(1)

Ir-Regolament (UE) 2015/2283 jipprevedi li huwa biss l-ikel ġdid awtorizzat u inkluż fil-lista tal-Unjoni li jista’ jitqiegħed fis-suq fl-Unjoni. Ikel tradizzjonali minn pajjiż terz huwa ikel ġdid iddefinit fl-Artikolu 3(2)(c) tar-Regolament (UE) 2015/2283.

(2)

Ir-Regolament ta’ Implimentazzjoni tal-Kummissjoni (UE) 2017/2468 (2) jistabbilixxi rekwiżiti amministrattivi u xjentifiċi dwar ikel tradizzjonali minn pajjiżi terzi.

(3)

Skont l-Artikolu 8 tar-Regolament (UE) 2015/2283, ir-Regolament ta’ Implimentazzjoni tal-Kummissjoni (UE) 2017/2470 (3) stabbilixxa lista tal-Unjoni ta’ ikel ġdid awtorizzat.

(4)

Skont l-Artikolu 15(4) tar-Regolament (UE) 2015/2283, il-Kummissjoni jeħtieġ tiddeċiedi dwar l-awtorizzazzjoni u dwar it-tqegħid fis-suq tal-Unjoni ta’ ikel tradizzjonali minn pajjiż terz.

(5)

Fis-6 ta’ Mejju 2020, il-kumpanija Societé de Produits Nestlé SA (“l-applikant”) ippreżentat notifika lill-Kummissjoni bl-intenzjoni tagħha li tqiegħed fis-suq tal-Unjoni l-polpa taċ-ċirasa mnixxfa minn Coffea arabica L. u Coffea canephora Pierre ex A.Froehner u l-infużjoni tagħha bħala ikel tradizzjonali minn pajjiż terz f’konformità mal-Artikolu 14 tar-Regolament (UE) 2015/2283. L-applikant talbet li l-polpa taċ-ċirasa mnixxfa minn Coffea arabica L. u Coffea canephora Pierre ex A.Froehner u l-infużjoni tagħha tintuża bħala ingredjent għall-infużjonijiet (inkluż ix-xarbiet lesti għax-xorb) u xarbiet bit-togħma maħsuba għall-popolazzjoni ġenerali.

(6)

Fit-13 ta’ Novembru 2020, il-kumpanija Luigi Lavazza SpA (“l-applikant”) ippreżentat notifika lill-Kummissjoni bl-intenzjoni tagħha li tqiegħed fis-suq tal-Unjoni l-polpa taċ-ċirasa mnixxfa minn Coffea arabica L. u Coffea canephora Pierre ex A.Froehner u l-infużjoni tagħha bħala ikel tradizzjonali minn pajjiż terz f’konformità mal-Artikolu 14 tar-Regolament (UE) 2015/2283. L-applikant talbet li l-polpa taċ-ċirasa mnixxfa minn Coffea arabica L. u Coffea canephora Pierre ex A.Froehner u l-infużjoni tagħha jintużaw bħala ingredjent għall-infużjonijiet u x-xarbiet bit-togħma maħsuba għall-popolazzjoni ġenerali.

(7)

Skont l-Artikolu 7(2) tar-Regolament ta’ Implimentazzjoni (UE) 2017/2468, il-Kummissjoni talbet informazzjoni addizzjonali mill-applikanti fir-rigward tal-validità tan-notifika. Societé de Produits Nestlé SA ippreżentat l-informazzjoni mitluba fis-17 ta’ Lulju 2020, fis-17 ta’ Novembru 2020 u fit-23 ta’ Diċembru 2020, filwaqt li Luigi Lavazza SpA ippreżentat l-informazzjoni mitluba fit-2 ta’ April 2021.

(8)

Id-data ppreżentata mill-applikanti turi li l-polpa taċ-ċirasa mnixxfa minn Coffea arabica L. u/jew Coffea canephora Pierre ex A.Froehner u l-infużjoni tagħha għandha rekord ta’ użu sikur fl-ikel fil-Jemen, fl-Etjopja u fil-Bolivja.

(9)

Skont l-Artikolu 15(1) tar-Regolament (UE) 2015/2283, fl-4 ta’ Jannar 2021 u fis-6 ta’ April 2021, il-Kummissjoni bagħtet in-notifiki validi lill-Istati Membri u lill-Awtorità Ewropea dwar is-Sigurtà fl-Ikel (“l-Awtorità”).

(10)

L-ebda oġġezzjoni debitament motivata b’rabta mat-tqegħid fis-suq fl-Unjoni tal-polpa taċ-ċirasa mnixxfa minn Coffea arabica L. u/jew Coffea canephora Pierre ex A.Froehner u l-infużjoni tagħha ma tressqet lill-Kummissjoni mill-Istati Membri jew mill-Awtorità fil-perjodu ta’ erba’ xhur stabbilit fl-Artikolu 15(2) tar-Regolament (UE) 2015/2283.

(11)

Fis-27 ta’ Mejju 2021, l-Awtorità ppubblikat “Ir-rapport Tekniku dwar in-notifika tal-polpa taċ-ċirasa tal-kafè minn Coffea arabica L. u Coffea canephora Pierre ex A.Froehner bħala ikel tradizzjonali minn pajjiż terz skont l-Artikolu 14 tar-Regolament (UE) 2015/2283” (4), ibbażat fuq in-notifika minn Société de Produits Nestlé SA.

(12)

Fit-2 ta’ Settembru 2021, l-Awtorità ppubblikat “Ir-Rapport Tekniku dwar in-notifika tal-polpa taċ-ċirasa mnixxfa minn Coffea arabica L. u Coffea canephora Pierre ex A.Froehner bħala ikel tradizzjonali minn pajjiż terz skont l-Artikolu 14 tar-Regolament (UE) 2015/2283” (5), ibbażat fuq in-notifika minn Luigi Lavazza SpA.

(13)

F’dawk ir-rapporti l-Awtorità kkonkludiet li d-data disponibbli dwar il-kompożizzjoni u r-rekord tal-użu propost tal-polpa taċ-ċirasa mnixxfa minn Coffea arabica L. u Coffea canephora Pierre ex A.Froehner u l-infużjoni tagħha ma tqajjimx tħassib dwar is-sikurezza.

(14)

Għalhekk, il-Kummissjoni jenħtieġ li tawtorizza t-tqegħid fis-suq fl-Unjoni tal-polpa taċ-ċirasa mnixxfa minn Coffea arabica L. u/jew Coffea canephora Pierre ex A.Froehner u l-infużjoni tagħha bħala ikel tradizzjonali minn pajjiż terz u taġġorna skont dan il-lista tal-Unjoni ta’ ikel ġdid awtorizzat.

(15)

Fl-opinjoni tagħha l-Awtorità nnotat li l-konsum tax-xarbiet li fihom il-kafeina mhuwiex rakkomandat għat-tfal jew għan-nisa tqal jew għan-nisa li qed ireddgħu jekk il-kontenut tal-kafeina jaqbeż il-150 mg/l, kif stipulat fir-Regolament (UE) Nru 1169/2011 tal-Parlament Ewropew u tal-Kunsill (6). Għalhekk, jekk il-prodott li fih l-ikel il-ġdid ikun fih aktar minn 150 mg/l ta’ kafeina, jenħtieġ li jiġi pprovdut tikkettar sabiex il-konsumaturi jiġu infurmati kif xieraq bil-kontenut tal-kafeina u li l-prodott mhuwiex rakkomandat għat-tfal, għan-nisa tqal jew għan-nisa li qed ireddgħu.

(16)

Għall-polpa taċ-ċirasa tal-kafè mqiegħda fis-suq bħala tali għall-preparazzjoni tal-infużjonijiet, jenħtieġ li jiġi pprovdut tikkettar biex il-konsumatur jiġi informat b’mod xieraq dwar il-preparazzjoni tal-prodott.

(17)

Għalhekk, jenħtieġ li r-Regolament ta’ Implimentazzjoni (UE) 2017/2470 jiġi emendat skont dan,