(1)

Ir-Regolament (UE) 2015/2283 jipprevedi li biss l-ikel ġdid awtorizzat u inkluż fil-lista tal-Unjoni tal-ikel ġdid jista’ jitqiegħed fis-suq fl-Unjoni.

(2)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (2) stabbilixxa lista tal-Unjoni ta’ ikel ġdid.

(3)

Il-lista tal-Unjoni stabbilita fl-Anness tar-Regolament ta’ Implimentazzjoni (UE) 2017/2470 tinkludi t-trans-resveratrolu minn sorsi sintetiċi u mikrobjali bħala ikel ġdid awtorizzat.

(4)

L-ikel il-ġdid trans-resveratrolu minn sors mikrobjali ġie awtorizzat bħala ingredjent ġdid tal-ikel skont l-Artikolu 5 tar-Regolament (KE) Nru 258/97 tal-Parlament Ewropew u tal-Kunsill (3) li għandu jintuża fis-supplimenti tal-ikel kif definit fid-Direttiva 2002/46/KE tal-Parlament Ewropew u tal-Kunsill (4), fil-forma ta’ kapsula jew ta’ pillola, għall-popolazzjoni adulta abbażi tal-ekwivalenza sostanzjali tagħha għar-resveratrolu bi storja tal-konsum qabel il-15 ta’ Mejju 1997 estratta mill-għeruq tal-poligonju tal-Ġappun (Fallopia japonica).

(5)

Id-Deċiżjoni ta’ Implimentazzjoni tal-Kummissjoni (UE) 2016/1190 (5) awtorizzat it-tqegħid fis-suq tal-Unjoni tat-trans-resveratrolu sintetiku bħala ingredjent ġdid tal-ikel skont ir-Regolament (KE) Nru 258/97 tal-Parlament Ewropew u tal-Kunsill, biex jintuża wkoll fis-supplimenti tal-ikel kif iddefiniti fid-Direttiva 2002/46/KE fil-forma ta’ kapsula jew ta’ pillola għall-popolazzjoni adulta.

(6)

Ir-Regolament ta’ Implimentazzjoni tal-Kummissjoni (UE) 2021/51 (6) emenda l-kundizzjonijiet tal-użu tat-trans-resveratrolu. B’mod partikolari, tneħħew ir-restrizzjonijiet fuq il-formati tat-twassil tas-supplimenti tal-ikel li fihom l-ikel ġdid.

(7)

Fid-29 ta’ Lulju 2021, il-kumpanija Evolva AG (“l-applikant”) ressqet applikazzjoni lill-Kummissjoni f’konformità mal-Artikolu 10(1) tar-Regolament (UE) 2015/2283 biex jinbidlu l-ispeċifikazzjonijiet tat-trans-resveratrolu minn sors mikrobjali. L-applikant talab li jitneħħa r-rekwiżit li jenħtieġ li 100 % tal-partikoli tal-ikel ġdid prodott minn S. cerevisiae jkun ta’ daqs ta’ inqas minn 62,23 mikrometri (< 62,23 μm).

(8)

L-applikant jiġġustifika t-talba billi jindika li l-bidla meħtieġa sabiex titqies il-varjazzjoni fid-daqsijiet tal-partikoli tat-trans-resveratrolu minn sors mikrobjali matul il-proċess tal-produzzjoni tiegħu u l-ipproċessar tiegħu għall-użu fis-supplimenti tal-ikel. B’appoġġ għat-talba, l-applikant ipprovda data analitika li turi li l-profil tad-daqs tal-partikoli tat-trans-resveratrolu minn sors mikrobjali huwa komparabbli mal-profil tad-daqs tal-partikoli tat-trans-resveratrolu sintetizzat kimikament li ġie evalwat mill-Awtorità Ewropea dwar is-Sigurtà fl-Ikel (“l-Awtorità”) (7), u li għalih ma hemm l-ebda rekwiżit dwar id-daqs tal-partiċelli inkluż fil-lista tal-Unjoni ta’ ikel ġdid.

(9)

Il-Kummissjoni tqis li l-aġġornament mitlub tal-lista tal-Unjoni mhux mistenni li jkollu effett fuq is-saħħa tal-bniedem u li evalwazzjoni tas-sikurezza mill-Awtorità f’konformità mal-Artikolu 10(3) tar-Regolament (UE) 2015/2283 mhijiex meħtieġa peress li t-tneħħija mitluba tar-rekwiżit tad-daqs tal-partikoli għat-trans-resveratrolu minn sors mikrobjali ma tibdilx il-profil tas-sikurezza peress li l-evidenza analitika mressqa mill-applikant turi li l-profil tad-distribuzzjoni tad-daqs tal-partikoli tiegħu hu kumparabbli ma’ dak tat-trans-resveratrolu sintetizzat kimikament li ġie evalwat mill-Awtorità.

(10)

L-informazzjoni pprovduta fl-applikazzjoni tagħti biżżejjed raġunijiet biex jiġi stabbilit li l-bidliet mitluba fl-ispeċifikazzjonijiet tat-trans-resveratrolu huma f’konformità mal-kundizzjonijiet tal-Artikolu 12 tar-Regolament (UE) 2015/2283 u jenħtieġ li tiġi approvata.

(11)

Għaldaqstant jenħtieġ li l-Anness tar-Regolament ta’ Implimentazzjoni (UE) 2017/2470 jiġi emendat skont dan.

(12)

Il-miżuri previsti f’dan ir-Regolament jikkonformaw mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,