(1)

Ir-Regolament ta’ Implimentazzjoni tal-Kummissjoni (UE) 2015/1295 (2) jipprevedi l-approvazzjoni tas-sustanza attiva sulfoksaflor u konsegwentement l-inserzjoni tas-sulfoksaflor fl-Anness tar-Regolament ta’ Implimentazzjoni tal-Kummissjoni (UE) Nru 540/2011 (3).

(2)

Ir-Regolament ta’ Implimentazzjoni (UE) 2015/1295 jipprevedi wkoll il-preżentazzjoni ta’ aktar informazzjoni konfermatorja dwar ir-riskju għan-naħal tal-għasel permezz tar-rotot differenti ta’ esponiment, b’mod partikolari n-nektar, it-trab tad-dakra, il-fluwidu u t-trab tal-guttazzjoni, ir-riskju għan-naħal tal-għasel li jfittxu n-nektar jew it-trab tad-dakra fl-għelejjel suċċessivi u fil-fjuri tal-ħaxix ħażin, ir-riskju għal dakkara oħrajn li mhux naħal tal-għasel u r-riskju għad-duqqajs tan-naħal.

(3)

L-applikant ippreżenta l-informazzjoni konfermatorja meħtieġa fil-perjodu previst fir-Regolament ta’ Implimentazzjoni (UE) 2015/1295.

(4)

Kif miftiehem bejn l-Irlanda u r-Repubblika Ċeka, ir-relatur u l-Istat Membru korelatur, ir-Repubblika Ċeka vvalutat l-informazzjoni konfermatorja mressqa mill-applikant. Ir-Repubblika Ċeka ppreżentat il-valutazzjoni tagħha, fil-forma ta’ addendum tal-abbozz tar-rapport ta’ valutazzjoni, lill-Istati Membri l-oħra, lill-Kummissjoni u lill-Awtorità Ewropea dwar is-Sigurtà fl-Ikel (“l-Awtorità”) fit-12 ta’ Marzu 2018.

(5)

L-Istati Membri, l-applikant u l-Awtorità ġew ikkonsultati u ntalbu jikkummentaw dwar il-valutazzjoni tal-informazzjoni konfermatorja mill-Istat Membru korelatur.

(6)

L-Awtorità ppubblikat rapport tekniku (4) li kien fih l-eżitu fil-qosor ta’ din il-konsultazzjoni dwar is-sulfoksaflor fl-20 ta’ Settembru 2018.

(7)

Peress li matul il-konsultazzjoni dwar l-addendum tal-abbozz tar-rapport ta’ valutazzjoni ġew espressi opinjonijiet diverġenti, il-Kummissjoni kkonsultat lill-Awtorità u talbitha tipprovdi konklużjoni dwar il-punti kollha fejn kien hemm opinjonijiet diverġenti.

(8)

L-Awtorità ppubblikat il-konklużjoni tagħha dwar il-valutazzjoni tar-riskju fit-28 ta’ Marzu 2019 (5). Il-Kummissjoni kompliet tikkonsulta lill-Awtorità b’rabta mar-riskju għan-naħal. Il-Kummissjoni talbet lill-Awtorità, b’mod partikolari, biex tlesti l-valutazzjoni tal-miżuri għat-tnaqqis tat-tifrix tal-bexx meħtieġa biex jipproteġu n-naħal bagħli u n-naħal solitarju fil-ġmiem madwar l-għelieqi mill-esponiment għas-sulfoksaflor u tar-riskju għan-naħal mill-ilma tal-għadajjar.

(9)

L-Awtorità ppubblikat il-konklużjoni aġġornata tagħha fit-30 ta’ Marzu 2020 (6).

(10)

Fil-konklużjoni aġġornata tagħha, l-Awtorità qieset li fid-dawl tal-eżitu tal-evalwazzjoni tal-informazzjoni konfermatorja pprovduta mill-applikant, ir-riskju għan-naħal għall-użi fis-serer permanenti kien aċċettabbli. Madankollu, il-valutazzjoni tar-riskju għan-naħal bagħli u għan-naħal solitarju minn użi fuq barra ma setgħetx tiġi ffinalizzata. Għalhekk, l-Awtorità ma setgħetx tikkonkludi li hemm riskju baxx għan-naħal bagħli u għan-naħal solitarju minn użi fuq barra.

(11)

L-abbozz tar-rapport ta’ valutazzjoni, l-addendum u l-konklużjoni aġġornata tal-Awtorità ġew rieżaminati mill-Istati Membri u mill-Kummissjoni fil-Kumitat Permanenti dwar il-Pjanti, l-Annimali, l-Ikel u l-Għalf u ġew iffinalizzati fit-28 ta’ Jannar 2022. Fl-istess ħin, ir-rapport ta’ rieżami għas-sulfoksaflor ġie aġġornat.

(12)

L-applikant ingħata l-possibbiltà li jippreżenta l-kummenti dwar ir-rapport ta’ rieżami aġġornat.

(13)

Madankollu, minkejja l-argumenti mressqa mill-applikant, il-Kummissjoni kkonkludiet li r-riskju għan-naħal mill-użu fuq barra tas-sulfoksaflor ma jistax jiġi eskluż. Għaldaqstant, f’konformità mal-Artikolu 21(3) tar-Regolament (KE) Nru 1107/2009 flimkien mal-Artikolu 6 tiegħu, huwa neċessarju u xieraq li l-approvazzjoni tas-sulfoksaflor tiġi ristretta għall-użi fis-serer permanenti biss.

(14)

Għalhekk jenħtieġ li r-Regolamenti ta’ Implimentazzjoni (UE) 2015/1295 u (UE) Nru 540/2011 jiġu emendati skont dan.

(15)

Jenħtieġ li l-Istati Membri jingħataw iż-żmien biex jirtiraw jew jemendaw l-awtorizzazzjonijiet għall-prodotti għall-protezzjoni tal-pjanti li fihom is-sulfoksaflor u li mhumiex konformi mal-kundizzjonijiet ristretti tal-approvazzjoni.

(16)

Għall-prodotti għall-protezzjoni tal-pjanti li fihom is-sulfoksaflor, meta jingħata perjodu ta’ grazzja mill-Istati Membri f’konformità mal-Artikolu 46 tar-Regolament (KE) Nru 1107/2009, jenħtieġ li dak il-perjodu jkun qasir kemm jista’ jkun u li jiskadi sa mhux aktar tard minn 12-il xahar wara d-dħul fis-seħħ ta’ dan ir-Regolament.

(17)

Fid-dawl tal-informazzjoni pertinenti kollha disponibbli, mhuwiex meqjus xieraq li tinżamm l-approvazzjoni tas-sustanza attiva għall-użu fuq barra f’dan iż-żmien. Madankollu, dan ir-Regolament ma jżommx lill-applikant milli jissottometti informazzjoni addizzjonali biex jemenda l-kundizzjonijiet tal-approvazzjoni, kif previst fl-Artikoli 7 u 14 tar-Regolament (KE) Nru 1107/2009, u dik l-informazzjoni tiġi rieżaminata f’perjodu ta’ żmien raġonevoli kif previst f’dak ir-Regolament.

(18)

Il-Kumitat Permanenti dwar il-Pjanti, l-Annimali, l-Ikel u l-Għalf ma tax opinjoni qabel l-iskadenza stipulata mill-President tiegħu. Att ta’ implimentazzjoni tqies bħala neċessarju u l-president issottometta l-abbozz tal-att ta’ implimentazzjoni lill-kumitat tal-appelli għal aktar deliberazzjoni. Il-kumitat tal-appell ma ta l-ebda opinjoni,