus ta’ ħelsien mill-pest ta’ dik iż-żona, dment li dan l-istatus ta’ ħelsien ikun ġie kkomunikat bil-quddiem u bil-miktublill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

jew

(c)

il-frott:

(i)

oriġina minn żona stabbilita bħala ħielsa mill- Thaumatotibia leucotreta (Meyrick) mill-organizzazzjoni nazzjonali għall-protezzjoni tal-pjanti fil-pajjiż tal-oriġini, f’konformità mal-Istandard Internazzjonali għall-Miżuri Fitosanitarji ISPM 10(**), u li hija inkluża fil-lista tal-kodiċijiet tal-postijiet ta’ produzzjoni li ġiet ikkomunikata bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

kif ukoll

(ii)

ikun ġie soġġett għal spezzjonijiet uffiċjali mwettqa fil-post tal-produzzjoni fi żminijiet xierqa matul l-istaġun tat-tkabbir u qabel l-esportazzjoni, inkluż eżami viżwali b’intensità li tippermetti mill-inqas id-detezzjoni ta’ livell ta’ 2 % ta’ infestazzjoni, b’livell ta’ fiduċja ta’ 95 % skont l-Istandard Internazzjonali għall-Miżuri Fitosanitarji ISPM 31 (***) u inkluż kampjunar distruttiv f’każ ta’ sintomi, u jkunu nstabu ħielsa minn Thaumatotibia leucotreta (Meyrick),

kif ukoll

(iii)

ikun akkumpanjat minn ċertifikat fitosanitarju li jindika l-kodiċijiet tal-post ta’ produzzjoni,

jew

(d)

il-frott

(i)

ġie prodott f’sit tal-produzzjoni approvat, li huwa inkluż fil-lista tal-kodiċijiet tas-siti tal-produzzjoni li ġiet ikkomunikata bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż tal-oriġini,

kif ukoll

(ii)

ikun ġie soġġett għal approċċ effettiv ta’ sistemi biex jiġi żgurat il-ħelsien minn Thaumatotibia leucotreta (Meyrick), skont l-Istandards Internazzjonali għall-Miżuri Fitosanitarji ISPM 14 (*****), jew trattament awtonomu effettiv ta’ wara l-ħsad biex jiġi żgurat il-ħelsien minn Thaumatotibia leucotreta (Meyrick), sakemm l-approċċ ta’ sistemi rispettiv użat jew it-trattament ta’ wara l-ħsad, flimkien ma’ evidenza dokumentarja tal-effikaċja tiegħu, ikunu ġew ikkomunikati bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini u li t-trattament ta’ wara l-ħsad ikun ġie vvalutat mill-Awtorità Ewropea dwar is-Sigurtà fl-Ikel,

kif ukoll

(iii)

qabel l-esportazzjoni, ikun ġie soġġett għal spezzjonijiet uffiċjali għall-preżenza ta’ Thaumatotibia leucotreta (Meyrick), b’intensità li tippermetti mill-inqas id-detezzjoni ta’ livell ta’ 2 % ta’ infestazzjoni, b’livell ta’ fiduċja ta’ 95 % f’konformità mal-Istandard Internazzjonali għall-Miżuri Fitosanitarji ISPM 31 (***) u inkluż it-teħid distruttiv ta’ kampjuni f’każ ta’ sintomi,

kif ukoll

(iv)

ikunu akkumpanjati minn ċertifikat fitosanitarju li jindika l-kodiċijiet tas-sit tal-produzzjoni u jsemmi d-dettalji tat-trattament ta’ wara l-ħsad użat, jew l-użu tal-approċċ ta’ sistemi.”

(2)

il-punt 62.1 li ġej jiddaħħal bejn il-punti 62 u 63:

“62.1

Frott ta’ Citrus sinensis Pers.

0805 10 22

0805 10 24

0805 10 28

ex 0805 10 80

Pajjiżi tal-kontinent Afrikan, Cabo Verde, Saint Helena, Madagascar, Réunion, Mauritius, u Iżrael

Stqarrija uffiċjali li:

(a)

il-frott ikun oriġina minn pajjiż rikonoxxut bħala ħieles minn Thaumatotibia leucotreta (Meyrick) skont l-Istandards Internazzjonali għall-Miżuri Fitosanitarji rilevanti, dment li dan l-istatus ta’ ħelsien ikun ġie kkomunikat bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

jew

(b)

il-frott oriġina minn żona stabbilita bħala ħielsa minn Thaumatotibia leucotreta (Meyrick), mill-organizzazzjoni nazzjonali għall-protezzjoni tal-pjanti fil-pajjiż tal-oriġini, f’konformità mal-Istandard Internazzjonali għall-Miżuri Fitosanitarji ISPM 4(*). Iż-żona ħielsa mill-pesti tissemma fiċ-ċertifikat fitosanitarju u jissemma’ wkoll l-istatus ta’ ħelsien mill-pest ta’ dik iż-żona, dment li dan l-istatus ta’ ħelsien ikun ġie kkomunikat bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

jew

(c)

il-frott

(i)

oriġina minn post ta’ produzzjoni stabbilit bħala ħieles minn Thaumatotibia leucotreta (Meyrick) mill-organizzazzjoni nazzjonali għall-protezzjoni tal-pjanti fil-pajjiż tal-oriġini, f’konformità mal-Istandard Internazzjonali għall-Miżuri Fitosanitarji ISPM 10(**), u li huwa inkluż fil-lista ta’ kodiċijiet tal-post ta’ produzzjoni li ġiet ikkomunikata bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

kif ukoll

(ii)

ikun ġie soġġett għal spezzjonijiet uffiċjali mwettqa fil-post tal-produzzjoni fi żminijiet xierqa matul l-istaġun tat-tkabbir u qabel l-esportazzjoni, inkluż eżami viżwali b’intensità li tippermetti mill-inqas id-detezzjoni ta’ livell ta’ 2 % ta’ infestazzjoni, b’livell ta’ fiduċja ta’ 95 % f’konformità mal-Istandard Internazzjonali għall-Miżuri Fitosanitarji ISPM 31 (***) u inkluż kampjunar distruttiv f’każ ta’ sintomi, u li nstabu ħielsa minn Thaumatotibia leucotreta (Meyrick),

kif ukoll

(iii)

ikun akkumpanjat minn ċertifikat fitosanitarju li jindika l-kodiċijiet tal-post tal-produzzjoni,

jew

(d)

il-frott:

(i)

ġie prodott f’sit tal-produzzjoni approvat, li huwa inkluż fil-lista tal-kodiċijiet tas-siti tal-produzzjoni dment li dan l-istatus ta’ ħelsien ġie kkomunikat bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

kif ukoll

(ii)

kien soġġett għal:

—

approċċ effettiv ta’ sistemi, li jinkludi trattament kiesaħ ta’ 0 °C sa –1 °C għal mill-inqas 16-il jum, f’konformità mal-Istandards Internazzjonali għall-Miżuri Fitosanitarji ISPM 14 (*****) u ISPM 42 (****) rilevanti, dment li t-trattament bil-kesħa jkun ġie ddokumentat u vverifikat għal kull kunsinna mill-pajjiż terz esportatur u l-approċċ ta’ sistemi, flimkien ma’ evidenza dokumentarja tal-effettività tiegħu, ikunu ġew ikkomunikati minn qabel u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż tal-oriġini,

jew

—

approċċ effettiv ta’ sistemi f’konformità mal-Istandard Internazzjonali għall-Miżuri Fitosanitarji ISPM 14(*****), li jinkludi stadju ta’ tkessiħ minn qabel tal-polpa tal-frott għat-temperatura tat-trattament ta’ kesħa applikat, segwit minn dak it-trattament ta’ kesħa għal mill-inqas 20 jum f’temperatura stabbilita bejn -1 °C u + 2 °C, dment li l-istadju ta’ tkessiħ minn qabel u t-trattament ta’ kesħa jkunu ġew iddokumentati u vverifikati għal kull kunsinna mill-pajjiż terz esportatur, u dment li l-approċċ ta’ sistemi, flimkien ma’ evidenza dokumentarja tal-effikaċja tiegħu, ikunu ġew ikkomunikati bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

jew

—

trattament awtonomu effettiv ta’ wara l-ħsad biex jiġi żgurat il-ħelsien minn Thaumatotibia leucotreta (Meyrick), dment li dak it-trattament ta’ wara l-ħsad, flimkien ma’ evidenza dokumentarja tal-effikaċja tiegħu, ikunu ġew ikkomunikati bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż tal-oriġini u jkun ġie vvalutat mill-Awtorità Ewropea dwar is-Sigurtà fl-Ikel,

jew

—

sal-31 ta’ Diċembru 2022, approċċ ta’ sistemi effettiv f’konformità mal-Istandard Internazzjonali għall-Miżuri Fitosanitarji ISPM 14(*****), li jinkludi stadju ta’ tkessiħ minn qabel tal-polpa tal-frott sa 5 °C, segwit minn trattament kiesaħ għal mill-inqas 25 jum f’temperatura stabbilita bejn -1 °C u + 2 °C, dment li l-istadju ta’ tkessiħ minn qabel u t-trattament bil-kesħa jkunu ġew iddokumentati u vverifikati għal kull kunsinna mill-pajjiż terz esportatur, u dment li l-approċċ ta’ sistemi, flimkien ma’ evidenza dokumentarja tal-effikaċja tiegħu, ikunu ġew ikkomunikati bil-quddiem u bil-miktub lill-Kummissjoni mill-organizzazzjoni nazzjonali għall-protezzjoni tal-pjanti tal-pajjiż ta’ oriġini,

kif ukoll

(iii)

qabel l-esportazzjoni jkunu ġew soġġetti għal spezzjonijiet uffiċjali għall-preżenza ta’ Thaumatotibia leucotreta (Meyrick), b’intensità li tippermetti mill-inqas id-detezzjoni ta’ livell ta’ 2 % ta’ infestazzjoni, b’livell ta’ fiduċja ta’ 95 % f’konformità mal-Istandard Internazzjonali għall-Miżuri Fitosanitarji ISPM 31 (****) u inkluż kampjunar distruttiv f’każ ta’ sintomi,

kif ukoll

(iv)

ikunu akkumpanjati minn ċertifikat fitosanitarju li jindika l-kodiċijiet tas-sit tal-produzzjoni, isemmi d-dettalji tat-trattament ta’ wara l-ħsad użat jew l-użu tal-approċċ ta’ sistemi flimkien mat-temperatura stabbilita użata u t-tul tat-trattament kiesaħ applikat f’dak l-approċċ ta’ sistemi;

kif ukoll

(v)

f’każ li t-trattament bil-kesħa jkun ġie applikat matul it-trasport, minbarra ċ-ċertifikat fitosanitarju, ir-rekords dwar l-applikazzjoni tat-trattament ikunu nżammu u ppreżentati meta mitluba.”

(*)

ISPM 4 “Rekwiżiti għall-istabbiliment ta’ żoni ħielsa mill-pesti”.

(**)

ISPM 10 “Rekwiżiti għat-twaqqif ta’ postijiet ta’ produzzjoni u siti ta’ produzzjoni ħielsa mill-pesti”.

(***)

ISPM 31 “Metodoloġiji għat-teħid ta’ kampjuni ta’ mill-kunsinni”.

(****)

ISPM 42 “Rekwiżiti għall-użu ta’ trattamenti tat-temperatura bħala miżuri fitosanitarji”.

(*****)

ISPM 14 “L-użu ta’ miżuri integrati f’approċċ ta’ sistemi għall-immaniġġjar tar-riskju tal-pesti”.