(1)

Ir-Regolament Delegat tal-Kummissjoni (UE) 2017/583 (2) jistabbilixxi r-rekwiżiti ta’ trasparenza applikabbli għall-bonds, il-prodotti finanzjarji strutturati, il-kwoti u tal-emissjonijiet d-derivattivi. Sabiex tiġi ggarantita implimentazzjoni ordnata ta’ dawn ir-rekwiżiti, dak ir-Regolament Delegat istitwixxa l-introduzzjoni gradwali annwali tal-applikazzjoni ta’ ċerti limiti ta’ trasparenza matul perjodu ta’ erba’ snin, b’seħħ mill-2019. Dik l-introduzzjoni gradwali tippermetti t-twessigħ gradwali tal-applikazzjoni tal-obbligi ta’ trasparenza korrispondenti. Dan jikkonċerna, b’mod partikolari, il-kriterju tan-“numru medju ta’ kuljum ta’ negozji” użat għad-determinazzjoni ta’ bonds li hemm suq likwidu għalihom u l-perċentili tan-negozjar użati għad-determinazzjoni tad-daqs speċifiku tal-istrument (SSTI) li jippermetti li jiġu rinunzjati l-obbligi ta’ trasparenza ta’ qabel in-negozjar.

(2)

Skont dak l-approċċ ta’ introduzzjoni gradwali, il-pass għall-istadju li jmiss mhuwiex awtomatiku. L-Awtorità Ewropea tat-Titoli u s-Swieq (European Securities and Markets Authority, ESMA) hija obbligata tippreżenta lill-Kummissjoni l-valutazzjoni annwali tagħha tal-adegwatezza tal-pass għall-istadju li jmiss. Il-valutazzjoni tal-ESMA trid tanalizza l-evoluzzjoni tal-volumi tan-negozjar għall-istrumenti finanzjarji kkonċernati fl-istadju attwali u tantiċipa l-impatt possibbli li pass għall-istadju li jmiss jista’ jkollu kemm fuq il-likwidità disponibbli kif ukoll fuq il-parteċipanti fis-suq. Jekk ikun xieraq, l-ESMA tkun obbligata tippreżenta, flimkien mar-rapport tagħha, standard regolatorju rivedut li jaġġusta l-livell limitu għall-istadju li jmiss.

(3)

L-ESMA ppreżentat il-valutazzjoni u l-istandards regolatorji riveduti tagħha lill-Kummissjoni fit-22 ta’ Lulju 2021. L-ESMA tikkonkludi li bejn 1,57 % u 2,58 % tal-bonds innegozjati bejn l-ewwel u r-raba’ trimestru tal-2020 tqiesu bħala likwidi skont il-kriterji li japplikaw fl-istadju S2. Il-pass għall-istadju S3 ifisser żieda ta’ madwar 40 %.

(4)

Fir-rigward tal-SSTI, l-ESMA tikkonkludi li l-pass mill-istadju S2 għal S3 se jaffettwa l-aktar in-negozjar f’bonds sovrani u bonds pubbliċi oħrajn, peress li ż-żieda se tkun l-akbar għal dawk l-istrumenti. Dawk l-istrumenti, madankollu, tipikament jiġu nnegozjati fil-medda ta’ minn EUR 3 miljun sa EUR 6 miljun. Għalhekk, l-ESMA tqis li l-pass għall-istadju S3 iżżomm l-SSTI ta’ qabel in-negozjar baxx biżżejjed biex jipproteġi lill-fornituri tal-likwidità mill-impatt fuq is-suq li jirriżulta minn ordnijiet kbar, filwaqt li jiżgura li bonds aktar likwidi jkunu soġġetti għal trasparenza ta’ qabel in-negozjar.

(5)

Meta wieħed iqis il-valutazzjoni li saret mill-ESMA u l-livell limitat ta’ trasparenza fis-swieq tal-bonds, l-effetti limitati għall-kompetizzjoni fis-suq u l-fatt li l-livell limitu xorta jkun baxx biżżejjed biex jipproteġi l-fornituri tal-likwidità mill-impatt potenzjali fuq is-suq li jirriżulta minn ordnijiet kbar, ikun xieraq li jsir il-pass għall-istadju S3 għall-bonds li hemm suq likwidu għalihom u għall-SSTI għall-bonds. Jenħtieġ li l-pass għall-istadju S3 iżid il-livell ta’ trasparenza disponibbli fis-suq tal-bonds mingħajr ma jħalli impatt negattiv fuq il-likwidità.

(6)

Għalhekk jenħtieġ li r-Regolament Delegat (UE) 2017/583 jiġi emendat skont dan.

(7)

Dan ir-Regolament huwa bbażat fuq l-abbozz tal-istandards tekniċi regolatorji ppreżentati mill-ESMA lill-Kummissjoni.

(8)

L-ESMA wettqet konsultazzjonijiet pubbliċi miftuħa dwar l-istandards tekniċi regolatorji abbozzati li dan ir-Regolament huwa bbażat fuqhom, analizzat il-kostijiet u l-benefiċċji potenzjali relatati u talbet il-parir tal-Grupp tal-Partijiet Interessati tat-Titoli u s-Swieq stabbilit f’konformità mal-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (3),