(1)

L-aggressjoni militari reċenti mill-Federazzjoni Russa kontra l-Ukrajna u l-kunflitt armat li għaddej biddlu b’mod fundamentali s-sitwazzjoni tas-sigurtà fl-Ewropa. B’riżultat ta’ dik l-aggressjoni militari, l-Unjoni, u r-reġjuni tal-Lvant tagħha b’mod partikolari, qed jiffaċċaw influss sostanzjali ta’ persuni. Dan joħloq sfida addizzjonali fi żmien meta l-ekonomiji tal-Istati Membri għadhom qed jirkupraw mill-impatt tal-pandemija tal-COVID-19.

(2)

L-Istati Membri diġà jistgħu jiffinanzjaw firxa wiesgħa ta’ investimenti taħt il-programmi ta’ politika ta’ koeżjoni biex jindirizzaw sfidi migratorji taħt il-Fond Ewropew għall-Iżvilupp Reġjonali (FEŻR) u l-Fond Soċjali Ewropew (FSE), inkluż taħt ir-riżorsi addizzjonali li saru disponibbli bħala Assistenza fl-Irkupru għall-Koeżjoni u għat-Territorji tal-Ewropa (REACT-EU) biex jipprovdu assistenza għat-trawwim ta’ tiswija tad-dannu kkawżat mill-kriżi fil-kuntest tal-pandemija tal-COVID-19 u l-konsegwenzi soċjali tagħha u għat-tħejjija ta’ rkupru ekoloġiku, diġitali u reżiljenti tal-ekonomija. L-azzjonijiet jistgħu jkopru investimenti fl-oqsma tal-inklużjoni soċjali, is-saħħa, l-edukazzjoni, l-impjiegi, l-akkomodazzjoni u l-indukrar tat-tfal, inkluż permezz ta’ investimenti fl-infrastruttura, ir-riġenerazzjoni ta’ żoni urbani żvantaġġati, azzjonijiet biex jitnaqqas l-iżolament spazjali u edukattiv tal-migranti, u n-negozji l-ġodda. L-Istati Membri jistgħu jaqilbu r-riżorsi li jifdal fil-programmi tagħhom biex jindirizzaw tali sfidi ta’ migrazzjoni. Barra minn hekk, il-Fond għal Għajnuna Ewropea għall-Persuni l-Aktar fil-Bżonn (FGħEB) jista’ jintuża biex jipprovdi ikel u assistenza materjali bażika lill-persuni, inklużi ċittadini ta’ pajjiżi terzi, affettwati mill-aggressjoni militari tal-Federazzjoni Russa.

(3)

Filwaqt li r-riżorsi addizzjonali li saru disponibbli taħt ir-REACT-EU diġà jibbenefikaw minn għadd ta’ flessibbiltajiet fl-arranġamenti ta’ implimentazzjoni tagħhom, huwa meħtieġ li l-użu tar-riżorsi tal-FEŻR, l-FSE u FGħEB mill-qafas finanzjarju pluriennali 2014-2020 ikun iktar flessibbli. Wara li ġiet ikkunsidrata l-urġenza biex jiġu indirizzati l-isfidi migratorji b’riżultat tal-aggressjoni militari mill-Federazzjoni Russa kontra l-Ukrajna, jenħtieġ li l-infiq għall-operazzjonijiet li jindirizzaw dawk l-isfidi jkunu eliġibbli mid-data li fiha bdiet dik l-aggressjoni militari. Barra minn hekk, il-flessibbiltà fil-mod kif jistgħu jintużaw il-FEŻR u l-FSE jenħtieġ li tiżdied għal tali operazzjonijiet sabiex il-finanzjament disponibbli fil-programmi jkun jista’ jintuża malajr, dment li l-operazzjoni kkonċernata tkun konformi mal-programm operazzjonali kif emendat fejn meħtieġ. Jenħtieġ li dik il-flessibbiltà tkun addizzjonali għall-possibbiltajiet għall-finanzjament komplementari ta’ operazzjonijiet diġà previsti. Jenħtieġ li jiġu introdotti wkoll arranġamenti ta’ rapportar simplifikati dwar id-data tal-parteċipanti f’dawk l-operazzjonijiet.

(4)

Sabiex jiġi żgurat li l-persuni affettwati jkunu jistgħu jibbenefikaw minn assistenza taħt il-FGħEB mingħajr dewmien, huwa xieraq li l-Istati Membri jitħallew jemendaw ċerti elementi tal-programmi operazzjonali appoġġati mill-FGħEB mingħajr il-ħtieġa tal-adozzjoni ta’ deċiżjoni tal-Kummissjoni.

(5)

L-appoġġ ipprovdut taħt il-politika ta’ koeżjoni jenħtieġ li jkun komplementari, b’mod partikolari għall-azzjonijiet iffinanzjati taħt il-Fond għall-Ażil, il-Migrazzjoni u l-Integrazzjoni, biex jimmassimizza l-impatt tal-finanzjament disponibbli.

(6)

L-Istati Membri ġew affettwati mill-konsegwenzi tal-pandemija tal-COVID-19 b’mod bla preċedent. L-impatt kumplessiv ta’ dik il-pandemija kien li jitfa’ pressjoni għolja ħafna fuq il-baġits tal-Istati Membri minħabba ż-żieda f’daqqa u sinifikanti fl-investimenti pubbliċi meħtieġa fis-sistemi tal-kura tas-saħħa u f’setturi oħrajn tal-ekonomiji tagħhom. Dan irriskja wkoll li jfixkel l-appoġġ ipprovdut lill-persuni l-aktar fil-bżonn. Dan ħoloq sitwazzjoni eċċezzjonali li kienet teħtieġ li tiġi indirizzata minn miżuri speċifiċi.

(7)

Sabiex jirrispondu għall-impatt tat-tifqigħa tal-COVID-19, ir-Regolamenti (UE) Nru 1301/2013 (3) u (UE) Nru 1303/2013 (4) tal-Parlament Ewropew u tal-Kunsill ġew emendati bir-Regolament (UE) 2020/460 tal-Parlament Ewropew u tal-Kunsill (5) sabiex jippermettu aktar flessibbiltà fl-implimentazzjoni ta’ programmi appoġġati mill-FEŻR, mill-FSE u mill-Fond ta’ Koeżjoni (il-Fondi) u mill-Fond Ewropew għall-Affarijiet Marittimi u s-Sajd. Madankollu, peress li l-effetti negattivi serji ta’ dik il-kriżi fuq l-ekonomiji u s-soċjetajiet tal-Unjoni marru għall-agħar, iż-żewġ Regolamenti reġgħu ġew emendati, bir-Regolament (UE) 2020/558 tal-Parlament Ewropew u tal-Kunsill (6).

Barra minn hekk, sabiex iwieġeb għall-impatt tal-kriżi tal-COVID-19 fuq il-persuni l-aktar fil-bżonn, ir-Regolament (UE) Nru 223/2014 tal-Parlament Ewropew u tal-Kunsill (7) ġie emendat bir-Regolament (UE) 2020/559 tal-Parlament Ewropew u tal-Kunsill (8) biex jiġu introdotti miżuri speċifiċi għall-FGħeB biex tindirizza t-tifqigħa tal-COVID-19. Dawk l-emendi pprovdew flessibbiltà addizzjonali eċċezzjonali biex l-Istati Membri jkunu jistgħu jikkonċentraw fuq ir-rispons meħtieġ għall-kriżi mingħajr preċedent billi titqawwa l-possibbiltà li jiġi mobilizzat appoġġ mhux użat mill-Fondi u billi jiġu ssimplifikati r-rekwiżiti proċedurali marbutin mal-implimentazzjoni tal-programm biex jiġi indirizzat il-bżonn ta’ rispons rapidu għal dik il-kriżi. Emenda sussegwenti tar-Regolament (UE) Nru 1303/2013, introdotta bir-Regolament (UE) 2020/2221 tal-Parlament Ewropew u tal-Kunsill (9), għamlet disponibbli riżorsi addizzjonali sostanzjali bħala REACT-EU biex jipprovdu assistenza għat-trawwim ta’ tiswija tad-dannu kkawżat mill-kriżi fil-kuntest tal-pandemija tal-COVID-19 u l-konsegwenzi soċjali tagħha u għat-tħejjija ta’ rkupru ekoloġiku, diġitali u reżiljenti tal-ekonomija.

Bħala parti mill-istess pakkett, ir-Regolament (UE) Nru 223/2014 ġie emendat ukoll bir-Regolament (UE) 2021/177 tal-Parlament Ewropew u tal-Kunsill (10), sabiex jippermetti l-mobilizzazzjoni ta’ dawk ir-riżorsi addizzjonali mill-Istati Membri lill-persuni l-aktar fil-bżonn fil-kuntest tal-implimentazzjoni tal-FGħEB.

(8)

Filwaqt li l-flessibbiltajiet u r-riżorsi addizzjonali previsti fir-rigward tal-perjodu ta’ programmar 2014-2020 għenu lill-Istati Membri fl-isforzi tagħhom ta’ rispons għall-kriżijiet u ta’ rkupru, l-emerġenza ta’ varjanti ġodda tal-coronavirus, b’mod partikolari l-varjant Omicron, kif ukoll l-issikkar mifrux tar-restrizzjonijiet fl-aħħar trimestru tal-2021 komplew ikollhom effetti negattivi serji fuq l-ekonomiji u s-soċjetajiet tal-Istati Membri u xekklu l-implimentazzjoni normali tal-programmi tal-politika ta’ koeżjoni u tal-programmi appoġġati mill-FGħEB. L-aggressjoni militari reċenti mill-Federazzjoni Russa u l-flussi migratorji riżultanti aggravaw dawk l-effetti u jirriskjaw li jkomplu jimminaw l-irkupru tal-ekonomija tal-Unjoni. F’konformità mal-possibbiltà prevista fir-Regolament (UE) 2020/558, huwa għalhekk meħtieġ li tiġi prevista estensjoni eċċezzjonali ta’ waħda mill-miżuri introdotti permezz ta’ dak ir-Regolament, jiġifieri l-opzjoni tal-applikazzjoni ta’ rata ta’ kofinanzjament ta’ 100 % għas-sena kontabilistika 2020/2021 sas-sena kontabilistika ta’ wara.

(9)

Bil-ħsieb li jittaffa l-piż fuq il-baġits pubbliċi li qed jirriżulta mill-ħtieġa li jkun hemm reazzjoni għas-sitwazzjoni ta’ kriżi, li titħaffef l-implimentazzjoni tal-programm u li jiġu abilitati l-investimenti meħtieġa għall-irkupru tar-reġjuni, jenħtieġ li għalhekk l-Istati Membri jingħataw il-possibbiltà eċċezzjonali li japplikaw rata ta’ kofinanzjament ta’ 100 % fi programm appoġġat mill-FEŻR, mill-FSE, mill-Fond ta’ Koeżjoni jew mill-FGħEB għas-sena kontabilistika 2021/2022 ukoll.

(10)

Sabiex ikun hemm konformità mal-limiti massimi tal-pagamenti tal-qafas finanzjarju pluriennali għall-2022 u l-2023, jenħtieġ li jiġi stabbilit limitu massimu għal dawk is-snin għall-pagamenti li jirriżultaw mill-applikazzjoni tar-rata ta’ kofinanzjament ta’ 100 % taħt il-FEŻR, il-Fond ta’ Koeżjoni jew l-FSE. Il-pagamenti li ma jistgħux isiru b’riżultat tal-applikazzjoni ta’ dawk il-limiti massimi jenħtieġ li jitħallsu mill-Kummissjoni mal-ewwel opportunità soġġett għad-disponibbiltà tal-finanzjament, jew bl-aċċettazzjoni tal-kontijiet jew permezz ta’ pagamenti sussegwenti. Jenħtieġ li tali pagamenti differiti ma jaffettwawx l-aċċettazzjoni tal-kontijiet u ma jkollhom l-ebda effett ieħor.

(11)

Meta jitqies li l-applikazzjoni tar-rata ta’ kofinanzjament ta’ 100 % mhix se taffettwa sostanzjalment il-kontenut tal-programmi operazzjonali stess, huwa xieraq li tiġi permessa l-implimentazzjoni rapida tagħha mingħajr il-ħtieġa ta’ deċiżjoni tal-Kummissjoni li tapprova l-emenda tal-Istati Membri għat-tabelli finanzjarji tal-programm operazzjonali. Jenħtieġ li l-Istat Membru xorta waħda jinnotifika t-tabelli finanzjarji riveduti qabel is-sottomissjoni tal-applikazzjoni għall-pagament finali għas-sena kontabilistika. Emendi konsegwenzjali potenzjali, inkluż għall-valuri tal-indikaturi, jistgħu jsiru bħala parti minn emenda sussegwenti tal-programm wara t-tmiem tas-sena kontabilistika.

(12)

Peress li l-objettiv ta’ dan ir-Regolament, jiġifieri li jintroduċi miżuri ta’ flessibilità fil-qasam tal-għoti ta’ appoġġ, ma jistax jintlaħaq biżżejjed mill-Istati Membri waħedhom, iżda jista’ pjuttost, minħabba l-iskala u l-effetti tal-azzjoni proposta, jintlaħaq aħjar fil-livell tal-Unjoni, l-Unjoni tista’ tadotta miżuri, f’konformità mal-prinċipju tas-sussidjarjetà kif stabbilit fl-Artikolu 5 tat-Trattat dwar l-Unjoni Ewropea (TUE). F’konformità mal-prinċipju tal-proporzjonalità kif stabbilit f’dak l-Artikolu, dan ir-Regolament ma jmurx lil hinn minn dak li hu neċessarju biex jintlaħaq dak l-objettiv.

(13)

Għaldaqstant, jenħtieġ li r-Regolamenti (UE) Nru 1303/2013 u (UE) Nru 223/2014 jiġu emendati kif xieraq.

(14)

Fid-dawl tal-urġenza biex jiġu indirizzati l-isfidi migratorji b’riżultat tal-aggressjoni militari reċenti mill-Federazzjoni Russa u l-kriżi tas-saħħa pubblika kontinwa li ġejja mill-pandemija tal-COVID-19, ġie kkunsidrat xieraq li tiġi prevista eċċezzjoni għall-perjodu ta’ tmien ġimgħat imsemmi fl-Artikolu 4 tal-Protokoll Nru 1 dwar ir-rwol tal-Parlamenti nazzjonali fl-Unjoni Ewropea, anness mat-TUE, mat-Trattat dwar il-Funzjonament tal-Unjoni Ewropea u mat-Trattat li jistabbilixxi l-Komunità Ewropea għall-Enerġija Atomika.

(15)

Fid-dawl tal-bżonn li l-Istati Membri jkunu jistgħu jemendaw il-programmi tagħhom fil-ħin biex jibbenefikaw mill-applikazzjoni ta’ rata ta’ kofinanzjament ta’ 100 % għas-sena kontabilistika 2021/2022, jenħtieġ li r-Regolament jidħol fis-seħħ bħala kwistjoni urġenti l-għada tal-jum tal-pubblikazzjoni tiegħu f’Il-Ġurnal Uffiċjali tal-Unjoni Ewropea.