REGOLAMENT TA’ IMPLIMENTAZZJONI TAL-KUMMISSJONI (UE) 2022/829

tal-25 ta’ Mejju 2022

li jemenda r-Regolament (KE) Nru 31/96 fir-rigward tal-istituzzjonijiet eliġibbli għal eżenzjoni mid-dazju tas-sisa

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat id-Direttiva tal-Kunsill 2008/118/KE tas-16 ta’ Diċembru 2008 dwar l-arranġamenti ġenerali għad-dazju tas-sisa u li jħassar id-Direttiva 92/12/KEE (1), u b’mod partikolari l-Artikolu 13(2) tagħha,

Billi:

(1)	Id-Direttiva tal-Kunsill 2008/118/KE ġiet emendata bid-Direttiva tal-Kunsill (UE) 2019/2235 (2), li introduċiet eżenzjonijiet mill-VAT u mid-dazju tas-sisa għall-isforzi tad-difiża mwettqa fi ħdan il-qafas tal-Unjoni.

(2)

L-Anness II tar-Regolament tal-Kummissjoni (KE) Nru 31/96 (3) jipprevedi ċertifikat ta’ eżenzjoni, li jservi biex jikkonferma li ċerta tranżazzjoni tikkwalifika għal eżenzjoni mill-ħlas tad-dazju tas-sisa skont l-Artikolu 12 tad-Direttiva 2008/118/KE. Sabiex l-Istati Membri jkunu jistgħu japplikaw l-eżenzjoni mill-ħlas tad-dazju tas-sisa għal sforzi ta’ difiża kif stabbilit fl-Artikolu 12(1), il-punt (ba), tad-Direttiva 2008/118/KE, dak iċ-ċertifikat jeħtieġ jiġi emendat.

(3)	Għalhekk ir-Regolament (KE) Nru 31/96 jenħtieġ li jiġi emendat skont dan.

(4)	Peress li l-Artikolu 12(1), il-punt (ba), tad-Direttiva 2008/118/KE japplika mill-1 ta’ Lulju 2022, jenħtieġ li l-applikazzjoni ta’ dan ir-Regolament tiġi differita għal dik id-data.

(5)	Il-miżuri previsti f’dan ir-Regolament huma f’konformità mal-opinjoni tal-Kumitat dwar id-Dazju tas-Sisa,

ADOTTAT DAN IR-REGOLAMENT:

Artikolu 1

L-Anness tar-Regolament (KE) Nru 31/96 huwa sostitwit bit-test fl-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Għandu japplika mill-1 ta’ Lulju 2022.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, il-25 ta’ Mejju 2022.

Għall-Kummissjoni

Il-President

Ursula VON DER LEYEN

(1) ĠU L 9, 14.1.2009, p. 12.

(2) Id-Direttiva tal-Kunsill (UE) 2019/2235 tas-16 ta’ Diċembru 2019 li temenda d-Direttiva 2006/112/KE dwar is-sistema komuni ta’ taxxa fuq il-valur miżjud u d-Direttiva 2008/118/KE dwar l-arranġamenti ġenerali għad-dazju tas-sisa fir-rigward ta’ sforzi ta’ difiża fi ħdan il-qafas tal-Unjoni (ĠU L 336, 30.12.2019, p. 10).

(3) Ir-Regolament tal-Kummissjoni (KE) Nru 31/96 tal-10 ta’ Jannar 1996 dwar iċ-ċertifikat tal-eżenzjoni mit-taxxa tas-sisa (ĠU L 8, 11.1.1996, p. 11).

ANNESS

Noti ta’ spjegazzjoni

Għall-magazzinier awtorizzat, dan iċ-ċertifikat iservi bħala dokument ta’ sostenn għall-eżenzjoni mit-taxxa tal-kunsinni ta’ oġġetti lill-istituzzjonijiet/individwi eliġibbli msemmija fl-Artikolu 12 (1) tad-Direttiva 2008/118/KE. Għaldaqstant, għandu jitfassal ċertifikat wieħed għal kull magazzinier. Barra minn hekk, il-magazzinier jeħtieġ li jżomm iċ-ċertifikat fil-fajls tiegħu b’konformità mad-dispożizzjonijiet legali li japplikaw fl-Istat Membru tiegħu.

(a)

L-ispeċifikazzjoni ġenerali tal-karta li għandha tintuża hija stipulata f’ Il-Ġurnal Uffiċjali tal-Komunitajiet Ewropej Nru C 164 tal-1.7.164, p. 1.7.1989.

Il-karta għandha tkun bajda għal kull kopja u jenħtieġ li tkun 210 millimetri b’297 millimetri b’tolleranza massima ta’ 5 millimetri inqas jew 8 millimetri iktar fir-rigward tat-tul tagħha.

Iċ-ċertifikat ta’ eżenzjoni għandu jitfassal f’duplikat:

(i)	kopja waħda biex tinżamm mill-konsenjatur,

(ii)	kopja waħda li għandha takkumpanja d-dokument amministrattiv ta’ akkumpanjament

(b)	Kwalunkwe spazju mhux użat f’kaxxa 5.B għandu jiġi maqtugħ b’sing ħalli xejn ma jista’ jiġi miżjud.

(c)	Id-dokument irid jimtela b’mod li jista’ jinqara u b’tali mod li l-entrati ma jkunux jistgħu jitħassru. L-ebda tħassir jew kitba mill-ġdid ma huwa permess. Għandu jimtela b’lingwa rikonoxxuta mill-Istat Membru ospitanti.

(d)	Jekk id-deskrizzjoni tal-prodotti (kaxxa 5.B taċ-ċertifikat) tirreferi għal formola tal-ordni tax-xiri li saret f’lingwa oħra għajr lingwa rikonoxxuta mill-Istat Membru ospitanti, traduzzjoni trid tiġi mehmuża mill-istituzzjoni/individwu eliġibbli.

(e)	Min-naħa l-oħra, jekk iċ-ċertifikat ikun tfassal f’lingwa għajr waħda rikonoxxuta mill-Istat Membru tal-magazzinier, traduzzjoni tal-informazzjoni li tikkonċerna l-prodotti fil-kaxxa 5.B għandha tinhemeż mill-istituzzjoni/individwu eliġibbli.

(f)	Lingwa rikonoxxuta tfisser waħda mill-lingwi uffiċjali li tintuża fl-Istat Membru jew kwalunkwe lingwa oħra uffiċjali tal-Unjoni li l-Istat Membru jiddikjara li tista’ tintuża għal dan il-fini.

3.	Permezz tad-dikjarazzjoni tiegħu fil-kaxxa 3 taċ-ċertifikat, l-istituzzjoni/individwu eliġibbli jipprovdi l-informazzjoni neċessarja għall-evalwazzjoni tat-talba għal eżenzjoni fl-Istat Membru ospitanti.

4.	Permezz tad-dikjarazzjoni tagħha fil-kaxxa 4 taċ-ċertifikat, l-istituzzjoni tikkonferma d-dettalji fil-kaxxi 1 u 3(a) tad-dokument u tiċċertifika li l-individwu eliġibbli huwa membru tal-persunal tal-istituzzjoni.

(a)

Ir-referenza għall-formola tal-ordni tax-xiri (kaxxa 5.B taċ-ċertifikat) irid ikollha fiha minn tal-inqas id-data u n-numru tal-ordni. Il-formola tal-ordni għandha jkollha fiha l-elementi kollha li jidhru fil-kaxxa 5 taċ-ċertifikat. Jekk iċ-ċertifikat ikollu jkun ittimbrat mill-awtorità kompetenti tal-Istat Membru ospitanti, il-formola tal-ordni għandha tkun ittimbrata wkoll.

(b)	L-indikazzjoni tan-Nru tas-sisa kif definit fil-punt (a) tal-Artikolu 19(2) tar-Regolament tal-Kunsill Nru 389/2012 (1) tal-magazzinier awtorizzat hija fakultattiva.

(c)	Il-muniti jenħtieġ li jkunu indikati permezz ta’ kodiċi bi tliet ittri b’konformità mal-istandard internazzjonali ISO 4217 li ġie stabbilit mill-Organizzazzjoni Internazzjonali għall-Istandardizzazzjoni.

Id-dikjarazzjoni msemmija hawn fuq mill-istituzzjoni/individwu eliġibbli għandha tkun awtentikata fil-kaxxa 6 permezz tat-timbru tal-awtorità kompetenti tal-Istat Membru ospitanti. Dik l-awtorità tista’ tagħżel li l-approvazzjoni tagħha tkun tiddependi fuq il-qbil minn awtorità oħra fl-Istat Membru tagħha. Huwa f’idejn l-awtorità tat-taxxa kompetenti li takkwista tali qbil.

7.	Sabiex il-proċedura tiġi ssimplifikata, l-awtorità kompetenti tista’ tiddispensa mill-obbligu tal-istituzzjoni eliġibbli li titlob timbru fil-każ ta’ eżenzjoni għall-użu uffiċjali. L-istituzzjoni eliġibbli jenħtieġ li jsemmi din id-dispensa fil-kaxxa 7 taċ-ċertifikat.

(1) Ir-Regolament tal-Kunsill (UE) Nru 389/2012 tat-2 ta’ Mejju 2012 dwar kooperazzjoni amministrattiva fil-qasam tad-dazji tas-sisa u li jħassar ir-Regolament (KE) Nru 2073/2004 (ĠU L 121, 8.5.2012, p. 1).