10.5.2022   

MT

Il-Ġurnal Uffiċjali tal-Unjoni Ewropea

L 133/12


REGOLAMENT TAL-KUMMISSJONI (UE) 2022/711

tas-6 ta’ Mejju 2022

li jiċħad l-awtorizzazzjoni ta’ ċerti indikazzjonijiet dwar is-saħħa li jsiru fuq ikel, għajr dawk li jirreferu għat-tnaqqis tar-riskju tal-mard u għall-iżvilupp u s-saħħa tat-tfal

(Test b’rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1924/2006 tal-Parlament Ewropew u tal-Kunsill tal-20 ta’ Diċembru 2006 dwar indikazzjonijiet dwar in-nutrizzjoni u s-saħħa mogħtija fuq l-ikel (1), u b’mod partikolari l-Artikolu 18(5) tiegħu,

Billi:

(1)

Skont ir-Regolament (KE) Nru 1924/2006, l-indikazzjonijiet dwar is-saħħa li jsiru fuq l-ikel huma pprojbiti sakemm ma jkunux awtorizzati mill-Kummissjoni f’konformità ma’ dak ir-Regolament u inklużi f’lista ta’ indikazzjonijiet permessi.

(2)

Ir-Regolament (KE) Nru 1924/2006 jipprevedi wkoll li l-applikazzjonijiet għall-awtorizzazzjonijiet tal-indikazzjonijiet dwar is-saħħa jistgħu jintbagħtu mill-operaturi tan-negozji tal-ikel lill-awtorità kompetenti nazzjonali ta’ Stat Membru. L-awtorità kompetenti nazzjonali għandha tgħaddi l-applikazzjonijiet validi lill-Awtorità Ewropea dwar is-Sigurtà fl-Ikel (“l-Awtorità”) għal valutazzjoni xjentifika, kif ukoll lill-Kummissjoni u lill-Istati Membri għall-informazzjoni.

(3)

L-Awtorità għandha tagħti opinjoni dwar l-indikazzjoni dwar is-saħħa kkonċernata.

(4)

Il-Kummissjoni għandha tiddeċiedi dwar l-awtorizzazzjoni tal-indikazzjonijiet dwar is-saħħa filwaqt li tqis l-opinjoni li tkun tat l-Awtorità.

(5)

Wara applikazzjoni mingħand analyze & realize GmbH, imressqa skont l-Artikolu 13(5) tar-Regolament (KE) Nru 1924/2006, l-Awtorità kellha tagħti opinjoni fuq indikazzjoni dwar is-saħħa marbuta ma’ GlycoLite™ u t-tnaqqis tal-piż tal-ġisem (il-Mistoqsija Nru EFSA-Q-2018-00611). L-indikazzjoni proposta mill-applikant kienet kif ġej: “GlycoLite™ jgħin biex tonqos fil-piż”.

(6)

Il-Kummissjoni, l-Istati Membri u l-applikant irċevew l-opinjoni xjentifika (2) dwar dik l-indikazzjoni mill-Awtorità, li kkonkludiet li, abbażi tad-data ppreżentata, l-evidenza xjentifika ma kinitx biżżejjed biex tiġi stabbilita relazzjoni ta’ kawża u effett bejn il-konsum ta’ estratt milwiem mill-fażola bajda (Phaseolus vulgaris L.) standardizzata fl-attività inibitorja tal-α-amylażi in vitro tagħha (GlycoLiteTM) u tnaqqis tal-piż tal-ġisem ‘restrizzjoni kalorika jew f’alimentazzjoni ad libitum. Għaldaqstant, billi l-indikazzjoni dwar is-saħħa mhijiex konformi mar-rekwiżiti tar-Regolament (KE) Nru 1924/2006 għall-inklużjoni fil-lista tal-Unjoni ta’ indikazzjonijiet permessi, jenħtieġ li ma tiġix awtorizzata.

(7)

Wara applikazzjoni mingħand BioGaia AB, imressqa skont l-Artikolu 13(5) tar-Regolament (KE) Nru 1924/2006, l-Awtorità kellha tagħti opinjoni fuq indikazzjoni dwar is-saħħa marbuta ma’ pastilji orodispersibbli li fihom taħlita ta’ Lactobacillus reuteri DSM 17938 u Lactobacillus reuteri ATCC PTA 5289 u l-funzjoni normali tal-ħanek (Mistoqsija Nru EFSA-Q-2019-00383). L-indikazzjoni proposta mill-applikant kienet kif ġej: “Il-pastilji li fihom il-Lactobacillus reuteri DSM 17938 u l-Lactobacillus reuteri ATCC PTA 5289 jappoġġaw il-funzjoni normali tal-ħanek”.

(8)

Il-Kummissjoni, l-Istati Membri u l-applikant irċevew l-opinjoni xjentifika (3) dwar dik l-indikazzjoni mill-Awtorità, li kkonkludiet li, abbażi tad-data ppreżentata, l-evidenza xjentifika ma kinitx biżżejjed biex tiġi stabbilita relazzjoni ta’ kawża u effett bejn il-konsum tal-pastilji orodispersibbli li fihom taħlita ta’ Lactobacillus reuteri DSM 17938 u Lactobacillus reuteri ATCC PTA 5289 u l-manteniment ta’ funzjoni normali tal-ħanek. Għaldaqstant, billi l-indikazzjoni dwar is-saħħa mhijiex konformi mar-rekwiżiti tar-Regolament (KE) Nru 1924/2006 għall-inklużjoni fil-lista tal-Unjoni ta’ indikazzjonijiet permessi, jenħtieġ li ma tiġix awtorizzata.

(9)

Il-kummenti mingħand analyze & realize GmbH li rċeviet il-Kummissjoni skont l-Artikolu 16(6) tar-Regolament (KE) Nru 1924/2006, tqiesu fl-adozzjoni ta’ dan ir-Regolament.

(10)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1

L-indikazzjonijiet dwar is-saħħa elenkati fl-Anness ta’ dan ir-Regolament ma għandhomx jiġu inklużi fil-lista tal-Unjoni ta’ indikazzjonijiet permessi kif previst fl-Artikolu 13(3) tar-Regolament (KE) Nru 1924/2006.

Artikolu 2

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-6 ta’ Mejju 2022.

Għall-Kummissjoni

Il-President

Ursula VON DER LEYEN


(1)   ĠU L 404, 30.12.2006, p. 9.

(2)  EFSA Journal 2019;17(6):5715.

(3)  EFSA Journal 2020;18(3):6004.


ANNESS

Indikazzjonijiet dwar is-saħħa miċħuda

Applikazzjoni — Dispożizzjonijiet relevanti tar-Regolament (KE) Nru 1924/2006

Nutrijent, sustanza, ikel jew kategorija tal-ikel

Indikazzjoni

Referenza tal-opinjoni tal-EFSA

Indikazzjoni tas-saħħa tal-Artikolu 13(5) bbażata fuq evidenza xjentifika żviluppata ġdida u/jew tinkludi rikjesta għall-protezzjoni tad-data proprjetarja

GlycoLiteTM – Estratt milwiem standardizzat proprjetarju mill-fażola bajda (Phaseolus vulgaris L.)

GlycoLite™ jgħin biex tonqos fil-piż

Q-2018-00611

Indikazzjoni tas-saħħa tal-Artikolu 13(5) bbażata fuq evidenza xjentifika żviluppata ġdida u/jew tinkludi rikjesta għall-protezzjoni tad-data proprjetarja

Pastilji b’żewġ razez ta’ Lactobacillus reuteri:

Lactobacillus reuteri DSM 17938 u Lactobacillus reuteri ATCC PTA 5289, bejn wieħed u ieħor ammont indaqs ta’ kull razza (ammont minimu totali ta’ 1 × 108 CFU/pastilja ta’ kull razza batterjali)

Il-pastilji li fihom il-Lactobacillus reuteri DSM 17938 u l-Lactobacillus reuteri ATCC PTA 5289 jappoġġaw il-funzjoni normali tal-ħanek

Q-2019-00383