(1)

Permezz tar-Regolament ta’ Implimentazzjoni (UE) 2015/1953 (2), il-Kummissjoni Ewropea (“il-Kummissjoni”) imponiet dazji anti-dumping fuq l-importazzjonijiet ta’ ċerti prodotti b’vina parallela rrumblati ċatt ta’ azzar elettriku bis-siliċju (“GOES”) li joriġinaw mir-Repubblika tal-Poplu taċ-Ċina (“RPĊ” jew “iċ-Ċina”), mill-Ġappun, mir-Repubblika tal-Korea (“il-Korea”), mill-Federazzjoni Russa (“ir-Russja”) u mill-Istati Uniti tal-Amerka (“l-Istati Uniti”) (“il-miżuri oriġinali”). L-investigazzjoni li wasslet għall-impożizzjoni tal-miżuri oriġinali minn hawn ’il quddiem se ssir referenza għaliha bħala “l-investigazzjoni oriġinali”.

(2)

Abbażi tal-fatti speċifiċi tal-investigazzjoni oriġinali, il-Kummissjoni ddeċidiet li d-dazji varjabbli taħt il-forma ta’ tliet prezzijiet minimi tal-importazzjoni (PMI) għal tliet kategoriji ta’ prodotti differenti ta’ GOES kienu l-aktar forma xierqa ta’ miżuri għar-raġunijiet li ġejjin:

(3)

It-tliet PMI attwalment fis-seħħ ivarjaw bejn EUR 1 536/tunnellata sa EUR 2 043/tunnellata. Dawn japplikaw għall-produtturi esportaturi msemmija individwalment li għalihom ġew stabbiliti marġnijiet tad-dumping individwali mill-pajjiżi kkonċernati kollha, jiġifieri r-RPĊ, il-Ġappun, ir-Repubblika tal-Korea, il-Federazzjoni Russa u l-Istati Uniti tal-Amerka:

(4)

Wara l-pubblikazzjoni ta’ Notifika ta’ skadenza imminenti (3), il-Kummissjoni rċeviet talba għal rieżami skont l-Artikolu 11(2) tar-Regolament bażiku).

(5)

It-talba għal rieżami tressqet fid-29 ta’ Lulju 2020 mill-European Steel Association (“Eurofer” jew “l-applikant”) f’isem il-produtturi li jirrappreżentaw aktar minn 50 %, tal-produzzjoni totali tal-Unjoni tal-GOES. It-talba għal rieżami kienet imsejsa fuq il-bażi li l-iskadenza tal-miżuri x’aktarx twassal għal kontinwazzjoni jew rikorrenza ta’ dumping u ta’ dannu għall-industrija tal-Unjoni.

(6)

Hekk kif iddeterminat, wara konsultazzjoni mal-Kumitat stabbilit bl-Artikolu 15(1) tar-Regolament bażiku, li kienet teżisti biżżejjed evidenza għall-bidu ta’ rieżami ta’ skadenza, fit-30 ta’ Ottubru 2020, il-Kummissjoni bdiet rieżami ta’ skadenza rigward l-importazzjonijiet tal-GOES li joriġinaw miċ-Ċina, mill-Ġappun, mir-Repubblika tal-Korea, mill-Federazzjoni Russa u mill-Istati Uniti tal-Amerika (“il-pajjiżi kkonċernati”) fuq il-bażi tal-Artikolu 11(2) tar-Regolament bażiku. Din ippubblikat Notifika ta’ Bidu f’Il-Ġurnal Uffiċjali tal-Unjoni Ewropea (4) (“in-Notifika ta’ Bidu”).

(7)

L-investigazzjoni tal-probabbiltà ta’ kontinwazzjoni jew ta’ rikorrenza tad-dumping kopriet il-perjodu mill-1 ta’ Lulju 2019 sat-30 ta’ Ġunju 2020 (il-“perjodu ta’ investigazzjoni ta’ rieżami” jew “PIR”). L-eżami tax-xejriet rilevanti għall-valutazzjoni tal-probabbiltà ta’ kontinwazzjoni jew ta’ rikorrenza ta’ dannu kopra l-perjodu mill-1 ta’ Jannar 2017 sal-aħħar tal-perjodu ta’ investigazzjoni tar-rieżami (“il-perjodu taħt kunsiderazzjoni”).

(8)

Dan il-każ inbeda fit-30 ta’ Ottubru 2020, jiġifieri matul il-perjodu ta’ tranżizzjoni miftiehem bejn ir-Renju Unit u l-UE li fih ir-Renju Unit baqa’ soġġett għad-dritt tal-Unjoni. Dak il-perjodu ntemm fil-31 ta’ Diċembru 2020. Konsegwentement, mill-1 ta’ Jannar 2021, il-kumpaniji u l-assoċjazzjonijiet mir-Renju Unit ma baqgħux jikkwalifikaw bħala partijiet interessati f’dan il-proċediment.

(9)

Permezz ta’ nota għall-fajl tal-każ (5) fl-14 ta’ Jannar 2021, il-Kummissjoni stiednet lill-operaturi tar-Renju Unit li kkunsidraw li madankollu xorta waħda jikkwalifikaw bħala partijiet interessati sabiex jikkuntattjawha. Ma wasal l-ebda kumment mingħand l-operaturi tar-Renju Unit.

(10)

Fin-Notifika ta’ Bidu, il-partijiet interessati ġew mistiedna sabiex jikkuntattjaw lill-Kummissjoni sabiex jieħdu sehem fl-investigazzjoni. Barra minn hekk, il-Kummissjoni speċifikament informat lill-applikant, lill-produtturi magħrufa tal-Unjoni, lill-produtturi esportaturi magħrufa fil-pajjiżi konċernati, lil importaturi, utenti, negozjanti, kif ukoll assoċjazzjonijiet li kien magħruf li kienu kkonċernati, dwar l-investigazzjoni ta’ rieżami, u stednithom jieħdu sehem.

(11)

Il-partijiet interessati kellhom l-opportunità li jikkummentaw fuq il-bidu tar-rieżami ta’ skadenza u li jitolbu seduta ta’ smigħ mal-Kummissjoni u/jew mal-Uffiċjal tas-Seduta fil-proċedimenti kummerċjali.

(12)

Il-Kummissjoni organizzat seduti ma’ diversi utenti, diversi assoċjazzjonijiet ta’ utenti u produtturi esportaturi matul ir-rieżami ta’ skadenza.

(13)

Fin-Notifika ta’ Bidu, il-Kummissjoni indikat li hija tista’ tuża kampjuni f’konformità mal-Artikolu 17 tar-Regolament bażiku.

(14)

Fin-Notifika ta’ Bidu, il-Kummissjoni ħabbret li hi kienet għażlet proviżorjament kampjun tal-produtturi tal-Unjoni li kienu se jiġu investigati. Madankollu, fil-jum tal-pubblikazzjoni tan-Notifika ta’ Bidu, fit-30 ta’ Ottubru 2020, il-Kummissjoni ħarġet nota għall-fajl li ħabbret li minħabba n-numru limitat ta’ produtturi magħrufa fl-Unjoni Ewropea, il-kampjunar tal-produtturi tal-UE ma kienx meqjus neċessarju u stiednet lill-partijiet interessati sabiex jikkummentaw. Ma wasal l-ebda kumment. Għalhekk, l-erba’ produtturi magħrufa kollha tal-Unjoni ntalbu jissottomettu tweġiba dettaljata għall-kwestjonarju kif ukoll li jaqblu dwar verifika tat-tweġibiet għall-kwestjonarju.

(15)

Sabiex tiddeċiedi jekk kienx hemm bżonn li jittieħed kampjun u, jekk iva, sabiex tagħżel kampjun, il-Kummissjoni talbet lill-importaturi mhux relatati sabiex jipprovdu l-informazzjoni speċifikata fin-Notifika ta’ Bidu.

(16)

Importatur mhux relatat wieħed biss ippreżenta ruħu u pprovda l-informazzjoni mitluba. Konsegwentement, il-Kummissjoni ddeċidiet li l-kampjunar ma kienx meħtieġ.

(17)

Minħabba li jidher li hemm numru kbir ta’ produtturi fil-pajjiżi kkonċernati minn dan ir-rieżami ta’ skadenza, il-kampjunar kien previst fin-Notifika ta’ Bidu.

(18)

Sabiex tiddeċiedi jekk il-kampjunar kienx meħtieġ u, jekk iva, sabiex tagħżel kampjun, il-Kummissjoni talbet lill-produtturi kollha fil-pajjiżi ikkonċernati sabiex jipprovdu l-informazzjoni speċifikata fin-Notifika ta’ Bidu. Barra minn hekk, il-Kummissjoni talbet lill-missjonijiet tal-pajjiżi kkonċernati sabiex jidentifikaw u/jew jikkuntattjaw lil produtturi oħrajn, jekk ikun hemm, li jistgħu jkunu interessati jipparteċipaw fl-investigazzjoni.

(19)

Erba’ produtturi esportaturi jew gruppi ta’ produtturi esportaturi (żewġ kumpaniji fil-Ġappun, kumpanija waħda fir-RPĊ u waħda fir-Russja) ipprovdew l-informazzjoni mitluba u qablu li jiġu inklużi fil-kampjun. L-ebda wieħed mill-produtturi tal-Istati Uniti jew tal-Korea li ġew ikkuntattjati ma ppreżenta ruħu u pprovda l-informazzjoni mitluba. Fid-dawl tan-numru baxx ta’ produtturi esportaturi li kkooperaw, il-Kummissjoni ddeċidiet li ma kienx meħtieġ kampjun fir-rigward tal-ebda pajjiż ikkonċernat.

(20)

Kopji tal-kwestjonarji saru disponibbli fuq is-sit web tad-DĠ Kummerċ (6) meta nbeda l-każ.

(21)

Il-Kummissjoni bagħtet ukoll kwestjonarju dwar l-eżistenza ta’ distorsjonijiet sinifikanti fir-RPĊ fis-sens tal-Artikolu 2(6a)(b) tar-Regolament bażiku lill-Gvern tar-Repubblika tal-Poplu taċ-Ċina (“GTĊ”). Il-GTĊ ma pprovda l-ebda tweġiba għall-kwestjonarju u ġie informat kif xieraq li l-Kummissjoni kienet se tapplika l-fatti disponibbli f’konformità mal-Artikolu 18 tar-Regolament bażiku.

(22)

Ġew riċevuti tweġibiet għall-kwestjonarji mill-erba’ produtturi magħrufa tal-Unjoni kollha u mill-importatur mhux relatat li kkoopera. Seba’ utenti ppreżentaw ruħhom, u esprimew ir-rieda tagħhom li jipparteċipaw fl-investigazzjoni. Dawn ntalbu jimlew il-kwestjonarju maħsub għall-utenti. Madankollu, erba’ biss minnhom kkooperaw bis-sħiħ f’din l-investigazzjoni billi ppreżentaw tweġibiet għall-kwestjonarju kompluti kemm f’verżjonijiet miftuħa kif ukoll f’dawk sensittivi.

(23)

Grupp wieħed ta’ produtturi esportaturi fir-RPĊ, China Baowu Steel Group Co. Ltd. (“il-Baoshan Group”) magħmul minn żewġ produtturi esportaturi Baoshan Iron & Steel Co., Ltd. (“Baosteel”) u Wuhan Iron & Steel Co., Ltd., (“WISCO”) - u grupp wieħed ta’ produtturi esportaturi fil-Ġappun, Nippon Steel & Sumitomo Metal Corporation, Tokyo, il-Ġappun (“Nippon Steel”), ipprovdew tweġibiet għall-kwestjonarju. Il-produttur Russu, Novolipetsk Steel (“NLMK”), li oriġinarjament kien qabel li jiġi inkluż fil-kampjun, ma pprovdiex tweġiba sħiħa għall-kwestjonarju iżda pprovda, fis-sottomissjoni tiegħu tal-10 ta’ Diċembru 2020, informazzjoni limitata għall-kapaċità u l-produzzjoni speċifiċi tiegħu. Konsegwentement, il-Kummissjoni informat lill-kumpanija u lill-Federazzjoni Russa li hija se tapplika l-fatti disponibbli f’konformità mal-Artikolu 18 tar-Regolament bażiku. L-NMLK wieġeb, iżda t-tweġiba ġiet sottomessa barra mill-iskadenza speċifikata, u fi kwalunkwe każ ma kinitx tibdel il-valutazzjoni tal-Kummissjoni.

(24)

Wara d-divulgazzjoni, l-NLMK iddikjarat li l-Kummissjoni ma speċifikat l-ebda skadenza biex tipprovdi kummenti dwar l-applikazzjoni tal-Kummissjoni tal-Artikolu 18 tar-Regolament bażiku. Barra minn hekk, l-NLMK argumentat li l-Kummissjoni ma kellhiex tapplika l-Artikolu 18 fir-rigward ta’ din il-parti tat-tweġiba tagħha għall-kwestjonarju.

(25)

Il-Kummissjoni tabilħaqq ma speċifikatx skadenza għal tweġiba għall-ittra tagħha li tindika l-intenzjoni tagħha li tapplika l-Artikolu 18. Madankollu, fis-sottomissjoni tagħha tal-10 ta’ Diċembru 2020, l-NLMK kienet diġà indikat li kienet waqfet taħdem fuq it-tweġiba għall-kwestjonarju minħabba ċirkostanzi speċjali u ma kinitx ser tipprovdi tweġiba sħiħa għall-kwestjonarju. Fil-qosor, l-NLMK ipprovdiet biss informazzjoni frammentarja limitata għall-kapaċità ta’ produzzjoni u l-volum ta’ produzzjoni speċifiċi tagħha.

(26)

Konsegwentement, peress li l-NMLK ma pprovdietx informazzjoni affidabbli biżżejjed fir-rigward tal-kapaċità tal-produzzjoni u l-volumi tal-produzzjoni, kif spjegat fil-premessi (241) sa (245), il-Kummissjoni użat l-informazzjoni disponibbli fil-fajl. Fi kwalunkwe każ, kif imsemmi fil-premessa (242), il-Kummissjoni użat l-informazzjoni pprovduta mill-NMLK sa fejn kien possibbli f’dan ir-rigward.

(27)

Il-grupp l-ieħor ta’ produtturi esportaturi fil-Ġappun, JFE Steel Corporation (“JFE Steel”), li oriġinarjament kien qabel li jiġi inkluż fil-kampjun, ipprovda tweġiba mhux kompluta għall-kwestjonarju, li kienet limitata għall-bejgħ mill-esportazzjoni lejn l-UE u lejn il-bqija tad-dinja. Konsegwentement, JFE Steel ġiet informata li l-Kummissjoni se tapplika l-fatti disponibbli f’konformità mal-Artikolu 18 tar-Regolament bażiku fir-rigward tal-informazzjoni nieqsa.

(28)

Ma kien hemm l-ebda kooperazzjoni mill-produtturi fl-Istati Uniti u fil-Korea. Konsegwentement, il-Kummissjoni informat lill-Istati Uniti u lill-Korea li se tapplika l-fatti disponibbli f’konformità mal-Artikolu 18 tar-Regolament bażiku.

(29)

Mingħajr preġudizzju għall-applikazzjoni tal-Artikolu 18 tar-Regolament bażiku, il-Kummissjoni fittxet u vverifikat l-informazzjoni kollha li qieset neċessarja sabiex tiddetermina l-probabbiltà tal-kontinwazzjoni jew ta’ rikorrenza tad-dumping u tad-dannu, kif ukoll l-interess tal-Unjoni.

(30)

Minħabba t-tifqigħa tal-COVID-19 u l-miżuri ta’ konfinament stabbiliti minn diversi Stati Membri kif ukoll minn diversi pajjiżi terzi, il-Kummissjoni ma setgħetx twettaq żjarat ta’ verifika skont l-Artikolu 16 tar-Regolament bażiku. Minflok, il-Kummissjoni kkontroverifikat mill-bogħod l-informazzjoni kollha meqjusa meħtieġa għad-determinazzjonijiet tagħha f’konformità man-Notifika tagħha dwar il-konsegwenzi tat-tifqigħa tal-COVID-19 fuq l-investigazzjonijiet anti-dumping u antisussidji (7). Il-Kummissjoni wettqet kontroverifiki mill-bogħod (“RCC”) tal-partijiet interessati li ġejjin

(31)

Fil-21 ta’ Ottubru 2021, il-Kummissjoni ddivulgat il-fatti u l-kunsiderazzjonijiet essenzjali li fuq il-bażi tagħhom kien beħsiebha żżomm id-dazji anti-dumping fis-seħħ. Il-partijiet kollha ngħataw perjodu li fih setgħu jikkummentaw dwar id-divulgazzjoni. Fit-22 ta’ Novembru 2021, il-Kummissjoni bagħtet divulgazzjoni finali addizzjonali lil Nippon Steel rigward korrezzjoni tal-kalkoli tad-dumping. Ma wasal l-ebda kumment.

(32)

Il-kummenti li għamlu l-partijiet interessati ġew ikkunsidrati mill-Kummissjoni u ttieħdu inkunsiderazzjoni, fejn xieraq. Il-partijiet li talbu dan ingħataw seduta ta’ smigħ.

(33)

Il-prodott taħt rieżami huwa l-istess bħal fl-investigazzjoni oriġinali, jiġifieri prodotti b’vina parallela rrumblati ċatt ta’ azzar elettriku bis-siliċju, bi ħxuna ta’ aktar minn 0,16 mm li joriġinaw mir-RPĊ, mill-Ġappun, mill-Korea, mir-Russja u mill-Istati Uniti, li bħalissa jaqgħu taħt il-kodiċijiet NM ex 7225 11 00 (il-kodiċijiet TARIC 7225110011, 7225110015 u 7225110019) u ex 7226 11 00 (il-kodiċijiet TARIC 7226110012, 7226110014, 7226110016, 7226110092, 7226110094 u 7226110096) (“il-prodott taħt rieżami”).

(34)

GOES huma ffabbrikati minn rollijiet ta’ liga ta’ siliċju tal-azzar irrumblati bis-sħana ta’ ħxuna differenti li minnha l-istruttura tal-vina hija diretta b’mod uniformi sabiex tippermetti l-konduttività manjetika bi grad għoli ta’ effiċjenza. L-ineffiċjenzi fir-rigward tal-konduttività huma msejħin “telf fil-qalba”, li huwa l-indikatur primarju tal-kwalità tal-prodott u li huwa espress f’W/kg. GOES jista’ jiġi prodott bħala GOES b’permeabbiltà għolja u bħala GOES regolari jew konvenzjonali. It-tipi b’permeabbiltà għolja jippermettu li jkun hemm anqas telf fil-qalba f’kull ħxuna partikolari tal-pjanċi. Barra minn hekk, it-tipi b’permeabbiltà għolja jistgħu jiġu prodotti bid-dominju rfinat (“DR”) anke meta jkollhom telf fil-qalba aktar baxx minħabba t-tinqix ta’ linji rqaq fuq il-wiċċ tal-azzar.

(35)

Minkejja d-differenzi fil-permeabbiltà, il-ħxuna u l-wisa’, it-tipi kollha tal-prodott rieżaminat jaqsmu l-istess karatteristiċi fiżiċi bażiċi u għandhom essenzjalment l-istess użu bażiku.

(36)

GOES jintuża l-aktar fit-tagħmir elettriku fejn il-fluss manjetiku jista’ jkun ristrett sabiex jallinja ruħu fid-direzzjoni “orjentata”, bħal meta l-enerġija elettrika tiġi trażmessa fuq distanzi kbar. Għaldaqstant, il-prodott rieżaminat jintuża bħala materjal tal-qalba fit-transformers tal-enerġija u tad-distribuzzjoni.

(37)

GOES jintuża wkoll f’reatturi tax-shunt, li jintużaw f’sistemi tat-trażmissjoni tal-enerġija b’vultaġġ għoli sabiex jistabbilizzaw il-vultaġġ matul il-varjazzjonijiet fit-tagħbija. Il-prodott rieżaminat jista’ jintuża wkoll f’tagħmir li għandu transformers iżgħar, inklużi apparati domestiċi u tagħmir ajruspazjali, ajrunawtiku u elettroniku. GOES jista’ jintuża wkoll f’ġeneraturi kbar ta’ prestazzjoni għolja meta d-disinn jippermetti li l-karatteristiċi manjetiċi direzzjonali jintużaw b’mod effiċjenti.

(38)

Kif stabbilit fl-investigazzjoni oriġinali, din l-investigazzjoni ta’ rieżami ta’ skadenza kkonfermat li l-prodotti li ġejjin għandhom l-istess karatteristiċi fiżiċi, kimiċi u tekniċi bażiċi kif ukoll l-istess użi bażiċi:

(39)

Għalhekk, dawn il-prodotti huma kkunsidrati bħala prodotti simili skont it-tifsira tal-Artikolu 1(4) tar-Regolament bażiku.

(40)

L-NLMK u l-Gvern Russu argumentaw li l-prezzijiet medji tal-importazzjoni aktar baxxi mill-Federazzjoni Russa huma spjegati minn sehem sinifikanti ta’ esportazzjoni ta’ GOES “tat-tieni” u “tat-tielet għażla” (b’diversi difetti, għadd ta’ truf iwweldjati u anqas ċatti) u li dawn it-tipi tal-aħħar ma jikkompetux ma’ tipi oħrajn tal-prodott taħt rieżami. GOES esportati tat-“tieni” u t-“tielet għażla” jikkostitwixxu prodotti differenti u ma jikkonformawx mal-istandards tekniċi Ewropej. Għalhekk, huma argumentaw li l-materjal “tat-tieni” u “tat-tielet għażla” tagħhom jenħtieġ li jew jiġi eskluż mill-ambitu tal-prodott, jew li jingħata (raba’) livell separat ta’ PMI li jirrifletti l-valur eċċezzjonalment baxx tagħhom fis-suq.

(41)

Il-Kummissjoni ċaħdet it-talbiet ta’ hawn fuq, peress li la l-ambitu tal-prodott u lanqas il-PMI ma jistgħu jinbidlu fil-qafas ta’ rieżami ta’ skadenza.

(42)

Wara d-divulgazzjoni, l-NLMK iddikjarat li awtorità investigattiva imparzjali kellha tibda rieżami interim parzjali b’ħeffa, limitat għad-definizzjoni tal-kamp ta’ applikazzjoni tal-prodott u/jew il-forma tal-miżuri. Il-Kummissjoni ċaħdet din l-asserzjoni, peress li ma kellhiex biżżejjed evidenza biex tibda investigazzjoni bħal din.

(43)

F’konformità mal-Artikolu 11(2) tar-Regolament bażiku, il-Kummissjoni eżaminat jekk huwiex probabbli li l-iskadenza tal-miżuri fis-seħħ twassal għal kontinwazzjoni jew għal rikorrenza ta’ dumping.

(44)

L-ebda produttur mir-Russja, mill-Istati Uniti tal-Amerika u mill-Korea ma kkoopera fl-investigazzjoni.

(45)

Il-Kummissjoni informat lill-awtoritajiet tat-tliet pajjiżi kkonċernati kollha kemm huma li, minħabba n-nuqqas ta’ kooperazzjoni, il-Kummissjoni tista’ tapplika l-Artikolu 18 tar-Regolament bażiku rigward is-sejbiet fir-rigward tar-Russja, tal-Istati Uniti tal-Amerika u tal-Korea. Il-Kummissjoni ma rċeviet l-ebda kumment jew talba għal intervent tal-Uffiċjal tas-Seduta mingħand l-awtoritajiet tat-tliet pajjiżi f’dan ir-rigward.

(46)

Konsegwentement, f’konformità mal-Artikolu 18(1) tar-Regolament bażiku, is-sejbiet fir-rigward tal-probabbiltà ta’ kontinwazzjoni jew rikorrenza ta’ dumping fir-rigward tar-Russja, tal-Istati Uniti u tal-Korea kienu bbażati fuq il-fatti disponibbli, b’mod partikolari l-informazzjoni disponibbli għall-pubbliku, bħal siti web uffiċjali ta’ kumpaniji, l-informazzjoni fit-talba għal rieżami u l-informazzjoni miksuba mill-partijiet li kkooperaw matul l-investigazzjoni ta’ rieżami. Il-Kummissjoni użat ukoll statistika varja dwar l-importazzjoni, inklużi l-istatistika tal-Eurostat dwar l-importazzjoni COMEXT u l-Global Trade Atlas (“GTA”).

(47)

Barra minn hekk, fir-rigward tal-Baoshan Group u wara l-RCC, il-Kummissjoni applikat l-Artikolu 18(1) tar-Regolament bażiku f’dak li għandu x’jaqsam mal-kostijiet lavorattivi. Fil-fatt, kif spjegat fil-premessa (207) hawn taħt, il-kumpanija naqset milli tipprovdi evidenza vverifikata u affidabbli fir-rigward tal-kalkolu tas-sigħat ta’ xogħol allokati għall-manifattura tal-GOES.

(48)

Produttur esportatur Ġappuniż wieħed biss (Nippon Steel) kkoopera bis-sħiħ fl-investigazzjoni attwali. Wara l-bidu, it-tieni produttur esportatur Ġappuniż magħruf (JFE Steel) ippreżenta ruħu u pprovda tweġiba mhux kompluta għall-kwestjonarju limitata għall-bejgħ, il-produzzjoni u l-kapaċità tal-esportazzjoni. Konsegwentement, il-Kummissjoni informat lil JFE Steel u lill-Gvern tal-Ġappun bl-intenzjoni tagħha li tapplika l-fatti disponibbli f’konformità mal-Artikolu 18 tar-Regolament bażiku. Ma wasal l-ebda kumment.

(49)

B’riżultat ta’ dan, is-sejbiet f’din it-Taqsima kienu parzjalment ibbażati fuq il-fatti disponibbli f’konformità mal-Artikolu 18 tar-Regolament bażiku f’dak li għandu x’jaqsam mal-bejgħ domestiku. Għal dan il-għan, intużat l-informazzjoni pprovduta minn Nippon Steel, l-informazzjoni pprovduta mill-JFE dwar il-bejgħ għall-esportazzjoni, it-talba għar-rieżami ta’ skadenza, l-istatistika tal-Eurostat u l-informazzjoni disponibbli għall-pubbliku.

(50)

Iż-żewġ produtturi esportaturi Ġappuniżi kienu jirrappreżentaw 100 % tal-esportazzjonijiet mill-Ġappun lejn l-Unjoni matul il-PIR.

(51)

Il-Kummissjoni stabbiliet il-valur normali għal Nippon Steel fuq il-bażi li ġejja. Il-Kummissjoni l-ewwel eżaminat jekk il-volum totali ta’ bejgħ domestiku ta’ kull produttur esportatur li kkoopera bis-sħiħ kienx rappreżentattiv, f’konformità mal-Artikolu 2(2) tar-Regolament bażiku. Il-bejgħ domestiku jkun rappreżentattiv jekk il-volum totali tal-bejgħ domestiku tal-prodott simili lil klijenti indipendenti fis-suq domestiku għal kull produttur esportatur kien jirrappreżenta mill-anqas 5 % tal-volum totali tal-bejgħ għall-esportazzjoni tiegħu tal-prodott taħt rieżami, lejn l-Unjoni, matul il-PIR. Fuq din il-bażi, il-bejgħ totali tal-uniku produttur esportatur li kkoopera, tal-prodott simili fis-suq domestiku, kien rappreżentattiv.

(52)

Imbagħad, il-Kummissjoni identifikat it-tipi ta’ prodotti mibjugħin fuq livell domestiku li kienu identiċi jew paragunabbli għat-tipi ta’ prodotti mibjugħin għall-esportazzjoni lejn l-Unjoni għall-produttur esportatur b’bejgħ domestiku rappreżentattiv.

(53)

Il-Kummissjoni mbagħad eżaminat jekk il-bejgħ domestiku minn kull produttur esportatur li kkoopera bis-sħiħ fis-suq domestiku tiegħu għal kull tip ta’ prodott li huwa identiku jew komparabbli ma’ tip ta’ prodott mibjugħ għall-esportazzjoni lejn l-Unjoni kienx rappreżentattiv, f’konformità mal-Artikolu 2(2) tar-Regolament bażiku. Il-bejgħ domestiku ta’ tip ta’ prodott huwa rappreżentattiv jekk il-volum totali ta’ bejgħ domestiku ta’ dak it-tip ta’ prodott lil klijenti indipendenti matul il-PIR jirrappreżenta mill-anqas 5 % tal-volum totali ta’ bejgħ għall-esportazzjoni tal-prodott identiku jew komparabbli lejn l-Unjoni. Il-Kummissjoni stabbiliet li dawn it-tipi ta’ prodotti kienu rappreżentattivi.

(54)

Il-Kummissjoni mbagħad iddefiniet il-proporzjon tal-bejgħ profittabbli lil konsumaturi indipendenti fis-suq domestiku għal kull tip ta’ prodott matul il-PIR, għal Nippon Steel kollu kemm hu, sabiex tiddeċiedi jekk tużax il-prezz tal-bejgħ domestiku reali għall-kalkolu tal-valur normali, f’konformità mal-Artikolu 2(4) tar-Regolament bażiku.

(55)

Il-valur normali huwa bbażat fuq il-prezz domestiku reali għal kull tip ta’ prodott, irrispettivament minn jekk dak il-bejgħ huwiex profittabbli jew le, jekk:

(56)

F’dan il-każ, il-valur normali huwa l-medja ponderata tal-prezzijiet tal-bejgħ domestiku kollu ta’ dak it-tip ta’ prodott matul il-PIR.

(57)

Il-valur normali huwa l-prezz domestiku reali għal kull tip ta’ prodott tal-bejgħ domestiku profittabbli biss tat-tipi ta’ prodotti matul il-PIR, jekk:

(58)

L-analiżi tal-bejgħ domestiku wriet li aktar minn 90 % tal-bejgħ domestiku ħalla profitt u li l-prezz tal-bejgħ medju ponderat kien ogħla mill-kost tal-produzzjoni. Għaldaqstant, skont it-tip tal-prodott, il-valur normali ġie kkalkolat bħala l-medja ponderata tal-prezzijiet tal-bejgħ domestiku kollu matul il-PIR fis-sitwazzjoni deskritta fil-premessa (56), jew bħala medja ponderata tal-bejgħ bi profitt biss fis-sitwazzjoni deskritta fil-premessa (57).

(59)

Fejn ma kienx hemm biżżejjed bejgħ jew ma kienx hemm bejgħ ta’ tip ta’ prodott tal-prodott simili fil-perkors normali tan-negozju, il-Kummissjoni kkalkolat il-valur normali f’konformità mal-paragrafi (3) u (6) tal-Artikolu 2 tar-Regolament bażiku.

(60)

Għal dawn it-tipi ta’ prodotti, il-valur normali ġie kkalkolat billi mal-kost medju tal-produzzjoni tal-prodott simili tal-uniku produttur esportatur li kkoopera matul il-PIR ġew miżjuda:

(61)

Għat-tipi tal-prodott mhux mibjugħa fis-suq domestiku, ġew miżjuda l-ispejjeż SG&A medji ponderati u l-profitt tat-tranżazzjonijiet kollha li saru fil-perkors normali tan-negozju fis-suq domestiku.

(62)

Fir-rigward ta’ JFE Steel, fin-nuqqas ta’ kooperazzjoni, il-Kummissjoni użat il-fatti disponibbli f’konformità mal-Artikolu 18 tar-Regolament bażiku sa fejn kien ikkonċernat il-bejgħ domestiku. Billi ma kinitx disponibbli data affidabbli dwar il-prezzijiet ta’ JFE Steel fis-suq domestiku, il-Kummissjoni stabbiliet valur normali maħdum bl-użu tal-metodoloġija u l-valuri li jinsabu fit-talba għal rieżami ta’ skadenza.

(63)

Nippon Steel esportat lejn l-Unjoni permezz ta’ negozjanti relatati biss. Il-prezz tal-esportazzjoni għalhekk kien stabbilit skont l-Artikolu 2(9) tar-Regolament bażiku, jiġifieri fuq il-bażi tal-prezzijiet li bihom inbiegħu mill-ġdid għall-ewwel darba l-prodotti importati lil xerrej indipendenti. L-aġġustamenti tal-prezz saru għall-kostijiet kollha mġarrba bejn l-importazzjoni u l-bejgħ mill-ġdid, inkluż għall-ispejjeż SG&A, u għall-profitti dovuti.

(64)

JFE Steel esportat direttament lejn l-UE u għalhekk, il-prezz tal-esportazzjoni tagħha kien il-prezz effettivament imħallas jew li jista’ jitħallas għall-prodott taħt rieżami meta mibjugħ għall-esportazzjoni lejn l-Unjoni, f’konformità mal-Artikolu 2(8) tar-Regolament bażiku.

(65)

Il-Kummissjoni qabblet il-valur normali u l-prezz tal-esportazzjoni kif stabbiliti hawn fuq, fuq bażi ex-works.

(66)

Fejn iġġustifikat mill-ħtieġa li jiġi żgurat tqabbil ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabbiltà tal-prezzijiet, f’konformità mal-Artikolu 2(10) tar-Regolament bażiku. Fejn kien applikabbli u ġustifikat, saru aġġustamenti għall-kostijiet tat-trasport, l-assigurazzjoni, il-ġarr, it-tagħbija u l-kostijiet anċillari, l-ippakkjar, il-kostijiet ta’ kreditu u l-imposti tal-banek mħallsa mill-produttur esportatur li kkoopera.

(67)

Nippon Steel ma kellhiex bejgħ domestiku għal xi wħud mit-tipi ta’ prodotti li esportat lejn l-UE. Fid-dawl tal-volum għoli ta’ bejgħ għall-esportazzjoni li għalih jista’ jsir tqabbil u filwaqt li jitqies li, fil-kuntest ta’ rieżami ta’ skadenza, ma huwiex meħtieġ li jiġi stabbilit l-ammont eżatt ta’ dumping iżda biss jekk id-dumping x’aktarx ikompli jew jerġa’ jseħħ fil-futur, il-Kummissjoni qieset li t-tqabbil, kif stabbilit, kien akkurat.

(68)

Wara d-divulgazzjoni, Nippon Steel sostniet li l-Kummissjoni kellha tikkalkula l-marġni tad-dumping applikabbli għal Nippon Steel abbażi tal-bejgħ kollu għall-esportazzjoni lejn l-UE u rreferiet għall-ġurisprudenza eżistenti (9).

(69)

Il-Kummissjoni fakkret li l-marġni tad-dumping ma kienx ikopri l-bejgħ kollu għall-esportazzjoni lejn l-UE minħabba li, kif spjegat fil-premessa (67) hawn fuq, ma kien hemm l-ebda bejgħ domestiku korrispondenti għal xi tipi ta’ prodotti li l-kumpanija esportat lejn l-UE. Dawn it-tipi ta’ prodotti (li jammontaw għal 38 % tal-kwantità totali esportata) inizjalment ma kinux inklużi fil-kalkoli tad-dumping peress li l-kumpanija ma kinitx ipprovdiet il-kostijiet korrispondenti tal-produzzjoni għalihom. Sabiex jiġi kkalkolat marġni ta’ dumping għal 100 % tal-bejgħ għall-esportazzjoni lejn l-UE u fin-nuqqas ta’ data aktar preċiża mill-kumpanija, il-Kummissjoni ddeċidiet li tiġbor it-tipi ta’ prodotti abbażi tal-wisa’ tagħhom, li huwa parametru li għandu impatt aktar baxx fuq il-kost tal-produzzjoni u l-prezz tal-bejgħ mit-telf fil-qalba u l-ħxuna. Fuq dik il-bażi hija kkalkulat il-valur normali għat-tipi kollha ta’ prodotti. Il-kalkoli tad-dumping ikkoreġuti ġew divulgati lill-kumpanija u ma wasal l-ebda kumment.

(70)

Kemm għal Nippon Steel kif ukoll għal JFE Steel, it-tqabbil bejn il-valur normali u l-prezz tal-esportazzjoni wera li l-bejgħ tagħhom lill-UE sar bi prezzijiet oġġett ta’ dumping matul il-perjodu ta’ investigazzjoni tar-rieżami. Il-marġni tad-dumping li nstab għal Nippon Steel kien ta’ madwar 31 %, filwaqt li għal JFE Steel dan kien ta’ madwar 19 %.

(71)

Għalhekk, il-Kummissjoni kkonkludiet li d-dumping tkompla matul il-perjodu ta’ investigazzjoni tar-rieżami.

(72)

Wara li rriżulta dumping matul il-perjodu ta’ investigazzjoni tar-rieżami, il-Kummissjoni analizzat jekk kienx hemm probabbiltà ta’ kontinwazzjoni ta’ dumping jekk il-miżuri fuq importazzjonijiet ta’ GOES mill-Ġappun jitħallew jiskadu. Waqt dan, saret analiżi tal-elementi li ġejjin: il-kapaċità tal-produzzjoni u l-kapaċità ta’ riżerva fil-Ġappun u l-attraenza tas-suq tal-Unjoni.

(73)

Abbażi tat-tweġibiet għall-kwestjonarju taż-żewġ produtturi esportaturi Ġappuniżi magħrufa, il-Kummissjoni stabbiliet li l-kapaċità tal-produzzjoni Ġappuniża kienet tammonta għal [350 000 sa 410 000] tunnellata matul il-PIR.

(74)

Abbażi tal-istess sett ta’ data, il-Kummissjoni stabbiliet li l-kapaċità ta’ riżerva tal-GOES fil-Ġappun kienet ta’ madwar [50 000 sa 110 000] tunnellata.

(75)

Nippon Steel sostniet li l-kapaċità ta’ riżerva tal-Ġappun kienet sopravalutata peress li l-Kummissjoni ma qisitx il-fatt li l-Ġappun jiffoka fuq l-irqaq tip ta’ gauge tal-GOES li jrendi inqas volum mit-tip ta’ GOES prodott mill-industrija tal-Unjoni u minn pajjiżi oħra kkonċernati.

(76)

L-analiżi tal-mudelli esportati lejn l-Unjoni u lejn il-pajjiżi ewlenin l-oħrajn tal-esportazzjoni, bħall-Indja u l-Messiku, uriet li l-maġġoranza l-kbira tal-mudelli esportati minn Nippon Steel kellhom ħxuna tal-gauge simili jew ogħla mill-prodotti manifatturati mill-industrija tal-Unjoni. Barra minn hekk, is-sehem tat-tip ta’ gauge irqaq tal-GOES esportat lejn l-UE kien sinifikanti u tabilħaqq kien hemm domanda għal dan it-tip ta’ prodott fis-suq tal-Unjoni. Fi kliem ieħor, anki jekk il-kapaċità ta’ riżerva kienet tikkorrispondi esklużivament, quod non, għal prodotti b’gauge irqaq, ikun hemm domanda għal tali prodotti fis-suq tal-Unjoni.

(77)

Barra minn hekk, il-Kummissjoni bbażat il-valutazzjoni tagħha tal-kapaċità ta’ riżerva fuq l-informazzjoni pprovduta mill-produtturi esportaturi Ġappuniżi. Għalhekk, il-Kummissjoni naqset milli tara kif setgħet stmat iżżejjed il-kapaċità ta’ riżerva meta d-data ħarġet mill-produtturi esportaturi nfushom. Fi kwalunkwe każ, il-Kummissjoni qieset li l-affermazzjoni relatata mar-rendiment la kienet dettaljata biżżejjed u lanqas issostanzjata, peress li ma kinitx tipprovdi għal differenza korrispondenti fil-kapaċità tal-produzzjoni jew fil-kapaċità ta’ riżerva marbuta mad-differenza allegata fir-rendiment. Barra minn hekk, din l-affermazzjoni tqajmet minn Nippon Steel biss u ma kien fiha l-ebda informazzjoni fir-rigward tal-firxa fil-ħxuna tal-gauge tal-produtturi esportaturi ewlenin l-oħrajn Ġappuniżi. Abbażi ta’ dak kollu li ntqal hawn fuq, il-Kummissjoni ċaħdet din l-affermazzjoni.

(78)

Barra minn hekk, il-Kummissjoni qieset li l-produtturi esportaturi Ġappuniżi jimmanifatturaw ukoll azzar elettriku mhux orjentat (“NOES”). Kemm il-GOES kif ukoll l-NOES jiġu ffabbrikati bl-użu tal-istess tagħmir. Dan ifisser li huwa teknikament possibbli li l-kapaċità tiġi liberata mill-NOES u li din tinbidel għall-GOES. Tali bidla tista’ sseħħ fil-futur jekk il-produtturi esportaturi Ġappuniżi jkollhom l-inċentiv ekonomiku li jagħmlu dan. B’riżultat ta’ dan, il-kapaċità ta’ riżerva li nstabet tista’ potenzjalment tiżdied saħansitra aktar.

(79)

Wara d-divulgazzjoni, il-Gvern Ġappuniż u Nippon Steel affermaw li l-produtturi Ġappuniżi ma jistgħux jilliberaw il-kapaċità destinata għall-produzzjoni tan-NOES għall-benefiċċju tal-produzzjoni tal-GOES għall-esportazzjoni lejn l-UE peress li Nippon Steel hija marbuta b’kuntratti mal-manifatturi tal-vetturi elettriċi biex tipproduċi NOES. F’dan il-kuntest, huwa argumenta li l-valutazzjoni tal-kapaċità ta’ riżerva jenħtieġ li ma tkunx ibbażata fuq dak l-element.

(80)

Il-Kummissjoni ħadet nota tal-eżistenza ta’ kuntratti vinkolanti mal-manifatturi tal-vetturi elettriċi biex jipproduċu NOES li, per se, ma jippermettux li tiġi lliberata l-kapaċità għall-GOES immedjatament. Madankollu, il-Kummissjoni qieset ukoll li, jekk il-kundizzjonijiet tas-suq fis-suq tal-vetturi elettriċi jiżviluppaw b’mod negattiv, il-produtturi esportaturi Ġappuniżi jistgħu jiddedikaw aktar kapaċità għall-produzzjoni tal-GOES peress li l-produtturi jużaw l-istess tagħmir għall-produzzjoni kemm tal-GOES kif ukoll tan-NOES. Fi kwalunkwe każ, irrispettivament mill-iżvilupp tad-domanda għan-NOES fis-snin li ġejjin, il-Kummissjoni qieset li l-konklużjonijiet tagħha dwar il-valutazzjoni tal-kapaċità ta’ riżerva kif imsemmi fil-premessa (74) baqgħu validi peress li dawn kienu bbażati fuq l-eżistenza ta’ kapaċità ta’ riżerva sinifikanti speċifika għall-GOES biss, li magħha ma ġiet miżjuda l-ebda kapaċità liberatorja addizzjonali, marbuta mal-produzzjoni tan-NOES.

(81)

F’termini ta’ daqs, is-suq tal-Unjoni (aktar minn 265 000 sa 280 000 tunnellata ta’ konsum fil-perjodu ta’ investigazzjoni tar-rieżami) huwa fost l-akbar swieq ta’ GOES madwar id-dinja. Fost il-pajjiżi kkonċernati, ir-RPĊ biss għandha suq domestiku akbar mill-UE, filwaqt li l-Istati Uniti, il-Korea, ir-Russja u l-Ġappun għandhom konsum domestiku ferm iżgħar.

(82)

Il-kapaċità ta’ riżerva stabbilita hija ekwivalenti għal [28 sa 31 %] tal-konsum tal-Unjoni matul il-PIR, kif stabbilit fil-premessa (259) hawn taħt. Fl-istess ħin huwa probabbli li l-kapaċità ta’ riżerva se tkun diretta lejn is-suq tal-Unjoni fi kwantitajiet kbar jekk il-miżuri jiskadu. Tabilħaqq, is-suq domestiku Ġappuniż jassorbi madwar kwart tal-kapaċitajiet ta’ produzzjoni Ġappuniżi u tradizzjonalment huwa kważi 100 % sodisfatt bil-produzzjoni domestika.

(83)

Barra minn hekk, l-industrija tal-GOES Ġappuniża hija orjentata lejn l-esportazzjoni peress li aktar minn [70 sa 80] % tal-produzzjoni kollha hija destinata għall-esportazzjonijiet. Fl-aħħar nett, iċ-Ċina u l-Istati Uniti għandhom dazji tad-difiża tal-kummerċ li fil-fatt inaqqsu l-aċċess tal-produtturi esportaturi Ġappuniżi għal dawk is-swieq importanti. B’mod partikolari, l-esportazzjonijiet Ġappuniżi lejn ir-RPĊ naqsu drastikament eżatt wara l-impożizzjoni tal-miżuri minn din tal-aħħar.

(84)

Barra minn hekk, il-produtturi esportaturi Ġappuniżi għandhom sistema ta’ distribuzzjoni stabbilita fl-Unjoni Ewropea u għalhekk jistgħu jżidu malajr il-vjeġġi lejn is-suq tal-Unjoni.

(85)

Fid-dawl tal-kunsiderazzjonijiet ta’ hawn fuq, jista’ jkun raġonevolment mistenni li, jekk il-miżuri jitħassru, parti sostanzjali mill-esportazzjonijiet u l-kapaċità ta’ riżerva attwali tal-Ġappun jiġu diretti mill-ġdid lejn l-Unjoni.

(86)

Wara d-divulgazzjoni, il-Gvern Ġappuniż u Nippon Steel affermaw li s-suq tal-Unjoni ma kienx għadu attraenti daqs kemm kien matul l-investigazzjoni oriġinali u li l-produtturi Ġappuniżi għandhom l-intenzjoni li jaqbdu b’mod attiv is-swieq Ażjatiċi li qed jiżdiedu u li l-esportazzjonijiet mill-Ġappun mhux se jifqgħu s-suq tal-Unjoni f’każ li l-miżuri jintemmu.

(87)

Nippon Steel qieset ukoll li l-konklużjoni tal-Kummissjoni dwar l-attraenza tas-suq tal-Unjoni ma kinitx issostanzjata peress li kienet ibbażata biss fuq id-daqs tiegħu. F’dan ir-rigward, hija indikat elementi speċifiċi oħrajn relatati mal-attraenza tas-suq tal-Unjoni, bħal-livell tal-prezzijiet, il-preżenza ta’ industrija domestika b’saħħitha, id-domanda għal tip speċifiku ta’ prodott, miżuri ta’ difiża kummerċjali u/jew diżinċentivi assoċjati mat-trasport.

(88)

Il-Kummissjoni qieset li l-affermazzjoni relatata mas-suq Ażjatiku ma kinitx issostanzjata b’evidenza ta’ sostenn. Fi kwalunkwe każ, il-produtturi esportaturi Ġappuniżi komplew jesportaw kwantitajiet sinifikanti u żammew is-sehem mis-suq tagħhom fl-Unjoni matul il-perjodu kkunsidrat minkejja l-fatturi kollha msemmija minn Nippon Steel, it-tnaqqis fil-konsum u l-miżuri fis-seħħ.

(89)

Barra minn hekk, is-suq tal-UE kien it-tielet l-akbar suq tal-esportazzjoni għall-produtturi esportaturi Ġappuniżi matul il-PIR (10). Barra minn hekk, analiżi tal-evoluzzjoni tal-bejgħ għall-esportazzjoni miż-żewġ produtturi esportaturi Ġappuniżi żvelat li l-esportazzjonijiet tagħhom lejn pajjiżi mhux tal-UE naqsu ferm aktar matul il-perjodu kkunsidrat (-[25-35] %) mill-esportazzjonijiet lejn l-UE (-[5-15] %) matul l-istess perjodu.

(90)

Minbarra d-daqs tagħha u l-kwantitajiet kbar li l-produtturi esportaturi Ġappuniżi jistgħu jbigħu fis-suq tal-UE, il-Kummissjoni nnotat ukoll li s-suq tal-Unjoni huwa kkaratterizzat minn livelli għoljin ta’ prezzijiet u minn preżenza sinifikanti ta’ importazzjonijiet, li juru l-attraenza tiegħu għall-produtturi ta’ GOES barra mill-UE. Fuq din il-bażi, dawn l-affermazzjonjiet ġew miċħudin.

(91)

Fuq il-bażi ta’ dan ta’ hawn fuq, il-Kummissjoni kkonkludiet li d-dumping x’aktarx li jkompli fil-futur jekk il-miżuri jitħallew jiskadu. Meta wieħed iqis il-livelli tal-prezzijiet oġġett ta’ dumping tal-GOES lejn l-Unjoni matul il-PIR, il-kapaċità ta’ riżerva fil-Ġappun u l-attraenza tas-suq tal-Unjoni, il-Kummissjoni kkonkludiet ukoll li kwantitajiet sinifikanti ta’ GOES mill-Ġappun x’aktarx jidħlu fis-suq tal-Unjoni f’livelli ta’ prezzijiet oġġett ta’ dumping jekk il-miżuri jitħallew jiskadu.

(92)

Fin-nuqqas ta’ koperazzjoni minn kwalunkwe produttur esportatur Korean, kif indikat fil-premessa (28), il-Kummissjoni bbażat l-analiżi globali tagħha, inkluż il-kalkolu tad-dumping, fuq il-fatti disponibbli skont l-Artikolu 18 tar-Regolament bażiku.

(93)

Konsegwentement, il-probabbiltà ta’ kontinwazzjoni jew rikorrenza ta’ dumping ġiet ivvalutata bl-użu tal-informazzjoni li tinsab fit-talba għal rieżami ta’ skadenza, flimkien mad-data tal-Eurostat u l-istatistika dwar l-esportazzjoni li tinsab fil-GTA.

(94)

Sabiex jiġi stabbilit il-valur normali, il-Kummissjoni użat l-istess metodoloġija bħal dik applikata mill-applikant fit-talba. Peress li data affidabbli dwar il-prezzijiet fis-suq domestiku tal-Korea ma kinitx disponibbli, il-Kummissjoni stabbiliet valur normali maħdum bl-użu tal-metodoloġija u l-valuri li jinsabu fit-talba għal rieżami ta’ skadenza.

(95)

Il-prezzijiet tal-esportazzjoni lejn l-Unjoni ġew stabbiliti abbażi tad-data tal-Eurostat.

(96)

Il-valur normali u l-prezzijiet tal-esportazzjoni tqabblu fuq bażi ex-works. Għal dan il-għan, il-kostijiet tal-konsenja u tal-assigurazzjoni tnaqqsu abbażi tal-informazzjoni disponibbli fit-talba (EUR 115,82/tunnellata). Għalhekk, il-valur normali ex-works stabbilit kien ta’ EUR 1 893/tunnellata, filwaqt li l-prezz tal-esportazzjoni ex-works kien ta’ EUR 1 880/tunnellata matul il-PIR.

(97)

Abbażi ta’ dan ta’ hawn fuq, il-Kummissjoni stabbiliet li l-marġni tad-dumping tal-esportazzjonijiet Koreani lejn l-Unjoni kien fil-livell de minimis, jiġifieri anqas minn 2 %, espress bħala perċentwal tal-prezz tal-esportazzjoni.

(98)

Il-Kummissjoni analizzat jekk id-dumping kienx probabbli li jerġa’ jseħħ jekk il-miżuri anti-dumping attwali jitħallew jiskadu. Meta għamlet dan, hi analizzat l-imġiba tal-esportaturi Koreani fi swieq oħrajn, il-kapaċità tal-produzzjoni u l-kapaċità ta’ riżerva fil-Korea, u l-attraenza tas-suq tal-Unjoni.

(99)

Il-Kummissjoni analizzat il-prezzijiet tal-esportazzjoni mill-Korea lejn swieq terzi oħrajn matul il-PIR, kif irrapportat fl-istatistika uffiċjali tal-esportazzjoni Koreana mill-GTA, u qabblet dawn il-livelli tal-prezzijiet mal-prezzijiet tal-importazzjoni. Din l-analiżi wriet li l-esportazzjonijiet Koreani lejn bosta mis-swieq ewlenin l-oħrajn tal-esportazzjoni tagħha saru bi prezzijiet aktar baxxi mill-prezzijiet tal-esportazzjoni lejn l-UE. Il-prezz medju tal-esportazzjoni lejn swieq terzi ġie stabbilit għal EUR 1 442/tunnellata matul il-PIR, li huwa taħt l-anqas PMI applikabbli fl-UE u ħafna anqas mill-prezz medju ex-works lejn l-UE. It-tqabbil ta’ dawk il-prezzijiet ma’ swieq terzi bil-valur normali maħdum wera differenza fil-prezz ta’ madwar 30 %.

(100)

Għalhekk, tqies probabbli li, kieku l-miżuri attwali kellhom jitħassru, il-produtturi esportaturi Koreani jibdew ibigħu lill-Unjoni f’livelli ta’ dumping.

(101)

Skont il-fatti disponibbli inklużi fit-talba għal rieżami, il-Korea għandha kapaċità ta’ produzzjoni stmata ta’ 280 000 tunnellata u kapaċità ta’ riżerva stmata ta’ 24 000 tunnellata matul il-PIR. Għalhekk, il-kapaċità ta’ riżerva tal-Korea kkorrispondiet għal madwar [7 - 10]% tal-konsum tal-Unjoni ta’ GOES fil-PIR.

(102)

Il-Kummissjoni stabbiliet li s-suq tal-Unjoni huwa attraenti għall-produtturi Koreani għar-raġunijiet li ġejjin.

(103)

L-ewwel nett, kif indikat fil-premessa (81) hawn fuq, is-suq tal-Unjoni huwa fost l-akbar swieq fid-dinja. It-tieni, il-konsum domestiku tal-Korea huwa fil-biċċa l-kbira sodisfatt mill-produzzjoni domestika, peress li madwar 19 % biss minnu huwa magħmul mill-importazzjonijiet. B’riżultat ta’ dan, il-produtturi esportaturi huma fil-biċċa l-kbira orjentati lejn l-esportazzjoni.

(104)

It-tielet, wara l-impożizzjoni ta’ miżuri anti-dumping fir-RPĊ kontra, fost l-oħrajn, il-Korea, u ż-żieda fil-kapaċità tal-produzzjoni domestika proprja taċ-Ċina, l-esportazzjonijiet Koreani lejn iċ-Ċina naqsu drastikament f’dawn l-aħħar snin. Dan imbagħad jagħmel is-suq tal-Unjoni aktar attraenti, u b’hekk jinħoloq ir-riskju li tista’ sseħħ ċerta devjazzjoni kummerċjali lejn l-Unjoni.

(105)

Fuq il-bażi ta’ dan ta’ hawn fuq, il-Kummissjoni kkonkludiet li d-dumping x’aktarx jirrikorri fil-futur jekk il-miżuri jitħallew jiskadu. Meta titqies il-kapaċità ta’ riżerva fil-Korea, il-livelli baxxi tal-prezzijiet tal-esportazzjonijiet tal-GOES lejn pajjiżi terzi matul il-PIR, li saru bi prezzijiet oġġett ta’ dumping meta mqabbla mal-valur normali, flimkien mal-attraenza tas-suq tal-Unjoni, il-Kummissjoni kkonkludiet ukoll li kwantitajiet sinifikanti ta’ GOES mill-Korea x’aktarx jidħlu fis-suq tal-Unjoni f’livelli ta’ prezzijiet oġġett ta’ dumping, jekk il-miżuri jitħallew jiskadu.

(106)

Fin-nuqqas ta’ koperazzjoni minn kwalunkwe produttur esportatur tal-Istati Uniti tal-Amerika, kif indikat fil-premessa (28), il-Kummissjoni bbażat l-analiżi globali tagħha, inkluż il-kalkolu tad-dumping, fuq il-fatti disponibbli skont l-Artikolu 18 tar-Regolament bażiku.

(107)

Konsegwentement, il-probabbiltà ta’ kontinwazzjoni jew rikorrenza ta’ dumping ġiet ivvalutata bl-użu tal-informazzjoni li tinsab fit-talba għal rieżami ta’ skadenza, flimkien ma’ sorsi oħrajn ta’ informazzjoni bħall-Eurostat u l-GTA.

(108)

Sabiex jiġi stabbilit il-valur normali, il-Kummissjoni użat l-istess metodoloġija bħal dik applikata mill-applikant fit-talba. Peress li data affidabbli dwar il-prezzijiet fis-suq domestiku tal-Istati Uniti ma kinitx disponibbli, il-Kummissjoni stabbiliet valur normali maħdum bl-użu tal-metodoloġija u l-valuri li jinsabu fit-talba għal rieżami ta’ skadenza.

(109)

Il-prezzijiet tal-esportazzjoni lejn l-Unjoni ġew stabbiliti abbażi tad-data tal-Eurostat.

(110)

Il-valur normali u l-prezzijiet tal-esportazzjoni tqabblu fuq bażi ex-works. Għal dan il-għan, il-kostijiet tal-konsenja u tal-assigurazzjoni tnaqqsu abbażi tal-informazzjoni disponibbli fit-talba (EUR 166,66/tunnellata). Għalhekk, il-valur normali ex-works ġie stabbilit għal EUR 2 310/tunnellata, filwaqt li l-prezz tal-esportazzjoni kien ta’ EUR 1 880/tunnellata matul il-PIR.

(111)

Fuq il-bażi ta’ dan ta’ hawn fuq, il-Kummissjoni stabbiliet marġni tad-dumping ta’ madwar 21 %. Għalhekk, il-Kummissjoni kkonkludiet li d-dumping tkompla matul il-perjodu ta’ investigazzjoni tar-rieżami.

(112)

Il-Kummissjoni analizzat jekk id-dumping huwiex probabbli li jkompli jekk il-miżuri anti-dumping attwali jitħallew jiskadu. Meta għamlet dan, hija eżaminat il-produzzjoni u l-kapaċità ta’ riżerva fl-Istati Uniti u l-attraenza tas-suq tal-Unjoni.

(113)

Skont l-informazzjoni pprovduta fit-talba għal rieżami ta’ skadenza, l-Istati Uniti kellhom kapaċità ta’ produzzjoni stmata ta’ 265 000 tunnellata u kapaċità ta’ riżerva stmata ta’ 77 000 tunnellata matul il-PIR. Għalhekk, il-kapaċità ta’ riżerva fl-Istati Uniti biss tista’ tissodisfa [bejn 27 u 30] % tal-konsum kollu tal-GOES fl-Unjoni.

(114)

L-investigazzjoni kkonfermat li s-suq tal-Unjoni huwa attraenti għall-produtturi tal-Istati Uniti għar-raġunijiet li ġejjin:

(115)

L-ewwel nett, kif indikat fil-premessa (81) hawn fuq, is-suq tal-Unjoni huwa fost l-akbar swieq fid-dinja.

(116)

It-tieni, il-konsum domestiku tal-Istati Uniti diġà huwa fil-biċċa l-kbira sodisfatt mill-produzzjoni domestika, peress li madwar 15 % biss minnu kien magħmul mill-importazzjonijiet matul il-PIR. B’riżultat ta’ dan, il-produtturi esportaturi huma orjentati lejn l-esportazzjoni.

(117)

Fuq il-bażi ta’ dan ta’ hawn fuq, il-Kummissjoni kkonkludiet li d-dumping x’aktarx li jkompli fil-futur jekk il-miżuri jitħallew jiskadu. Meta qieset il-livelli tal-prezzijiet oġġett ta’ dumping tal-GOES lejn l-Unjoni matul il-PIR, il-kapaċità ta’ riżerva kbira fl-Istati Uniti u l-attraenza tas-suq tal-Unjoni, il-Kummissjoni kkonkludiet ukoll li kwantitajiet sinifikanti ta’ GOES mill-Istati Uniti x’aktarx jidħlu fis-suq tal-Unjoni f’livelli ta’ prezzijiet oġġett ta’ dumping jekk il-miżuri jitħallew jiskadu.

(118)

Skont l-Artikolu 2(1) tar-Regolament bażiku, “il-valur normali normalment għandu jkun ibbażat fuq il-prezzijiet imħallsa jew pagabbli, fil-kors ordinarju tal-kummerċ, minn klijenti indipendenti fil-pajjiż esportatur”.

(119)

Madankollu, skont l-Artikolu 2(6a)(a) tar-Regolament bażiku, “[f]il-każ li jiġi determinat […] li mhuwiex xieraq li jintużaw prezzijiet u kostijiet domestiċi fil-pajjiż esportatur minħabba l-eżistenza f’dak il-pajjiż ta’ distorsjonijiet sinifikanti fis-sens tal-punt (b), il-valur normali għandu jiġi kkalkolat esklużivament abbażi tal-kostijiet tal-produzzjoni u tal-bejgħ li jirriflettu prezzijiet jew valuri ta’ riferiment mingħajr distorsjoni”, u “għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti” (“kostijiet amministrattivi, tal-bejgħ u ġenerali” minn hawn ’il quddiem “SG&A”).

(120)

Fid-dawl tal-evidenza suffiċjenti disponibbli fil-bidu tal-investigazzjoni li indikat l-eżistenza ta’ distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku fir-rigward tar-RPĊ, il-Kummissjoni qieset li kien xieraq li tiftaħ l-investigazzjoni fir-rigward tal-produtturi esportaturi minn dan il-pajjiż b’kunsiderazzjoni tal-Artikolu 2(6a) tar-Regolament bażiku.

(121)

Konsegwentement, sabiex tiġbor id-data neċessarja għall-applikazzjoni eventwali tal-Artikolu 2(6a) tar-Regolament bażiku, fin-Notifika ta’ Bidu, il-Kummissjoni stiednet lill-produtturi tar-RPĊ sabiex jipprovdu informazzjoni dwar l-inputs użati għall-produzzjoni tal-prodott taħt rieżami. Produttur esportatur wieħed ipprovda l-informazzjoni mitluba.

(122)

Sabiex tikseb l-informazzjoni li qieset meħtieġa għall-investigazzjoni tagħha fir-rigward tal-allegati distorsjonijiet sinifikanti, il-Kummissjoni bagħtet ukoll kwestjonarju lill-GTĊ. Barra minn hekk, fil-punt 5.3.2 tan-Notifika ta’ Bidu, il-Kummissjoni stiednet lill-partijiet interessati kollha jressqu l-fehmiet tagħhom, jippreżentaw informazzjoni u jipprovdu evidenza ta’ sostenn fir-rigward tal-applikazzjoni tal-Artikolu 2(6a) tar-Regolament bażiku fi żmien 37 jum mid-data tal-pubblikazzjoni tan-Notifika ta’ Bidu f’Il-Ġurnal Uffiċjali tal-Unjoni Ewropea. Ma waslet l-ebda tweġiba għall-kwestjonarju mill-GTĊ u ma waslet l-ebda sottomissjoni dwar l-applikazzjoni tal-Artikolu 2(6a) tar-Regolament bażiku qabel l-iskadenza.

(123)

Fit-30 ta’ Novembru 2020, il-Kummissjoni ħarġet l-ewwel nota għall-fajl (“l-Ewwel Nota”) fejn talbet il-fehmiet tal-partijiet interessati dwar is-sorsi rilevanti li l-Kummissjoni tista’ tuża sabiex tiddetermina l-valur normali, f’konformità mat-tieni inċiż tal-Artikolu 2(6a)(e) tar-Regolament bażiku. F’dik in-nota, il-Kummissjoni pprovdiet lista tal-fatturi ta’ produzzjoni kollha, bħall-materjali, l-enerġija u l-manodopera użati fil-produzzjoni tal-prodott taħt rieżami mill-produtturi esportaturi. Barra minn hekk, abbażi tal-kriterji li jiggwidaw l-għażla ta’ prezzijiet jew ta’ parametri referenzjarji mingħajr distorsjoni, il-Kummissjoni identifikat żewġ pajjiżi rappreżentattivi possibbli: il-Brażil u r-Russja.

(124)

Il-Kummissjoni stiednet lill-partijiet interessati sabiex iressqu l-kummenti. Waslu kummenti mingħand l-Eurofer u l-Baoshan Group.

(125)

Il-kummenti dwar l-Ewwel Nota ġew indirizzati fit-tieni nota (“it-Tieni Nota”) li l-Kummissjoni ħarġet fl-20 ta’ Lulju 2021 u li biha informat lill-partijiet interessati dwar is-sorsi rilevanti li kienet beħsiebha tuża għad-determinazzjoni tal-valur normali, bil-Brażil bħala l-pajjiż rappreżentattiv. Informat ukoll lill-partijiet interessati li kienet se tistabbilixxi l-kostijiet tal-bejgħ, ġenerali u amministrattivi (“SG&A”) u l-profitti abbażi ta’ Aperam Inox América so Sul S.A. (“Aperam”), produttur fil-pajjiż rappreżentattiv. Waslu kummenti mingħand l-Eurofer u l-Baoshan Group.

(126)

Mal-bidu tal-investigazzjoni abbażi tal-Artikolu 2(6a)(a) tar-Regolament bażiku, il-Kummissjoni bagħtet kwestjonarju dwar l-eżistenza ta’ distorsjonijiet lill-GTĊ. Madankollu, il-GTĊ ma ppreżenta l-ebda tweġiba. Il-Kummissjoni informat lill-GTĊ b’Note Verbale fl-24 ta’ Settembru 2021 li kellha l-ħsieb li tagħmel użu mill-Artikolu 18 tar-Regolament bażiku fir-rigward tal-eżistenza possibbli ta’ distorsjonijiet sinifikanti fis-suq domestiku Ċiniż għall-GOES skont it-tifsira tal-Artikolu 2(6a) tar-Regolament bażiku. Il-Kummissjoni stiednet lill-GTĊ sabiex jissottometti l-kumment tiegħu dwar l-applikazzjoni tal-Artikolu 18. Ma wasal l-ebda kumment.

(127)

F’investigazzjonijiet reċenti dwar is-settur tal-azzar fir-RPĊ (11), il-Kummissjoni sabet li kien hemm distorsjonijiet sinifikanti skont it-tifsira tal-Artikolu 2(6a)(b) tar-Regolament bażiku. F’din l-investigazzjoni l-Kummissjoni kkonkludiet li, abbażi tal-evidenza disponibbli, l-applikazzjoni tal-Artikolu 2(6a) tar-Regolament bażiku kienet xierqa wkoll.

(128)

F’dawk l-investigazzjonijiet, il-Kummissjoni sabet li hemm intervent sostanzjali tal-gvern fir-RPĊ u li dan jirriżulta f’distorsjoni tal-allokazzjoni effettiva tar-riżorsi f’konformità mal-prinċipji tas-suq (12). B’mod partikolari, il-Kummissjoni kkonkludiet li fis-settur tal-azzar, li jappartjeni għalih il-GOES, mhux biss għad hemm grad sostanzjali ta’ sjieda mill-GTĊ fis-sens tal-ewwel inċiż tal-Artikolu 2(6a)(b) tar-Regolament bażiku (13), iżda l-GTĊ huwa wkoll f’pożizzjoni li jinterferixxi fil-prezzijiet u fil-kostijiet permezz tal-preżenza tal-Istat fid-ditti fis-sens tat-tieni inċiż tal-Artikolu 2(6a)(b) tar-Regolament bażiku (14). Il-Kummissjoni sabet ukoll li l-preżenza u l-intervent tal-Istat fis-swieq finanzjarji, kif ukoll fil-provvista tal-materja prima u tal-inputs, iħallu effett ta’ distorsjoni addizzjonali fuq is-suq. Tabilħaqq, b’mod ġenerali, is-sistema tal-ippjanar fir-RPĊ tirriżulta fil-konċentrazzjoni tar-riżorsi f’setturi ddeżinjati bħala strateġiċi jew inkella bħala politikament importanti mill-GTĊ, aktar milli fl-allokazzjoni tagħhom f’konformità mal-forzi tas-suq (15). Barra minn hekk, il-Kummissjoni kkonkludiet li l-liġijiet Ċiniżi dwar il-falliment u l-proprjetà ma jaħdmux kif suppost fis-sens tar-raba’ inċiż tal-Artikolu 2(6a)(b) tar-Regolament bażiku, u b’hekk jiġu ġġenerati distorsjonijiet b’mod partikolari meta jiġu miżmuma ħajjin ditti insolventi u meta jiġu allokati d-drittijiet għall-użu tal-art fir-RPĊ (16). Bl-istess mod, il-Kummissjoni sabet distorsjonijiet tal-kostijiet tal-pagi fis-settur tal-azzar fis-sens tal-ħames inċiż tal-Artikolu 2(6a)(b) tar-Regolament bażiku (17), kif ukoll distorsjonijiet fis-swieq finanzjarji fis-sens tas-sitt inċiż tal-Artikolu 2(6a)(b) tar-Regolament bażiku, b’mod partikolari fir-rigward tal-aċċess għall-kapital għall-atturi korporattivi fir-RPĊ (18).

(129)

Bħal fl-investigazzjonijiet preċedenti rigward is-settur tal-azzar fir-RPĊ, f’din l-investigazzjoni l-Kummissjoni eżaminat jekk kienx xieraq jew le li jintużaw il-prezzijiet u l-kostijiet domestiċi fir-RPĊ, minħabba l-eżistenza ta’ distorsjonijiet sinifikanti skont it-tifsira tal-punt (b) tal-Artikolu 2(6a) tar-Regolament bażiku. Il-Kummissjoni għamlet dan abbażi tal-evidenza disponibbli fil-fajl, inkluża l-evidenza li tinsab fit-talba kif ukoll fir-Rapport, li hija bbażata fuq sorsi pubblikament disponibbli. Dik l-analiżi kopriet l-eżami tal-interventi sostanzjali tal-gvern fl-ekonomija tar-RPĊ b’mod ġenerali, iżda wkoll is-sitwazzjoni speċifika tas-suq fis-settur rilevanti inkluż il-prodott taħt rieżami. Il-Kummissjoni kompliet tissupplimenta dawn l-elementi evidenzjarji bir-riċerka tagħha stess dwar id-diversi kriterji rilevanti sabiex tikkonferma l-eżistenza ta’ distorsjonijiet sinifikanti fir-RPĊ, kif misjub ukoll mill-investigazzjonijiet preċedenti tagħha f’dan ir-rigward.

(130)

It-talba kien fiha informazzjoni dwar l-effetti distortivi tat-13-il Pjan ta’ Ħames Snin għall-Azzar fuq l-industrija tal-azzar. Barra minn hekk, it-talba rreferiet għas-sejbiet magħmula mill-Gvern tal-Istati Uniti dwar il-kontroll tal-Istat fuq is-setgħa ta’ kontroll relattivament b’saħħitha fuq is-settur tal-azzar fiċ-Ċina permezz ta’ SASAC u s-setgħa ta’ kontroll assoluta fuq l-elettriku (19). It-talba osservat ukoll li l-GOES, bħall-azzar miksi b’mod organiku, huma prodotti minn kojls illaminati bis-sħana. Għalhekk, l-istess distorsjonijiet osservati mill-Kummissjoni fir-rigward tal-azzar miksi b’materjal organiku fir-Regolament ta’ Implimentazzjoni tal-Kummissjoni (UE) 2019/687 (20) japplikaw ukoll għall-GOES. It-talba osservat ukoll li ż-żewġ produtturi esportaturi Ċiniżi ewlenin fl-investigazzjoni tal-GOES, Baosteel u WISCO, huma wkoll produtturi esportaturi ta’ prodotti tal-azzar miksija b’materjal organiku koperti mill-miżuri definittivi fuq dak il-prodott. Fi tmiem l-2016, Baosteel u WISCO ingħaqdu sabiex saru l-akbar produttur tal-azzar taċ-Ċina. It-talba rreferiet ukoll għall-proċediment antisussidji rigward prodotti tal-azzar ċatti llaminati bis-sħana (21), li fih il-Kummissjoni sabet numru ta’ sussidji li jindikaw l-eżistenza ta’ distorsjonijiet fis-settur. Fl-aħħar nett, it-talba semmiet l-appoġġ finanzjarju li rċevew Baosteel u produtturi oħrajn, kif muri minn rapport imħejji minn Steel Industry Coalition (22) u s-sejbiet li saru f’diversi investigazzjonijiet tad-dazju kumpensatorju tal-Istati Uniti (23).

(131)

Kif indikat fil-premessa (126), il-GTĊ la kkummenta u lanqas ma pprovda evidenza li tappoġġa jew li tirribatti l-evidenza eżistenti fil-fajl tal-każ, inkluż ir-Rapport u l-evidenza addizzjonali li ġiet ipprovduta mill-ilmentatur, dwar l-eżistenza ta’ distorsjonijiet sinifikanti u/jew dwar l-adegwatezza tal-applikazzjoni tal-Artikolu 2(6a) tar-Regolament bażiku fil-każ inkwistjoni.

(132)

Speċifikament fis-settur tal-azzar, li jappartjeni għalih GOES, għad hemm grad sostanzjali ta’ sjieda mill-GTĊ. Ħafna mill-akbar produtturi huma proprjetà tal-Istat. Pereżempju, Baosteel, l-esportatur ewlieni tal-GOES, hija intrapriża ewlenija tal-Istat Ċiniż li tinvolvi ruħha fil-manifattura tal-azzar u hija parti miċ-China Baowu Steel Group Co. Ltd., ikkonsolidata reċentement, li qabel kienet Baoshan Iron & Steel Co., Ltd. u Wuhan Iron & Steel. (24) Filwaqt li l-qasma nominali bejn in-numru ta’ SOEs u kumpaniji bi sjieda privata hija stmata li hija kważi ugwali, erba’ mill-ħames produtturi tal-azzar Ċiniżi kklassifikati mal-ewwel għaxra bħala l-akbar produtturi tal-azzar fid-dinja huma SOEs (25). Fl-istess ħin, filwaqt li fl-2016 l-aqwa għaxar produtturi kienu jirrappreżentaw biss madwar 36 % tal-output totali tal-industrija, il-GTĊ stabbilixxa l-mira fl-istess sena li jikkonsolida bejn 60 % u 70 % tal-produzzjoni tal-azzar f’madwar għaxar intrapriżi fuq skala kbira sal-2025 (26). Din l-intenzjoni ġiet ripetuta mill-GTĊ f’April 2019, fejn dan ħabbar il-ħruġ ta’ linji gwida dwar il-konsolidazzjoni tal-industrija tal-azzar (27). Tali konsolidazzjoni tista’ tinvolvi fużjonijiet furzati ta’ kumpaniji privati profittabbli ma’ SOEs bi prestazzjoni batuta (28). Iż-żewġ produtturi tal-GOES fiċ-Ċina, Baosteel u WISCO (it-tnejn parti mill-Baoshan Group) huma proprjetà tal-Istat.

(133)

Fir-rigward tal-GTĊ li jinsab f’pożizzjoni li jinterferixxi mal-prezzijiet u l-kostijiet permezz tal-preżenza tal-Istat f’ditti fis-sens tat-tieni inċiż tal-Artikolu 2(6a)(b) tar-Regolament bażiku, l-investigazzjoni stabbiliet l-eżistenza ta’ konnessjonijiet personali bejn il-produtturi tal-prodott taħt rieżami u s-CCP, bħal membri tas-CCP fost il-maniġment superjuri jew membri tal-bord tad-diretturi fil-Baoshan Group.

(134)

Kemm l-intrapriżi pubbliċi kif ukoll dawk privati fis-settur tal-GOES huma soġġetti għal superviżjoni u gwida tal-politika. L-eżempji li ġejjin juru x-xejra msemmija hawn fuq ta’ livell ta’ intervent mill-GTĊ li qiegħed jiżdied fis-settur. Iż-żewġ produtturi tal-GOES jenfasizzaw b’mod espliċitu l-attivitajiet ta’ bini tal-partit fuq is-siti web tagħhom, għandhom membri tal-partit fil-maniġment tal-kumpanija u jissottolinjaw l-affiljazzjoni tagħhom mas-CCP. L-investigazzjoni żvelat attivitajiet ta’ bini tal-partit kemm f’Baosteel kif ukoll f’WISCO. Baosteel tiddeskrivi l-attivitajiet ta’ bini tal-partit kif ġej: “Nieħdu r-responsabbiltà ewlenija ta’ amministrazzjoni tal-partit b’mod strett u komprensiv; Immexxu l-ħidma ideoloġika u politika tal-kumpanija, b’ħidma fi front magħqud, filwaqt li nibnu ċiviltà spiritwali, nibnu kultura korporattiva u ħidma tal-massa bħal trade unions u l-Lega Komunista taż-Żgħażagħ; Immexxu l-kostruzzjoni ta’ stil tal-partit u ta’ gvern onest, insostnu l-kumitati tad-dixxiplina sabiex iwettqu b’mod effettiv ir-responsabbiltajiet superviżorji tagħhom” (29). WISCO tindika fuq is-sit web tagħha li l-ewwel kungress tal-membri tal-Partit Komunista Ċiniż li WISCO Group Co., Ltd. organizza fit-22 ta’ Jannar 2021“iddeċieda li jagħti kontribut sħiħ għar-rwol ta’ tmexxija tal-kumitat tal-partit ta’ ‘direzzjoni, ġestjoni tas-sitwazzjoni ġenerali, u l-iżgurar tal-implimentazzjoni’, li jtejjeb il-pożizzjonijiet politiċi, li jsaħħaħ ir-responsabbiltà, u jippromwovi bis-sħiħ l-implimentazzjoni tal-istrateġija ta’ żvilupp ‘1345’ (30)”.

(135)

Barra minn hekk, fis-settur tal-GOES hemm stabbiliti politiki li jiddiskriminaw favur il-produtturi domestiċi jew li b’xi mod ieħor jinfluwenzaw is-suq fis-sens tat-tielet inċiż tal-Artikolu 2(6a)(b) tar-Regolament bażiku.

(136)

Minkejja li l-GOES hija industrija speċjalizzata u l-ebda dokument ta’ politika speċifiku li jiggwida speċifikament l-iżvilupp tal-industrija tal-GOES bħala tali ma seta’ jiġi identifikat matul l-investigazzjoni, l-industrija tal-GOES qiegħda tibbenefika minn gwida u intervent governattivi fir-rigward tal-azzar u tal-materja prima ewlenija għall-manifattura tad-GOES, jiġifieri l-azzar u l-mineral tal-ħadid.

(137)

L-industrija tal-azzar titqies bħala industrija essenzjali mill-GTĊ (31). Dan huwa kkonfermat fil-bosta pjanijiet, direttivi u dokumenti oħrajn iffokati fuq l-azzar, li jinħarġu fil-livell nazzjonali, reġjonali u muniċipali, bħall-“Pjan għall-Aġġustament u t-Titjib tal-Industrija tal-Azzar għas-snin 2016 sal-2020”, li kien validu matul il-perjodu PI. Dan il-Pjan stqarr li l-industrija tal-azzar hija “settur importanti u fundamentali tal-ekonomija Ċiniża, pedament nazzjonali” (32). Il-kompiti u l-objettivi ewlenin stabbiliti f’dan il-Pjan ikopru l-aspetti kollha tal-iżvilupp tal-industrija (33). It-13-il Pjan ta’ Ħames Snin (“FYP”) għall-Iżvilupp Ekonomiku u Soċjali (34), applikabbli matul il-PI, ippreveda appoġġ lill-intrapriżi li jipproduċu tipi ta’ prodotti tal-azzar ta’ livell għoli. Dan jiffoka wkoll fuq il-kisba ta’ kwalità, ta’ durabbiltà u ta’ affidabbiltà tal-prodotti permezz tas-sostenn lill-kumpaniji li jużaw teknoloġiji relatati mal-produzzjoni tal-azzar nadif, l-irrumblar bi preċiżjoni u t-titjib fil-kwalità (35).

(138)

Il-“Katalogu għall-Iggwidar tar-Ristrutturar tal-Industrija (il-Verżjoni tal-2011) (l-Emenda tal-2013)” (36) (“il-Katalogu”) jelenka l-azzar bħala industrija mħeġġa. Materja prima importanti użata għall-produzzjoni tal-GOES hija l-ħadid. Il-mineral tal-ħadid kien kopert mill-Pjan Nazzjonali għar-Riżorsi Minerali bejn l-2016 u l-2020 matul il-perjodu PI. Il-pjan kien jipprevedi, fost l-oħrajn, li “tiġi żgurata l-konċentrazzjoni tal-intrapriżi u jiġu żviluppati minjieri kbar u ta’ daqs medju kompetittivi fis-suq”, li “tiġi żgurata gwida tar-riżorsi lokali sabiex dawn jiġu kkonċentrati fuq gruppi ta’ minjieri ta’ daqs kbir”, li “jitnaqqas il-piż fuq l-intrapriżi tal-minerali tal-ħadid, tiżdied il-kompetittività tal-intrapriżi domestiċi tal-minerali tal-ħadid”, li “jiġi kkontrollat b’mod adegwat l-iżvilupp ta’ minjieri fondi 1 000 metru u ta’ minjieri tal-minerali tal-ħadid fuq skala żgħira”.

(139)

Il-mineral tal-ħadid jissemma wkoll fit-13-il FYP dwar l-Azzar 2016-2020, li kien fis-seħħ matul il-perjodu ta’ investigazzjoni tar-rieżami. Il-pjan jipprevedi għall-mineral tal-ħadid: “żamma tal-appoġġ tax-xogħlijiet ta’ esplorazzjoni f’żoni tal-minerali ewlenin domestiċi, […], appoġġ għal numru ta’ intrapriżi domestiċi eżistenti u kompetittivi ħafna tal-minerali tal-ħadid, bis-saħħa ta’ żvilupp usa’ u intensifikat, […], u t-tisħiħ tar-rwol tal-bażijiet tar-riżorsi minerali domestiċi fir-rigward tas-sigurtà (tal-provvisti)”.

(140)

Il-mineral tal-ħadid huwa kklassifikat bħala Industrija Strateġika Emerġenti (“SEI”) u, għalhekk, huwa kopert mit-13-il FYP dwar l-SEIs. Il-mineral tal-ħadid, il-ħadid fondut grezz u l-ligi tal-ħadid huma lkoll elenkati wkoll fil-Katalogu ta’ Gwida tal-NRDC għall-Aġġustament tal-Industrija tal-2019. Il-ligi tal-ħadid jissemmew fil-Katalogu ta’ Gwida tal-MIIT tal-2018 għall-Iżvilupp u għat-Trasferiment tal-Industrija.

(141)

Kif jidher mill-eżempji msemmija hawn fuq dwar l-azzar u l-ħadid, il-GTĊ jiggwida wkoll l-iżvilupp tas-settur tal-GOES f’konformità ma’ firxa wiesgħa ta’ għodod ta’ politika u direttivi u jikkontrolla virtwalment kull aspett fl-iżvilupp u fil-funzjonament tas-settur. B’hekk, l-industrija tal-GOES tibbenefika minn gwida u intervent governattivi fir-rigward tal-azzar u tal-materja prima ewlenija għall-manifattura tal-GOES, jiġifieri l-mineral tal-ħadid.

(142)

Minbarra dan ta’ hawn fuq, il-produtturi tal-GOES huma wkoll benefiċjarji ta’ sussidji mill-Istat, li jindika b’mod ċar l-interess tal-istat f’dan is-settur. Matul l-investigazzjoni, il-Kummissjoni stabbiliet li ż-żewġ produtturi tal-GOES, Baosteel (37) u WISCO (38) ibbenefikaw minn sussidji diretti mill-Istat.

(143)

Fil-qosor, l-GTĊ għandu miżuri fis-seħħ sabiex iħeġġeġ lill-operaturi jikkonformaw mal-objettivi tal-ordni pubbliku li jappoġġaw l-industriji mħeġġa, inkluża l-produzzjoni tal-GOES, bħala parti mis-settur tal-azzar u tal-ħadid. Tali miżuri jimpedixxu l-forzi tas-suq milli joperaw b’mod ħieles.

(144)

Din l-investigazzjoni ma żvelat l-ebda evidenza li l-applikazzjoni diskriminatorja jew l-infurzar inadegwat tal-liġijiet dwar il-falliment u l-proprjetà skont ir-raba’ inċiż tal-Artikolu 2(6a)(b) tar-Regolament bażiku fis-settur tal-GOES imsemmi hawn fuq fil-premessa (128) ma jaffettwawx lill-manifatturi tal-prodott taħt rieżami.

(145)

Is-settur tal-GOES huwa affettwat ukoll mid-distorsjonijiet tal-kostijiet tal-pagi fis-sens tal-ħames inċiż tal-Artikolu 2(6a)(b) tar-Regolament bażiku, kif imsemmi wkoll hawn fuq fil-premessa (128). Dawk id-distorsjonijiet jaffettwaw lis-settur kemm direttament (waqt il-produzzjoni tal-prodott taħt rieżami jew tal-inputs ewlenin), kif ukoll indirettament (waqt li jkun hemm aċċess għall-kapital jew għall-inputs minn kumpaniji soġġetti għall-istess sistema lavorattiva fir-RPĊ) (39).

(146)

Barra minn hekk, ma tressqet l-ebda evidenza f’din l-investigazzjoni li turi li s-settur tal-GOES ma huwiex affettwat mill-intervent tal-gvern fis-sistema finanzjarja fis-sens tas-sitt inċiż tal-Artikolu 2(6a)(b) tar-Regolament bażiku, kif imsemmi wkoll hawn fuq fil-premessa (128). Għalhekk, l-intervent sostanzjali tal-gvern fis-sistema finanzjarja jwassal biex il-kundizzjonijiet tas-suq jiġu affettwati b’mod serju fil-livelli kollha.

(147)

Fl-aħħar nett, il-Kummissjoni tfakkar li sabiex jiġi prodott il-GOES, huma meħtieġa numru ta’ inputs. Meta l-produtturi tal-GOES jixtru/jikkuntrattaw dawn l-inputs, il-prezzijiet li dawn iħallsu (u li jiġu rreġistrati bħala l-kostijiet tagħhom) huma esposti għall-istess distorsjonijiet sistemiċi msemmija qabel. Pereżempju, il-fornituri tal-inputs jimpjegaw manodopera li hija soġġetta għad-distorsjonijiet, jistgħu jissellfu flus li huma soġġetti għad-distorsjonijiet fuq is-settur finanzjarju/l-allokazzjoni tal-kapital u huma soġġetti għas-sistema tal-ippjanar li tapplika fil-livelli kollha tal-gvern u s-setturi.

(148)

B’konsegwenza ta’ dan, mhux biss il-prezzijiet tal-bejgħ domestiku tal-GOES ma humiex xierqa għall-użu fis-sens tal-Artikolu 2(6a)(a) tar-Regolament bażiku, iżda l-kostijiet tal-inputs kollha (inklużi l-materja prima, l-enerġija, l-art, il-finanzjament, il-manodopera, eċċ.) huma wkoll affettwati minħabba li l-formazzjoni tal-prezzijiet tagħhom hija affettwata minn intervent sostanzjali min-naħa tal-gvern, kif deskritt fil-Partijiet A u B tar-Rapport. Tabilħaqq, l-interventi mill-gvern deskritti fir-rigward tal-allokazzjoni tal-kapital, tal-art, tal-manodopera, tal-enerġija u tal-materja prima huma preżenti fir-RPĊ kollha. Dan ifisser, pereżempju, li input li minnu nnifsu kien prodott fir-RPĊ permezz tal-kombinament ta’ firxa ta’ fatturi ta’ produzzjoni huwa espost għal distorsjonijiet sinifikanti. L-istess japplika għall-input, lejn l-input u l-bqija.

(149)

Il-GTĊ ma ppreżenta l-ebda evidenza jew argument kuntrarju. Grupp wieħed ta’ produtturi esportaturi, jiġifieri Baosteel u WISCO (“il-Baoshan Group”), ippreżenta sett ta’ kummenti dwar l-eżistenza ta’ distorsjonijiet sinifikanti.

(150)

L-ewwel nett, il-Baoshan Group enfasizza li l-allegazzjoni dwar “distorsjonijiet sinifikanti” fiċ-Ċina jenħtieġ li ma ssirx konklużjoni ddeterminata minn qabel. Il-Baoshan Group argumenta li l-Kummissjoni jenħtieġ li ma tiġborx l-informazzjoni meħtieġa għall-kalkolu tal-valur normali abbażi tal-metodoloġija rappreżentattiva tal-pajjiż fil-bidu tal-investigazzjoni, jiġifieri qabel ma jiġu stabbiliti u kkonfermati d-distorsjonijiet sinifikanti f’investigazzjoni partikolari. Skont il-Baoshan Group, tali informazzjoni jenħtieġ li tinġabar biss ladarba l-Kummissjoni tkun ikkonfermat il-fatti meħtieġa sabiex jiġu applikati d-dispożizzjonijiet tal-Artikolu 2(6a) tar-Regolament bażiku. Hija osservat ukoll li t-talba kienet tiddependi ħafna fuq ir-Rapport dwar iċ-Ċina, li, skont il-Baoshan Group, jonqos milli jissodisfa l-istandards ta’ evidenza imparzjali u oġġettiva, minħabba li ġie abbozzat bl-għan li jiffaċilita l-preżentazzjoni ta’ lmenti għall-industrija Ewropea. Barra minn hekk, il-Baoshan Group argumenta li l-preċiżjoni tal-informazzjoni inkluża fir-rapport tal-Kummissjoni u r-rilevanza għall-proċediment attwali huma dubjużi ħafna, minħabba li r-Rapport ġie ppubblikat fl-2017, bl-inklużjoni tal-kontenut u tar-referenzi tal-2016 u tas-snin ta’ qabel u għalhekk mhux applikabbli għall-PI fl-investigazzjoni attwali. Barra minn hekk, il-Baoshan Group osserva li r-Rapport dwar iċ-Ċina ma jkoprix il-GOES, iżda s-settur tal-azzar biss u li s-sejbiet li saru dwar l-azzar ma humiex neċessarjament rilevanti għall-GOES.

(151)

Għalhekk, il-Kummissjoni tqis li l-evidenza elenkata fin-Notifika ta’ Bidu kienet biżżejjed sabiex tiġġustifika l-bidu ta’ investigazzjoni abbażi tal-Artikolu 2(6a) tar-Regolament bażiku. Tabilħaqq, il-Kummissjoni ċċarat li filwaqt li d-determinazzjoni dwar l-eżistenza attwali ta’ distorsjonijiet sinifikanti u l-użu konsegwenti tal-metodoloġija preskritta mill-Artikolu 2(6a)(a) isseħħ biss fil-ħin tad-divulgazzjoni provviżorja u/jew definittiva, l-Artikolu 2(6a)(e) jistabbilixxi obbligu li tinġabar id-data meħtieġa għall-applikazzjoni ta’ din il-metodoloġija meta l-investigazzjoni tkun inbdiet fuq din il-bażi. F’dan il-każ, il-Kummissjoni qieset l-evidenza sottomessa mill-applikant dwar id-distorsjonijiet sinifikanti suffiċjenti sabiex tinbeda l-investigazzjoni abbażi ta’ dan. In-Notifika ta’ Bidu speċifikat dan b’mod ċar fil-punt 3 f’konformità mal-obbligu stabbilit fl-Artikolu 2(6a)(e) tar-Regolament bażiku. Għalhekk, il-Kummissjoni ħadet il-passi meħtieġa biex tkun tista’ tapplika l-metodoloġija skont l-Artikolu 2(6a) tar-Regolament bażiku f’każ li l-eżistenza ta’ distorsjonijiet sinifikanti tiġi kkonfermata matul l-investigazzjoni.

(152)

Rigward l-affermazzjoni dwar in-nuqqas ta’ imparzjalità tar-Rapport, il-Kummissjoni tinnota li dan ir-rapport huwa dokument komprensiv ibbażat fuq evidenza oġġettiva estensiva, inkluż leġiżlazzjoni, regolamenti u dokumenti uffiċjali oħrajn ta’ politika ppubblikati mill-GTĊ, rapporti ta’ partijiet terzi minn organizzazzjonijiet internazzjonali, studji akkademiċi u artikli minn akkademiċi, u sorsi indipendenti affidabbli oħrajn. Dan sar disponibbli għall-pubbliku f’Diċembru 2017 u għalhekk kwalunkwe parti interessata jkollha biżżejjed opportunità biex tirribatti, tissupplimenta jew tikkummenta dwaru u dwar l-evidenza li huwa bbażat fuqha. Fir-rigward tal-argument li r-Rapport kien skadut, il-Kummissjoni tfakkar li sa issa ma ġiet ipprovduta l-ebda evidenza li turi li r-rapport huwa skadut. Għall-kuntrarju, il-Kummissjoni nnotat b’mod partikolari li l-evidenza u d-dokumenti ta’ politika ewlenin li jinsabu fir-Rapport, inklużi l-pjanijiet rilevanti ta’ ħames snin u l-leġiżlazzjoni applikabbli għall-prodott taħt rieżami kienu għadhom rilevanti matul il-PIR, u li la l-Baoshan Group u lanqas partijiet oħrajn ma taw prova li dan ma kienx għadu l-każ.

(153)

Fir-rigward tal-argument li r-Rapport tal-Kummissjoni ma jinkludix kapitolu speċifiku dwar il-GOES iżda biss dwar l-azzar b’mod ġenerali, il-Kummissjoni nnotat li l-ewwel nett, it-GOES huwa tip speċjalizzat ta’ azzar, u għalhekk id-dispożizzjonijiet dwar l-azzar huma applikabbli b’mod wiesa’ wkoll għall-GOES. It-tieni, l-eżistenza tad-distorsjonijiet sinifikanti li jagħtu lok għall-applikazzjoni tal-Artikolu 2(6a) tar-Regolament bażiku ma hijiex marbuta mal-eżistenza ta’ kapitolu settorjali speċifiku li jkopri l-prodott taħt investigazzjoni. Ir-Rapport jiddeskrivi tipi differenti ta’ distorsjonijiet preżenti fir-RPĊ, li huma trażversali u applikabbli fl-ekonomija Ċiniża kollha u jaffettwaw il-prezzijiet u/jew il-materja prima u l-kostijiet tal-produzzjoni tal-prodott taħt investigazzjoni. Għalhekk, id-dikjarazzjonijiet magħmula mill-Baoshan Group ġew miċħuda.

(154)

Fil-qosor, l-evidenza disponibbli wriet li l-prezzijiet jew il-kostijiet tal-prodott taħt rieżami, inklużi l-kostijiet tal-materja prima, tal-enerġija u tal-manodopera, ma humiex ir-riżultat tal-forzi tas-suq ħieles minħabba li dawn huma affettwati minn intervent sostanzjali min-naħa tal-gvern fis-sens tal-Artikolu 2(6a)(b) tar-Regolament bażiku kif muri mill-impatt attwali jew potenzjali ta’ wieħed jew aktar mill-elementi rilevanti elenkati fih. Abbażi ta’ dan, u fin-nuqqas ta’ kwalunkwe kooperazzjoni mill-GTĊ, il-Kummissjoni kkonkludiet li ma huwiex xieraq li jintużaw prezzijiet u kostijiet domestiċi sabiex jiġi stabbilit il-valur normali f’dan il-każ. Konsegwentement, il-Kummissjoni pproċediet sabiex tibni l-valur normali esklużivament abbażi tal-kostijiet tal-produzzjoni u l-bejgħ li jirriflettu prezzijiet jew valuri referenzjarji mingħajr distorsjoni, jiġifieri, f’dan il-każ, abbażi tal-kostijiet korrispondenti tal-produzzjoni u l-bejgħ f’pajjiż rappreżentattiv xieraq, f’konformità mal-Artikolu 2(6a)(a) tar-Regolament bażiku, kif diskuss fit-taqsima li ġejja.

(155)

L-għażla tal-pajjiż rappreżentattiv kienet ibbażata fuq il-kriterji li ġejjin, skont l-Artikolu 2(6a) tar-Regolament bażiku:

(156)

Kif spjegat fil-premessi (123) u (125), il-Kummissjoni ppubblikat żewġ noti għall-fajl dwar is-sorsi għad-determinazzjoni tal-valur normali: l-ewwel nota dwar il-fatturi ta’ produzzjoni tat-30 ta’ Novembru 2020 (l-“Ewwel Nota”) u t-tieni nota dwar il-fatturi ta’ produzzjoni tal-20 ta’ Lulju 2021 (it-“Tieni Nota”). Dawn in-noti ddeskrivew il-fatti u l-evidenza li fuqhom huma bbażati l-kriterji rilevanti u indirizzaw il-kummenti li waslu mill-partijiet dwar dawk l-elementi u dwar is-sorsi rilevanti. Fit-Tieni Nota, il-Kummissjoni informat lill-partijiet interessati bl-intenzjoni tagħha li tqis lill-Brażil bħala pajjiż rappreżentattiv xieraq f’dan il-każ jekk l-eżistenza tad-distorsjonijiet sinifikanti skont l-Artikolu 2(6a) tar-Regolament bażiku tiġi kkonfermata.

(157)

Fl-Ewwel Nota, il-Kummissjoni identifikat il-Brażil u r-Russja bħala pajjiżi b’livell simili ta’ żvilupp ekonomiku bħaċ-Ċina skont il-Bank Dinji, jiġifieri t-tnejn huma kklassifikati mill-Bank Dinji bħala pajjiżi “b’introjtu medju superjuri” fuq bażi tal-introjtu nazzjonali gross fejn kien magħruf li jiġi manifatturat l-prodott taħt rieżami. L-industrija tal-Unjoni kienet ipproponiet ukoll lill-Korea t’Isfel bħala pajjiż rappreżentattiv allegatament xieraq. Madankollu, fid-dawl tal-livell ta’ żvilupp ekonomiku tal-Korea t’Isfel, kif ikklassifikat mill-Bank Dinji, dan il-pajjiż ma setax jitqies.

(158)

Fir-rigward tal-Ewwel Nota, l-industrija tal-Unjoni sostniet li l-Artikolu 2(6a) tar-Regolament bażiku ta diskrezzjoni wiesgħa lill-Kummissjoni fid-determinazzjoni ta’ liema pajjiż rappreżentattiv jista’ jkun xieraq u ma llimitax il-kunċett ta’ livell simili ta’ żvilupp ekonomiku lil pajjiżi kklassifikati fl-istess grupp ta’ introjtu nazzjonali gross mill-Bank Dinji. B’mod partikolari, hija sostniet li filwaqt li r-raggruppamenti tal-introjtu nazzjonali gross tal-Bank Dinji jistgħu jagħmlu sens f’ħafna każijiet, dawn ma jagħmlux sens fir-rigward tal-industrija tal-GOES li hija soġġetta għal dan ir-rieżami. Ir-raġuni hija li l-GOES huwa prodott uniku tal-azzar b’teknoloġija avvanzata u l-fabbriki tal-GOES tal-produttur esportatur Ċiniż huma magħmulin skont l-ogħla standards internazzjonali filwaqt li jesportaw prinċipalment il-GOES bi gradi ta’ permeabbiltà għolja (primjum) (“HGO”) lejn l-Unjoni Ewropea. L-industrija tal-Unjoni argumentat ukoll li l-produttur fil-Brażil ma kienx kapaċi jikseb livelli simili ta’ kwalità filwaqt li l-produttur esportatur Ċiniż kien fl-istess livell ta’ żvilupp ekonomiku u teknoloġiku bħall-fabbrika Koreana POSCO u għalhekk, fl-opinjoni tagħha, il-Korea kienet l-aktar pajjiż rappreżentattiv xieraq.

(159)

Fir-rigward tal-użu tal-klassifikazzjoni tal-Bank Dinji, meta jkun qiegħed jinħadem il-valur normali f’każ ta’ pajjiżi b’distorsjonijiet sinifikanti, l-Artikolu 2(6a)(a) tar-Regolament bażiku jistabbilixxi li l-Kummissjoni tista’ tuża pajjiż rappreżentattiv b’livell simili ta’ żvilupp ekonomiku bħala l-pajjiż esportatur. Sabiex jiġi definit liema pajjiżi huma f’livell simili ta’ żvilupp ekonomiku bħall-pajjiż esportatur f’kull każ, il-Kummissjoni tuża pajjiżi kklassifikati fl-istess kategorija ta’ introjtu mill-Bank Dinji. Il-Kummissjoni tagħmel dan billi teżerċita d-diskrezzjoni tagħha fl-interpretazzjoni u fl-applikazzjoni tar-Regolament bażiku kif ikkonfermat ripetutament mill-Qorti tal-Ġustizzja f’ċirkostanzi fejn jitħalla f’idejn il-Kummissjoni sabiex tagħmel dan. Il-Kummissjoni tqis li din il-bażi tad-data tippermetti li jkun hemm numru suffiċjenti ta’ pajjiżi potenzjalment xierqa b’livell simili ta’ żvilupp sabiex jintgħażel pajjiż rappreżentattiv xieraq skont l-Artikolu 2(6a)(a) tar-Regolament bażiku.

(160)

F’dan il-każ, il-kategorija rilevanti tal-Bank Dinji, fejn ir-RPĊ hija kklassifikata, kienet dik tal-pajjiżi b’introjtu medju superjuri. Għalhekk, il-Korea ma kellhiex livell simili ta’ żvilupp ekonomiku bħar-RPĊ u tqieset li ma tissodisfax il-kriterju stabbilit fl-ewwel inċiż tal-Artikolu 2(6a)(a) tar-Regolament bażiku.

(161)

Fir-rigward tat-Tieni Nota, l-Eurofer sostniet li l-valutazzjoni tal-Kummissjoni bbażata fuq il-livell nazzjonali ta’ żvilupp ekonomiku u referenza għall-klassifikazzjoni tal-Bank Dinji ma kinitx tagħmel sens u jenħtieġ li tintegra l-iżvilupp ekonomiku tal-industrija tal-GOES Ċiniża. F’dan il-kuntest, l-Eurofer argumentat li l-industriji tal-GOES tal-Korea u tal-Ġappun kellhom livell simili ta’ żvilupp ekonomiku bħal dik Ċiniża. Fin-nuqqas ta’ kooperazzjoni mill-produtturi esportaturi Koreani, l-Eurofer saħqet li l-Kummissjoni tista’ tuża lill-Ġappun bħala pajjiż rappreżentattiv għaċ-Ċina u l-informazzjoni pprovduta minn Nippon Steel sabiex tiddetermina l-valur normali.

(162)

Il-Kummissjoni qieset li l-formulazzjoni tal-ewwel inċiż tal-Artikolu 2(6a)(a) tar-Regolament bażiku ma tippermettix qari daqshekk ristrett peress li ma tirreferix għal approċċ speċifiku għas-settur. Barra minn hekk, l-Eurofer ma pprovdiet l-ebda sors indipendenti li fuqu l-Kummissjoni setgħet tiddependi sabiex tistabbilixxi li l-industriji tal-GOES Koreani u Ġappuniżi kellhom livell simili ta’ żvilupp ekonomiku. Fuq din il-bażi, din l-affermazzjoni ġiet miċħuda.

(163)

Fl-Ewwel Nota, il-Kummissjoni indikat li, għall-pajjiżi identifikati bħala pajjiżi fejn kien qiegħed jiġi prodott il-prodott taħt rieżami, jiġifieri l-Brażil u r-Russja, id-disponibbiltà tad-data pubblika kienet limitata għal produttur wieħed tal-prodott taħt rieżami li jinsab fil-Brażil; jiġifieri Aperam Inox América do Sul S.A. (“Aperam”) għas-sena kalendarja 2019. F’dan ir-rigward, il-Kummissjoni stiednet lill-partijiet interessati sabiex jikkummentaw, u, jekk jitqies xieraq, jipproponu produtturi oħrajn tal-prodott taħt investigazzjoni f’pajjiż rappreżentattiv tal-għażla tagħhom li jissodisfa l-kriterji tal-ewwel inċiż tal-Artikolu 2(6a)(a) tar-Regolament bażiku, fejn id-dikjarazzjonijiet finanzjarji li jkun fihom id-data rilevanti jkunu disponibbli faċilment.

(164)

Fir-rigward tal-Ewwel Nota, l-ebda parti interessata ma ppreżentat kummenti rigward Aperam jew ippreżentat data finanzjarja pubblika rilevanti ta’ produttur tal-GOES f’pajjiż rappreżentattiv potenzjali.

(165)

Fir-rigward tat-Tieni Nota, l-Eurofer qablet li l-Brażil kien aktar adattat mir-Russja. Madankollu, hija sostniet li Aperam teknikament ma kinitx kapaċi tipproduċi l-prodotti ta’ grad għoli esportati mill-Baoshan Group lejn l-UE bħala riżultat tan-nuqqas ta’ investiment tagħha fit-teknoloġija, fil-proċessi u fl-għarfien meħtieġ għal dawn il-gradi. B’mod partikolari, l-Eurofer irreferiet għal-livell ta’ deprezzament, li allegatament kien baxx wisq u jenħtieġ li jiġi aġġustat f’konformità mal-livell tal-produtturi tal-Unjoni jew tal-Korea.

(166)

Kif spjegat fil-premessa (180), il-Kummissjoni ma qagħditx fuq il-livell ta’ deprezzament ta’ Aperam sabiex tibni l-valur normali. Tabilħaqq, id-data tal-Aperam użata sabiex jinbena l-valur normali kienet relatata biss mal-SG&A u l-perċentwali tal-profitt. F’dak li għandu x’jaqsam mad-deprezzament u mal-ispejjeż ġenerali oħrajn, il-Kummissjoni qagħdet fuq l-ispejjeż ġenerali tal-Baoshan Group espressi bħala perċentwal tal-kost ta’ kostijiet oħrajn tal-manifattura u applikat dan il-perċentwal għall-kost “ikkalkolat mill-ġdid” tal-manifattura. Fuq din il-bażi, din l-affermazzjoni ġiet miċħuda.

(167)

Fir-rigward tat-Tieni Nota, l-Eurofer iddikjarat ukoll li l-Kummissjoni jenħtieġ li tintegra d-data finanzjarja ta’ Aperam għas-sena kalendarja 2020 fil-kalkolu tagħha tal-SG&A u l-profitt għall-perjodu ta’ investigazzjoni tar-rieżami.

(168)

Il-Kummissjoni aċċettat din l-asserzjoni iżda eventwalment qagħdet biss fuq id-data tal-2020 minħabba li, kif imsemmi fil-premessa (203), ir-rapporti finanzjarji tal-2019 ma wrewx profitt meta eskludew l-ispejjeż mhux operatorji.

(169)

Fl-Ewwel Nota, il-Kummissjoni pprovdiet lista tal-fatturi kollha tal-produzzjoni, bħall-materja prima, il-manodopera u l-enerġija użati fil-produzzjoni tal-GOES. Fl-istess Nota, il-Kummissjoni qieset li kien hemm restrizzjonijiet kummerċjali fuq ċerti fatturi ta’ produzzjoni bbażati fuq l-Inventarju tal-OECD dwar ir-restrizzjonijiet fuq l-esportazzjoni tal-Materja Prima Industrijali (42) u b’mod partikolari l-lista ta’ restrizzjonijiet fuq l-esportazzjoni tal-materja prima industrijali għall-Brażil (HS 7225 11 u 7226 11) u r-Russja (HS 7204 10 sa 7204 50). Barra minn hekk, fir-rigward tar-Russja, id-Dokument ta’ Ħidma tal-Persunal tal-Kummissjoni dwar distorsjonijiet sinifikanti fl-ekonomija tal-Federazzjoni Russa għall-finijiet tal-investigazzjonijiet tad-difiża tal-kummerċ (SWD(2020) 242) kien identifika wkoll distorsjonijiet sinifikanti fil-gass naturali (43) u fl-elettriku (44), livelli għoljin ta’ intervent mill-Istat u livelli għoljin ta’ konċentrazzjoni u integrazzjoni vertikali f’setturi ewlenin tal-materja prima, fl-industrija tal-azzar u fit-trasport (45), u l-eżistenza ta’ dazji tal-importazzjoni fuq il-GOES (HS 7225 11 u 7226 11). Fid-dawl ta’ dawn ir-restrizzjonijiet kummerċjali u distorsjonijiet sinifikanti, f’dan l-istadju, il-Kummissjoni kienet qieset li l-Brażil ikun il-pajjiż rappreżentattiv xieraq u stiednet lill-partijiet sabiex jikkummentaw dwar l-adegwatezza tal-pajjiżi rappreżentattivi possibbli.

(170)

Fir-rigward tal-Ewwel Nota, l-industrija tal-Unjoni pprovdiet argumenti addizzjonali għal dawk stabbiliti fl-Ewwel Nota dwar għaliex ir-Russja kienet pajjiż rappreżentattiv anqas xieraq mill-Brażil.

(171)

Barra minn hekk, il-Kummissjoni nnotat li l-ebda parti ma kkontestat is-sejbiet tagħha fit-Taqsima 2 tal-Ewwel Nota dwar in-nuqqasijiet identifikati għar-Russja bħala pajjiż rappreżentattiv. Konsegwentement, il-Kummissjoni kkonkludiet li l-Brażil kien pajjiż xieraq peress li ssodisfa l-kriterji kollha, jiġifieri jinsab f’livell komparabbli ta’ żvilupp bħaċ-Ċina, għandu produttur tal-GOES u d-data ta’ dan il-produttur hija disponibbli faċilment għall-perjodu ta’ investigazzjoni tar-rieżami.

(172)

Wara li ġie stabbilit li l-Brażil kien il-pajjiż rappreżentattiv xieraq, abbażi tal-elementi kollha msemmija hawn fuq, ma kienx hemm bżonn li titwettaq valutazzjoni tal-livell ta’ protezzjoni soċjali u ambjentali f’konformità mal-aħħar sentenza tal-ewwel inċiż tal-Artikolu 2(6a)(a) tar-Regolament bażiku.

(173)

Fid-dawl tal-analiżi ta’ hawn fuq, il-Kummissjoni ddeċidiet li tikkunsidra lill-Brażil bħala l-pajjiż rappreżentattiv xieraq għall-fini tal-Artikolu 2(6a)(a) tar-Regolament bażiku.

(174)

Fl-Ewwel Nota, il-Kummissjoni elenkat il-fatturi ta’ produzzjoni, bħall-materjali, l-enerġija u l-manodopera, użati fil-produzzjoni tal-prodott taħt rieżami mill-produttur esportatur u stiednet lill-partijiet interessati jikkummentaw u jipproponu informazzjoni disponibbli għall-pubbliku dwar il-valuri mingħajr distorsjoni għal kull wieħed mill-fatturi ta’ produzzjoni msemmija f’dik in-nota.

(175)

F’konformità mal-Artikolu 2(6a)(a) tar-Regolament bażiku, il-Kummissjoni identifikat ukoll sorsi li għandhom jintużaw sabiex jiġu stabbiliti prezzijiet u valuri referenzjarji mingħajr distorsjoni. Is-sors ewlieni li l-Kummissjoni pproponiet li jintuża kien il-Global Trade Atlas (il-“GTA”). Fl-aħħar nett, fuq l-istess nota, il-Kummissjoni identifikat il-kodiċijiet tas-Sistema Armonizzata (SA), jew il-kodiċijiet tal-merkanzija użati, inter alia, fl-UE, fil-Kanada jew fil-Brażil, ta’ fatturi ta’ produzzjoni li abbażi tal-informazzjoni pprovduta mill-partijiet interessati, inizjalment tqiesu li ntużaw għall-analiżi tal-GTA.

(176)

Il-Kummissjoni stiednet lill-partijiet interessati jikkummentaw u jipproponu informazzjoni pubblikament disponibbli dwar valuri mingħajr distorsjoni għal kull wieħed mill-fatturi ta’ produzzjoni msemmija f’dik in-Nota.

(177)

Abbażi tal-proposta li jintuża l-Brażil bħala l-pajjiż rappreżentattiv, il-Kummissjoni informat lill-partijiet interessati fit-Tieni Nota li kienet se tuża l-GTA sabiex tistabbilixxi l-kostijiet mingħajr distorsjoni tal-biċċa l-kbira tal-materja prima.

(178)

Il-Kummissjoni stabbiliet lista ta’ fatturi ta’ produzzjoni u ta’ sorsi intenzjonati sabiex jintużaw għall-fatturi ta’ produzzjoni kollha, bħall-materjali, l-enerġija u l-manodopera użati fil-produzzjoni tal-prodott taħt rieżami mill-produtturi esportaturi. Il-Kummissjoni ma rċeviet l-ebda kumment dwar il-lista ta’ fatturi tal-produzzjoni.

(179)

Meta titqies l-informazzjoni kollha ppreżentata mill-partijiet interessati u miġbura matul l-RCCs, il-fatturi ta’ produzzjoni li ġejjin u s-sorsi tagħhom ġew identifikati sabiex jiġi ddeterminat il-valur normali f’konformità mal-Artikolu 2(6a)(a) tar-Regolament bażiku:

Tabella 1

Fatturi ta’ produzzjoni tal-GOES

(180)

Barra minn hekk, il-Kummissjoni inkludiet valur għall-ispejjeż ġenerali tal-manifattura sabiex tkopri l-kostijiet mhux inklużi fil-fatturi tal-produzzjoni msemmija hawn fuq, bħad-deprezzament u spejjeż fissi oħrajn li ma jistgħux jiġu kkwantifikati. Minħabba n-nuqqas ta’ data rilevanti fid-data finanzjarja disponibbli għall-pubbliku ta’ Aperam sabiex jiġi stabbilit l-ammont relatat mal-ispejjeż ġenerali, minflok intużat id-data speċifika għall-kumpanija tal-produttur esportatur u ġiet applikata fuq il-kost “ikkalkolat mill-ġdid” tal-manifattura. Il-metodoloġija hija spjegata kif xieraq fit-Taqsima 3.5.1.6.

(181)

Fir-rigward tat-Tieni Nota għall-fajl, l-Eurofer talbet lill-Kummissjoni sabiex tikkalkola l-valur normali direttament f’EUR sabiex tevita distorsjonijiet ikkawżati mir-rati tal-kambju tas-CNY. Sa fejn il-munita użata għall-kalkolu tad-dumping, l-Eurofer ma pprovdiet l-ebda evidenza ta’ distorsjoni. Fuq din il-bażi, il-Kummissjoni wettqet il-kalkolu tad-dumping f’konformità mal-prattika standard tagħha, jiġifieri billi użat il-munita tal-pajjiż esportatur.

(182)

Sabiex jiġi stabbilit il-prezz mingħajr distorsjoni ta’ materja prima kif ikkonsenjata sax-xatba tal-fabbrika ta’ produttur rappreżentattiv tal-pajjiż, il-Kummissjoni użat bħala bażi l-prezz medju ponderat ta’ importazzjoni fil-pajjiż rappreżentattiv kif irrappurtat fil-GTA li miegħu żdiedu d-dazji fuq l-importazzjoni u l-kostijiet tat-trasport. Prezz tal-importazzjoni fil-pajjiż rappreżentattiv ġie ddeterminat bħala medja ponderata tal-prezzijiet ta’ unità tal-importazzjonijiet mill-pajjiżi terzi kollha bl-esklużjoni tar-RPĊ u l-pajjiżi li ma humiex membri tad-WTO elenkati fl-Anness 1 tar-Regolament (UE) 2015/755 tal-Parlament Ewropew u tal-Kunsill (46). Il-Kummissjoni ddeċidiet li teskludi l-importazzjonijiet mir-RPĊ lejn il-pajjiż rappreżentattiv peress li fil-premessa (154) din ikkonkludiet li ma huwiex xieraq li jintużaw prezzijiet u kostijiet domestiċi fir-RPĊ minħabba l-eżistenza ta’ distorsjonijiet sinifikanti f’konformità mal-Artikolu 2(6a)(b) tar-Regolament bażiku. Minħabba li ma hemm l-ebda evidenza li turi li l-istess distorsjonijiet ma jaffettwawx bl-istess mod il-prodotti maħsuba għall-esportazzjoni, il-Kummissjoni qieset li l-istess distorsjonijiet affettwaw il-prezzijiet tal-esportazzjoni. Wara li ġew esklużi l-importazzjonijiet mir-RPĊ lejn il-pajjiż rappreżentattiv, il-volum tal-importazzjonijiet minn pajjiżi terzi oħrajn baqa’ rappreżentattiv (bħala medja aktar minn 90 %).

(183)

Għal numru ta’ fatturi ta’ produzzjoni, il-kostijiet effettivi mġarrba mill-produtturi esportaturi li kkooperaw kienu jirrappreżentaw sehem negliġibbli tal-kostijiet totali tal-materja prima fil-perjodu ta’ investigazzjoni taħt rieżami. Billi l-valur użat għal dawn ma kellu l-ebda impatt apprezzabbli fuq il-kalkoli tal-marġni tad-dumping, irrispettivament mis-sors użat, il-Kummissjoni ddeċidiet li tinkludi dawk il-kostijiet f’oġġetti tal-konsum kif spjegat fil-premessa (209).

(184)

Il-Kummissjoni esprimiet il-kost tat-trasport imġarrab mill-produttur esportatur li kkoopera għall-provvista ta’ materja prima bħala perċentwal tal-kost attwali ta’ materja prima bħal din u mbagħad applikat l-istess perċentwal għall-kost mingħajr distorsjoni tal-istess materja prima sabiex jinkiseb il-kost mingħajr distorsjoni tat-trasport. Il-Kummissjoni kkunsidrat li, fil-kuntest ta’ din l-investigazzjoni, il-proporzjon bejn il-materja prima tal-produttur esportatur u l-kostijiet tat-trasport irrapportati jista’ jintuża b’mod raġonevoli bħala indikazzjoni biex jiġu stmati l-kostijiet mingħajr distorsjoni tat-trasport tal-materja prima meta tiġi kkonsenjata lill-fabbrika tal-kumpanija.

(185)

Fir-rigward tal-Ewwel Nota, il-Baoshan Group afferma li għal ċerta materja prima (l-idroġenu, in-nitroġenu, l-ossiġenu u l-landa) il-prezzijiet fil-Brażil kienu ħafna ogħla milli fir-Russja, l-aktar minħabba livell baxx ħafna ta’ importazzjonijiet fil-Brażil. F’dan il-kuntest, huwa stieden lill-Kummissjoni tuża sorsi alternattivi bbażati fuq l-Artikolu 2(6a)(a) tar-Regolament bażiku bħall-prezzijiet internazzjonali jew il-kostijiet domestiċi fiċ-Ċina.

(186)

Il-Kummissjoni qieset li l-ossiġenu, in-nitroġenu u l-landa ġew importati fi kwantitajiet rappreżentattivi fil-Brażil. Konsegwentement, l-asserzjoni relatata ma’ din il-materja prima ġiet għall-ewwel miċħuda. Madankollu, f’dak li għandu x’jaqsam mal-idroġenu, il-Kummissjoni osservat li l-livelli tal-importazzjonijiet u d-differenzi fil-prezzijiet kienu tabilħaqq sinifikanti. Għalhekk, il-Kummissjoni qieset li l-użu tad-data tal-akbar esportatur tal-idroġenu fid-dinja; jiġifieri l-Kanada, kienet l-aktar xierqa. Fin-nuqqas ta’ differenzi sinifikanti fil-livelli tal-importazzjonijiet u l-prezzijiet tal-landa, il-Kummissjoni qagħdet fuq l-importazzjonijiet lejn il-Brażil fit-totalità.

(187)

Fir-rigward tat-Tieni Nota, il-Baoshan Group saħaq li l-prezzijiet tal-importazzjoni kkalkolati għan-nitroġenu u l-ossiġenu fil-Brażil kienu neqsin peress li kien hemm differenzi sinifikanti fil-prezz tal-unità skont il-pajjiż tal-oriġini. Dan iddikjara li l-prezz tal-importazzjoni tan-nitroġenu u l-ossiġenu li joriġinaw fil-Paragwaj kien, rispettivament, 11-il darba u 8 darbiet anqas mill-prezz medju tal-importazzjoni, u b’hekk jindika differenzi sinifikanti fil-prezzijiet tal-importazzjoni skont il-pajjiż tal-oriġini. Barra minn hekk, huwa argumenta li l-Paragwaj kien jirrappreżenta rispettivament aktar minn 98 % u 70 % tal-volum tal-importazzjoni għan-nitroġenu u l-ossiġenu. Barra minn hekk, il-Baoshan Group argumenta li l-kost unitarju għal din il-materja prima kien ferm aktar baxx mill-prezz medju tal-importazzjoni. Fuq din il-bażi u meta wieħed iqis is-sehem ta’ dawn iż-żewġ materji primi, il-Baoshan Group ippropona li n-nitroġenu u l-ossiġenu jiġu ttrattati bħala oġġetti ta’ konsum jew li wieħed joqgħod fuq il-prezz tal-importazzjoni tan-nitroġenu u l-ossiġenu li joriġinaw fil-Paragwaj biss.

(188)

Fid-dawl tas-sehem tal-kost tan-nitroġenu u tal-ossiġenu fil-kost tal-manifattura u d-differenzi fil-prezzijiet osservati, il-Kummissjoni qieset li kien xieraq li dawn il-materji primi jitqiesu bħala oġġetti ta’ konsum.

(189)

Fir-rigward tal-Ewwel Nota, l-industrija tal-Unjoni ddikjarat li kien meħtieġ grad partikolarment għoli ta’ minerali tal-ħadid u ossidu tal-manjeżju fil-manifattura tal-GOES u li l-istatistika dwar l-importazzjoni, ibbażata fuq il-kodiċijiet tas-SA jew tal-pajjiż rappreżentattiv, li normalment jinkludu l-gradi kollha, ma rriflettietx dan.

(190)

Il-Kummissjoni qieset li din l-affermazzjoni kienet iġġustifikata peress li l-GOES huwa tabilħaqq prodott sofistikat ħafna, ħafna aktar għali minn tipi regolari ta’ azzar u jeħtieġ riċetti speċjali u materja prima ta’ kwalità għolja ħafna/ta’ grad għoli anke fil-livell upstream tal-produzzjoni tal-ħadid. Peress li d-data pprovduta mill-produttur esportatur ma ppermettietx lill-Kummissjoni li tagħżel il-gradi tal-mineral tal-ħadid użati speċifikament fil-manifattura tal-GOES, il-Kummissjoni qieset li l-prezz tal-mineral tal-ħadid 66 % konċentrat tal-Fe kif irrapportat minn Fastmarkets (47) kien l-aktar valur referenzjarju xieraq.

(191)

Il-Kummissjoni qieset li l-ossidu tal-manjeżju (“MgO”) użat fil-manifattura tal-GOES huwa ta’ kwalità ferm ogħla minn dak importat lejn il-Brażil. Il-kodiċijiet doganali tal-pajjiż rappreżentattiv għall-MgO jinkludu aktar gradi ta’ MgO minn dak speċifiku ħafna użat fil-manifattura tal-GOES. Barra minn hekk, tali MgO huwa manifatturat minn ftit produtturi, li jinsabu fi ftit pajjiżi, li wieħed minnhom huwa Franza. Tabilħaqq, it-tip ta’ MgO użat għall-GOES irrapportat mill-produttur esportatur Ċiniż u mill-industrija tal-Unjoni huwa ħafna drabi aktar għali mill-MgO importat fil-Brażil. Għalhekk, l-MgO importat fil-Brażil ma huwiex parametru referenzjarju adegwat għall-MgO għall-manifattura tal-GOES. B’riżultat ta’ dan, il-Kummissjoni qieset li l-esportazzjonijiet, kif iddikjarati fil-Comext, minn Franza bħala produttur prinċipali tal-MgO għall-GOES lejn il-pajjiżi fejn jiġi prodott il-GOES (48), bl-esklużjoni ta’ dawk li jmorru lejn ir-RPĊ u dawk li jibqgħu fl-Unjoni, kienet parametru referenzjarju xieraq li jirrifletti l-prezzijiet internazzjonali barra mill-Unjoni u ċ-Ċina.

(192)

Il-Kummissjoni qieset li l-prezzijiet tal-importazzjoni fil-Brażil kif irrapportati mill-Global Trade Atlas (“GTA”) ma kinux rappreżentattivi għall-Faħam tal-Kokk u għall-Arja Kkompressata. Barra minn hekk, dawn il-prezzijiet qajmu kwistjonijiet serji ta’ konverżjoni.

(193)

Fin-nuqqas ta’ informazzjoni speċifika dwar il-gradi tal-faħam tal-kokk użati mill-produttur esportatur Ċiniż, il-Kummissjoni qieset li l-prezz tal-faħam tal-kokk iebes primjum - li għandu l-ogħla kwalità - kif irrapportat minn Fastmarkets kien xieraq. Tabilħaqq, l-investigazzjoni żvelat li l-prezz ta’ referenza tal-ogħla grad tal-faħam tal-kokk kien għadu aktar baxx mill-prezz irrapportat mill-produttur esportatur għax-xiri tiegħu tal-faħam tal-kokk. Din hija indikazzjoni oħra li l-produttur esportatur uża faħam tal-kokk ta’ kwalità għolja ħafna fil-proċess tal-produzzjoni tiegħu.

(194)

Fir-rigward tal-arja kkompressata, il-produttur esportatur irrapporta l-konsum tiegħu f’metri kubiċi, filwaqt li l-importazzjonijiet fil-Brażil huma rrapportati biss f’kg u l-Kummissjoni ma setgħetx issib fattur ta’ konverżjoni xieraq. Fi kwalunkwe każ, l-arja kkompressata kienet tirrappreżenta parti negliġibbli mill-kost totali tal-manifattura tal-produttur esportatur. Abbażi ta’ dan, il-Kummissjoni ttrattat dan il-fattur ta’ produzzjoni bħala prodott għall-konsum.

(195)

Ma kien hemm l-ebda importazzjoni ta’ Ferronijobju (“Fe-Nb”) irrapportata fil-Brażil fil-perjodu ta’ investigazzjoni. Għalhekk, għall-Fe-Nb, il-Kummissjoni użat ukoll id-data tal-akbar esportatur fid-dinja, jiġifieri l-Brażil, bl-istess approċċ kif imsemmi fil-premessa (186) għall-idroġenu.

(196)

Fir-rigward tal-gass tal-faħam, il-produttur esportatur irrapporta l-konsum tiegħu f’metri kubiċi, filwaqt li l-importazzjonijiet fil-Brażil huma rrapportati biss f’kg u l-Kummissjoni ma setgħetx issib fattur ta’ konverżjoni għall-gass tal-faħam. Barra minn hekk, l-importazzjonijiet fil-Brażil tal-gass tal-faħam kienu biss ta’ 58 kg. Għalhekk, il-Kummissjoni kkalkolat il-prezz referenzjarju tal-gass tal-faħam abbażi tal-prezz tal-gass naturali fil-pajjiż rappreżentattiv, filwaqt li kkontrollat il-valur tas-sħana taż-żewġ gassijiet.

(197)

Fir-rigward tat-Tieni Nota, l-Eurofer issottomettiet kummenti relatati ma’ ċerta materja prima u oġġetti tal-konsum użati fil-manifattura tal-GOES. Huwa talab ukoll lill-Kummissjoni sabiex tqis it-trasport domestiku lejn il-produttur esportatur Ċiniż.

(198)

F’dan ir-rigward, il-Kummissjoni qieset li l-informazzjoni pprovduta mill-Baoshan Group kienet tirrifletti l-fatturi rilevanti kollha tal-produzzjoni anke jekk il-proċess tal-manifattura kien differenti. Barra minn hekk, il-kalkolu tal-Kummissjoni jqis it-trasport domestiku kif spjegat fil-premessa (184).

(199)

Fit-Tieni Nota, il-Kummissjoni pproponiet li tuża l-kost tal-manodopera tal-produttur tal-GOES fil-pajjiż rappreżentattiv, APERAM, sabiex tistabbilixxi l-valur mingħajr distorsjoni għall-kost tal-manodopera. L-ebda parti interessata ma ressqet kummenti f’dan ir-rigward. Hekk kif saret disponibbli d-data finanzjarja tal-2020, il-Kummissjoni kkalkolat mill-ġdid il-kost tal-manodopera bħala medja tad-data tal-2019 u tal-2020 sabiex tirrifletti l-perjodu ta’ investigazzjoni tar-rieżami.

(200)

Fit-Tieni Nota, il-Kummissjoni pproponiet li tuża t-tariffa tal-prezz tal-elettriku rrapportata mis-CEMIG - il-fornitur tal-elettriku fl-istat Brażiljan ta’ Minais Gerais, fejn jinsab l-uniku manifattur tal-GOES Brażiljan (49), sabiex tistabbilixxi l-valur mingħajr distorsjoni għall-kost tal-elettriku. L-ebda parti interessata ma ressqet kummenti f’dan ir-rigward.

(201)

Fit-Tieni Nota, il-Kummissjoni pproponiet li tuża l-prezz tal-gass naturali għall-utenti industrijali rrapportat mill-GASMIG – fornitur fl-istat Brażiljan ta’ Minais Gerais fejn jinsab il-manifattur tal-GOES (50). Il-Kummissjoni użat id-data tal-prezzijiet tal-gass industrijali fil-limiti ta’ konsum korrispondenti. Il-Kummissjoni kkalkolat il-prezz referenzjarju abbażi tat-tariffi tal-GASMIG applikabbli fil-perjodu ta’ investigazzjoni. Il-prezz referenzjarju jinkludi t-taxxi (Tarifa com impostos). L-ebda parti interessata ma ressqet kummenti f’dan ir-rigward.

(202)

Skont l-Artikolu 2(6a)(a) tar-Regolament bażiku, “il-valur normali maħdum għandu jinkludi ammont raġonevoli u mingħajr distorsjoni għal kostijiet amministrattivi, tal-bejgħ u ġenerali u għal profitti”. Barra minn hekk, kien jeħtieġ li jiġi stabbilit valur għall-ispejjeż ġenerali tal-manifattura sabiex ikopri l-kostijiet mhux inklużi fil-fatturi ta’ produzzjoni msemmija hawn fuq.

(203)

Fl-Ewwel u fit-Tieni Nota tagħha, il-Kummissjoni indikat li kienet se tuża d-data finanzjarja ta’ Aperam u għamlet id-data finanzjarja ta’ Aperam għall-2019 disponibbli f’dan ir-rigward. Madankollu, wara analiżi ulterjuri u l-esklużjoni tal-ispejjeż u d-dħul mhux operatorji, deher li fl-2019 Aperam kienet qiegħda tagħmel telf. Għalhekk, id-data tagħha għall-2019 ma setgħetx tintuża.

(204)

Id-data finanzjarja ta’ Aperam għas-sena kalendarja 2020 saret disponibbli għall-Kummissjoni matul il-proċediment. Wara l-esklużjoni tal-ispejjeż u d-dħul mhux operatorji, Aperam irrapportat profitt. F’konformità mat-talba tal-Eurofer li tuża r-rapporti finanzjarji tal-2020, il-Kummissjoni kkalkolat il-perċentwali tas-SG&A u l-profitt abbażi tar-rapporti finanzjarji ta’ Aperam għal dik is-sena. Barra minn hekk, il-Kummissjoni qieset li f’dan il-każ kien aktar xieraq li tintuża d-data konsolidata ta’ Aperam milli toqgħod fuq ir-rapporti finanzjarji għall-entitajiet relatati li hija kienet tikkontrolla. Tabilħaqq, l-approċċ konsolidat jipprovdi stampa aktar preċiża tal-operazzjonijiet ta’ Aperam u jnaqqas il-profitti interkorporattivi, li ma humiex identifikabbli fil-kontijiet individwali, mir-riżultati finanzjarji tagħha. Barra minn hekk, kemm il-kontijiet konsolidati kif ukoll dawk individwali ta’ Aperam ma jirrigwardjawx esklużivament il-produzzjoni tal-GOES. Għalhekk, l-użu tad-data konsolidata ma jagħmilx id-data anqas preċiża. Konsegwentement, l-SG&A mingħajr distorsjoni u l-profitt kienu bbażati fuq ir-rapporti finanzjarji tal-2020 ta’ Aperam.

(205)

Il-kostijiet indiretti tal-manifattura mġarrba mill-produtturi esportaturi li kkooperaw ġew espressi bħala sehem mill-kostijiet tal-manifattura effettivament imġarrba mill-produtturi esportaturi. Dan il-perċentwal ġie applikat għall-kostijiet tal-manifattura mingħajr distorsjoni.

(206)

Abbażi ta’ dan ta’ hawn fuq, il-Kummissjoni ħadmet il-valur normali għal kull tip ta’ prodott fuq bażi ex-works, f’konformità mal-Artikolu 2(6a)(a) tar-Regolament bażiku.

(207)

L-ewwel, il-Kummissjoni stabbiliet il-kostijiet mingħajr distorsjoni tal-manifattura. Il-Kummissjoni applikat il-kostijiet unitarji mingħajr distorsjoni għall-konsum effettiv tal-fatturi individwali tal-produzzjoni tal-produttur esportatur li kkoopera. Dawn il-proporzjonijiet ta’ konsum ipprovduti mill-Baoshan Group ġew ivverifikati matul l-RCC. Kif indikat fil-premessa (47) hawn fuq, wara l-RCC, il-Kummissjoni bagħtet ittra (“l-ittra tal-Artikolu 18”) lill-Baoshan Group fejn tindika l-intenzjoni tagħha li terġa’ lura għall-fatti disponibbli u li tapplika l-Artikolu 18(1) tar-Regolament bażiku fir-rigward tal-kalkolu tas-sigħat ta’ xogħol allokati għall-manifattura tal-GOES. Dwar is-sustanza, il-Kummissjoni qieset li l-allokazzjoni tal-manodopera tal-Baoshan Group ma kinitx appoġġjata minn evidenza vverifikata u affidabbli. Fil-kummenti tiegħu għall-ittra tal-Artikolu 18, il-Baoshan Group ipprovda l-istess evidenza ta’ sostenn li pprovda matul l-RCC. Billi dawk id-dokumenti ma wrewx kemm sigħat kull impjegat kien ħadem kuljum, il-Kummissjoni kkonfermat l-intenzjoni tagħha u applikat il-fatti disponibbli fir-rigward tal-allokazzjoni ta’ sigħat ta’ xogħol għall-manifattura tal-GOES. Meta għamlet dan, il-Kummissjoni kkalkolat mill-ġdid in-numru ta’ sigħat ta’ xogħol allokati għall-manifattura tal-GOES billi qasmet il-kost tal-manodopera totali ta’ Baosteel u WISCO bil-kost rispettiv fis-siegħa kkalkolat għal kull ħaddiem għad-dipartiment tal-azzar tas-siliċju taż-żewġ kumpaniji. Konsegwentement, is-sigħat ta’ xogħol ikkalkolati u rrapportati minn Baosteel u WISCO ġew sostitwiti bil-valuri rispettivi kkalkolati mill-ġdid mill-Kummissjoni.

(208)

Il-Kummissjoni mmultiplikat il-proporzjonijiet tal-konsum bil-kostijiet mhux distorti għal kull unità osservati fil-pajjiż rappreżentattiv, il-Brażil, kif deskritt fit-Taqsima 3.5.1.5.

(209)

It-tieni, sabiex tasal għal kostijiet totali mingħajr distorsjoni tal-manifattura, il-Kummissjoni żiedet l-ispejjeż ġenerali tal-manifattura. L-ispejjeż ġenerali tal-manifattura mġarrba mill-produtturi esportaturi li kkooperaw żdiedu bil-kostijiet tal-materja prima u l-oġġetti konsumabbli msemmija fil-premessa (187) u sussegwentement espressi bħala sehem tal-kostijiet tal-manifattura li fil-fatt ġew imġarrba minn kull wieħed mill-produtturi esportaturi. Dan il-perċentwal ġie applikat għall-kostijiet tal-manifattura mingħajr distorsjoni.

(210)

Għall-kostijiet tal-produzzjoni stabbiliti kif deskritt fil-premessa preċedenti, il-Kummissjoni applikat l-SG&A u l-profitt ta’ Aperam. L-SG&A espressi bħala perċentwal tal-kost tal-prodotti mibjugħa (“COGS”) u applikati għall-kost totali mingħajr distorsjoni tal-manifattura, kienu jammontaw għal 13,5 %. Il-profitt, espress bħala perċentwal tas-COGS u applikat għall-kostijiet tal-produzzjoni mingħajr distorsjoni, ammonta għal 7,6 %.

(211)

Abbażi ta’ dan, il-Kummissjoni bniet il-valur normali għal kull tip ta’ prodott fuq bażi ex-works f’konformità mal-Artikolu 2(6a)(a) tar-Regolament bażiku.

(212)

Fir-rigward tat-Tieni Nota, l-Eurofer issuġġeriet li l-valur normali jiġi kkalkolat abbażi tal-prezzijiet tal-esportazzjoni Ċiniżi lejn l-Istati Uniti skont l-Artikolu 2(3) tar-Regolament bażiku.

(213)

Kif imsemmi fil-premessa (154), il-Kummissjoni kkonkludiet li, f’dan il-każ, ma kienx xieraq li jintużaw prezzijiet u kostijiet domestiċi sabiex jiġi stabbilit il-valur normali. Konsegwentement, il-Kummissjoni kellha taħdem valur normali f’konformità mal-Artikolu 2(6a)(a) tar-Regolament bażiku, li ma jipprevedix l-użu tal-prezzijiet tal-esportazzjoni lejn pajjiżi terzi.

(214)

Peress li l-Baoshan Group esporta l-prodott taħt rieżami lejn l-Unjoni permezz ta’ diversi kumpaniji relatati li aġixxew bħala importatur, il-prezz tal-esportazzjoni ġie stabbilit abbażi tal-prezz li bih il-prodott importat reġa’ nbiegħ għall-ewwel darba lil klijenti indipendenti fl-Unjoni, f’konformità mal-Artikolu 2(9) tar-Regolament bażiku. F’dan il-każ, l-aġġustamenti tal-prezz saru għall-kostijiet kollha mġarrba bejn l-importazzjoni u l-bejgħ mill-ġdid, inkluż għall-ispejjeż SG&A, u għall-profitti dovuti.

(215)

Il-Kummissjoni qabblet il-valur normali u l-prezz tal-esportazzjoni tal-Baoshan Group fuq bażi ex-works.

(216)

Fejn iġġustifikat mill-ħtieġa li jiġi żgurat tqabbil ġust, il-Kummissjoni aġġustat il-valur normali u/jew il-prezz tal-esportazzjoni għad-differenzi li jaffettwaw il-prezzijiet u l-komparabbiltà tal-prezzijiet, f’konformità mal-Artikolu 2(10) tar-Regolament bażiku. Saru aġġustamenti għall-kostijiet tat-trasport tal-merkanzija bil-baħar, tal-assigurazzjoni u tal-kreditu.

(217)

Għall-Baoshan Group, l-uniku produttur esportatur li kkoopera, il-Kummissjoni qabblet il-valur normali medju ponderat ta’ kull tip tal-prodott simili mal-prezz tal-esportazzjoni medju ponderat tat-tip korrispondenti tal-prodott taħt rieżami, f’konformità mal-Artikolu 2(11) u (12) tar-Regolament bażiku.

(218)

It-tqabbil kif deskritt hawn fuq ma wera l-ebda dumping.

(219)

Il-Kummissjoni investigat, f’konformità mal-Artikolu 11(2) tar-Regolament bażiku, il-probabbiltà ta’ rikorrenza ta’ dumping, jekk il-miżuri jiġu revokati. Ġew analizzati l-elementi li ġejjin: l-esportazzjoni lejn pajjiżi terzi, il-kapaċità tal-produzzjoni u l-kapaċità ta’ riżerva fiċ-Ċina u l-attraenza tas-suq tal-Unjoni.

(220)

Il-Kummissjoni sabet li matul il-PIR, il-Baoshan Group esporta kwantitajiet sinifikanti ħafna tal-bejgħ totali tal-esportazzjoni tiegħu lejn swieq terzi għajr l-UE, fejn il-prezzijiet minimi tal-importazzjoni ma japplikawx.

(221)

Meta jitqabbel il-valur normali maħdum stabbilit f’konformità mal-Artikolu 2(6a)(a) tar-Regolament bażiku mal-prezzijiet tal-esportazzjoni għall-akbar swieq tal-bejgħ tal-esportazzjoni għall-grupp – l-Indja u l-Messiku – li jammontaw għal madwar [35 sa 70 %] tal-bejgħ kollu tal-esportazzjoni, il-Kummissjoni stabbiliet li l-prezzijiet tal-esportazzjoni kienu 20 % anqas mill-valur normali stabbilit għall-Baoshan Group.

(222)

Fin-nuqqas ta’ kooperazzjoni minn produtturi esportaturi Ċiniżi oħrajn, il-Kummissjoni kellha tiddependi fuq il-fatti disponibbli. F’dan ir-rigward, hija użat l-istatistika Ċiniża dwar l-esportazzjoni kif irrapportata fil-GTA sabiex tivvaluta l-prezzijiet tal-esportazzjoni lejn pajjiżi terzi. Fuq din il-bażi, l-istatistika Ċiniża dwar l-esportazzjoni rrapportat prezz medju tal-esportazzjoni miċ-Ċina li kien taħt l-anqas PMI applikabbli fl-UE fil-perjodu ta’ investigazzjoni tar-rieżami u għalhekk taħt il-prezz tal-esportazzjoni tal-Baoshan Group.

(223)

Għalhekk, tqies probabbli li, kieku l-miżuri attwali kellhom jitħassru, il-produtturi esportaturi Ċiniżi jibdew jbigħu lill-Unjoni f’livelli ta’ dumping.

(224)

Minbarra l-Baoshan Group, li huwa l-uniku esportatur lejn l-UE, hemm mill-anqas tmien produtturi esportaturi oħrajn tal-GOES fiċ-Ċina. Skont l-istatistika Ċiniża dwar l-esportazzjoni kif irrapportata fil-GTA, il-produtturi esportaturi Ċiniżi l-oħrajn esportaw ukoll lejn il-bqija tad-dinja (51).

(225)

L-istimi tal-Eurofer ipprovduti fit-talba għal rieżami ta’ skadenza fir-rigward tal-kapaċità tal-produzzjoni tal-Baoshan Group kienu qrib ħafna tad-data attwali tal-Baoshan Group. Fin-nuqqas ta’ kooperazzjoni minn produtturi esportaturi oħrajn fiċ-Ċina, il-Kummissjoni kellha tibbaża s-sejbiet tagħha fuq il-fatti disponibbli sabiex tivvaluta l-kapaċità tal-produtturi esportaturi l-oħrajn, u qagħdet fuq l-informazzjoni li tinsab fit-talba għal rieżami ta’ skadenza.

(226)

L-informazzjoni li tinsab fit-talba għal rieżami ta’ skadenza stmat il-kapaċità Ċiniża totali għal 1 810 000 tunnellata, filwaqt li l-produzzjoni kienet stmata għal 1 220 000 tunnellata. Il-konsum Ċiniż kien stmat għal 1 020 000 tunnellata. Abbażi ta’ dan, il-kapaċità ta’ riżerva fiċ-Ċina kienet stmata għal 600 000 tunnellata, li taqbeż b’mod sinifikanti l-konsum totali tal-UE (265 000 sa 280 000) fil-PIR. Barra minn hekk, xi swieq ewlenin bħall-Istati Uniti huma protetti minn tariffi għoljin ta’ 25 %, li jnaqqas l-aċċess tal-produtturi esportaturi Ċiniżi.

(227)

Fuq din il-bażi, huwa probabbli li l-produtturi Ċiniżi jidderieġu l-kapaċitajiet ta’ riżerva tagħhom lejn is-suq tal-Unjoni fi kwantitajiet kbar jekk il-miżuri jiskadu u jibdew ibigħu bi prezzijiet oġġett ta’ dumping.

(228)

Kif diġà nstab fil-premessa (82) hawn fuq, is-suq tal-Unjoni huwa fost l-akbar swieq tal-GOES madwar id-dinja.

(229)

Il-livelli tal-prezzijiet fl-Unjoni huma ġeneralment ogħla b’mod sinifikanti mill-prezzijiet tal-esportazzjoni tal-produtturi Ċiniżi lejn pajjiżi terzi.

(230)

Id-daqs tas-suq tal-Unjoni u d-differenzi fil-prezzijiet urew l-attraenza tas-suq tal-Unjoni.

(231)

Abbażi tal-kunsiderazzjonijiet ta’ hawn fuq, ġie konkluż li kien hemm probabbiltà ta’ rikorrenza ta’ dumping jekk il-miżuri jitħallew jiskadu.

(232)

Fin-nuqqas ta’ koperazzjoni minn kwalunkwe produttur esportatur Russu, kif indikat fil-premessa (23), il-Kummissjoni bbażat l-analiżi tagħha, inkluż il-kalkolu tad-dumping, fuq il-fatti disponibbli skont l-Artikolu 18 tar-Regolament bażiku.

(233)

Konsegwentement, il-probabbiltà ta’ kontinwazzjoni jew rikorrenza ta’ dumping ġiet ivvalutata bl-użu tal-informazzjoni li tinsab fit-talba għal rieżami ta’ skadenza, flimkien ma’ sorsi oħrajn ta’ informazzjoni bħall-Eurostat u l-GTA.

(234)

Billi data affidabbli dwar il-prezzijiet fis-suq domestiku Russu ma kinitx disponibbli, il-Kummissjoni stabbiliet valur normali maħdum bl-użu tal-metodoloġija u l-valuri li jinsabu fit-talba għal rieżami ta’ skadenza.

(235)

Il-prezz tal-esportazzjoni lejn l-Unjoni ġie stabbilit abbażi tad-data tal-Eurostat matul il-PIR.

(236)

Il-valur normali u l-prezzijiet tal-esportazzjoni tqabblu fuq bażi ex-works. Għal dan il-għan, il-kostijiet tal-konsenja u tal-assigurazzjoni tnaqqsu abbażi tal-informazzjoni disponibbli fit-talba (EUR 202,67/tunnellata). Għalhekk, il-valur normali ex-works stabbilit b’dan il-mod kien ta’ EUR 1 642/tunnellata, filwaqt li l-prezz tal-esportazzjoni ex-works kien ta’ EUR 797,5/tunnellata matul il-PIR.

(237)

Abbażi ta’ dan ta’ hawn fuq, il-Kummissjoni stabbiliet differenza fil-prezz ta’ madwar 80 % u kkonkludiet li d-dumping kompla matul il-perjodu ta’ investigazzjoni tar-rieżami.

(238)

Wara d-divulgazzjoni, il-Gvern Russu saħaq li l-livell tal-marġni tad-dumping li nstab kien dubjuż fid-dawl tal-livell għoli tiegħu u li l-Kummissjoni kellha tivverifika l-informazzjoni dwar il-valur normali pprovduta fit-talba għal rieżami ta’ skadenza b’ċirkospezzjoni speċjali. Huwa żied ukoll li, meta tintuża informazzjoni sekondarja, il-Kummissjoni jenħtieġ li tkun ivverifikat tali informazzjoni kontra sorsi indipendenti oħrajn f’konformità mal-paragrafu 7 tal-Anness II “L-aħjar informazzjoni disponibbli f’termini tal-paragrafu 8 tal-Artikolu 6” tal-Ftehim dwar l-Implimentazzjoni tal-Artikolu VI tal-Ftehim Ġenerali dwar it-Tariffi u l-Kummerċ 1994 (“ADA”).

(239)

Il-Kummissjoni qieset li l-informazzjoni pprovduta fit-talba għal rieżami ta’ skadenza dwar il-valur normali għall-produtturi esportaturi Russi kienet akkurata u adegwata biżżejjed. Barra minn hekk, l-ebda parti interessata ma pprovdiet kummenti dwar l-informazzjoni pprovduta fit-talba għal rieżami ta’ skadenza. Fl-aħħar nett, l-ebda produttur esportatur Russu ma pprovda data rilevanti relatata mal-istabbiliment tal-valur normali. Barra minn hekk, ma ġie pprovdut l-ebda sors indipendenti ieħor mill-Gvern Russu jew minn kwalunkwe parti interessata. F’dawn iċ-ċirkostanzi, u fin-nuqqas ta’ kwalunkwe sors ieħor ta’ data, il-Kummissjoni qieset li kienet ibbażat fuq l-aħjar informazzjoni disponibbli għaliha rigward il-valur normali. Fl-aħħar nett, il-paragrafu 7 tal-Anness II tal-ADA jipprevedi wkoll li jekk parti interessata ma tikkoperax u b’hekk l-informazzjoni rilevanti tkun qed tinżamm mill-awtoritajiet, tali sitwazzjoni tista’ twassal għal riżultat li jkun inqas favorevoli milli kieku l-parti kienet ikkoperat bis-sħiħ. Fuq din il-bażi, din l-affermazzjoni ġiet miċħuda.

(240)

Il-Kummissjoni analizzat jekk id-dumping kienx probabbli li jkompli jekk il-miżuri anti-dumping attwali jitħallew jiskadu. Meta għamlet dan, hija eżaminat il-produzzjoni u l-kapaċità ta’ riżerva fir-Russja u l-attraenza tas-suq tal-Unjoni. Fin-nuqqas ta’ kooperazzjoni mill-produtturi Russi, il-Kummissjoni kellha tiddependi fuq il-fatti disponibbli.

(241)

Skont il-fatti disponibbli inklużi fit-talba għal rieżami, ir-Russja għandha kapaċità ta’ produzzjoni stmata ta’ madwar 332 000 tunnellata. Il-Kummissjoni stmat il-produzzjoni Russa għal 274 000 tunnellata. Għalhekk, il-kapaċità ta’ produzzjoni ta’ riżerva ġiet stabbilita għal madwar 58 000 tunnellata, li jirrappreżentaw aktar minn [16 sa 22] % tal-konsum tal-GOES tal-Unjoni.

(242)

Anke jekk il-Kummissjoni użat l-informazzjoni sottomessa mill-NLMK fis-sottomissjoni tagħha tal-11 ta’ Diċembru 2020, il-kapaċità ta’ produzzjoni ta’ riżerva xorta tammonta għal [20 000 sa 50 000] tunnellata u tirrappreżenta madwar [7 sa 19] % tal-konsum tal-Unjoni. F’dan ir-rigward, l-NLMK ma pprovdietx evidenza ta’ sostenn dwar il-kapaċità tal-produzzjoni tagħha. Barra minn hekk, għal xi snin li għaddew, il-produzzjoni kienet ogħla mill-kapaċità li tqajjem dubji fuq il-kapaċità tal-produzzjoni attwali rrapportata mill-NLMK fis-sottomissjoni tagħha.

(243)

Wara d-divulgazzjoni, l-NLMK issottomettiet li l-Kummissjoni kellha tivverifika u toqgħod fuq l-informazzjoni li kienet issottomettiet fiż-żmien dovut rigward il-kapaċità, il-produzzjoni u l-użu tal-kapaċità Russi u li tali verifika kienet tippermetti lill-Kummissjoni tiċċara d-dubji mqajma fil-premessa (242).

(244)

Kif imsemmi fil-premessa (23), l-NLMK stess kienet indikat, fis-sottomissjoni tagħha tal-10 ta’ Diċembru 2020, li kienet obbligata tieqaf taħdem fuq it-tweġiba għall-kwestjonarju u ma pprovditx tweġiba sħiħa għall-kwestjonarju sal-iskadenza estiża, iżda biss informazzjoni frammentarja limitata għall-kapaċità u l-produzzjoni speċifiċi tagħha.

(245)

F’dan il-każ, il-Kummissjoni qieset li l-informazzjoni pprovduta mill-NLMK kienet wisq frammentarja biex wieħed jasal għal konklużjonijiet sinifikanti. Fi kwalunkwe każ, kif imsemmi fil-premessa (242), il-Kummissjoni qieset l-informazzjoni pprovduta mill-NLMK f’dan ir-rigward u waslet għal konklużjoni simili f’dak li għandu x’jaqsam mal-eżistenza tal-kapaċità ta’ riżerva. Fuq din il-bażi, din l-affermazzjoni ġiet miċħuda.

(246)

L-investigazzjoni kkonfermat li s-suq tal-Unjoni huwa attraenti għall-produtturi Russi għar-raġunijiet li ġejjin:

(247)

L-ewwel nett, is-suq tal-Unjoni huwa fost l-akbar fid-dinja.

(248)

It-tieni, f’termini ta’ prezzijiet, kif muri fil-premessa (271) hawn taħt, il-livell medju tal-prezzijiet tal-importazzjonijiet Russi fis-suq tal-Unjoni huwa anqas minn dak tal-produtturi tal-Unjoni, u għalhekk l-esportazzjonijiet x’aktarx li jkomplu jiżdiedu jekk il-miżuri jiġu revokati.

(249)

It-tielet, parti kbira mill-produzzjoni fir-Russja hija diretta għall-esportazzjonijiet (aktar minn 86 % tal-produzzjoni hija destinata għall-esportazzjonijiet), filwaqt li l-konsum domestiku huwa kważi kompletament sodisfatt mill-produtturi fir-Russja.

(250)

Fis-sottomissjoni tagħha tal-11 ta’ Diċembru 2020, l-NLMK sostniet li l-UE ma hijiex suq ta’ prijorità peress li l-importazzjonijiet naqsu b’mod sinifikanti mill-investigazzjoni oriġinali. Il-Kummissjoni nnotat li, anke jekk l-esportazzjonijiet tal-NLMK lejn l-UE naqsu mill-investigazzjoni oriġinali, xorta waħda jammontaw għal sehem sinifikanti tal-konsum tal-UE u żdiedu matul il-perjodu kkunsidrat kif jista’ jiġi osservat fit-Tabella 3 ta’ hawn taħt. Għalhekk, għall-kuntrarju tad-dikjarazzjoni magħmula mill-NLMK, is-suq tal-Unjoni jibqa’ suq ta’ destinazzjoni importanti għall-esportazzjonijiet mir-Russja.

(251)

Wara d-divulgazzjoni, l-NLMK allegat li s-suppożizzjoni tal-Kummissjoni li ċertu suq huwa attraenti sempliċiment minħabba d-daqs kbir tiegħu hija żbaljata. F’dan ir-rigward, l-NLMK irreferiet ukoll għall-fatt li s-suq tal-Unjoni ma attira l-ebda importazzjoni żejda sostanzjali minn pajjiżi terzi mhux fil-mira, minkejja li dawk il-pajjiżi kellhom aċċess għas-suq favorevoli meta mqabbla mal-esportaturi mill-pajjiżi kkonċernati. Hija allegat ukoll li l-argument dwar il-livell baxx tal-prezzijiet tal-importazzjonijiet Russi huwa żbaljat għaliex il-prezzijiet medji tal-produtturi Russi u tal-Unjoni ma humiex komparabbli minħabba l-fatt li t-tipi ta’ prodotti mibjugħin mill-partijiet rispettivi ma humiex f’kompetizzjoni diretta ma’ xulxin. Barra minn hekk, wara d-divulgazzjoni, il-Gvern Russu ddikjara li ma kienx jaqbel mal-Kummissjoni li s-suq tal-Unjoni huwa suq attraenti għall-produtturi esportaturi Russi għar-raġunijiet li ġejjin: il-produtturi esportaturi Russi qed jiffukaw fuq is-suq domestiku tagħhom, u l-esportazzjonijiet tagħhom kienu prinċipalment orjentati mill-ġdid lejn il-pajjiżi Ażjatiċi. Barra minn hekk, huma affermaw li l-eżistenza ta’ miżuri anti-dumping fixklu l-valutazzjoni tal-prezzijiet tal-importazzjoni lejn l-Unjoni.

(252)

Il-Kummissjoni ma qablitx ma’ dawn l-asserzjonijiet. Id-daqs ta’ suq huwa aspett tanġibbli meta tiġi vvalutata l-attraenza tiegħu peress li jistgħu jinbiegħu volumi kbar u jistgħu jsiru ekonomiji ta’ skala f’termini ta’ spejjeż relatati mal-produzzjoni, mal-kummerċjalizzazzjoni u mal-bejgħ. Barra minn hekk, l-importazzjonijiet li joriġinaw mir-Russja żdiedu kemm fil-volumi kif ukoll fis-sehem mis-suq matul il-perjodu ta’ investigazzjoni tar-rieżami, irrispettivament minn jekk il-fokus tal-produtturi esportaturi Russi huwiex orjentat mill-ġdid lejn is-swieq domestiċi Russi u/jew Ażjatiċi. Dan wera li s-suq tal-Unjoni kompla jkun attraenti ħafna għall-produtturi esportaturi Russi. Barra minn hekk, kif imsemmi fil-premessa (277), it-tnaqqis fl-importazzjonijiet minn pajjiżi terzi oħra kien prinċipalment dovut għall-fatt li l-uniku produttur tal-GOES fir-Renju Unit għalaq l-operazzjonijiet tiegħu b’mod permanenti f’Novembru 2019.

(253)

Barra minn hekk, l-allegazzjoni tal-NLMK li l-argument tal-Kummissjoni dwar il-livelli baxxi tal-prezzijiet huwa żbaljat ma ġietx aċċettata għar-raġunijiet deskritti fil-premessa preċedenti. Barra minn hekk, kif spjegat fil-premessa (272) hawn taħt, l-importazzjonijiet mir-Russja bħala medja saru bi prezzijiet li kienu madwar 30 % inqas mill-PMI applikabbli (EUR 1 536/tunnellata) u madwar 23 % inqas mill-prezzijiet tal-industrija tal-Unjoni fil-PIR għal tipi ta’ prodotti komparabbli. F’dan ir-rigward, anki b’kunsiderazzjoni tal-eżistenza tal-miżuri anti-dumping, il-prezzijiet tal-importazzjoni Russi jagħtu indikazzjoni tajba tal-imġiba tal-prezz tal-esportazzjoni tal-produtturi esportaturi Russi lejn l-Unjoni u tal-livell tal-prezz probabbli tagħhom fin-nuqqas ta’ miżuri.

(254)

Fuq il-bażi ta’ dan ta’ hawn fuq, il-Kummissjoni kkonkludiet li d-dumping x’aktarx li jkompli fil-futur jekk il-miżuri jitħallew jiskadu. Meta titqies il-kapaċità ta’ riżerva kbira fir-Russja, il-livelli tal-prezzijiet oġġett ta’ dumping tal-GOES lejn l-Unjoni matul il-PIR, flimkien mal-attraenza tas-suq tal-Unjoni, il-Kummissjoni kkonkludiet li kwantitajiet sinifikanti ta’ GOES mir-Russja x’aktarx ikomplu jidħlu fis-suq tal-Unjoni f’livelli ta’ prezzijiet oġġett ta’ dumping jekk il-miżuri jitħallew jiskadu.

(255)

Fl-Unjoni, erba’ kumpaniji jipproduċu l-prodott taħt rieżami. Abbażi tal-informazzjoni disponibbli mit-talba, ma hemm l-ebda produttur ieħor fl-Unjoni li jipproduċi l-prodott taħt rieżami fl-Unjoni. Għalhekk, huma jikkostitwixxu l-“industrija tal-Unjoni” skont it-tifsira tal-Artikolu 4(1) tar-Regolament bażiku.

(256)

Il-produzzjoni totali tal-Unjoni matul il-perjodu ta’ investigazzjoni tar-rieżami kienet stabbilita għal madwar 249 000 tunnellata. Il-Kummissjoni stabbiliet din iċ-ċifra fuq il-bażi tal-informazzjoni dwar l-industrija tal-Unjoni mill-produtturi kollha magħrufa fl-Unjoni.

(257)

Il-Kummissjoni stabbiliet il-konsum tal-Unjoni abbażi tal-bejgħ fis-suq tal-Unjoni tal-produtturi magħrufa kollha fl-Unjoni u l-importazzjonijiet mill-pajjiżi terzi kollha kif irrapportat mill-Eurostat (il-bażi tad-data tal-Comext).

(258)

Fir-rigward tal-Ġappun, porzjon tal-importazzjonijiet tal-prodott taħt rieżami fin-Netherlands inżammu kunfidenzjali matul il-perjodu kkunsidrat. (52) Għal din ir-raġuni, il-meded huma pprovduti fit-tabella ta’ hawn taħt dwar il-konsum tal-Unjoni u fit-tabelli rilevanti l-oħrajn li huma relatati mal-volumi u l-valuri tal-importazzjoni.

(259)

Il-konsum tal-Unjoni żviluppa kif ġej:

Tabella 2

Konsum tal-Unjoni (tunnellati)

(260)

Il-konsum tal-Unjoni ċċaqlaq matul il-perjodu kkunsidrat, u varja bejn 265 000 sa 280 000 tunnellata matul il-perjodu ta’ investigazzjoni tar-rieżami u 300 000 sa 315 000 tunnellata fl-2017. B’mod ġenerali, il-konsum tal-Unjoni naqas bi 11 % bejn l-2017 u l-perjodu ta’ investigazzjoni tar-rieżami għalkemm kien hemm quċċata temporanja fl-2019. It-tnaqqis fil-konsum huwa dovut għal taħlita ta’ fatturi bħal anqas importazzjonijiet u anqas bejgħ mill-produtturi tal-Unjoni matul il-perjodu ta’ investigazzjoni tar-rieżami minħabba domanda aktar baxxa ta’ GOES.

(261)

Wara d-divulgazzjoni, l-applikant għamel referenza għall-użu estensiv ta’ skemi ta’ pproċessar attiv mill-importaturi tal-Unjoni u ż-żieda fl-importazzjonijiet tal-laminazzjonijiet u n-nuklei tal-azzar mit-Turkija, li t-tnejn li huma għandhom tendenza li jissottovalutaw il-GOES attwali prodott barra li qed jiġi kkunsmat fl-Unjoni. Il-Kummissjoni kkonfermat li, minn naħa waħda, il-GOES kollha li ġew importati permezz ta’ skemi ta’ pproċessar attiv tqiesu għall-kalkolu tad-data dwar il-konsum. Min-naħa l-oħra, il-Kummissjoni nnotat li l-laminazzjonijiet u l-qalba tal-azzar jaqgħu barra mill-kamp ta’ applikazzjoni tal-miżuri anti-dumping u għalhekk ma kinux investigati.

(262)

Il-Kummissjoni stabbiliet il-volum tal-importazzjonijiet abbażi tal-Eurostat (il-bażi tad-data tal-Comext). Is-sehem mis-suq tal-importazzjonijiet kien stabbilit abbażi tal-konsum tal-Unjoni, kif stabbilit fil-premessa (257) hawn fuq.

(263)

L-importazzjonijiet mill-pajjiżi kkonċernati u s-sehem mis-suq tagħhom żviluppaw kif ġej:

Tabella 3

Il-volum tal-importazzjonijiet (tunnellati) u s-sehem mis-suq

(264)

Il-miżuri ġew imposti fl-2015. L-importazzjonijiet tal-prodott taħt rieżami mill-pajjiżi kkonċernati naqas bi 17 % matul il-perjodu kkunsidrat. Madankollu, is-sehem mis-suq tagħhom naqas biss bi ftit (minn 27,5 % sa 34,2 % fl-2017 għal 26,5 % sa 34,0 % fil-perjodu ta’ investigazzjoni tar-rieżami) minħabba t-tnaqqis parallel fil-konsum fis-suq tal-Unjoni.

(265)

Mill-pajjiżi kkonċernati, l-importazzjonijiet mir-Repubblika tal-Korea u mill-Federazzjoni Russa biss żdiedu bejn l-2017 u l-perjodu ta’ investigazzjoni tar-rieżami u kisbu punt perċentwali wieħed u żewġ punti perċentwali tas-sehem mis-suq rispettivament.

(266)

Il-Kummissjoni stabbiliet il-prezzijiet medji tal-importazzjonijiet abbażi tal-istatistika tal-Eurostat.

(267)

Il-prezz medju ponderat tal-importazzjonijiet mill-pajjiżi kkonċernati żviluppa kif ġej:

Tabella 4

Il-prezzijiet tal-importazzjoni (EUR/tunnellata)

(268)

Ġie osservat tnaqqis fil-prezz medju bejn l-2017 u l-perjodu ta’ investigazzjoni tar-rieżami għall-importazzjonijiet mill-pajjiżi kkonċernati għat-tipi kollha ta’ GOES, kemm jekk prodotti konvenzjonali kif ukoll dawk b’permeabbiltà għolja. L-importazzjonijiet mill-Federazzjoni Russa kienu jikkonċernaw tipi konvenzjonali ta’ GOES, filwaqt li l-importazzjonijiet mill-erba’ pajjiżi l-oħrajn huma importazzjonijiet ta’ GOES b’permeabbiltà għolja.

(269)

Il-prezzijiet medji tal-importazzjonijiet naqsu minn EUR 1 865/tunnellata fl-2017 għal EUR 1 718/tunnellata matul il-perjodu ta’ investigazzjoni ta’ rieżami. Matul il-perjodu kkunsidrat, it-tnaqqis fil-prezz medju tal-importazzjonijiet kien ta’ madwar 7,6 %.

(270)

Ma kien hemm l-ebda kooperazzjoni minn xi produttur fir-Repubblika tal-Korea, fil-Federazzjoni Russa u fl-Istati Uniti, filwaqt li kien hemm kooperazzjoni minn produttur esportatur Ċiniż wieħed u produttur esportatur Ġappuniż wieħed.

(271)

Għall-importazzjonijiet kollha mill-pajjiżi kkonċernati minbarra r-Russja, il-prezzijiet tal-importazzjoni lejn l-Unjoni kienu affettwati b’mod sinifikanti mill-istabbiliment tal-miżuri fil-forma tat-tliet PIMs għar-raġunijiet spjegati fil-premessa (2). Kif imsemmi fil-premessa (3), ma jitħallas l-ebda dazju, jekk il-prezz CIF fil-fruntiera tal-Unjoni jkun daqs jew ogħla mill-PMI. Il-prezzijiet tal-importazzjoni mill-pajjiżi kkonċernati, minbarra r-Russja, kienu kważi fil-każijiet kollha daqs jew ftit ogħla mill-PMI matul il-perjodu kkunsidrat u ħafna ogħla mill-prezzijiet tal-industrija tal-Unjoni fil-PIR. Ma nstab l-ebda twaqqigħ tal-prezz fir-rigward tal-pajjiżi kkonċernati minbarra r-Russja.

(272)

Għar-Russja, minħabba n-nuqqas ta’ kooperazzjoni minn kwalunkwe produttur esportatur Russu, il-Kummissjoni qabblet il-prezzijiet CIF medji tal-importazzjoni mir-Russja, abbażi tal-Eurostat, aġġustati għall-kostijiet ta’ wara l-importazzjoni (EUR 65/tunnellata) mal-prezzijiet medji tal-bejgħ tal-industrija tal-Unjoni għal tipi ta’ prodotti komparabbli. L-importazzjonijiet mir-Russja bħala medja saru bi prezzijiet li kienu madwar 30 % anqas mill-PMI applikabbli (EUR 1 536/tunnellata) u madwar 23 % anqas mill-prezzijiet applikabbli tal-industrija tal-Unjoni fil-PIR.

(273)

Wara d-divulgazzjoni, Nippon Steel sostniet li l-Kummissjoni jenħtieġ li tikkalkula mill-ġdid il-marġni tat-twaqqigħ tal-prezz u tal-bejgħ taħt il-prezz għar-raġunijiet li ġejjin: L-ewwel nett, dawn il-marġnijiet, li kienu jinkludu aġġustament skont l-Artikolu 2(9) tar-Regolament bażiku, saru fl-investigazzjoni oriġinali bi ksur tal-Artikoli 3(1), 3(2), 3(3) u 3(6) tar-Regolament bażiku. It-tieni, dawn il-marġnijiet ma ġewx ikkalkolati f’konformità mal-ġurisprudenza tal-Qorti tal-UE.

(274)

Il-Kummissjoni ċaħdet din l-affermazzjoni. Il-Kummissjoni ma sabet l-ebda twaqqigħ tal-prezz fir-rigward tal-Ġappun matul il-perjodu ta’ investigazzjoni tar-rieżami (ara prmessa (271)). Għalhekk, it-talba ta’ Nippon Steel biex jiġi kkalkolat mill-ġdid il-marġni tat-twaqqigħ tal-prezz kif stabbilit fl-investigazzjoni oriġinali kienet mingħajr skop. Barra minn hekk, peress li rieżami ta’ skadenza ma jbiddilx il-livell tad-dazji, reviżjoni tal-marġni ta’ dannu stabbilit oriġinarjament kienet ukoll mingħajr skop. Barra minn hekk, għall-analiżi tal-effetti fuq il-prezzijiet, jekk il-miżuri jitħallew jiskadu kif stabbilit fil-premessa (336), il-Kummissjoni ddeterminat il-livelli tal-prezzijiet futuri probabbli tal-importazzjonijiet lejn l-Unjoni abbażi tal-prezzijiet tal-esportazzjoni Ġappuniżi lejn pajjiżi terzi li għalihom ma sar, jew ma seta’ jsir, l-ebda aġġustament skont l-Artikolu 2(9) tar-Regolament bażiku.

(275)

Matul il-perjodu ta’ investigazzjoni tar-rieżami, l-importazzjonijiet minn pajjiżi terzi oħrajn ammontaw għal [19 000 sa 25 000] jew [7 % sa 10,5 %] tal-konsum tal-Unjoni. L-importazzjonijiet ewlenin tal-GOES, minn pajjiżi oħrajn għajr il-pajjiżi kkonċernati, ġew mill-Brażil u mir-Renju Unit.

(276)

Il-volum tal-importazzjonijiet, kif ukoll is-sehem mis-suq u x-xejriet tal-prezzijiet għall-importazzjonijiet tal-GOES minn pajjiżi terzi oħrajn żviluppaw kif ġej:

Tabella 5

Importazzjonijiet minn pajjiżi terzi (tunnellati)

(277)

L-importazzjonijiet tal-prodott taħt rieżami mir-Renju Unit naqsu bin-nofs bejn l-2017 u l-perjodu ta’ investigazzjoni tar-rieżami, minn madwar 25 000 sa 35 000 tunnellata għal 10 000 sa 20 000 tunnellata. Dan it-tnaqqis kien dovut għall-fatt li l-uniku produttur tal-GOES fir-Renju Unit għalaq l-operazzjonijiet tiegħu b’mod permanenti f’Novembru tal-2019.

(278)

Min-naħa l-oħra, l-importazzjonijiet tal-prodott taħt rieżami mill-Brażil żdiedu b’mod sostanzjali matul il-perjodu kkunsidrat. Madankollu, is-sehem tas-suq Brażiljan baqa’ baxx, jiġifieri 2 %, matul il-perjodu ta’ investigazzjoni tar-rieżami.

(279)

L-importazzjonijiet totali minn pajjiżi terzi ħlief il-pajjiżi kkonċernati, żdiedu bi 38 % bejn l-2017 u l-perjodu ta’ investigazzjoni tar-rieżami sabiex jilħqu s-sehem mis-suq ta’ 7,0 % sa 10,5 % fil-perjodu ta’ investigazzjoni tar-rieżami meta mqabbel ma’ 10,2 % sa 13,5 % fl-2017.

(280)

F’dak li għandu x’jaqsam mal-livelli tal-prezzijiet, is-sitwazzjoni hija differenti minn pajjiż għall-ieħor, skont jekk il-prodotti konvenzjonali jew b’permeabbiltà għolja jinbigħux fis-suq tal-Unjoni.

(281)

Madankollu, il-prezzijiet medji tal-bejgħ tal-importazzjonijiet minn pajjiżi terzi naqsu matul il-perjodu kkunsidrat. Din ix-xejra hija konsistenti max-xejra osservata għall-importazzjonijiet mill-pajjiżi kkonċernati fit-Tabella 5 ta’ hawn fuq u x-xejra tal-prezz osservata għall-bejgħ tal-industrija tal-Unjoni fis-suq tal-Unjoni fit-Tabella 9 ta’ hawn taħt.

(282)

F’konformità mal-Artikolu 3(5) tar-Regolament bażiku, l-eżami tal-impatt tal-importazzjonijiet fuq l-industrija tal-Unjoni kien jinkludi evalwazzjoni tal-indikaturi ekonomiċi kollha li kellhom effett fuq l-istat tal-industrija tal-Unjoni matul il-perjodu taħt kunsiderazzjoni.

(283)

Sabiex tiddetermina d-dannu, il-Kummissjoni ma għamlitx distinzjoni bejn l-indikaturi tad-dannu makroekonomiċi u mikroekonomiċi minħabba li l-erba’ produtturi magħrufa tal-Unjoni kollha kemm huma jikkostitwixxu l-“industrija tal-Unjoni” skont l-Artikolu 4(1) tar-Regolament bażiku. Il-Kummissjoni evalwat l-indikaturi tad-dannu abbażi tad-data fit-tweġibiet għall-kwestjonarju mill-produtturi tal-Unjoni li kkooperaw.

(284)

L-erba’ produtturi tal-Unjoni li kkooperaw jappartjenu għal żewġ gruppi korporattivi. Għal din ir-raġuni, il-Kummissjoni qieset jekk kienx hemm il-ħtieġa li tiġi pprovduta l-informazzjoni sottomessa f’firxiet bl-għan li ma tiġix żvelata informazzjoni kummerċjali kunfidenzjali, iżda kkonkludiet li d-data aggregata ma kinitx tali li tiżvela informazzjoni kunfidenzjali. Għalhekk, ma ġiet ipprovduta l-ebda firxa fir-rigward tal-indikaturi tad-dannu.

(285)

Il-produzzjoni totali tal-Unjoni, il-kapaċità tal-produzzjoni u l-użu tal-kapaċità żviluppaw kif ġej matul il-perjodu taħt kunsiderazzjoni:

Tabella 6

Il-produzzjoni, il-kapaċità ta’ produzzjoni u l-użu tal-kapaċità

(286)

Matul il-perjodu kkunsidrat, il-volum tal-produzzjoni tal-industrija tal-Unjoni naqas bi 15 %. Minbarra d-domanda aktar baxxa matul il-perjodu kkunsidrat, kif spjegat fil-premessa (260), it-tnaqqis sinifikanti tal-volum tal-produzzjoni matul il-perjodu ta’ investigazzjoni tar-rieżami kien ukoll ir-riżultat ta’:

(287)

Iċ-ċifri tal-kapaċità rrapportati jirreferu għall-kapaċità teknika, li jimplika li l-aġġustamenti, meqjusa bħala standards mill-industrija, għall-ħin ta’ twaqqif, għall-manutenzjoni, għall-ostakoli u għal perjodi normali oħrajn ta’ waqfien ġew ikkunsidrati. Il-kapaċità żdiedet ftit matul il-perjodu kkunsidrat. Matul il-perjodu kunsidrat tnejn mill-erba’ produtturi tal-Unjoni investew sabiex jimmodernizzaw it-tagħmir tal-produzzjoni eżistenti tagħhom bil-għan li jipproduċu proporzjon ogħla ta’ tipi b’permeabbiltà għolja milli t-tipi konvenzjonali. B’riżultat ta’ dawn l-investimenti, il-produtturi tal-Unjoni setgħu, prinċipalment mill-2019 ’il quddiem, jipproduċu proporzjonalment aktar tipi ta’ GOES b’permeabbiltà għolja li huma kkaratterizzati minn ħxuna aktar baxxa, u dan irriżulta f’kapaċità ta’ produzzjoni aktar baxxa f’tunnellaġġ matul il-perjodu kkunsidrat.

(288)

It-tnaqqis fir-rata tal-użu tal-kapaċità matul il-perjodu ta’ investigazzjoni tar-rieżami minkejja tnaqqis fil-kapaċità tal-produzzjoni kien dovut għat-tnaqqis qawwi fil-volum tal-produzzjoni matul il-perjodu ta’ investigazzjoni tar-rieżami, kif spjegat fil-premessa (286) hawn fuq. It-tnaqqis kien ta’ kważi 10 punti perċentwali matul il-perjodu kkunsidrat.

(289)

Il-volum tal-bejgħ u s-sehem mis-suq tal-industrija tal-Unjoni żviluppaw kif ġej matul il-perjodu taħt kunsiderazzjoni:

Tabella 7

Il-volum ta’ bejgħ u s-sehem mis-suq

(290)

Il-volumi tal-bejgħ tal-industrija tal-Unjoni lil klijenti mhux relatati fl-Unjoni baqgħu stabbli matul il-perjodu mill-2017 sal-2019, iżda naqsu kemxejn fil-perjodu ta’ investigazzjoni tar-rieżami. It-tnaqqis fil-volumi tal-bejgħ segwa x-xejra ta’ tnaqqis tal-volum tal-produzzjoni matul il-perjodu ta’ investigazzjoni tar-rieżami għall-istess raġunijiet kif spjegat fil-premessa (286). Il-volum tal-produzzjoni naqas għalkemm b’mod aktar sinifikanti - 15-il punt perċentwali bejn l-2017 u l-perjodu tal-investigazzjoni tar-rieżami - mit-tnaqqis fil-volumi tal-bejgħ tal-produtturi tal-Unjoni.

(291)

Madankollu, matul il-perjodu kkunsidrat, is-sehem mis-suq tal-industrija tal-Unjoni żdied bi ftit minn 55,9 % sa 62,6 % għal 61,0 % sa 66,8 % bħala riżultat tal-fatt li t-tnaqqis fil-konsum qabeż it-tnaqqis fil-volum tal-bejgħ tal-industrija tal-Unjoni.

(292)

Raġuni oħra għal din iż-żieda fis-sehem mis-suq tal-industrija tal-Unjoni hija l-miżuri fis-seħħ, flimkien mat-tfixkil tal-ktajjen internazzjonali tal-kummerċ u tal-provvista fl-ewwel nofs tal-2020 bħala riżultat tal-impatt tal-pandemija tal-COVID-19.

(293)

Matul il-perjodu kkunsidrat, il-konsum tal-Unjoni naqas bi 11 %, filwaqt li l-volum tal-bejgħ lil klijenti mhux relatati fl-Unjoni naqas b’4 %. Konsegwentement, minkejja ż-żieda fis-sehem mis-suq, ma kien hemm l-ebda tkabbir għall-industrija tal-Unjoni matul il-perjodu kkunsidrat.

(294)

L-impjiegi u l-produttività żviluppaw kif ġej matul il-perjodu taħt kunsiderazzjoni:

Tabella 8

L-impjiegi u l-produttività

(295)

In-numru ta’ impjegati tal-industrija tal-Unjoni involuti fil-produzzjoni tal-prodott taħt rieżami baqa’ stabbli matul il-perjodu mill-2017 sal-2019, iżda naqas bi ftit matul il-perjodu ta’ investigazzjoni tar-rieżami.

(296)

Il-produttività tal-forza tax-xogħol tal-industrija tal-Unjoni, imkejla bħala output (tunnellati) għal kull impjegat, naqset b’mod sinifikanti matul il-perjodu ta’ investigazzjoni tar-rieżami. Dan jista’ jiġi spjegat bħala l-effett ikkombinat ta’:

(297)

Kif spjegat fil-premessa (44), ma kien hemm l-ebda kooperazzjoni mill-produtturi esportaturi mir-Russja, mill-Korea, u mill-Istati Uniti. Produttur esportatur wieħed Ċiniż u wieħed Ġappuniż biss ikkooperaw bis-sħiħ matul dan il-proċediment.

(298)

Madankollu, minkejja l-fatt li l-prezzijiet tal-importazzjoni lejn l-Unjoni kienu affettwati b’mod sinifikanti mill-istabbiliment attwali tal-miżuri fil-forma tat-tliet PMI, instab dumping li jikkonċerna l-importazzjonijiet mill-Ġappun (ara l-premessa (70)), mill-Istati Uniti (ara l-premessa (111)) u mir-Russja (ara l-premessa (237)) matul il-perjodu ta’ investigazzjoni tar-rieżami. Ma nstab l-ebda dumping għall-importazzjonijiet miċ-Ċina u mill-Korea.

(299)

L-indikaturi tad-dannu juru li, minkejja l-miżuri anti-dumping fis-seħħ mill-2015, li rriżultaw f’xi serħan u fi prestazzjoni mtejba inizjalment, is-sitwazzjoni ekonomika tal-industrija tal-Unjoni baqgħet fraġli u dannuża. Għalhekk, ma seta’ jiġi stabbilit l-ebda rkupru mid-dumping tal-passat.

(300)

Il-prezzijiet medji ponderati tal-bejgħ ta’ unità tal-produtturi tal-Unjoni inklużi fil-kampjun lil klijenti mhux relatati fl-Unjoni żviluppaw kif ġej matul il-perjodu taħt kunsiderazzjoni:

Tabella 9

Il-prezzijiet tal-bejgħ fl-Unjoni

(301)

It-tabella ta’ hawn fuq turi li l-prezzijiet tal-bejgħ ta’ unità tal-Unjoni naqsu bi ftit matul il-perjodu ta’ investigazzjoni tar-rieżami, meta mqabbla mas-snin preċedenti. Dan kien prinċipalment l-effett ikkombinat ta’:

(302)

It-tabella ta’ hawn fuq turi wkoll l-evoluzzjoni tal-kost tal-produzzjoni. Il-waqfien tal-produzzjoni ta’ produttur ewlieni wieħed tal-Unjoni u anqas produzzjoni (ara l-premessa (296)) wasslu għal żieda fil-kost fiss għal kull tunnellata prodotta tal-prodott taħt rieżami matul il-perjodu ta’ investigazzjoni tar-rieżami. Il-kombinazzjoni taż-żieda fil-kost tal-produzzjoni u t-tnaqqis żgħir fil-prezzijiet tal-bejgħ tal-industrija tal-Unjoni wasslu għal telf sinifikanti għall-produtturi tal-Unjoni.

(303)

Il-kostijiet lavorattivi medji tal-produtturi tal-Unjoni inklużi fil-kampjun żviluppaw kif ġej matul il-perjodu taħt kunsiderazzjoni:

Tabella 10

Kostijiet lavorattivi medji għal kull impjegat

(304)

Bejn l-2016 u l-perjodu ta’ investigazzjoni tar-rieżami, il-kost lavorattiv medju għal kull impjegat naqas bi 8,5 %. L-impatt ta’ din il-varjazzjoni huwa pjuttost żgħir minħabba li l-kost lavorattiv jirrappreżenta biss madwar 15 % tal-kost totali tal-manifattura matul il-perjodu ta’ investigazzjoni tar-rieżami.

(305)

Il-livelli tal-istokk tal-produtturi tal-Unjoni żviluppaw kif ġej matul il-perjodu taħt kunsiderazzjoni:

Tabella 11

L-inventarji

(306)

Matul il-perjodu kkunsidrat, il-livell tal-istokkijiet tal-għeluq oxxilla iżda b’mod ġenerali naqas bħala perċentwal tal-produzzjoni. Il-maġġoranza tat-tipi ta’ prodott simili huma prodotti mill-industrija tal-Unjoni skont ordnijiet speċifiċi tal-utenti. Għalhekk, l-istokks ma jistgħux jitqiesu bħala indikatur importanti tad-dannu għall-industrija.

(307)

Matul il-perjodu taħt kunsiderazzjoni, il-profittabbiltà, il-fluss tal-flus, l-investimenti u r-redditu fuq l-investimenti tal-produtturi tal-Unjoni żviluppaw kif ġej:

Tabella 12

Il-profittabbiltà, il-fluss tal-flus, l-investimenti u r-redditu fuq l-investimenti

(308)

Il-Kummissjoni stabbiliet il-profittabbiltà tal-produtturi tal-Unjoni billi esprimiet it-telf nett qabel it-taxxa tal-bejgħ tal-prodott simili lil klijenti mhux relatati fl-Unjoni bħala perċentwal tal-fatturat ta’ dak il-bejgħ.

(309)

L-impożizzjoni tal-miżuri fl-2015 kellha effett pożittiv fuq il-profittabbiltà tal-industrija tal-Unjoni, b’mod partikolari fis-sena 2017 meta l-industrija tal-Unjoni bdiet tirkupra. It-telf imġarrab fl-2017 mill-produtturi tal-Unjoni xorta kien relattivament modest, jiġifieri 2,1 %. It-telf imġarrab, rispettivament, matul l-2013 u l-perjodu ta’ investigazzjoni tal-investigazzjoni inizjali, li kopra l-perjodu mill-1 ta’ Lulju 2013 sat-30 ta’ Ġunju 2014, iż-żewġ perjodi eżatt qabel l-impożizzjoni tal-miżuri inizjali fl-2015, ammonta għal -26,6 % u -22,3 %. Dawn kienu ħafna ogħla mit-telf imġarrab fl-2017 (-2,1 %). Madankollu, is-sitwazzjoni ekonomika bdiet tiddeterjora aktar minn hemm ’il quddiem (53), sal-punt li t-telf laħaq -18,6 % fil-perjodu ta’ investigazzjoni tar-rieżami.

(310)

Il-fluss tal-flus nett huwa l-kapaċità tal-produtturi tal-Unjoni li jiffinanzjaw l-attivitajiet tagħhom stess. Ix-xejra fil-fluss tal-flus nett ma segwitx xejra simili ta’ tnaqqis bħall-profittabbiltà u kienet pożittiva. Dan il-fluss ta’ flus pożittiv jista’ jiġi spjegat prinċipalment mill-eżistenza ta’ żewġ kuntratti importanti li kienu fis-seħħ għand produttur wieħed tal-Unjoni, li kien qiegħed iġarrab telf:

(311)

Minkejja t-telf imġarrab matul il-perjodu kkunsidrat, l-investimenti baqgħu ’l fuq minn EUR 21 miljun fis-snin kollha tal-perjodu kkunsidrat. Dawn l-investimenti kienu l-aktar relatati mal-aġġornament tal-makkinarju għall-produzzjoni ta’ tipi b’permeabbiltà għolja tal-prodott taħt rieżami.

(312)

Ir-redditu fuq l-investimenti huwa fil-prinċipju l-profitt f’perċentwal tal-valur kontabilistiku nett tal-investimenti. Minħabba t-telf imġarrab, ir-redditu fuq l-investimenti baqa’ negattiv matul il-perjodu kkunsidrat. Fil-fatt, segwa l-istess xejra ’l isfel bħall-profittabbiltà.

(313)

Il-ħila li jiżdied il-kapital hija l-ħila li jiżdiedu l-flus sabiex isiru investimenti, espansjonijiet jew riformi. Filwaqt li jitqies it-telf imġarrab matul il-perjodu ta’ investigazzjoni tar-rieżami, il-finanzjament tad-dejn jew tal-ekwità huwa essenzjali għall-produtturi tal-Unjoni sabiex ikunu jistgħu jkomplu jinvestu. Pereżempju, kif stabbilit fil-premessa (310), produttur tal-Unjoni kkonkluda ftehim ta’ trasferiment ta’ profitt/telf mal-kumpanija omm tiegħu, li jfisser li t-telf imġarrab tiegħu ġie assorbit mill-kumpanija omm tiegħu, u dan ippermetta lill-kumpanija tagħmel aktar l-investimenti meħtieġa, l-aktar fil-makkinarju sabiex tipproduċi tipi b’permeabbiltà għolja tal-prodott taħt rieżami.

(314)

Kif stabbilit fil-premessa (309), l-impożizzjoni tal-miżuri fl-2015 inizjalment kellha effett pożittiv fuq is-sitwazzjoni ekonomika tal-industrija tal-Unjoni, b’mod partikolari fl-2017 meta l-industrija tal-Unjoni bdiet tirkupra.

(315)

Madankollu, is-sitwazzjoni ekonomika bdiet tiddeterjora b’mod kostanti għal darb’oħra minn hemm ’il quddiem, sal-punt li t-telf laħaq -18,6 % fil-perjodu ta’ investigazzjoni tar-rieżami.

(316)

Il-volumi tal-bejgħ fis-suq tal-Unjoni naqsu b’4 %, flimkien ma’ tnaqqis żgħir fil-prezzijiet tal-unità tal-bejgħ bi 2 %. Il-produzzjoni naqset bi 15 %, u l-użu tal-kapaċità tal-produzzjoni naqas b’10 %. Fl-isfond ta’ kost dejjem akbar tal-produzzjoni, it-telf laħaq livell li ma huwiex sostenibbli.

(317)

Minħabba t-telf imġarrab matul il-perjodu taħt kunsiderazzjoni b’riżultat tal-fatturi deskritti hawn fuq, l-indikaturi l-oħrajn bħar-redditu fuq l-investiment segwew l-istess xejriet ’l isfel bħall-indikatur tal-profittabbiltà.

(318)

Wara d-divulgazzjoni, l-NLMK allegat li s-sitwazzjoni dannuża tal-industrija tal-Unjoni kienet dovuta għal problemi strutturali u ma kellha xejn x’taqsam mal-importazzjonijiet mill-pajjiżi kkonċernati. L-NLMK irreferiet għall-korrelazzjoni bejn il-livell tat-telf u ż-żieda fil-kostijiet tal-produzzjoni, u għall-prestazzjoni li qed tiddeterjora tal-produtturi tal-Unjoni, inkluża l-waqfa ta’ produttur ewlieni wieħed tal-Unjoni li wasslet għal żieda fil-kost fiss għal kull unità ta’ prodott. Barra minn hekk, wara d-divulgazzjoni, il-Gvern Russu allega li t-tnaqqis fil-konsum kien il-problema ewlenija għall-industrija tal-Unjoni, li, skont il-Gvern Russu, kienet f’sitwazzjoni stabbli, kif indikat mill-għadd ta’ impjegati tagħha u ż-żieda fl-investimenti.

(319)

Wara d-divulgazzjoni, Nippon Steel ikkummentat li kull indikatur tad-dannu jista’ jiġi spjegat b’raġunijiet għajr l-importazzjonijiet tal-GOES mill-pajjiżi kkonċernati. Pereżempju, hija allegat li t-telf ta’ – 18,6 % jista’ jiġi spjegat miż-żieda ta’ 32 % fin-nefqa fuq l-investiment, filwaqt li t-tnaqqis ta’ 4 % fil-volum tal-bejgħ jista’ jkun ir-riżultat tat-tnaqqis ta’ 11 % fil-konsum tal-Unjoni kif ukoll tat-tnaqqis fil-produzzjoni tal-Unjoni.

(320)

Il-Kummissjoni ċaħdet dawn il-kummenti tal-NLMK u ta’ Nippon Steel għar-raġunijiet li ġejjin. L-ewwel nett, il-Kummissjoni ma argumentatx li s-sitwazzjoni dannuża fil-perjodu ta’ investigazzjoni tar-rieżami kienet ikkawżata, jew kienet ikkawżata biss, minn importazzjonijiet mill-pajjiżi kkonċernati. Kif stabbilit fil-premessi (330) u (331), il-Kummissjoni qieset ukoll fatturi oħrajn li potenzjalment ikkawżaw dannu kif identifikat mill-partijiet ikkonċernati, iżda kkonkludiet li dawn il-fatturi l-oħrajn kienu ta’ natura temporanja. It-tieni, kif deskritt b’mod ġenerali fit-taqsima 5 hawn taħt u b’mod partikolari fil-premessa (361), minħabba s-sitwazzjoni dannuża tal-passat u dik attwali tal-industrija tal-Unjoni, in-nuqqas ta’ miżuri x’aktarx li jirriżulta f’żieda sinifikanti ta’ importazzjonijiet oġġett ta’ dumping mill-pajjiżi kkonċernati bi prezzijiet dannużi, li twassal għal telf saħansitra ogħla għall-produtturi tal-Unjoni. It-tielet, fl-analiżi tas-sitwazzjoni tal-industrija tal-Unjoni tqiesu l-indikaturi kollha tad-dannu, li abbażi tagħhom il-Kummissjoni waslet għall-konklużjoni li l-industrija tal-Unjoni ġarrbet dannu materjali, kif stabbilit fil-premessa (321). Ir-raba’ nett, dawn il-kummenti ma kinux sostanzjati biżżejjed. Fl-aħħar nett, il-Kummissjoni mhux biss għamlet analiżi komprensiva tad-dannu mġarrab mill-industrija tal-Unjoni (it-Taqsima 4), iżda wkoll analiżi komprensiva ta’ kawżi oħra ta’ dannu u ta’ dak li jseħħ fin-nuqqas ta’ kwalunkwe miżura (it-Taqsima 5). Kif spjegat fil-premessa (361), il-Kummissjoni kkonkludiet li fid-dawl tas-sitwazzjoni dannuża tal-passat u dik attwali tal-industrija tal-Unjoni, in-nuqqas ta’ miżuri x’aktarx jirriżulta f’żieda sinifikanti ta’ importazzjonijiet oġġett ta’ dumping mill-pajjiżi kkonċernati bi prezzijiet dannużi, li twassal għal telf saħansitra ogħla għall-produtturi tal-Unjoni.

(321)

Abbażi ta’ dak li ntqal hawn fuq, il-Kummissjoni kkonkludiet li l-industrija tal-Unjoni ġarrbet dannu materjali, kif muri mill-indikaturi ewlenin kollha tad-dannu, skont it-tifsira tal-Artikolu 3(5) tar-Regolament bażiku.

(322)

Kif imsemmi fil-premessa (271), il-prezzijiet tal-importazzjoni lejn l-Unjoni kienu affettwati b’mod sinifikanti mill-istabbiliment tal-miżuri fil-forma tat-tliet PMI. B’mod ġenerali, il-GOES miċ-Ċina, mill-Ġappun, mill-Korea u mill-Istati Uniti ġie importat bi prezzijiet ugwali għal jew ftit ogħla mill-PMI u konsiderevolment ogħla mill-prezz tal-bejgħ u mill-kost tal-produzzjoni tal-industrija tal-Unjoni u għalhekk bi prezzijiet mhux dannużi. Min-naħa l-oħra, l-importazzjonijiet mir-Russja bħala medja saru bi prezzijiet ferm aktar baxxi mill-prezz tal-bejgħ u mill-kost tal-produzzjoni tal-industrija tal-Unjoni u għalhekk f’livell ta’ prezz dannuż. Tabilħaqq, il-prezz medju tal-importazzjoni mir-Russja nstab li kien aktar minn 20 % taħt il-prezzijiet medji tal-industrija tal-Unjoni għal prodotti komparabbli matul il-perjodu ta’ investigazzjoni tar-rieżami.

(323)

Wara d-divulgazzjoni, l-NLMK argumentat li t-tipi ta’ GOES li joriġinaw mir-Russja ma kinux f’kompetizzjoni diretta mat-tipi ta’ prodotti prinċipalment manifatturati fl-UE u li l-prezzijiet baxxi tal-importazzjonijiet Russi kienu jirriflettu l-kwalità aktar baxxa tagħhom u l-applikazzjonijiet limitati tagħhom. Hija argumentat li l-volumi tal-importazzjoni miżmuma tat-tipi ta’ GOES li joriġinaw mir-Russja sempliċiment jirrispondu għal domanda li għadha teżisti iżda li qed tonqos għal tipi ta’ GOES ta’ kwalità aktar baxxa.

(324)

L-allegazzjoni li t-tipi ta’ GOES importati mir-Russja ma kinux f’kompetizzjoni diretta mat-tipi ta’ prodotti prinċipalment manifatturati fl-UE, madankollu, ma kinitx appoġġata mill-fatti tal-investigazzjoni. L-ewwel nett, fil-PI kien għad hemm kompetizzjoni bejn l-importazzjonijiet mir-Russja u t-tipi prodotti mill-produtturi tal-Unjoni, b’mod partikolari minn tnejn mill-erba’ produtturi tal-Unjoni, li pproduċew ukoll tipi ta’ GOES ta’ kwalità aktar baxxa. It-tieni, il-Kummissjoni tfakkar li stabbiliet it-tliet PMI għal tliet kategoriji ta’ prodotti differenti, abbażi tat-telf fil-qalba massimu, li huwa kriterju oġġettiv mhux diskriminatorju li jkopri t-tipi ta’ prodotti differenti kollha ta’ GOES, inklużi dawk importati mir-Russja. It-tielet, it-tipi ta’ GOES importati mir-Russja huma parti mill-kamp ta’ applikazzjoni tal-prodott, ġew mibjugħa u xorta jistgħu jintużaw fis-suq tal-Unjoni, minkejja li huwa probabbli li d-dħul fis-seħħ tal-Grad 2 se jwassal għal żieda fid-domanda tat-tipi ta’ permeabbiltà għolja tal-prodott taħt rieżami (ara l-premessa (401)) u għal tnaqqis fid-domanda tat-tipi prodotti mill-produtturi esportaturi Russi.

(325)

Fir-rigward ta’ dawn il-fatturi l-oħrajn, il-pandemija tal-COVID-19 wasslet għal dewmien fl-ordnijiet u kkawżat tnaqqis fid-domanda fl-Unjoni matul il-perjodu kkunsidrat, segwit minn tnaqqis fil-prezzijiet tal-bejgħ. Għalhekk, anke l-pandemija tal-COVID-19 kellha impatt negattiv fuq is-sitwazzjoni ekonomika tal-industrija tal-Unjoni.

(326)

Barra minn hekk, ir-reċessjoni globali fl-industrija tal-azzar ikkawżat tnaqqis fid-domanda tal-azzar u fil-konsum tal-azzar fl-Unjoni matul il-perjodu kkunsidrat, segwita minn tnaqqis fil-prezzijiet tal-bejgħ.

(327)

Barra minn hekk, il-bejgħ għall-esportazzjoni (f’volum) tal-produtturi tal-Unjoni lil klijenti mhux relatati naqas b’35 % sa 38 % matul il-perjodu kkunsidrat, minn 100 000 sa 115 000 tunnellata fl-2017 għal 60 000 sa 75 000 tunnellata matul il-perjodu ta’ investigazzjoni tar-rieżami. Madankollu, il-produtturi tal-Unjoni saru aktar selettivi u setgħu jżidu ftit il-prezz tal-esportazzjoni tagħhom matul il-perjodu kkunsidrat.

(328)

Il-partijiet interessati allegaw li l-produtturi tal-Unjoni ma kinux effiċjenti biżżejjed minħabba ż-żieda fil-kostijiet u fl-investimenti. Parti interessata minnhom argumentat ukoll li l-produtturi tal-Unjoni ma setgħux ilestu ċerti pjanijiet ta’ ristrutturar, b’mod partikolari minħabba li l-Kummissjoni pprojbiet l-fużjoni bejn Tata Steel u ThyssenKrupp. Madankollu, dawn l-allegazzjonijiet ma kinux sostanzjati. Barra minn hekk, jekk l-industrija tal-Unjoni ma kinitx tkun kapaċi tagħmel dawn l-investimenti, l-industrija tal-Unjoni ma kinitx tkun tista’ tkompli tikkompeti mal-produtturi esportaturi tal-pajjiżi kkonċernati, li prinċipalment qegħdin jimportaw tipi ta’ GOES b’permeabbiltà għolja lejn l-Unjoni. Dan kien iwassal għal sitwazzjoni mhux sostenibbli, li tpoġġi f’dubju s-sopravivenza tal-erba’ produtturi tal-Unjoni. Għaldaqstant, iż-żieda fil-kostijiet tal-investiment kienet meħtieġa sabiex l-industrija tal-Unjoni tibqa’ kompetittiva, u vijabbli.

(329)

Il-partijiet interessati allegaw ukoll li l-volum tal-importazzjonijiet minn pajjiżi terzi oħrajn kien qiegħed jikkontribwixxi wkoll għad-dannu materjali mġarrab mill-industrija tal-Unjoni. F’dan ir-rigward, Il-Kummissjoni rreferiet għall-premessi (275) sa (281) ta’ dan ir-Regolament u fakkret li l-importazzjonijiet totali minn pajjiżi terzi għajr il-pajjiżi kkonċernati naqsu bi 38 % bejn l-2017 u l-perjodu ta’ investigazzjoni tar-rieżami sabiex jilħqu sehem mis-suq ta’ 7 % sa 10,5 % fil-perjodu ta’ investigazzjoni tar-rieżami meta mqabbla ma’ 10,2 % sa 13,5 % fl-2017. Għalhekk, ma hemm l-ebda indikazzjoni li tissuġġerixxi li importazzjonijiet oħrajn kkawżaw dannu lill-industrija tal-Unjoni.

(330)

Il-fatturi l-oħrajn, kif stabbilit hawn fuq, jitqiesu li huma ta’ natura temporanja u s-sitwazzjoni tal-industrija tal-Unjoni kienet diġà qiegħda terġa’ tidher aktar promettenti fi tmiem il-perjodu ta’ investigazzjoni tar-rieżami, fid-dawl tad-domanda ogħla mistennija għall-GOES fil-futur qrib kif ukoll tal-kapaċità tal-industrija tal-Unjoni li tipproduċi dejjem aktar tipi ta’ prodotti b’permeabbiltà għolja tal-prodott taħt rieżami.

(331)

F’dan l-isfond, il-Kummissjoni vvalutat, f’konformità mal-Artikolu 11(2) tar-Regolament bażiku, jekk ikunx hemm probabbiltà ta’ kontinwazzjoni ta’ dannu kkawżat mill-importazzjonijiet oġġett ta’ dumping kontinwi mir-Russja u probabbiltà ta’ rikorrenza ta’ dannu kkawżat mill-importazzjonijiet mill-pajjiżi l-oħrajn kkonċernati jekk il-miżuri jitħallew jiskadu fin-nuqqas ta’ dawk iċ-ċirkostanzi temporanji u eċċezzjonali. Il-Kummissjoni qieset l-elementi li ġejjin: (1) il-kapaċità ta’ riżerva fil-pajjiżi kkonċernati u l-attraenza tas-suq tal-Unjoni; u (2) l-impatt tal-importazzjonijiet potenzjali u l-livelli tal-prezzijiet ta’ dawn l-importazzjonijiet minn dawn il-pajjiżi fuq is-sitwazzjoni tal-industrija tal-Unjoni jekk il-miżuri jitħallew jiskadu.

(332)

Kif diġà deskritt fil-premessi (82), (101), (113), (226) u (241), il-kwantitajiet li jistgħu jiġu esportati mill-produtturi esportaturi mill-pajjiżi kkonċernati huma sinifikanti meta mqabbla mad-daqs tas-suq tal-Unjoni. Tabilħaqq, il-kapaċitajiet żejda jirrappreżentaw aktar minn tliet darbiet il-konsum totali tal-Unjoni (54) matul il-perjodu ta’ investigazzjoni tar-rieżami. Barra minn hekk, il-produtturi esportaturi fiċ-Ċina, fir-Russja u fil-Ġappun għandhom sehem mis-suq domestiku ta’ 97 % sa 100 %, filwaqt li l-Istati Uniti u l-produtturi esportaturi Koreani għandhom sehem mis-suq domestiku ta’ 83 % sa 86 %. B’riżultat ta’ dan, kwalunkwe kapaċità ta’ riżerva disponibbli tal-produtturi esportaturi ma tistax tiġi assorbita aktar fis-swieq domestiċi rispettivi tagħhom peress li dawn is-swieq diġà huma fil-biċċa l-kbira sodisfatti mill-produzzjoni domestika tal-produtturi esportaturi. Barra minn hekk, is-swieq Ċiniżi u tal-Istati Uniti huma protetti minn miżuri kummerċjali.

(333)

Fid-dawl ta’ dan ta’ hawn fuq, huwa probabbli li l-produtturi esportaturi mill-pajjiżi kkonċernati kollha jerġgħu jibdew ibigħu volumi għoljin fis-suq tal-Unjoni jekk il-miżuri jiskadu.

(334)

Kif imsemmi fil-premessi (271) u (322), l-importazzjonijiet miċ-Ċina, mill-Ġappun, mill-Korea u mill-Istati Uniti saru f’livell ta’ prezz ugwali għal, jew ogħla mill-PMI rilevanti, u ogħla mill-prezz tal-bejgħ u mill-kost tal-produzzjoni tal-industrija tal-Unjoni. L-importazzjonijiet mir-Russja li saru bi prezzijiet ferm anqas mill-PMI rilevanti (EUR 1 536/tunnellata) u għalhekk dehru li fil-biċċa l-kbira ma kinux affettwati minnu, kif ukoll bi prezzijiet taħt il-prezz tal-bejgħ u l-kost tal-produzzjoni tal-industrija tal-Unjoni. Għalhekk, il-Kummissjoni qieset li l-PMI kellu impatt sinifikanti fuq l-imġiba tal-ipprezzar tal-produtturi esportaturi mill-erba’ pajjiżi preċedenti u li l-prezzijiet tal-importazzjoni attwali tagħhom ma setgħux jintużaw bħala indikatur affidabbli għall-prezzijiet futuri probabbli jekk il-miżuri jitħallew jiskadu.

(335)

F’dawn iċ-ċirkostanzi, għall-GOES minn dawn l-erba’ pajjiżi (iċ-Ċina, il-Ġappun, il-Korea u l-Istati Uniti) (55), il-Kummissjoni eżaminat ukoll l-imġiba attwali tal-ipprezzar tal-produtturi esportaturi tagħhom fis-swieq tal-esportazzjoni ta’ pajjiżi terzi tagħhom sabiex tivvaluta l-livelli probabbli tal-prezzijiet tal-importazzjonijiet lejn l-Unjoni, jekk il-miżuri jiskadu.

(336)

Għal dan il-għan, għall-produtturi li kkooperaw fiċ-Ċina u fil-Ġappun, il-Kummissjoni ddeterminat il-livelli probabbli tal-prezzijiet tal-importazzjonijiet lejn l-Unjoni billi qabblet, għat-tipi ta’ prodotti b’telf fil-qalba massimu mhux akbar minn 0,9 W/kg:

(337)

Abbażi ta’ dan, ġie stabbilit li l-produtturi esportaturi Ġappuniżi u Ċiniżi esportaw lejn is-swieq tal-esportazzjoni ewlenin tagħhom ta’ pajjiżi terzi bi prezzijiet li kienu madwar 10 % aktar baxxi meta mqabbla mal-PMI korrispondenti.

(338)

Barra minn hekk, il-Kummissjoni qabblet il-prezzijiet medji ponderati tal-bejgħ tal-Unjoni għat-tipi ta’ GOES tal-ogħla kwalità (tipi ta’ GOES b’telf fil-qalba massimu mhux ogħla minn 0,9 W/kg, li jirrappreżentaw il-maġġoranza tal-importazzjonijiet – meta mqabbla maż-żewġ kategoriji l-oħrajn ta’ prodotti differenti ta’ GOES, kif spjegat fil-premessa (2) - mill-produtturi esportaturi Ċiniżi u Ġappuniżi li kkooperaw fis-suq tal-Unjoni) mal-prezzijiet medji ponderati korrispondenti tal-bejgħ għall-istess kategorija ta’ prodotti manifatturati minn dawn il-produtturi li kkooperaw fiċ-Ċina u fil-Ġappun, u mibjugħa lill-bqija tad-dinja, stabbiliti fuq bażi CIF, b’aġġustamenti xierqa għad-dazji doganali u għall-kostijiet ta’ wara l-importazzjoni.

(339)

Ġie stabbilit li l-produtturi esportaturi Ċiniżi u Ġappuniżi esportaw lejn is-swieq tal-esportazzjoni ewlenin tagħhom ta’ pajjiżi terzi bi prezzijiet li kienu madwar 3 % ogħla meta mqabbla mal-prezzijiet tal-bejgħ korrispondenti mill-produtturi tal-Unjoni.

(340)

F’dan il-kuntest, madankollu jenħtieġ li jiġi mfakkar li l-produtturi tal-Unjoni diġà biegħu taħt il-kost tal-produzzjoni tagħhom matul il-perjodu kollu kkunsidrat (ara t-Tabella 9, il-premessa (300)), li wassal għal telf sinifikanti u għal sitwazzjoni diġà dannuża matul il-perjodu ta’ investigazzjoni tar-rieżami. Jekk il-miżuri jiskadu, prezzijiet simili mill-produtturi esportaturi Ġappuniżi u Ċiniżi fis-suq tal-Unjoni, hekk kif japplikaw għas-swieq terzi tagħhom għall-ogħla tipi ta’ GOES ta’ kwalità tagħhom, ikomplu jaggravaw is-sitwazzjoni dannuża tal-industrija tal-Unjoni.

(341)

Wara d-divulgazzjoni, Nippon Steel allegat li l-analiżi tal-Kummissjoni tal-livelli tal-prezzijiet probabbli għall-importazzjonijiet ta’ GOES mill-Ġappun fin-nuqqas ta’ miżuri ma kinitx issostanzjata. L-ewwel nett, il-prezz tal-importazzjoni mill-Ġappun kien konsistentement u b’mod sinifikanti ogħla mill-ogħla PMI u għalhekk, il-Kummissjoni kellha tissostanzja r-raġunijiet għaliex il-prezzijiet attwali tal-importazzjoni tal-Ġappun ma jistgħux jintużaw biex jiġu ddeterminati l-prezzijiet probabbli li jitlob il-Ġappun, jekk il-miżuri jiskadu. Hija talbet ukoll lill-Kummissjoni biex tissostanzja t-tqabbil tagħha tal-prezzijiet tal-esportazzjoni tal-Ġappun lejn swieq ta’ pajjiżi terzi mal-PMI rispettivi tagħhom u mal-prezzijiet tal-esportazzjoni tal-prezzijiet tal-Unjoni. Fl-aħħar nett, Nippon Steel allegat li l-prezzijiet tal-bejgħ tagħha lill-Indja kienu ogħla milli fl-Unjoni, meta qabblet il-bejgħ tagħha ta’ tipi ta’ prodotti li jaqblu lill-Indja u lill-Unjoni rispettivament.

(342)

Il-Kummissjoni rrikonoxxiet li l-prezzijiet tal-importazzjoni lejn l-Unjoni mill-Ġappun kienu konsistentement ogħla mill-ogħla PMI matul il-perjodu ta’ investigazzjoni tar-rieżami, kif muri fit-Tabella 4, il-premessa (267).

(343)

Madankollu, il-Kummissjoni ċaħdet l-affermazzjoni ta’ Nippon Steel li kellha tuża l-prezzijiet attwali tal-importazzjonijiet tal-Ġappun lejn l-Unjoni biex tiddetermina l-prezzijiet probabbli li jitlob il-Ġappun, jekk il-miżuri jiskadu. Kif spjegat fil-premessa (334), il-PMI kellu impatt sinifikanti fuq l-imġiba tal-ipprezzar tal-produtturi esportaturi minn erba’ pajjiżi kkonċernati, inkluż il-Ġappun, li kienu prinċipalment qed jesportaw tipi ta’ GOES ta’ kwalità għolja u għalhekk il-prezzijiet tal-importazzjoni tagħhom lejn l-Unjoni ma setgħux jintużaw bħala indikatur affidabbli għall-prezzijiet futuri probabbli jekk il-miżuri jitħallew jiskadu. Fil-każ tal-Ġappun, dan intwera mill-fatt li, bħala medja, il-prezzijiet tal-esportazzjoni tagħhom lejn pajjiżi terzi kienu ferm aktar baxxi minn dawk lejn l-Unjoni.

(344)

Fir-rigward tas-sostanzjar tat-tqabbil tagħha tal-prezzijiet tal-esportazzjoni tal-Ġappun lejn swieq ta’ pajjiżi terzi bil-PMI rispettivi tagħhom u l-prezzijiet tal-esportazzjoni tagħhom lejn l-Unjoni, il-Kummissjoni spjegat l-approċċ tagħha u r-raġunijiet għalih fil-premessa (336) hawn fuq. Barra minn hekk, l-asserzjoni li l-prezzijiet tal-bejgħ ta’ Nippon Steel kienu ogħla fl-Indja minn dawk lejn l-Unjoni kienet żbaljata peress li d-data dwar il-bejgħ kienet ibbażata fuq tranżazzjonijiet bejn Nippon Steel u n-negozjanti relatati tagħha fl-Indja u fl-Ewropa, li ma kienx meqjus bħala bażi affidabbli għal kwalunkwe tqabbil biex wieħed jasal għal konklużjonijiet dwar il-livelli tal-prezzijiet finali lill-ewwel klijenti indipendenti tagħhom. Barra minn hekk, ta’ min jinnota, għaż-żewġ produtturi esportaturi Ġappuniżi, li t-tqabbil tal-PMI u l-prezzijiet medji tal-bejgħ Ġappuniżi lil pajjiżi terzi, kif deskritt fil-premessa (336), kien ibbażat fuq informazzjoni pprovduta miż-żewġ produtturi esportaturi Ġappuniżi u kopra l-bejgħ tal-esportazzjoni mhux relatat tagħhom kollu lill-pajjiżi terzi kollha tagħhom.

(345)

Peress li ma kien hemm l-ebda kooperazzjoni mill-produtturi Koreani u tal-Istati Uniti, il-livell tal-prezz tal-esportazzjoni probabbli lejn l-Unjoni ġie stmat billi tqabblu l-prezzijiet tal-esportazzjoni attwali Koreani u tal-Istati Uniti lejn pajjiżi terzi, abbażi tal-istatistika rilevanti tal-importazzjoni tal-GTA speċifika għall-pajjiż, mal-PMI medju.

(346)

Ġie stabbilit li, għall-produtturi Koreani u tal-Istati Uniti li ma kkooperawx, il-prezzijiet tal-esportazzjoni tagħhom lejn pajjiżi terzi kienu rispettivament 20 % u 15 % aktar baxxi meta mqabbla mal-PMI medju. F’każ li dawn il-prezzijiet tal-esportazzjoni tal-Istati Uniti u tal-Korea jitqabblu mal-ogħla livell tal-PMI, li possibbilment ikun aktar preċiż peress li l-maġġoranza tal-esportazzjonijiet ta’ dawk il-pajjiżi jikkonsistu fi prodotti GOES b’permeabbiltà għolja, dawn il-perċentwali jkunu saħansitra ogħla b’mod sinifikanti.

(347)

Barra minn hekk, il-Kummissjoni qabblet il-prezzijiet medji ponderati tal-bejgħ tal-Unjoni għat-tipi ta’ GOES b’telf fil-qalba massimu mhux ogħla minn 0,9 W/kg mal-prezzijiet korrispondenti tal-esportazzjoni Koreani u tal-Istati Uniti lejn pajjiżi terzi, abbażi tal-istatistika rilevanti dwar l-importazzjoni tal-GTA, speċifika għall-pajjiż, u abbażi tas-suppożizzjoni li l-maġġoranza tal-importazzjonijiet tal-Korea u tal-Istati Uniti jikkonsistu fi prodotti GOES b’permeabbiltà għolja.

(348)

Ġie stabbilit li l-prezzijiet tal-esportazzjoni Koreani u tal-Istati Uniti lejn pajjiżi terzi kienu rispettivament 22 % u 14 % anqas meta mqabbla mal-prezzijiet tal-bejgħ mill-produtturi tal-Unjoni. Kif diġà ssemma fil-premessa (340), peress li l-produtturi tal-Unjoni diġà biegħu taħt il-kost tal-produzzjoni tagħhom, jekk il-miżuri jiskadu, prezzijiet simili mill-produtturi esportaturi Koreani u mill-Istati Uniti jkomplu jaggravaw is-sitwazzjoni dannuża tal-industrija tal-Unjoni.

(349)

Għalhekk, filwaqt li qieset dawn il-livelli tal-prezzijiet tal-esportazzjonijiet mill-erba’ pajjiżi kkonċernati lejn pajjiżi terzi u s-sitwazzjoni dannuża attwali tal-industrija tal-Unjoni, il-Kummissjoni qieset li, fin-nuqqas ta’ miżuri anti-dumping, huwa probabbli li l-produtturi esportaturi tal-erba’ pajjiżi kkonċernati jibdew jesportaw lejn l-Unjoni f’livelli simili ta’ prezzijiet li japplikaw għas-swieq terzi tagħhom u tal-anqas bi prezzijiet taħt il-livelli applikabbli tal-PMI, jiġifieri f’livelli ta’ prezzijiet dannużi.

(350)

Fid-dawl ta’ dan ta’ hawn fuq, il-Kummissjoni kkonkludiet li, jekk il-miżuri jiskadu, l-importazzjonijiet lejn l-Unjoni mill-pajjiżi kollha kkonċernati jsiru f’livelli ta’ prezzijiet dannużi. Dawn l-importazzjonijiet ikomplu jikkawżaw dannu fil-każ tar-Russja, u jirriżultaw f’rikorrenza ta’ dannu fil-każ tal-pajjiżi l-oħrajn kkonċernati.

(351)

Il-Kummissjoni vvalutat l-impatt possibbli tal-importazzjonijiet mill-pajjiżi kkonċernati fuq is-sitwazzjoni finanzjarja tal-industrija tal-Unjoni billi mmudellat żewġ xenarji possibbli jekk il-miżuri jitħallew jiskadu, jiġifieri

(352)

Fl-ewwel xenarju, il-Kummissjoni assumiet ukoll li 100 % tal-importazzjonijiet totali mill-pajjiżi kkonċernati jaffettwaw l-industrija tal-Unjoni u ma jaffettwawx l-importazzjonijiet minn pajjiżi terzi oħrajn peress li s-sehem mis-suq ta’ dawn il-pajjiżi tal-aħħar huwa insinifikanti. Barra minn hekk, il-Kummissjoni assumiet li l-industrija tal-Unjoni żżomm l-istess prezzijiet tal-bejgħ bħal matul il-perjodu ta’ investigazzjoni tar-rieżami peress li diġà qiegħda tagħmel telf.

(353)

Ir-riżultat ta’ din is-simulazzjoni fl-ewwel xenarju juri li ż-żieda fl-importazzjonijiet mill-pajjiżi kkonċernati tkun għad-detriment tal-industrija tal-Unjoni. Din tal-aħħar titlef il-volum tal-bejgħ u s-sehem mis-suq fis-suq tal-Unjoni, u dan iwassal għal tnaqqis ulterjuri fil-produzzjoni tagħha u kost fiss ogħla għal kull tunnellata manifatturata tal-prodott taħt rieżami. Dan ikollu impatt fuq il-profittabbiltà ġenerali tal-industrija. B’riżultat ta’ dan, it-telf imġarrab mill-industrija tal-Unjoni jkompli jiżdied minn -18,6 % għal livell saħansitra aktar insostenibbli ta’ -22,6 %.

(354)

Fit-tieni xenarju, l-effett ta’ tnaqqis ta’ 5 % fil-prezz instab li kien potenzjalment ta’ dannu akbar. F’każ ta’ tnaqqis fil-prezzijiet tal-Unjoni ta’ 5 % (EUR 1 356/tunnellata) minħabba ż-żieda fil-pressjoni fuq il-prezzijiet tal-importazzjonijiet mill-pajjiżi kkonċernati, it-telf saħansitra jkompli jonqos għal -29 %. F’każ ta’ tnaqqis fil-prezzijiet tal-Unjoni ta’ 10 %, jiġifieri minn 1 427 EUR/tunnellata għal 1 285 EUR/tunnellata, it-telf jilħaq -37 %.

(355)

Fir-realtà, jekk il-miżuri jitħallew jiskadu, huwa probabbli ħafna li fis-suq isseħħ kombinazzjoni tal-ewwel u tat-tieni xenarju. Dan jirriżulta f’telf mhux sostenibbli saħansitra ogħla għall-industrija tal-Unjoni.

(356)

Wara d-divulgazzjoni, il-Gvern Ġappuniż argumenta wkoll li l-Ġappun jenħtieġ li jiġi eskluż mill-kamp ta’ applikazzjoni tal-miżuri anti-dumping peress li l-prodotti Ġappuniżi ma jikkawżaw l-ebda dannu u lanqas ma huma ta’ theddida għall-industrija tal-Unjoni għar-raġunijiet li ġejjin. L-ewwel nett, dawn jipproduċu tipi partikolari ta’ kwalità eċċezzjonali, li tintuża minn u ssir dejjem aktar importanti għal utenti partikolari fl-Unjoni. It-tieni, il-fatt li l-prezzijiet tal-esportazzjoni Ġappuniżi lejn l-Unjoni huma ogħla b’mod sinifikanti mill-PMI, juri li l-fatt li jekk il-miżuri anti-dumping eżistenti jitħallew jiskadu fir-rigward tal-Ġappun, dan ma jwassalx għal prezzijiet tal-importazzjoni mnaqqsa.

(357)

Wara d-divulgazzjoni, u b’mod simili għad-dikjarazzjoni tal-Gvern Ġappuniż, Nippon Steel reġgħet argumentat li l-miżuri anti-dumping jenħtieġ li ma jinżammux fir-rigward tal-Ġappun minħabba li hija ċ-Ċina li hija theddida sinifikanti għall-industrija tal-Unjoni, mhux il-Ġappun, fid-dawl tal-kapaċità ta’ riżerva relattivament baxxa tiegħu meta mqabbla maċ-Ċina. Il-prezzijiet li l-produtturi esportaturi Ġappuniżi jitolbu fis-suq tal-Unjoni huma l-ogħla fid-dinja, u ogħla mill-ogħla PMI. It-tielet, il-prezzijiet tal-esportazzjoni Ġappuniżi jikkompetu ma’ produtturi oħrajn, inkluża l-industrija tal-Unjoni, bi prezzijiet ġusti.

(358)

Il-Kummissjoni rrikonoxxiet li l-produtturi esportaturi Ġappuniżi jipproduċu tipi ta’ prodotti ta’ kwalità għolja, kif imsemmi fil-premessa (381). Min-naħa l-oħra, kif imsemmi fil-premessa (337), ġie stabbilit li l-produtturi esportaturi Ġappuniżi esportaw lejn is-swieq tal-esportazzjoni ewlenin tagħhom ta’ pajjiżi terzi bi prezzijiet li kienu madwar 10 % aktar baxxi meta mqabbla mal-PMI korrispondenti għal dawn it-tipi partikolari ta’ kwalità għolja. Fuq din il-bażi, il-Kummissjoni sostniet li huwa probabbli li jkun hemm żieda sinifikanti fl-importazzjonijiet oġġett ta’ dumping mill-pajjiżi kollha kkonċernati, inkluż il-Ġappun, bi prezzijiet dannużi aktar baxxi fin-nuqqas ta’ miżuri. Għalhekk, il-Kummissjoni qieset li ma kien hemm l-ebda bażi biex il-Ġappun jiġi eskluż mill-kamp ta’ applikazzjoni tal-investigazzjoni.

(359)

Barra minn hekk, kif spjegat fit-taqsimiet rispettivi ta’ hawn fuq, il-Kummissjoni stabbiliet - minkejja l-kapaċità ta’ riżerva ddeterminata għaċ-Ċina - li:

(360)

Fid-dawl tal-kunsiderazzjonijiet ta’ hawn fuq, il-Kummissjoni ċaħdet ukoll din l-affermazzjoni ta’ Nippon Steel.

(361)

Fuq din il-bażi, u filwaqt li titqies is-sitwazzjoni dannuża tal-passat u dik attwali tal-industrija tal-Unjoni, in-nuqqas ta’ miżuri x’aktarx jirriżulta f’żieda sinifikanti ta’ importazzjonijiet oġġett ta’ dumping mill-pajjiżi kkonċernati bi prezzijiet dannużi, li twassal għal telf saħansitra ogħla għall-produtturi tal-Unjoni. Għalhekk, il-Kummissjoni kkonkludiet li, jekk kienx hemm kawżalità suffiċjenti fir-rigward tal-importazzjonijiet Russi matul il-perjodu ta’ investigazzjoni tar-rieżami jew le, id-dannu kif stabbilit oriġinarjament jerġa’ jseħħ fir-rigward tal-pajjiżi kkonċernati.

(362)

F’konformità mal-Artikolu 21 tar-Regolament bażiku, il-Kummissjoni eżaminat jekk iż-żamma tal-miżuri anti-dumping eżistenti tmurx kontra l-interess tal-Unjoni b’mod ġenerali. Id-determinazzjoni tal-interess tal-Unjoni kienet ibbażata fuq l-apprezzament tal-interessi differenti kollha involuti, inklużi dawk tal-industrija tal-Unjoni, tal-importaturi, tal-utenti u tal-interessi tal-ordni pubbliku fir-rigward tal-prodott taħt rieżami kif inkorporat fid-Direttiva 2009/125/KE tal-Parlament Ewropew u tal-Kunsill (57) (“id-Direttiva dwar l-Ekodisinn”) u r-Regolamenti speċifiċi għall-prodott tagħha. F’konformità mat-tielet sentenza tal-Artikolu 21(1) tar-Regolament bażiku, ingħatat kunsiderazzjoni speċjali għall-ħtieġa li l-industrija tiġi protetta mill-effetti negattivi ta’ dumping dannuż.

(363)

Il-partijiet interessati kollha ngħataw l-opportunità li jesprimu l-fehmiet tagħhom skont l-Artikolu 21(2) tar-Regolament bażiku.

(364)

L-industrija tal-Unjoni tinsab f’erba’ Stati Membri (Franza, il-Ġermanja, iċ-Ċekja u l-Polonja), u timpjega direttament madwar 2 200 impjegat fir-rigward tal-prodott taħt rieżami.

(365)

Xi partijiet interessati affermaw li l-miżuri jenħtieġ li jitħallew jiskadu peress li l-produtturi tal-Unjoni ma għadhomx jiffaċċjaw sitwazzjoni dannuża. Pereżempju, huma allegaw li l-produtturi tal-Unjoni żiedu l-bejgħ tagħhom tal-prodott taħt rieżami fis-suq tal-Unjoni, u setgħu jespandu s-sehem mis-suq tagħhom fis-suq tal-Unjoni bi 3 % mill-2017. Ġie affermat ukoll li l-industrija tal-Unjoni żammet livelli stabbli ta’ produzzjoni, kapaċità ta’ produzzjoni, użu tal-kapaċità, u impjiegi mill-2017. L-industrija tal-Unjoni setgħet tinvesti wkoll ammonti sinifikanti, li allegatament huwa indikazzjoni ta’ industrija li hija kunfidenti dwar il-futur tas-suq tagħha.

(366)

Kif stabbilit fil-premessi (315) u wara, il-produtturi tal-Unjoni kienu qegħdin iġarrbu telf li jammonta għal -18,6 % matul il-perjodu ta’ investigazzjoni tar-rieżami. Barra minn hekk, il-volumi tal-bejgħ fis-suq tal-Unjoni naqsu b’4 %, matul il-perjodu kkunsidrat, flimkien ma’ tnaqqis żgħir fil-prezzijiet unitarji tal-bejgħ ta’ 2 %. Barra minn hekk, il-produzzjoni naqset bi 15 %, u l-użu tal-kapaċità tal-produzzjoni naqas b’10 %. Għalhekk, il-Kummissjoni kkonkludiet fil-premessa (321) li l-industrija tal-Unjoni ġarrbet dannu materjali.

(367)

Barra minn hekk, il-Kummissjoni stabbiliet li hemm probabbiltà kbira ta’ kontinwazzjoni ta’ dannu kkawżat oriġinarjament mill-importazzjonijiet minn dawn il-pajjiżi jekk il-miżuri jiskadu. L-influss ta’ volumi sostanzjali ta’ importazzjonijiet oġġett ta’ dumping mill-pajjiżi kkonċernati jwassal għal żieda fil-kompetizzjoni inġusta għall-industrija tal-Unjoni u jikkawża aktar dannu lill-industrija tal-Unjoni. Dan jaggrava s-sitwazzjoni ekonomika diġà dannuża u fraġli ħafna tal-industrija tal-Unjoni u jhedded il-vijabbiltà tagħha.

(368)

Il-Kummissjoni b’hekk ikkonkludiet li l-kontinwazzjoni tal-miżuri tkun fl-interess tal-industrija tal-Unjoni.

(369)

Il-Kummissjoni kkuntattjat lill-importaturi mhux relatati magħrufa kollha. Importatur mhux relatat wieħed biss ippreżenta ruħu u kkoopera f’din l-investigazzjoni billi ppreżenta tweġiba għall-kwestjonarju.

(370)

Għalhekk, il-Kummissjoni ma għandhiex biżżejjed informazzjoni għad-dispożizzjoni tagħha sabiex tikkonkludi li l-kontinwazzjoni tal-miżuri tkun ta’ detriment għall-interess tal-importaturi. Pjuttost il-kuntrarju, peress li l-importazzjonijiet mill-pajjiżi kkonċernati qatt ma waqfu bħala riżultat tal-miżuri iżda komplew f’volumi sinifikanti.

(371)

Seba’ utenti ppreżentaw ruħhom, u esprimew ir-rieda tagħhom li jipparteċipaw fl-investigazzjoni. Madankollu, erba’ biss minnhom kkooperaw bis-sħiħ f’din l-investigazzjoni billi ppreżentaw tweġibiet għall-kwestjonarju kompluti kemm f’verżjonijiet miftuħa kif ukoll f’dawk sensittivi.

(372)

L-erba’ utenti li kkooperaw bis-sħiħ kienu jinkludu wieħed mill-akbar utenti fis-suq tal-Unjoni, filwaqt li t-tliet utenti l-oħrajn kienu relattivament żgħar f’termini ta’ impjiegi u fatturat.

(373)

It-tliet assoċjazzjonijiet tal-utenti li ġejjin ippreżentaw ruħhom ukoll u pprovdew lill-Kummissjoni b’informazzjoni dwar l-interess tal-Unjoni:

(374)

Il-Kummissjoni rrikonoxxiet li l-industrija tat-transformers hija industrija importanti fis-suq tal-Unjoni. T&D Europe iddikjarat li l-fatturat tas-suq tal-Unjoni għat-transformers huwa ta’ madwar EUR 3,7 biljun, li madwar 10 % minn dan huwa magħmul mill-importazzjonijiet. Il-produzzjoni tat-transformers tal-UE tiswa madwar EUR 4,7 biljun, u b’hekk l-UE hija esportatur nett tat-transformers. T&D Europe iddikjarat ukoll li l-industrija tat-transformers tal-UE hija magħmula minn mijiet ta’ impriżi u timpjega aktar minn 30 000 persuna fl-UE, minbarra sottokuntratturi u industriji oħrajn li jibbenefikaw mill-industrija tat-transformers tal-UE. Fir-rigward tal-industrija downstream, WindEurope ddikjarat li l-industrija Ewropea tal-enerġija mir-riħ ipprovdiet aktar minn 160 000 impjieg dirett u appoġġat 140 000 impjieg indirett addizzjonali fl-2019. Il-produttur Russu (“NLMK”) ipprovda, fis-sottomissjoni tiegħu tal-11 ta’ Diċembru 2020, kummenti simili, filwaqt li sostna li, minħabba l-importanza tal-industrija tat-transformers, jenħtieġ li jipprevali l-interess tal-utenti.

(375)

Il-prodott taħt rieżami jintuża l-aktar bħala materjal tal-qalba fil-manifattura tat-transformers tal-enerġija u tad-distribuzzjoni. Il-produtturi tat-transformers fl-Ewropa jikkostitwixxu industrija li ilha stabbilita, li tradizzjonalment tforni produtturi kbar tal-enerġija. L-industrija tat-transformers, b’mod ġenerali, tagħmel parti minn gruppi industrijali kbar, li għandhom preżenza madwar id-dinja kollha. Ċerti kumpaniji indipendenti iżgħar, madankollu, joperaw ukoll fis-suq u wħud minnhom qegħdin joperaw f’xi swieq niċċa speċifiċi bħat-tħaffir.

(376)

Il-prodott taħt rieżami jitqies bħal element ta’ kost sinifikanti għall-utenti. Zvei allegat li l-kost tal-qalba tat-transformer (GOES) jammonta għal bejn 20 % u 40 % tal-kost totali tal-produzzjoni ta’ transformer. Madankollu, abbażi tad-data miġbura mill-kwestjonarji tal-utenti, il-prodott taħt rieżami bħala materjal ta’ input jammonta bħala medja għal madwar 7 % sa 17 % tal-kost totali tal-produzzjoni tat-transformers. Dan jista’ jkun ogħla f’ċerti każijiet eċċezzjonali, b’mod partikolari għal numru limitat ta’ kumpaniji intermedjarji li jinsabu bejn il-produtturi tal-prodott taħt rieżami u l-manifatturi tat-transformers. L-attivitajiet ta’ dawn il-kumpaniji intermedjarji huma limitati għall-qtugħ lonġitudinali għall-wisa’ u l-qtugħ tal-laminazzjonijiet skont l-ispeċifikazzjonijiet tal-produtturi tat-transformers tal-kojls u/jew l-assemblaġġ tal-qlub għat-transformers.

(377)

L-utenti affermaw li l-prodotti mill-produtturi esportaturi huma kwalitattivament aħjar f’termini ta’ telf fil-qalba. Huma affermaw ukoll li, wara l-impożizzjoni tal-miżuri matul ħames snin konsekuttivi, l-industrija tal-Unjoni xorta ma għandhiex biżżejjed kapaċità sabiex tforni lill-industrija tal-utenti b’mod partikolari b’tipi ta’ permeabbiltà għolja. T&D Europe allegat li l-industrija tat-transformers hija partikolarment dipendenti fuq l-importazzjonijiet ta’ tipi rfinati ta’ GOES b’dominju b’permeabbiltà għolja u li l-produtturi tal-UE ma humiex kapaċi jimmanifatturaw tipi raffinati ta’ GOES b’dominju b’permeabbiltà għolja fil-kwantità u l-kwalità li huma meħtieġa fis-suq tal-Unjoni. Hija allegat ukoll li, għall-futur prevedibbli, il-produtturi tal-Unjoni jistgħu biss jipprovdu sehem żgħir mid-domanda tal-UE. Konsegwentement, huma allegaw li għad hemm u se jkun hemm nuqqas fis-suq tal-Unjoni, b’mod partikolari għat-tipi b’permeabbiltà għolja.

(378)

L-assoċjazzjonijiet tal-utenti argumentaw li ż-żamma tal-miżuri eżistenti tnaqqas il-kompetittività tal-produtturi tat-transformers Ewropej vis-à-vis il-produtturi tat-transformers li jinsabu barra mill-Unjoni. Jekk il-miżuri jitkomplew fil-forma tat-tliet PMI, dan jirriżulta fi prezz tas-suq distort u għoli wisq li jkollu impatt materjali fuq il-kost tat-transformers u tal-elettriku madwar l-Ewropa. T&D Europe u Zvei sostnew ukoll li fis-swieq tal-GOES mingħajr miżuri ta’ importazzjoni artifiċjali (bħall-Indja) il-prezz tal-GOES naqas għal livelli ta’ prezzijiet storikament baxxi fl-ewwel kwart tal-2020. Fl-aħħar nett, huma allegaw li l-PMI iżidu l-kostijiet għall-produtturi tat-transformers tal-UE u fil-biċċa l-kbira jibbenefikaw fabbriki mhux tal-UE li jbigħu fl-UE bi prezzijiet ogħla. Zvei żiedet li dan jista’ jwassal għal rilokazzjoni tal-produtturi tat-transformers Ewropej barra mis-suq tal-Unjoni.

(379)

Bħala sommarju ta’ dak li ntqal hawn fuq, iż-żewġ argumenti ewlenin kontra l-kontinwazzjoni tal-miżuri eżistenti kienu dawn li ġejjin:

Sabiex tivvaluta dawn iż-żewġ argumenti ewlenin, il-Kummissjoni ħadet inkunsiderazzjoni l-istruttura tas-suq li ġejja. In-numru ta’ produtturi tal-prodott taħt rieżami madwar id-dinja huwa limitat għal anqas minn 20 produttur sinifikanti. L-Unjoni hija, wara s-suq Ċiniż, is-suq bl-ogħla numru ta’ produtturi. Deher li mhux il-produtturi kollha jistgħu jfornu ċerti tipi ta’ permeabbiltà għolja tal-prodott taħt rieżami. Il-produtturi tat-tipi b’permeabbiltà għolja tal-prodott taħt rieżami jinsabu fl-Unjoni, fl-Istati Uniti tal-Amerka, fil-Ġappun, fil-Korea u fiċ-Ċina.

(380)

Il-Kummissjoni qieset, sabiex tibda, li l-objettiv tad-dazji anti-dumping ma huwiex li jingħalaq is-suq tal-Unjoni minn kwalunkwe importazzjoni. Tabilħaqq, l-importazzjonijiet mill-pajjiżi kkonċernati naqsu iżda ma ntemmux bejn l-2015 u l-perjodu ta’ investigazzjoni tar-rieżami, iżda komplew f’volumi sinifikanti. Għalhekk, l-importazzjonijiet ma humiex mistennija li jintemmu jekk il-miżuri jinżammu, iżda minflok ikomplu.

(381)

Fir-rigward tal-kwalità tal-prodott taħt rieżami, huwa rikonoxxut fis-suq li l-importazzjonijiet minn, b’mod partikolari, r-RPĊ, il-Korea, l-Istati Uniti u l-Ġappun ġeneralment jikkonċernaw tipi tal-prodott taħt rieżami b’permeabbiltà għolja. Madankollu, żewġ produtturi tal-Unjoni huma kapaċi jipproduċu ċerti tipi ta’ kwalità b’telf fil-qalba baxx tal-prodott taħt rieżami wkoll. L-akbar utent li kkoopera ddikjara li tnejn mill-erba’ produtturi tal-Unjoni tal-GOES żiedu b’mod konsiderevoli l-isforzi tagħhom sabiex jipproduċu tipi ta’ kwalità ta’ GOES b’permeabbiltà għolja bejn l-2015 u l-2020 u tejbu l-portafoll tal-prodotti tagħhom b’mod konsiderevoli f’termini ta’ telf fil-qalba matul l-istess perjodu.

(382)

Id-data tal-produzzjoni li nġabret mill-industrija tal-Unjoni, diviża għal kull kategorija PMI ta’ prodotti, tabilħaqq ikkonfermat li l-produtturi tal-GOES tal-Unjoni żiedu b’mod konsiderevoli l-isforzi tagħhom sabiex jipproduċu prodotti b’telf fil-qalba massimu mhux ogħla minn 0,9 W/kg. Filwaqt li l-produzzjoni totali naqset b’mod sinifikanti fil-perjodu kkunsidrat, il-produtturi tal-Unjoni setgħu jipproduċu proporzjonalment aktar prodotti b’telf fil-qalba massimu mhux ogħla minn 0,9 W/kg matul l-istess perjodu, li rriżulta f’żieda ta’ 36 %, jiġifieri aktar minn 20 000 tunnellata.

(383)

Fin-nuqqas ta’ miżuri, isir inċert jekk l-industrija tal-Unjoni tkunx tista’ tkompli tiżviluppa t-tipi ta’ GOES b’permeabbiltà għolja tagħha, filwaqt li titqies is-sitwazzjoni ekonomika diffiċli tagħha.

(384)

Meta titqies il-kapaċità tal-produzzjoni disponibbli tal-produtturi tal-Unjoni u l-istrateġija kontinwa tagħhom li jipproduċu proporzjonalment aktar tipi b’permeabbiltà għolja fil-futur qrib, l-industrija tal-Unjoni tista’ tipprovdi dejjem aktar lill-industrija tal-utenti, inklużi t-tipi b’permeabbiltà għolja. Il-produtturi tal-Unjoni stmaw li se jkunu jistgħu jżidu aktar il-livelli ta’ produzzjoni ta’ tipi b’permeabbiltà għolja, mis-sena 2021.

(385)

Anke b’żieda ulterjuri fil-livelli tal-produzzjoni ta’ tipi b’permeabbiltà għolja, l-akbar utent li kkoopera stima li l--produzzjoni tal-GOES tal-Unjoni xorta se tonqos milli tforni d-domanda fis-suq tal-Unjoni li tikkonċerna tipi b’permeabbiltà għolja tal-prodott taħt rieżami.

(386)

It-test tal-interess tal-Unjoni, madankollu, ma jeħtieġx li d-domanda tal-Unjoni tkun koperta kollha mill-produzzjoni tal-Unjoni. L-importazzjonijiet mill-pajjiżi kkonċernati huma mistennija li jkomplu jfornu lis-suq tal-Unjoni. Fid-dawl ta’ dan ta’ hawn fuq, il-Kummissjoni kkonkludiet li ma huwiex probabbli li l-kontinwazzjoni tal-miżuri eżistenti twassal għal nuqqas fil-provvista ta’ tipi ta’ GOES b’permeabbiltà għolja fis-suq tal-Unjoni.

(387)

Abbażi tad-data miġbura, il-Kummissjoni qieset li l-kontinwazzjoni tal-miżuri se jkollha biss impatt limitat fuq il-prezzijiet tat-transformers u fuq l-impjiegi fl-industrija tal-utent. L-effett probabbli jkun li l-kost tal-materjal tal-input, li jammonta għal madwar 7 % sa 17 %, jibqa’ mingħajr ma jinbidel fl-istess livelli mill-impożizzjoni tal-miżuri fil-forma tat-tliet PMI fl-2015.

(388)

Il-Kummissjoni qieset ukoll li, anke jekk wieħed jassumi differenza fil-prezz bejn il-prezzijiet ogħla tal-Unjoni u dawk internazzjonali aktar baxxi b’madwar 20 %, kwalunkwe impatt fuq l-industrija tal-utenti jkun minuri kif ġej: Jekk il-miżuri kellhom jiskadu fis-suq tal-Unjoni u jekk il-prezzijiet tal-Unjoni jonqsu b’20 %, il-kostijiet tal-GOES għall-utenti bħala medja jitnaqqsu b’anqas minn 2,5 % (59).

(389)

Barra minn hekk, fir-rigward tas-sitwazzjoni ekonomika tal-utenti li kkooperaw, tnejn kienu qegħdin jagħmlu profitt u tnejn kienu qegħdin jagħmlu telf. Sadanittant, wieħed mill-utenti li għamel telf ġie nnazzjonalizzat. L-utent l-ieħor, jiġifieri l-akbar utent f’termini ta’ fatturat u impjegati, iddikjara li t-telf tiegħu mġarrab matul l-2019 u matul il-perjodu ta’ investigazzjoni tar-rieżami ma kienx attribwibbli għall-attivitajiet operazzjonali tiegħu, iżda pjuttost ir-riżultat ta’ żewġ avvenimenti eċċezzjonali. Kieku dawn l-avvenimenti eċċezzjonali ma seħħewx, din il-kumpanija wkoll kienet tagħmel profitt. Għaldaqstant, b’mod ġenerali, il-Kummissjoni kkonkludiet li l-utenti li kkooperaw kienu ekonomikament f’pożizzjoni aħjar mill-produtturi tal-GOES.

(390)

Fl-aħħar nett, l-utenti kisbu kwantità sinifikanti ta’ GOES, inklużi t-tipi b’permeabbiltà għolja, mill-industrija tal-Unjoni. Jekk il-miżuri eżistenti jiskadu, ma jistax jiġi eskluż li l-utenti jibdew jiddependu esklużivament fuq l-importazzjonijiet, b’mod partikolari għat-tipi b’permeabbiltà għolja, li ċertament ikun ta’ detriment ukoll, fis-sens li jaffettwa d-diversità tal-provvista tagħhom. Fid-dawl ta’ dan ta’ hawn fuq, il-Kummissjoni kkonkludiet li kontinwazzjoni tal-miżuri ma jkollha l-ebda effett negattiv sproporzjonat fuq il-kompetittività tal-industrija tal-utenti.

(391)

Wara d-divulgazzjoni, l-applikant argumenta li l-Kummissjoni kkonkludiet b’mod korrett li jekk il-miżuri eżistenti jiskadu, ma jistax jiġi eskluż li l-utenti jistgħu jsiru esklużivament dipendenti fuq l-importazzjonijiet, li ċertament ikun ukoll ta’ detriment għalihom fis-sens li dan jaffettwa d-diversità tal-provvista tagħhom. L-applikant żied li ma hijiex biss kwistjoni ta’ diversità tal-provvista iżda wkoll kwistjoni ta’ sigurtà tal-provvista. Huwa argumenta li, bħala komponent meħtieġ għall-produzzjoni tal-qalba tat-transformers, il-GOES huwa pereżempju kruċjali għaż-żamma u għall-espansjoni tal-grilja elettrika tal-Unjoni, li ma tistax tiddependi fuq il-provvista minn kumpaniji barranin fl-Ażja, fir-Russja jew fl-Istati Uniti.

(392)

Il-Kummissjoni tenniet li l-objettiv tad-dazji anti-dumping ma huwiex li jingħalaq is-suq tal-Unjoni mill-importazzjonijiet kollha (ara l-premessa (380)). Bl-estensjoni tal-miżuri fil-forma ta’ PMI iżda mingħajr l-għeluq tas-suq tal-Unjoni, tista’ tinkiseb provvista sigura u diversa minn sorsi differenti, inkluż minn produtturi esportaturi u produtturi tal-Unjoni.

(393)

Wara d-divulgazzjoni, l-NLMK argumentat li l-kontinwazzjoni tal-miżuri, sa fejn hija kkonċernata r-Russja, ma hijiex fl-interess tal-Unjoni, u li tali kontinwazzjoni ma tindirizzax il-problemi strutturali tal-industrija tal-Unjoni filwaqt li tagħmel ħsara lill-utenti.

(394)

Fir-rigward ta’ dawn l-allegazzjonijiet tal-NLMK, il-Kummissjoni rreferiet għall-premessa (388) li fiha ġie spjegat li l-kontinwazzjoni tal-miżuri jkollha biss impatt żgħir fuq il-kostijiet tal-utenti. It-tieni, fir-rigward tal-allegazzjoni li l-industrija tal-Unjoni għandha problemi strutturali, il-Kummissjoni tirreferi għall-kunsiderazzjonijiet tagħha fil-premessa (320).

(395)

Abbażi ta’ dan ta’ hawn fuq, ġie konkluż li, fil-bilanċ, il-kontinwazzjoni tal-miżuri tmur kontra l-interessi tal-utenti. Madankollu, il-Kummissjoni ma setgħetx taċċetta d-dikjarazzjoni li l-kontinwazzjoni tal-miżuri twassal għal nuqqas ta’ provvista ta’ GOES b’permeabbiltà għolja. Hija kkonkludiet ukoll li l-kompetittività tal-industrija tal-utenti possibbilment tkun affettwata b’mod negattiv mill-kontinwazzjoni tal-miżuri, għalkemm b’impatt iżgħar fuq il-kostijiet milli allegat.

(396)

Id-Direttiva dwar l-Ekodisinn tistabbilixxi qafas għar-rekwiżiti tal-ekodisinn għall-prodotti relatati mal-enerġija billi tistabbilixxi rekwiżiti obbligatorji minimi għall-effiċjenza enerġetika ta’ dawn il-prodotti. Din għandha l-għan li tnaqqas il-konsum tal-enerġija fl-Unjoni billi ttejjeb l-effiċjenza tal-apparati domestiċi elettriċi.

(397)

Id-Direttiva dwar l-Ekodisinn hija implimentata permezz ta’ Regolamenti speċifiċi għall-prodotti li japplikaw direttament fil-pajjiżi kollha tal-UE. Ir-Regolament dwar l-Ekodisinn (60) ikopri r-rekwiżiti l-ġodda dwar l-Ekodisinn fir-rigward ta’ transformers tal-elettriku ta’ qawwa żgħira, medja u għolja. L-Artikolu 1 tar-Regolament dwar l-Ekodisinn jiddefinixxi l-kamp tal-applikazzjoni tiegħu (applikabbli għat-tqegħid fis-suq jew għat-tħaddim ta’ transformers tal-elettriku bi klassifikazzjoni ta’ qawwa minima ta’ 1 kVA li jintużaw f’netwerks tat-trażmissjoni u d-distribuzzjoni tal-elettriku ta’ 50 Hz, jew għal applikazzjonijiet industrijali). Ir-Regolament dwar l-Ekodisinn japplika biss għal transformers mixtrijin wara d-dħul fis-seħħ tiegħu.

(398)

Il-Grad 1 tar-Regolament dwar l-Ekodisinn daħal fis-seħħ fl-1 ta’ Lulju 2015, u l-Grad 2 (61) fl-1 ta’ Lulju 2021. Ir-rekwiżiti tal-Grad 2 huma aktar stretti minn dawk tal-Grad 1.

(399)

Numru ta’ partijiet interessati indikaw id-dħul fis-seħħ tal-Grad 2 tar-Regolament dwar l-Ekodisinn. T&D Europe affermaw li t-tipi ta’ GOES tal-ogħla kwalità, li huma prodotti fi kwantitajiet limitati biss mill-industrija tal-Unjoni, huma meħtieġa sabiex it-transformers tal-Grad 2 jiġu ddiżinjati u mmanifatturati b’mod kosteffiċjenti u fi ħdan il-limitazzjonijiet tal-ispazju meħtieġa. Zvei ddikjarat li, minħabba l-Patt Ekoloġiku tal-Kummissjoni tal-UE, l-elettrifikazzjoni dejjem akbar tal-partijiet kollha tal-ekonomija u t-trasformazzjoni diġitali tal-industrija totali tal-UE se jwasslu għal domanda akbar għal transformers (effiċjenti ħafna). WindEurope ddikjarat li d-domanda għat-transformers li jinkorporaw tipi ta’ GOES b’permeabbiltà għolja se tkompli tiżdied minħabba sensibilizzazzjoni dejjem akbar dwar it-telf tal-enerġija tul iċ-ċiklu tal-ħajja tat-transformers, kif ukoll b’riżultat tal-miżuri tal-UE sabiex jitnaqqsu l-kostijiet tal-enerġija u tittejjeb il-prestazzjoni ambjentali tat-transformers, speċjalment fid-dawl tal-implimentazzjoni tal-Grad 2 tad-Direttiva tal-UE dwar l-Ekodisinn għat-transformers.

(400)

L-akbar utenti li kkooperaw iddikjaraw li r-rekwiżiti aktar stretti tal-Grad 2 jistgħu jiġu sodisfatti b’żewġ modi:

B’riżultat ta’ dan, dan l-utent kien tal-fehma wkoll li se sseħħ bidla ulterjuri fit-tipi ta’ GOES tal-ogħla kwalità bħala riżultat tad-dħul fis-seħħ tar-Regolament dwar l-Ekodisinn tal-Grad 2.

(401)

Il-Kummissjoni qieset li, abbażi tal-argumenti ta’ hawn fuq, huwa probabbli ħafna li d-dħul fis-seħħ tal-Grad 2 se jwassal għal żieda fid-domanda tat-tipi b’permeabbiltà għolja tal-prodott taħt rieżami. Madankollu, id-domanda u l-produzzjoni ta’ transformers li jużaw tipi konvenzjonali tal-prodott taħt rieżami se jkomplu jeżistu wkoll.

(402)

Barra minn hekk, il-Kummissjoni għandha l-għan li tagħti spinta lill-kapaċità tat-teknoloġija eolika lil hinn mill-kosta permezz tal-Istrateġija tal-UE dwar l-Enerġija Rinnovabbli Offshore (62) sabiex tilħaq l-għan tal-UE tan-newtralità klimatika sal-2050 (63). L-Istrateġija tal-UE dwar l-Enerġija Rinnovabbli Offshore stmat żieda fil-kapaċità tal-Ewropa tat-teknoloġija eolika lil hinn mill-kosta mil-livell attwali tagħha ta’ 12 GW għal mill-anqas 60 GW sal-2030 u għal 300 GW sal-2050. Din l-istrateġija se tikkontribwixxi wkoll għal żieda fid-domanda għal tipi b’permeabbiltà għolja tal-prodott taħt rieżami. WindEurope stqarret li l-industrija Ewropea tal-enerġija eolika tuża transformers f’diversi applikazzjonijiet: fi ħdan il-gondola, fis-substazzjonijiet lil hinn mill-kosta, u fil-punti ta’ konnessjoni tal-grilja fuq l-art. B’mod partikolari, WindEurope ddikjarat li tipi tal-prodott taħt rieżami b’permeabbiltà għolja huma partikolarment essenzjali għat-transformers fil-gondola, peress li l-ispazju huwa fi primjum u l-massa trid tiġi mminimizzata.

(403)

Għalhekk, standards differenti legalment vinkolanti tal-prodott stabbilew l-objettiv li tiġi żgurata provvista suffiċjenti, irrispettivament mill-oriġini tagħha, ta’ GOES ta’ kwalità għolja għall-produzzjoni u l-kummerċjalizzazzjoni tat-transformers fl-Ewropa. Filwaqt li hemm ċertezza li d-domanda għat-tipi b’permeabbiltà għolja se tiżdied, id-daqs fil-futur ta’ din id-domanda, madankollu, ma huwiex ċar fil-preżent għaliex il-partijiet interessati għadhom ma taw l-ebda projezzjoni rilevanti sostnuta b’evidenza dwar il-kwistjoni. Madankollu, kif stabbilit hawn fuq, il-Kummissjoni kkonkludiet li ma hemm l-ebda evidenza fil-fajl li turi li l-kontinwazzjoni tal-miżuri twassal għal nuqqas ta’ provvista ta’ tipi ta’ GOES b’permeabbiltà għolja b’tali mod li jimmina l-ilħuq tal-objettivi kif stipulat fil-Grad 2 tar-Regolament tal-UE dwar l-Ekodisinn. Fid-dawl tan-numru limitat ta’ produtturi ta’ GOES madwar id-dinja, il-kontinwazzjoni tal-miżuri pjuttost tikkontribwixxi għal diversità ta’ provvista, anke ta’ tipi ta’ GOES b’permeabbiltà għolja, li ssir dejjem aktar importanti fid-dawl ta’ dawn l-objettivi.

(404)

Fid-dawl ta’ dan ta’ hawn fuq, il-Kummissjoni qieset li l-kontinwazzjoni tal-miżuri eżistenti tippermetti lill-industrija tal-Unjoni terġa’ lura gradwalment għall-profittabbiltà u tagħmel aktar investimenti meħtieġa għall-manifattura u l-iżvilupp tal-gradi ta’ kwalità meħtieġa sabiex tiġi sodisfatta d-domanda akbar ta’ prodotti tal-GOES b’permeabbiltà għolja.

(405)

Jekk il-miżuri kellhom jiskadu, huwa improbabbli li l-industrija tal-Unjoni tkun tista’ tkompli tiżviluppa t-tipi ta’ GOES b’permeabbiltà għolja tagħha u li tkun kapaċi tibqa’ ħajja, meta titqies is-sitwazzjoni ekonomika diffiċli tagħha. Għalhekk, kontinwazzjoni tal-miżuri hija b’mod ċar fl-interess tal-industrija tal-Unjoni.

(406)

Fir-rigward tal-interess tal-utenti, iż-żamma tal-miżuri eżistenti għandha biss impatt limitat fuq il-prezzijiet tat-transformers u fuq l-impjiegi fl-industrija tal-utent.

(407)

Fir-rigward tal-objettiv stipulat fir-Regolament dwar l-Ekodisinn li tiġi żgurata provvista suffiċjenti ta’ tipi ta’ GOES b’permeabbiltà għolja fis-suq tal-Unjoni għal raġunijiet ta’ effiċjenza fl-enerġija, ma ġiex stabbilit li dan l-objettivi ikun imminat mill-impożizzjoni tal-miżuri.

(408)

Fid-dawl ta’ dan ta’ hawn fuq, kollox ma’ kollox u meta jitqies li l-miżuri fil-forma tal-PMI tfasslu sabiex jakkomodaw it-tħassib tal-industrija tal-utenti fir-rigward tal-ħtieġa kontinwa ta’ importazzjonijiet ta’ prodotti tal-GOES b’permeabbiltà għolja, il-Kummissjoni kkonkludiet li ma kien hemm l-ebda raġuni konvinċenti ta’ interess għall-Unjoni kontra l-kontinwazzjoni tal-miżuri eżistenti fuq l-importazzjonijiet ta’ GOES li joriġinaw mill-pajjiżi kkonċernati. Jekk il-miżuri eżistenti jiskadu, dan jista’ jwassal għal tnaqqis fil-prezz fit-tipi kollha ta’ GOES, u l-industrija tal-Unjoni jkollha bżonn tnaqqas aktar il-prezzijiet tal-bejgħ tagħha sabiex tibqa’ attraenti. F’ċirkostanzi bħal dawn, is-sitwazzjoni ekonomika tal-industrija tal-Unjoni tkompli tmur għall-agħar u tipperikola l-vijabbiltà u s-sopravivenza tagħha.

(409)

Wara d-divulgazzjoni, Nippon Steel argumentat li ż-żamma tal-miżuri ma tkunx fl-interess tal-Unjoni peress li dawn kienu ineffettivi filwaqt li kellhom impatt negattiv bla bżonn fuq l-utenti. Barra minn hekk, Nippon Steel argumentat li l-Kummissjoni ma qisitx il-fatt li ċerti utenti fis-settur tal-enerġija mir-riħ diġà qed ibatu l-konsegwenzi negattivi tal-miżuri ta’ difiża kummerċjali reċenti fuq l-inputs, bħad-dazji fuq il-materjali tal-fibra tal-ħġieġ u l-faxex tal-fibra tal-ħġieġ.

(410)

Il-Kummissjoni ma laqgħetx dawn l-allegazzjonijiet għar-raġunijiet li ġejjin. L-ewwel nett, kif stabbilit fil-premessa (309), l-impożizzjoni tal-miżuri fl-2015 inizjalment kellha effett pożittiv fuq is-sitwazzjoni ekonomika tal-industrija tal-Unjoni, b’mod partikolari fl-2017 meta l-industrija tal-Unjoni bdiet tirkupra. It-tieni, il-Kummissjoni rreferiet għall-premessa (388) li tispjega li l-kontinwazzjoni tal-miżuri jkollha biss impatt żgħir fuq il-kostijiet tal-utenti. It-tielet, l-għan ewlieni tal-impożizzjoni ta’ miżuri għad-difiża tal-kummerċ huwa li jerġa’ jkun hemm kundizzjonijiet ekwi fost il-produtturi differenti. Fl-aħħar nett, il-Kummissjoni nnotat li WindEurope, l-assoċjazzjoni tal-industrija għall-enerġija mir-riħ fl-Ewropa, li tirrappreżenta lil aktar minn 400 organizzazzjoni membru, ma sostnietx li l-membri tagħha kienu diġà qed isofru l-konsegwenzi negattivi ta’ miżuri reċenti ta’ difiża kummerċjali fuq l-inputs. Għalhekk, din l-affermazzjoni ta’ Nippon Steel ma hijiex sostanzjata.

(411)

Abbażi tal-konklużjonijiet milħuqa dwar il-probabbiltà ta’ kontinwazzjoni u rikorrenza ta’ dumping u dannu kkawżat mill-importazzjonijiet mill-pajjiżi kkonċernati, u fid-dawl tal-interess tal-Unjoni, il-Kummissjoni kkonkludiet li jenħtieġ li jinżammu l-miżuri anti-dumping fuq l-importazzjonijiet tal-prodott taħt rieżami li joriġinaw miċ-Ċina, mill-Ġappun, mir-Repubblika tal-Korea, mill-Federazzjoni Russa u mill-Istati Uniti tal-Amerika.

(412)

Parti interessata waħda talbet li, jekk il-Kummissjoni tiddeċiedi li huwa essenzjali li tinżamm xi protezzjoni tal-industrija tal-Unjoni minkejja n-nuqqas ovvju tal-miżura anti-dumping tagħha li tindirizza l-problemi strutturali tagħha tal-produtturi tal-Unjoni, il-miżuri jinżammu għal perjodu limitat ta’ sena jew sentejn.

(413)

Il-Kummissjoni ċaħdet din it-talba abbażi tad-dannu mġarrab mill-industrija tal-Unjoni, li ma jiġġustifikax l-impożizzjoni ta’ miżuri għal perjodu iqsar minn ħames snin.

(414)

Ir-rati tad-dazju anti-dumping tal-kumpaniji individwali speċifikati f’dan ir-Regolament japplikaw biss għall-importazzjonijiet tal-prodott taħt rieżami li joriġinaw mill-pajjiżi ikkonċernati u manifatturat mill-entitajiet legali msemmijin. L-importazzjonijiet tal-prodott taħt rieżami manifatturat minn kwalunkwe kumpanija oħra mhux imsemmija b’mod speċifiku fil-parti operattiva ta’ dan ir-Regolament, inklużi l-entitajiet relatati ma’ dawk speċifikament imsemmija, jenħtieġ li jkunu soġġetti għar-rata ta’ dazju applikabbli għall-“kumpaniji l-oħrajn kollha”. Dawn jenħtieġ li ma jiġu soġġetti għal ebda rata individwali ta’ dazju anti-dumping.

(415)

Sabiex jitnaqqsu r-riskji ta’ ċirkumvenzjoni, qiegħed jitqies li jinħtieġu miżuri speċjali f’dan il-każ sabiex jiżguraw l-applikazzjoni xierqa tal-miżuri anti-dumping. Dawn il-miżuri speċjali jinkludu dan li ġej: il-preżentazzjoni lill-awtoritajiet doganali tal-Istati Membri ta’ fattura kummerċjali valida u ċertifikat validu tal-fabbrika, li għandu jikkonforma mar-rekwiżiti mniżżla fl-Artikoli ta’ dan ir-Regolament. L-importazzjonijiet li ma jkunux akkumpanjati b’tali fattura u ċertifikat tal-fabbrika għandhom ikunu soġġetti għal rata ta’ dazju ad valorem applikabbli għall-kumpaniji l-oħra kollha mingħajr referenza għall-prezzijiet minimi ta’ importazzjoni.

(416)

Il-kumpanija tista’ titlob l-applikazzjoni ta’ dawn ir-rati individwali ta’ dazju anti-dumping jekk sussegwentement tbiddel l-isem tal-entità tagħha. It-talba trid tkun indirizzata lill-Kummissjoni (64). It-talba jrid ikun fiha l-informazzjoni rilevanti kollha li turi li l-bidla tal-isem ma taffettwax id-dritt tal-kumpanija li tibbenefika mir-rata tad-dazju li tapplika għaliha. Jekk il-bidla fl-isem tal-kumpanija ma taffettwax id-dritt tagħha li tibbenefika mir-rata tad-dazju li tapplika għaliha, jiġi ppubblikat Regolament dwar il-bidla tal-isem f’Il-Ġurnal Uffiċjali tal-Unjoni Ewropea.

(417)

Fid-dawl tal-Artikolu 109 tar-Regolament (UE, Euratom) 2018/1046 tal-Parlament Ewropew u tal-Kunsill (65), meta ammont ikun irid jiġi rrimborżat wara sentenza tal-Qorti tal-Ġustizzja tal-Unjoni Ewropea, l-imgħax li jrid jitħallas jenħtieġ li jkun ir-rata applikata mill-Bank Ċentrali Ewropew għall-operazzjonijiet ta’ rifinanzjament ewlenin tiegħu, kif ippubblikat fis-serje C ta’ Il-Ġurnal Uffiċjali tal-Unjoni Ewropea fl-ewwel jum kalendarju ta’ kull xahar.

(418)

Il-Kumitat stabbilit permezz tal-Artikolu 15(1) tar-Regolament Bażiku ma tax opinjoni.