1.   Meta tkun meħtieġa konsolidazzjoni skont l-Artikolu 18(3) tar-Regolament (UE) Nru 575/2013, l-entità li ġejja għandha tkun responsabbli għall-iżgurar tal-konformità mar-rekwiżiti stabbiliti fl-Ewwel Parti tat-Titolu II tal-Kapitolu 2 tat-Taqsima 1 tar-Regolament (UE) Nru 575/2013 fuq il-bażi tas-sitwazzjoni konsolidata tal-impriżi kollha tal-grupp:

(a)	l-istituzzjoni, meta jkun hemm istituzzjoni waħda biss fil-grupp;

(b)	l-istituzzjoni ta’ kreditu bl-akbar total fil-karta tal-bilanċ, meta jkun hemm diversi istituzzjonijiet ta’ kreditu fil-grupp;

(c)	id-ditta tal-investiment soġġetta għar-Regolament (UE) Nru 575/2013 bl-akbar total fil-karta tal-bilanċ, meta l-grupp ma jkun jinkludi l-ebda istituzzjoni ta’ kreditu.

2.   Għall-finijiet tal-paragrafu 1, it-total fil-karta tal-bilanċ għandu jiġi kkalkolat fuq il-bażi tal-aħħar rapporti finanzjarji konsolidati awditjati jew, meta r-rapporti finanzjarji konsolidati ma jkunux meħtieġa li jitħejjew f’konformità mal-qafas kontabilistiku applikabbli, l-aħħar rapport finanzjarju individwali vverifikat tal-istituzzjoni.

3.   Meta l-applikazzjoni tal-kriterji msemmija fil-paragrafu 1 ta’ dan l-Artikolu ma tkunx xierqa, l-awtoritajiet kompetenti responsabbli għall-eżerċitar tas-superviżjoni fuq bażi konsolidata skont l-Artikolu 111(4), (5), u (6) tad-Direttiva 2013/36/UE tal-Parlament Ewropew u tal-Kunsill (9) jistgħu jirrinunzjaw għal dawk il-kriterji, u jaħtru entità oħra fil-grupp soġġetta għar-Regolament (UE) Nru 575/2013 bħala responsabbli għall-iżġurar tal-konformità mar-rekwiżiti msemmija fl-Ewwel Parti tat-Titolu II tal-Kapitolu 2 tat-Taqsima 1 ta’ dan ir-Regolament fuq il-bażi tas-sitwazzjoni ta’ konsolidazzjoni tal-impriżi kollha tal-grupp.

Meta jivvalutaw l-adegwatezza tal-applikazzjoni tal-kriterji msemmija fil-paragrafu 1 ta’ dan l-Artikolu, dawk l-awtoritajiet kompetenti għandhom iqisu kwalunkwe deċiżjoni meħuda f’konformità mal-Artikolu 111(6) tad-Direttiva 2013/36/UE jew, fin-nuqqas ta’ din id-deċiżjoni, l-istituzzjonijiet ikkonċernati u l-importanza relattiva tal-attivitajiet tagħhom fl-Istati Membri rilevanti jew jekk dawn ikunux meħtieġa jħejju rapporti finanzjarji konsolidati għall-grupp fil-każijiet imsemmija fl-Artikolu 22(7) tad-Direttiva 2013/34/UE. F’każijiet bħal dawn, l-istituzzjoni bl-akbar total fil-karta tal-bilanċ għandu jkollha d-dritt li tinstema’, qabel ma l-awtoritajiet kompetenti jieħdu d-deċiżjoni.

4.   Fil-każijiet imsemmija f’dan l-Artikolu, l-awtoritajiet kompetenti responsabbli għall-eżerċitar tas-superviżjoni fuq bażi konsolidata skont l-Artikolu 111(4), (5) u (6) tad-Direttiva 2013/36/UE għandhom jippermettu jew jirrikjedu l-użu tal-metodu ta’ konsolidazzjoni previst fl-Artikolu 22(8) u (9) tad-Direttiva 2013/34/UE.

5.   Impriża li tkun relatata ma’ impriża waħda jew aktar fis-sens tal-Artikolu 22(7) tad-Direttiva 2013/34/UE ma għandhiex għalfejn tiġi inkluża fil-konsolidazzjoni skont dan l-Artikolu fl-istess każijiet u f’konformità mal-istess kriterji kif stabbilit fl-Artikolu 19 tar-Regolament (UE) Nru 575/2013.

1.   Fil-każ ta’ parteċipazzjonijiet f’istituzzjonijiet jew f’istituzzjonijiet finanzjarji ġestiti minn impriża inkluża fil-konsolidazzjoni flimkien ma’ impriża waħda jew aktar mhux inkluża fil-konsolidazzjoni, is-superviżur konsolidanti għandu jirrikjedi konsolidazzjoni proporzjonali skont l-Artikolu 18(4) tar-Regolament (UE) Nru 575/2013, meta jiġu ssodisfati l-kundizzjonijiet kollha li ġejjin:

(a)

l-impriżi parteċipanti jikkontrollaw bi sħab maġġoranza tad-drittijiet tal-vot tal-azzjonisti jew tal-membri fl-istituzzjoni jew fl-istituzzjoni finanzjarja kkonċernata jew ikollhom il-kapaċità li jidderieġu bi sħab l-attivitajiet rilevanti ta’ dik l-istituzzjoni jew istituzzjoni finanzjarja, skont arranġament kuntrattwali legalment infurzabbli bejniethom jew skont klawżoli tal-memoranda jew tal-artikoli ta’ assoċjazzjoni tal-istituzzjoni jew tal-istituzzjoni finanzjarja;

(b)	id-deċiżjonijiet dwar l-attivitajiet rilevanti tal-istituzzjoni jew tal-istituzzjoni finanzjarja jirrikjedu l-kunsens unanimu tal-impriżi parteċipanti kollha;

(c)

l-arranġament kuntrattwali msemmi fil-punt (a) jew il-klawżoli tal-memoranda jew tal-artikoli ta’ assoċjazzjoni tal-istituzzjoni jew tal-istituzzjoni finanzjarja jistipulaw li r-responsabbiltà tal-impriżi parteċipanti hija limitata għall-azzjoni tal-kapital li dawn għandhom fl-istituzzjoni jew fl-istituzzjoni finanzjarja kkonċernata.

2.   Fil-każijiet imsemmija f’dan l-Artikolu, il-konsolidazzjoni proporzjonali għandha titwettaq fuq il-bażi tal-azzjoni tal-kapital miżmuma fl-istituzzjoni jew fl-istituzzjoni finanzjarja kkonċernata u f’konformità mal-Artikolu 26(2) tad-Direttiva 2013/34/UE.

1.   Meta l-awtoritajiet kompetenti jiddeterminaw li l-konsolidazzjoni għandha titwettaq f’konformità mal-Artikolu 18(5) tar-Regolament (UE) Nru 575/2013, dawn jistgħu jippermettu jew jirrikjedu l-użu tal-metodu tal-ekwità skont dan l-Artikolu sakemm ma jiddeterminawx il-konsolidazzjoni proporzjonali jew sħiħa tal-istituzzjoni jew tal-istituzzjoni finanzjarja kkonċernata li tkun meħtieġa f’konformità mal-kundizzjonijiet stabbiliti fil-paragrafi minn 2 sa 5 ta’ dan l-Artikolu.

2.   L-awtorità kompetenti għandha tagħmel id-determinazzjoni msemmija fil-paragrafu 1 fuq il-bażi ta’ valutazzjoni tar-riskji ppreżentati mill-istituzzjoni jew mill-istituzzjoni finanzjarja kkonċernata lill-istituzzjoni, filwaqt li tqis il-firxa u l-effettività ta’ kull mitigant tar-riskju u l-impatt fuq ir-rekwiżiti prudenzjali tal-istituzzjoni fuq bażi konsolidata li jista’ jirriżulta mill-applikazzjoni ta’ konsolidazzjoni sħiħa jew proporzjonali.

3.   Għall-finijiet tal-valutazzjoni msemmija fil-paragrafu 2, l-istituzzjoni għandha tipprovdi lill-awtorità kompetenti, fuq talba, l-informazzjoni kollha meħtieġa b’mod partikolari fir-rigward tal-elementi li ġejjin:

(a)

l-istruttura ġenerali tas-sjieda tal-istituzzjoni jew tal-istituzzjoni finanzjarja kkonċernata, wara li tqis, b’mod partikolari, jekk azzjonijiet jew drittijiet ta’ sjieda ekwivalenti u drittijiet tal-vot, inkluż drittijiet potenzjali tal-vot kif imsemmi fl-Artikolu 5(5), jitqassmux bejn għadd kbir ta’ azzjonisti, sidien jew membri, jew jekk l-istituzzjoni hijiex l-azzjonist ewlieni, is-sid jew il-membru tal-istituzzjoni jew tal-istituzzjoni finanzjarja;

(b)

jekk l-istituzzjoni taġixxix bħala sponsor billi tiġġestixxi jew tagħti pariri lill-istituzzjoni jew lill-istituzzjoni finanzjarja kkonċernata, tqiegħed it-titoli tal-istituzzjoni jew tal-istituzzjoni finanzjarja fis-suq, jew tipprovdi titjib fil-likwidità u/jew fil-kreditu lill-istituzzjoni jew lill-istituzzjoni finanzjarja, jew jekk l-istituzzjoni hijiex investitur importanti fl-istrumenti ta’ dejn jew ta’ ekwità tagħha, jew jekk hemmx involviment kuntrattwali u mhux kuntrattwali ieħor li jesponi lill-istituzzjoni għar-riskji jew għal redditi simili għall-ekwità mill-assi tal-istituzzjoni jew tal-istituzzjoni finanzjarja kkonċernata jew relatat mal-prestazzjoni tagħha;

(c)

jekk l-istituzzjoni hijiex effettivament involuta fil-proċess tat-teħid ta’ deċiżjonijiet tal-istituzzjoni jew tal-istituzzjoni finanzjarja kkonċernata, il-grad sa fejn l-istituzzjoni teżerċita influwenza fuqu, jew jekk l-istituzzjoni jew l-istituzzjoni finanzjarja titqiesx bħala kkontrollata f’konformità mal-qafas kontabilistiku applikabbli;

(d)	jekk l-istituzzjoni tirċevix servizzi operazzjonali kritiċi mill-istituzzjoni jew mill-istituzzjoni finanzjarja kkonċernata li ma jistgħux jiġu sostitwiti fil-ħin mingħajr spiża eċċessiva;

(e)	jekk il-klassifikazzjoni tal-kreditu tal-istituzzjoni jew tal-istituzzjoni finanzjarja kkonċernata hijiex ibbażata fuq il-klassifikazzjoni proprja tal-istituzzjoni;

(f)

jekk jeżistux karatteristiċi speċifiċi relatati mal-kompożizzjoni tal-bażi tal-investituri tal-istituzzjoni jew tal-istituzzjoni finanzjarja kkonċernata, b’referenza partikolari għal jekk l-investituri l-oħrajn fl-istituzzjoni jew fl-istituzzjoni finanzjarja għandhomx relazzjoni kummerċjali mill-qrib mal-istituzzjoni, għall-kapaċità tagħhom li jġarrbu telf jew għall-kapaċità tagħhom li jiddisponu mill-istrumenti finanzjarji tagħhom;

(g)	jekk l-istituzzjoni jew l-istituzzjoni finanzjarja kkonċernata u l-istituzzjoni għandhomx bażi komuni ta’ klijenti jew humiex involuti fil-kummerċjalizzazzjoni tal-prodotti ta’ xulxin;

(h)	jekk l-istituzzjoni u l-istituzzjoni jew l-istituzzjoni finanzjarja kkonċernata għandhomx l-istess marka;

(i)	jekk l-istituzzjoni tkunx diġà pprovdiet appoġġ finanzjarju lill-istituzzjoni jew lill-istituzzjoni finanzjarja kkonċernata f’każ ta’ diffikultajiet finanzjarji.

4.   L-awtoritajiet kompetenti jistgħu, b’mod partikolari, jirrikjedu konsolidazzjoni proporzjonali tal-istituzzjoni jew tal-istituzzjoni finanzjarja kkonċernata skont l-azzjoni tal-kapital miżmuma f’dik l-impriża meta jkun hemm ftehim kuntrattwali bejn l-istituzzjoni u azzjonist, sid jew membru wieħed jew aktar tal-istituzzjoni jew tal-istituzzjoni finanzjarja kkonċernata li jipprovdu appoġġ finanzjarju bi sħab lill-istituzzjoni jew lill-istituzzjoni finanzjarja jew ikun hemm evidenza qawwija li dawn jappoġġaw finanzjarjament lill-istituzzjoni jew lill-istituzzjoni finanzjarja skont l-azzjoni tal-kapital miżmuma fiha.

5.   L-awtoritajiet kompetenti jistgħu, b’mod partikolari, jirrikjedu konsolidazzjoni sħiħa tal-istituzzjoni jew tal-istituzzjoni finanzjarja kkonċernata meta, bħala konsegwenza tar-relazzjonijiet organizzazzjonali u finanzjarji bejn l-istituzzjoni u l-istituzzjoni jew l-istituzzjoni finanzjarja kkonċernata, l-istituzzjoni tkun esposta għall-maġġoranza tar-riskji jew tal-benefiċċji li jirriżultaw mill-attivitajiet rilevanti ta’ dik l-istituzzjoni jew l-istituzzjoni finanzjarja.

1.   Meta istituzzjoni teżerċita influwenza sinifikanti fuq istituzzjoni jew istituzzjoni finanzjarja waħda jew aktar, iżda mingħajr ma jkollha parteċipazzjoni jew rabtiet kapitali oħra f’dawk l-istituzzjonijiet, l-awtoritajiet kompetenti jistgħu jiddeterminaw il-konsolidazzjoni sħiħa tal-istituzzjonijiet jew tal-istituzzjonijiet finanzjarji kkonċernati skont il-punt (a) tal-Artikolu 18(6) tar-Regolament (UE) Nru 575/2013, fuq il-bażi ta’ valutazzjoni tar-riskji ppreżentati minn dawk l-istituzzjonijiet jew l-istituzzjonijiet finanzjarji lill-istituzzjoni li teżerċita l-influwenza sinifikanti, filwaqt li jqisu l-firxa u l-effettività ta’ kwalunkwe mitigant tar-riskju u l-impatt fuq ir-rekwiżiti prudenzjali ta’ dik l-istituzzjoni fuq bażi konsolidata li jista’ jirriżulta mill-applikazzjoni ta’ konsolidazzjoni sħiħa.

2.   Għall-finijiet tal-valutazzjoni msemmija fil-paragrafu 1, l-istituzzjoni għandha tipprovdi lill-awtorità kompetenti, fuq talba, l-informazzjoni kollha meħtieġa, b’mod partikolari fir-rigward tal-elementi msemmija fil-punti minn (a) sa (i) tal-Artikolu 4(3).

3.   L-awtoritajiet kompetenti jistgħu, b’mod partikolari, jirrikjedu konsolidazzjoni sħiħa tal-istituzzjonijiet jew tal-istituzzjonijiet finanzjarji msemmija fil-paragrafu 1 meta, bħala konsegwenza tar-relazzjonijiet organizzazzjonali u finanzjarji bejn l-istituzzjoni li teżerċita l-influwenza sinifikanti u l-istituzzjonijiet jew l-istituzzjonijiet finanzjarji kkonċernati, l-istituzzjoni tkun esposta għall-maġġoranza tar-riskji jew tal-benefiċċji li jirriżultaw mill-attivitajiet rilevanti ta’ dawk l-istituzzjonijiet jew l-istituzzjonijiet finanzjarji.

4.   Għall-finijiet ta’ dan l-Artikolu, l-elementi li għandhom jitqiesu bħala indikazzjonijiet ta’ influwenza sinifikanti għandhom jinkludu dan li ġej:

(a)	l-istituzzjoni tkun ħatret jew ikollha d-dritt li taħtar membru tal-korp amministrattiv, maniġerjali jew superviżorju tal-istituzzjoni jew tal-istituzzjoni finanzjarja kkonċernata;

(b)	l-istituzzjoni tkun involuta b’mod effettiv fil-proċess tat-teħid ta’ deċiżjonijiet tal-istituzzjoni jew tal-istituzzjoni finanzjarja kkonċernata, inkluż fid-deċiżjonijiet dwar id-dividendi u distribuzzjonijiet oħrajn;

(c)	l-eżistenza ta’ tranżazzjonijiet materjali mal-istituzzjoni jew mal-istituzzjoni finanzjarja kkonċernata;

(d)	l-istituzzjoni tkun skambjat persunal maniġerjali mal-istituzzjoni jew mal-istituzzjoni finanzjarja kkonċernata;

(e)	l-istituzzjoni tipprovdi informazzjoni teknika essenzjali jew servizzi kritiċi lill-istituzzjoni jew lill-istituzzjoni finanzjarja kkonċernata;

(f)

l-istituzzjoni jkollha drittijiet addizzjonali fl-istituzzjoni jew fl-istituzzjoni finanzjarja kkonċernata, skont kuntratt, il-klawżoli tal-memoranda tagħhom jew l-artikoli ta’ assoċjazzjoni li jistgħu jaffettwaw il-ġestjoni jew il-proċess tat-teħid ta’ deċiżjonijiet ta’ dik l-istituzzjoni jew l-istituzzjoni finanzjarja.

5.   L-eżistenza ta’ ċertifikat tal-azzjonijiet, ta’ għażliet ta’ xiri ta’ azzjonijiet, ta’ strumenti ta’ dejn li huma konvertibbli f’azzjonijiet ordinarji jew ta’ strumenti simili oħrajn li bħalissa jistgħu jiġu eżerċitati jew huma konvertibbli u li għandhom il-potenzjal, jekk jiġu eżerċitati jew ikkonvertiti, li jagħtu lill-istituzzjoni s-setgħa tal-vot jew li jnaqqsu s-setgħa tal-vot ta’ parti oħra fuq il-politiki finanzjarji u operattivi tal-istituzzjoni jew tal-istituzzjoni finanzjarja kkonċernata, għandha tiġi kkunsidrata wkoll fil-valutazzjoni tal-influwenza sinifikanti.

1.   Awtorità kompetenti għandha tiddetermina l-konsolidazzjoni ta’ żewġ istituzzjonijiet jew istituzzjonijiet finanzjarji jew aktar li jitqiegħdu f'ġestjoni unika għajr skont kuntratt, il-klawżoli tal-memoranda tagħhom jew l-artikoli ta’ assoċjazzjoni għall-finijiet tal-punt (b) tal-Artikolu 18(6) tar-Regolament (UE) Nru 575/2013, meta jiġu ssodisfati l-kundizzjonijiet li ġejjin:

(a)	l-awtorità kompetenti tkun wettqet valutazzjoni bil-għan li tivverifika li l-politiki finanzjarji u operattivi tal-istituzzjonijiet jew tal-istituzzjonijiet finanzjarji jkunu kkoordinati b’mod effettiv; u

(b)	l-istituzzjonijiet jew l-istituzzjonijiet finanzjarji kkonċernati ma jkunux relatati fis-sens tal-Artikolu 22(1), (2) u l-punt (b) tal-Artikolu 22(7) tad-Direttiva 2013/34/UE.

2.   Għall-finijiet tal-punt (a) tal-paragrafu 1, l-awtoritajiet kompetenti jistgħu, b’mod partikolari, iqisu l-elementi li ġejjin bħala indikazzjonijiet tal-eżistenza tas-sitwazzjoni msemmija f’dan il-punt:

(a)	l-istituzzjonijiet jew l-istituzzjonijiet finanzjarji kkonċernati jkunu kkontrollati direttament jew indirettament, mill-istess persuna fiżika jew persuni fiżiċi, jew mill-istess entità jew entitajiet;

(b)

maġġoranza tal-membri tal-korp amministrattiv, maniġerjali jew superviżorju tal-istituzzjonijiet jew tal-istituzzjonijiet finanzjarji tkun tikkonsisti minn persuni maħtura mill-istess persuna fiżika jew persuni fiżiċi jew mill-istess entità jew entitajiet, anke jekk dawk il-membri ma jkunux jikkonsistu mill-istess persuni.

3.   Fil-każijiet imsemmija f’dan l-Artikolu, l-awtoritajiet kompetenti għandhom jippermettu jew jirrikjedu l-użu tal-metodu ta’ konsolidazzjoni previst fl-Artikolu 22(8) u (9) tad-Direttiva 2013/34/UE.

4.   L-Artikolu 2(1), (2) u (3) ta’ dan ir-Regolament għandu japplika bl-iskop li tiġi ddeterminata l-entità responsabbli għall-iżgurar tal-konformità mar-rekwiżiti msemmija fl-Ewwel Parti tat-Titolu II tal-Kapitolu 2 tat-Taqsima 1 tar-Regolament (UE) Nru 575/2013 fuq il-bażi tas-sitwazzjoni ta’ konsolidazzjoni tal-istituzzjonijiet u tal-istituzzjonijiet finanzjarji kollha msemmija fil-paragrafu 1 ta’ dan l-Artikolu.

1.   Awtorità kompetenti tista’ tirrikjedi l-konsolidazzjoni sħiħa jew proporzjonali ta’ sussidjarja jew impriża li fiha istituzzjoni jkollha parteċipazzjoni meta din is-sussidjarja jew impriża ma tkunx istituzzjoni, istituzzjoni finanzjarja jew impriża ta’ servizzi anċillari skont l-Artikolu 18(8) tar-Regolament (UE) Nru 575/2013, dment li din twettaq valutazzjoni li tivverifika li l-kundizzjoni stabbilita fil-punt (b) tal-Artikolu 18(8) tar-Regolament (UE) Nru 575/2013 qed tiġi ssodisfata. Għal dan il-fini, għandu japplika l-Artikolu 4(2) u (3) ta’ dan ir-Regolament.

2.   L-awtoritajiet kompetenti jistgħu, b’mod partikolari, jirrikjedu konsolidazzjoni sħiħa tas-sussidjarja jew tal-impriża msemmija fil-paragrafu 1 meta, bħala konsegwenza tar-relazzjonijiet organizzazzjonali u finanzjarji bejn l-istituzzjoni u s-sussidjarja jew l-impriża kkonċernata, l-istituzzjoni tkun esposta għall-maġġoranza tar-riskji jew tal-benefiċċji li jirriżultaw mill-attivitajiet rilevanti ta’ din is-sussidjarja jew l-impriża.

3.   L-awtoritajiet kompetenti jistgħu b’mod partikolari jirrikjedu konsolidazzjoni proporzjonali ta’ impriża msemmija fil-paragrafu 1 skont l-azzjoni tal-kapital miżmuma f’din l-impriża meta tiġi ssodisfata waħda mill-kundizzjonijiet li ġejjin:

(a)

l-impriża tkun ikkontrollata bi sħab mill-istituzzjoni flimkien ma’ impriża waħda jew aktar mhux inkluża fil-konsolidazzjoni skont arranġament kuntrattwali legalment infurzabbli bejniethom jew il-klawżoli tal-memoranda tal-impriża jew l-artikoli ta’ assoċjazzjoni u d-deċiżjonijiet dwar l-attivitajiet rilevanti tal-impriża jkunu jirrikjedu l-kunsens unanimu tal-impriżi parteċipanti kollha;

(b)	ikun hemm ftehim kuntrattwali bejn l-istituzzjoni u azzjonist, sid jew membru wieħed jew aktar tal-impriża biex jipprovdu appoġġ finanzjarju bi sħab lil din l-impriża jew ikun hemm evidenza b’saħħitha li dawn jappoġġaw finanzjarjament lill-impriża skont l-azzjoni tal-kapital miżmuma fiha.

1.   F’każijiet fejn jintuża l-metodu ta’ konsolidazzjoni previst fl-Artikolu 22(8) u (9) tad-Direttiva 2013/34/UE skont il-punt (b) tal-Artikolu 18(3) jew (6) tar-Regolament (UE) Nru 575/2013, istituzzjoni tista’ tinkludi l-entrati tal-Grad 1 ta’ Ekwità Komuni u l-istrumenti kapitali tal-Grad 1 u tal-Grad 2 Addizzjonali u l-kontijiet tal-primjum azzjonarju relatati tal-impriżi inklużi fil-kamp ta’ applikazzjoni prudenzjali tal-konsolidazzjoni li jkunu jappartjenu għal persuni għajr dawk l-impriżi fil-kapital konsolidat tal-Grad 1 ta’ Ekwità Komuni, u tal-Grad 1 u tal-Grad 2 Addizzjonali, dment li dawk l-entrati kapitali jkunu disponibbli biex ikopru t-telf tal-impriżi kollha inklużi fil-konsolidazzjoni.

Meta l-entrati tal-Grad 1 ta’ Ekwità Komuni u l-istrumenti kapitali tal-Grad 1 u tal-Grad 2 Addizzjonali u l-kontijiet tal-primjum azzjonarju relatati msemmija fl-ewwel subparagrafu ma jkunux disponibbli biex ikopru t-telf tal-impriżi kollha inklużi fil-kamp ta’ applikazzjoni prudenzjali tal-konsolidazzjoni, l-istituzzjoni għandha tiddetermina l-ammont tal-entrati tal-Grad 1 ta’ Ekwità Komuni u tal-istrumenti kapitali tal-Grad 1 u tal-Grad 2 Addizzjonali u l-kontijiet tal-primjum azzjonarju relatati li għandhom jiġu inklużi fil-kapital konsolidat tal-Grad 1, u tal-Grad 1 u tal-Grad 2 Addizzjonali, f’konformità mal-Artikoli minn 81 sa 88 tar-Regolament (UE) Nru 575/2013.

2.   Għall-finijiet tal-paragrafu 1, l-entrati tal-Grad 1 ta’ Ekwità Komuni u l-istrumenti kapitali tal-Grad 1 u tal-Grad 2 Addizzjonali u l-kontijiet tal-primjum azzjonarju relatati msemmija fl-ewwel subparagrafu tal-paragrafu 1, li jkunu jappartjenu għall-persuna jew għall-persuni jew għall-entità jew għall-entitajiet li jiġġestixxu l-impriżi fuq bażi magħquda skont l-Artikolu 18(3) tar-Regolament (UE) Nru 575/2013 jew li jeżerċitaw ġestjoni unika fuq l-impriżi skont il-punt (b) tal-Artikolu 18(6) ta’ dan ir-Regolament, għandhom jitqiesu li huma disponibbli biex ikopru t-telf tal-impriżi kollha inklużi fil-kamp ta’ applikazzjoni prudenzjali tal-konsolidazzjoni.

3.   F’każijiet fejn tkun meħtieġa konsolidazzjoni sħiħa skont l-Artikolu 18(5), il-punt (a) tal-Artikolu 18(6) jew l-Artikolu 18(8) tar-Regolament (UE) Nru 575/2013, l-istituzzjoni għandha tiddetermina l-ammont ta’ entrati tal-Grad 1 ta’ Ekwità Komuni u tal-istrumenti kapitali tal-Grad 1 u tal-Grad 2 Addizzjonali u tal-kontijiet tal-primjum azzjonarju relatati tal-impriżi inklużi fil-kamp ta’ applikazzjoni prudenzjali tal-konsolidazzjoni li jkunu jappartjenu għal persuni għajr dawk l-impriżi, li għandu jiġi inkluż fil-kapital konsolidat tal-Grad 1 ta’ Ekwità Komuni, u tal-Grad 1 u tal-Grad 2 Addizzjonali, f’konformità mal-Artikoli minn 81 sa 88 tar-Regolament (UE) Nru 575/2013. Għal dan il-għan, l-impriżi li għalihom tkun meħtieġa konsolidazzjoni sħiħa għandhom jitqiesu bħala sussidjarji.

4.   F’każijiet fejn tkun meħtieġa konsolidazzjoni proporzjonali skont l-Artikolu 18(4), (5) jew (8) tar-Regolament (UE) Nru 575/2013, l-istituzzjonijiet għandhom jiddeterminaw l-ammont ta’ strumenti kapitali tal-Grad 1 u tal-Grad 2 Addizzjonali maħruġa mill-impriżi inklużi b’mod proporzjonali fil-kamp ta’ applikazzjoni prudenzjali tal-konsolidazzjoni li jkunu jappartjenu għal persuni għajr dawk l-impriżi kif ukoll tal-kontijiet tal-primjum azzjonarju relatati, li għandu jiġi inkluż fil-kapital konsolidat tal-Grad 1 u tal-Grad 2 Addizzjonali f’konformità mal-Artikoli 82, 83, u minn 85 sa 88 tar-Regolament (UE) Nru 575/2013.

5.   Għall-finijiet tal-paragrafu 4, għandu japplika dan li ġej:

(a)	l-impriżi li għalihom tkun meħtieġa konsolidazzjoni proporzjonali għandhom jitqiesu bħala sussidjarji;

(b)	ir-referenzi għall-inklużjoni sħiħa fil-konsolidazzjoni skont l-Ewwel Parti tat-Titolu II tal-Kapitolu 2 tar-Regolament (UE) Nru 575/2013 għandhom jinftiehmu bħala referenzi għall-inklużjoni proporzjonali fil-konsolidazzjoni skont l-Artikolu 18(4), (5) jew (8) ta’ dan ir-Regolament; u

(c)	l-ammonti msemmija fl-Artikoli 82, 83 u minn 85 sa88 tar-Regolament (UE) Nru 575/2013 għandhom jiġu ddeterminati filwaqt li titqies l-azzjoni tal-kapital miżmuma mill-istituzzjoni f’dawk l-impriżi.