IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1924/2006 tal-Parlament Ewropew u tal-Kunsill tal-20 ta’ Diċembru 2006 dwar indikazzjonijiet dwar in-nutrizzjoni u s-saħħa mogħtija fuq l-ikel (1), u b’mod partikolari l-Artikolu 17(3) tiegħu,

Billi:

(1)	Skont ir-Regolament (KE) Nru 1924/2006, l-indikazzjonijiet dwar is-saħħa li jsiru fuq il-prodotti tal-ikel huma pprojbiti sakemm ma jkunux awtorizzati mill-Kummissjoni f’konformità ma’ dak ir-Regolament u inklużi f’lista tal-Unjoni ta’ indikazzjonijiet permessi.

(2)

Ir-Regolament (KE) Nru 1924/2006 jipprevedi wkoll li l-applikazzjonijiet għall-awtorizzazzjonijiet tal-indikazzjonijiet dwar is-saħħa jistgħu jintbagħtu mill-operaturi tan-negozji tal-ikel lill-awtorità kompetenti nazzjonali ta’ Stat Membru. L-awtorità kompetenti nazzjonali għandha tgħaddi l-applikazzjonijiet validi lill-Awtorità Ewropea dwar is-Sigurtà fl-Ikel (“l-Awtorità”).

(3)	Wara li tirċievi l-applikazzjoni, l-Awtorità għandha tinforma mingħajr dewmien lill-Istati Membri l-oħra u lill-Kummissjoni, u tagħti opinjoni fuq l-indikazzjoni dwar is-saħħa kkonċernata.

(4)	Il-Kummissjoni għandha tiddeċiedi dwar l-awtorizzazzjoni tal-indikazzjonijiet dwar is-saħħa filwaqt li tqis l-opinjoni li tat l-Awtorità.

(5)

Wara applikazzjoni mingħand Anxiofit Ltd., imressqa skont l-Artikolu 14(1)(a) tar-Regolament (KE) Nru 1924/2006, l-Awtorità kellha tagħti opinjoni dwar is-sostanzjar xjentifiku ta’ indikazzjoni dwar is-saħħa marbuta ma’ Anxioﬁt-1 u t-tnaqqis tal-ansjetà taħt il-limitu u tal-ansjetà ħafifa (il-Mistoqsija Nru EFSA-Q-2020-00032). L-indikazzjoni proposta mill-applikant kienet kif ġej: “Anxioﬁt-1 intwera li jtejjeb l-ansjetà taħt il-limitu u l-ansjetà ħafifa. L-ansjetà taħt il-limitu u l-ansjetà ħafifa huma fatturi ta’ riskju fl-iżvilupp tad-disturbi marbuta mal-ansjetà u d-depressjoni.”

(6)

Il-Kummissjoni, l-Istati Membri u l-applikant irċevew l-opinjoni xjentifika (2) dwar dik l-indikazzjoni mill-Awtorità, li kkonkludiet li, abbażi tad-data ppreżentata, l-evidenza xjentifika ma kinitx biżżejjed biex tiġi stabbilita relazzjoni ta’ kawża u effett bejn il-konsum tal-Anxiofit-1 u t-tnaqqis tal-ansjetà taħt il-limitu u tal-ansjetà ħafifa. Għaldaqstant, billi l-indikazzjoni dwar is-saħħa mhijiex konformi mar-rekwiżiti tar-Regolament (KE) Nru 1924/2006 għall-inklużjoni fil-lista tal-Unjoni ta’ indikazzjonijiet permessi, jenħtieġ li ma tiġix awtorizzata.

(7)	Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Applikazzjoni - Dispożizzjonijiet relevanti tar-Regolament (KE) Nru 1924/2006	Nutrijent, sustanza, ikel jew kategorija tal-ikel	Indikazzjoni	Referenza tal-opinjoni tal-EFSA
L-Artikolu 14(1)(a), indikazzjoni dwar is-saħħa li tirreferi għat-tnaqqis tar-riskju tal-mard.	Anxiofit-1, ingredjent tal-ikel li fih estratt niexef tal-għerq idroalkoħoliku tal-Echinacea angustifolia standardizzat għall-profil alkamid speċifiku.	Anxioﬁt-1 intwera li jtejjeb l-ansjetà taħt il-limitu u l-ansjetà ħafifa. L-ansjetà taħt il-limitu u l-ansjetà ħafifa huma fatturi ta’ riskju fl-iżvilupp tad-disturbi marbuta mal-ansjetà u d-depressjoni.	EFSA-Q-2020-00032