19.5.2022 |
MT |
Il-Ġurnal Uffiċjali tal-Unjoni Ewropea |
L 140/3 |
REGOLAMENT TA’ IMPLIMENTAZZJONI TAL-KUMMISSJONI (UE) 2022/782
tat-18 ta’ Mejju 2022
li jirtira l-approvazzjoni tas-sustanza attiva isopirażam f’konformità mar-Regolament (KE) Nru 1107/2009 tal-Parlament Ewropew u tal-Kunsill dwar it-tqegħid fis-suq ta’ prodotti għall-protezzjoni tal-pjanti, li jemenda r-Regolament ta’ Implimentazzjoni tal-Kummissjoni (UE) Nru 540/2011 u li jħassar ir-Regolament ta’ Implimentazzjoni (UE) Nru 1037/2012
(Test b’rilevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 1107/2009 tal-Parlament Ewropew u tal-Kunsill tal-21 ta’ Ottubru 2009 dwar it-tqegħid fis-suq ta’ prodotti għall-protezzjoni tal-pjanti u li jħassar id-Direttivi tal-Kunsill 79/117/KEE u 91/414/KEE (1), u b’mod partikolari l-Artikolu 21(3) u l-Artikolu 78(2) tiegħu,
Billi:
(1) |
Ir-Regolament ta’ Implimentazzjoni tal-Kummissjoni (UE) Nru 1037/2012 (2) approva l-isopirażam bħala sustanza attiva f’konformità mar-Regolament (KE) Nru 1107/2009 u elenkah fil-Parti B tal-Anness tar-Regolament ta’ Implimentazzjoni tal-Kummissjoni (UE) Nru 540/2011 (3). |
(2) |
Fl-10 ta’ Diċembru 2020, il-Kumitat għall-Istima tar-Riskji tal-Aġenzija Ewropea għas-Sustanzi Kimiċi adotta opinjoni (4) f’konformità mal-Artikolu 37(4) tar-Regolament (KE) Nru 1272/2008 tal-Parlament Ewropew u tal-Kunsill (5) fejn ikkonkluda li l-isopirażam jissodisfa l-kriterji biex jiġi kklassifikat bħala tossiku għar-riproduzzjoni tal-kategorija 1B u bħala karċinoġenu kategorija 2. |
(3) |
Ir-Regolament Delegat tal-Kummissjoni (UE) 2022/692 (6) konsegwentement emenda l-Anness VI tar-Regolament (KE) Nru 1272/2008 u kklassifika l-isopirażam bħala tossiku għar-riproduzzjoni tal-kategorija 1B. |
(4) |
Skont il-punt 3.6.4 tal-Anness II tar-Regolament (KE) Nru 1107/2009, sustanza attiva għandha tiġi approvata biss jekk mhijiex jew ma għandhiex tiġi kklassifikata f’konformità mad-dispożizzjonijiet tar-Regolament (KE) Nru 1272/2008 bħala tossika għar-riproduzzjoni tal-kategorija 1B, dment li l-esponiment tal-bnedmin għal dik is-sustanza fi prodott għall-protezzjoni tal-pjanti fil-kundizzjonijiet tal-użu realistiċi proposti ma jkunx negliġibbli. |
(5) |
Għall-użi rappreżentattivi tal-isopirażam, ir-residwi tal-isopirażam fuq l-ikel u l-għalf jaqbżu l-valur prestabbilit skont it-tifsira tal-Artikolu 18(1), il-punt (b), tar-Regolament (KE) Nru 396/2005 tal-Parlament Ewropew u tal-Kunsill (7). Għalhekk, il-kundizzjoni ta’ esponiment negliġibbli fir-rigward tal-esponiment mid-dieta ma tiġix issodisfata. |
(6) |
Għaldaqstant, l-isopirażam ma għadux jissodisfa l-kriterju għall-approvazzjoni stabbilit fil-punt 3.6.4 tal-Anness II tar-Regolament (KE) Nru 1107/2009. |
(7) |
F’konformità mal-Artikolu 21(1) tar-Regolament (KE) Nru 1107/2009, il-Kummissjoni infurmat lill-Istati Membri, lill-Awtorità Ewropea dwar is-Sigurtà fl-Ikel u lill-applikant li qieset li l-kriterju għall-approvazzjoni stabbilit fil-punt 3.6.4 tal-Anness II tar-Regolament (KE) Nru 1107/2009 jista’ ma jibqax jiġi ssodisfat minħabba li l-isopirażam jissodisfa l-kriterji biex jiġi kklassifikat bħala tossiku għar-riproduzzjoni tal-kategorija 1B u stiednet lill-applikant iressaq il-kummenti tiegħu. |
(8) |
L-applikant la pprovda informazzjoni biex juri esponiment negliġibbli u lanqas evidenza li l-kundizzjonijiet tal-Artikolu 4(7) tar-Regolament (KE) Nru 1107/2009, li jikkonċernaw is-sustanzi li huma meħtieġa biex jiġi kkontrollat periklu serju għas-saħħa tal-pjanti li ma jkunx jista’ jinżamm b’mezzi disponibbli oħrajn, huma ssodisfati. |
(9) |
Għaldaqstant, huwa xieraq li tiġi rtirata l-approvazzjoni tal-isopirażam. |
(10) |
L-Anness tar-Regolament ta’ Implimentazzjoni (UE) Nru 540/2011 għalhekk jenħtieġ li jiġi emendat skont dan u r-Regolament ta’ Implimentazzjoni (UE) Nru 1037/2012 jenħtieġ li jitħassar. |
(11) |
Jenħtieġ li l-Istati Membri jingħataw biżżejjed żmien biex jirtiraw l-awtorizzazzjonijiet għall-prodotti għall-protezzjoni tal-pjanti li fihom l-isopirażam. |
(12) |
Għall-prodotti għall-protezzjoni tal-pjanti li fihom l-isopirażam, meta jingħata xi perjodu ta’ grazzja mill-Istati Membri f’konformità mal-Artikolu 46 tar-Regolament (KE) Nru 1107/2009, jenħtieġ li dak il-perjodu jkun qasir kemm jista’ jkun u jiskadi mhux aktar tard minn sitt xhur wara d-data tad-dħul fis-seħħ ta’ dan ir-Regolament. |
(13) |
Dan ir-Regolament ma jipprevjenix is-sottomissjoni ta’ applikazzjoni oħra għall-approvazzjoni tal-isopirażam skont l-Artikolu 7 tar-Regolament (KE) Nru 1107/2009. |
(14) |
Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf, |
ADOTTAT DAN IR-REGOLAMENT:
Artikolu 1
Irtirar tal-approvazzjoni
L-approvazzjoni tas-sustanza attiva isopirażam hija rtirata.
Artikolu 2
Emenda għar-Regolament ta’ Implimentazzjoni (UE) Nru 540/2011
Fil-Parti B tal-Anness tar-Regolament ta’ Implimentazzjoni (UE) Nru 540/2011, titħassar ir-ringiela 27 dwar l-isopirażam.
Artikolu 3
Miżuri tranżizzjonali
L-Istati Membri għandhom jirtiraw l-awtorizzazzjonijiet għall-prodotti għall-protezzjoni tal-pjanti li fihom l-isopirażam bħala sustanza attiva sat-8 ta’ Settembru 2022.
Artikolu 4
Perjodu ta’ grazzja
Kwalunkwe perjodu ta’ grazzja mogħti mill-Istati Membri f’konformità mal-Artikolu 46 tar-Regolament (KE) Nru 1107/2009 għandu jiskadi sat-8 ta’ Diċembru 2022.
Artikolu 5
Tħassir
Ir-Regolament ta’ Implimentazzjoni (UE) Nru 1037/2012 jitħassar.
Artikolu 6
Dħul fis-seħħ
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-18 ta’ Mejju 2022.
Għall-Kummissjoni
Il-President
Ursula VON DER LEYEN
(1) ĠU L 309, 24.11.2009, p. 1.
(2) Ir-Regolament ta’ Implimentazzjoni tal-Kummissjoni (UE) Nru 1037/2012 tas-7 ta’ Novembru 2012 li japprova s-sustanza attiva isopirażam, skont ir-Regolament (KE) Nru 1107/2009 tal-Parlament Ewropew u tal-Kunsill dwar it-tqegħid fis-suq ta’ prodotti għall-protezzjoni tal-pjanti u li jemenda l-Anness tar-Regolament ta’ Implimentazzjoni tal-Kummissjoni (UE) Nru 540/2011 (ĠU L 308, 8.11.2012, p. 15).
(3) Ir-Regolament ta’ Implimentazzjoni tal-Kummissjoni (UE) Nru 540/2011 tal-25 ta’ Mejju 2011 li jimplimenta r-Regolament (KE) Nru 1107/2009 tal-Parlament Ewropew u tal-Kunsill f’dak li għandu x’jaqsam mal-lista ta’ sustanzi attivi approvati (ĠU L 153, 11.6.2011, p. 1).
(4) Il-Kumitat għall-Istima tar-Riskji, Opinjoni li tipproponi l-klassifikazzjoni u t-tikkettar armonizzati fil-livell tal-UE tal-Massa ta’ reazzjoni ta’ 3-(difluworometil)-1-metil-N-[(1RS,4SR,9RS)-1,2,3,4-tetraidro-9-isopropil-1,4-metanonaftalen-5-il]pirażol-4-karbossammid u 3-(difluworometil)-1-metil-N-[(1RS,4SR,9SR)-1,2,3,4-tetraidro-9-isopropil-1,4-metanonaftalen-5-il]pirażol-4-karbossammid [kontenut relattiv > 78 % sin isomeri < 15 % anti isomeri]; isopirażam. Numru KE: - Numru CAS: 881685-58-1 CLH-O-0000006915-65-01/F, adottata fl-10 ta’ Diċembru 2020.
(5) Ir-Regolament (KE) Nru 1272/2008 tal-Parlament Ewropew u tal-Kunsill tas-16 ta’ Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (ĠU L 353, 31.12.2008, p. 1).
(6) Ir-Regolament Delegat tal-Kummissjoni (UE) 2022/692 tas-16 ta’ Frar 2022 li jemenda, għall-finijiet tal-adattament tiegħu għall-progress tekniku u xjentifiku, ir-Regolament (KE) Nru 1272/2008 tal-Parlament Ewropew u tal-Kunsill dwar il-klassifikazzjoni, l-ittikkettar u l-imballaġġ tas-sustanzi u t-taħlitiet (ĠU L 129, 3.5.2022, p. 1).
(7) Ir-Regolament (KE) Nru 396/2005 tal-Parlament Ewropew u tal-Kunsill tat-23 ta’ Frar 2005 dwar il-livelli massimi ta' residwu ta' pestiċidi fi jew fuq ikel u għalf li joriġina minn pjanti u annimali u jemenda d-Direttiva tal-Kunsill 91/414/KEE (ĠU L 70, 16.3.2005, p. 1).