(1)

L-Anness V tar-Regolament (UE) 2019/1241 jipprevedi miżuri tekniċi stabbiliti fil-livell reġjonali għall-Baħar tat-Tramuntana, Skagerrak u Kattegat.

(2)

Fejn l-Istati Membri li għandhom interess ta’ ġestjoni dirett f’settur tas-sajd iqisu li miżuri alternattivi huma kompatibbli mal-protezzjoni tal-frieħ tal-ħut permezz tal-użu ta’ apparati ta’ selettività alternattivi għal dawk stabbiliti fil-livell reġjonali u stabbiliti fil-Parti B tal-Annessi V sa XI tar-Regolament (UE) 2019/1241, il-Kummissjoni tista’ tadotta tali miżuri permezz ta’ atti delegati fuq rakkomandazzjoni konġunta ppreżentata minn dawk l-Istati Membri.

(3)

Skont l-Artikolu 16 tar-Regolament (UE) 2019/1241, l-Istati Membri li għandhom interess ta’ ġestjoni dirett f’żona tas-sajd jistgħu jissottomettu rakkomandazzjoni konġunta lill-Kummissjoni għall-finijiet tal-adozzjoni ta’ miżuri tekniċi kif imsemmi fl-Artikolu 15(2) ta’ dak ir-Regolament fir-rigward tal-karatteristiċi ta’ selettività tal-irkaptu, skont id-daqs u skont l-ispeċi. L-Istati Membri li jippreżentaw tali rakkomandazzjoni għandhom jipprovdu evidenza xjentifika li turi li dawk il-miżuri jirriżultaw f’karatteristiċi ta’ selettività għal speċijiet speċifiċi jew taħlita ta’ speċijiet li huma mill-inqas ekwivalenti għall-karatteristiċi ta’ selettività tal-irkaptu stabbiliti fil-Parti B tal-Annessi V sa X u fil-Parti A tal-Anness XI ta’ dak ir-Regolament.

(4)

Il-Belġju, id-Danimarka, il-Ġermanja, Franza, in-Netherlands u l-Iżvezja (il-Grupp ta’ Scheveningen) għandhom interess ta’ ġestjoni tas-sajd dirett fis-sajd fil-Baħar tat-Tramuntana. Wara konsultazzjoni mal-Kunsill Konsultattiv tal-Baħar tat-Tramuntana, fis-26 ta’ Frar 2020, il-Grupp ta’ Scheveningen ippreżenta rakkomandazzjoni konġunta lill-Kummissjoni abbażi tal-Artikolu 15 tar-Regolament (UE) 2019/1241 li tipproponi att delegat biex jemenda l-Parti B tal-Anness V ta’ dak ir-Regolament biex jiġi permess l-użu ta’ apparat selettiv skont l-ispeċi fis-sajd tal-merluzz tan-Norveġja bħala alternattiva għall-għarbiel bi spazju massimu tal-vireg ta’ 35mm kif definit fil-Parti B tal-Anness V ta’ dak ir-Regolament, bħala l-miżura ta’ referenza għal dak is-sajd dirett.

(5)

Il-Grupp ta’ Esperti għas-Sajd ġie kkonsultat dwar ir-rakkomandazzjoni konġunta fit-30 ta’ Settembru 2021. Il-Parlament Ewropew attenda l-laqgħa bħala osservatur.

(6)

Il-Kumitat Xjentifiku, Tekniku u Ekonomiku għas-Sajd (“STECF”) ikkonkluda (2) li l-użu tal-apparat għall-esklużjoni x’aktarx jirriżulta f’rati mnaqqsa ta’ qabdiet inċidentali (f’piż u għadd) u f’mudell ta’ sfruttament miżmum jew imtejjeb għal speċijiet ta’ qabdiet inċidentali li jikbru akbar mill-merluzz tan-Norveġja (bħal gadojdi) meta mqabbel mal-użu tal-għarbiel. L-STECF innota li individwi iżgħar minn 15cm jikkostitwixxu biss proporzjon żgħir tal-qabdiet inċidentali globali u għalhekk ikkonkluda li l-qabdiet inċidentali fis-sajd tal-merluzz tan-Norveġja jitnaqqsu sostanzjalment bl-apparat għall-esklużjoni meta mqabbla mal-għarbiel.

(7)

Għalhekk jenħtieġ li r-Regolament (UE) 2019/1241 jiġi emendat skont dan.

(8)

Il-miżuri previsti f’dan ir-Regolament iħallu impatt dirett fuq l-ippjanar tal-istaġun tas-sajd tal-bastimenti tal-Unjoni u fuq l-attivitajiet ekonomiċi relatati, għalhekk jenħtieġ li dan ir-Regolament jidħol fis-seħħ minnufih wara l-pubblikazzjoni tiegħu. Peress li s-sajd tal-merluzz tan-Norveġja isir minn Settembru sa Diċembru, dan ir-Regolament għandu japplika mill-1 ta’ Settembru 2021. Tali applikazzjoni retroattiva ma taffettwax il-prinċipju taċ-ċertezza ġuridika u tal-protezzjoni tal-aspettattivi leġittimi,