(1)

Ir-Regolament Delegat tal-Kummissjoni (UE) 2019/625 (3) jistabbilixxi r-rekwiżiti għad-dħul fl-Unjoni ta’ kunsinni ta’ ċerti annimali u oġġetti maħsuba għall-konsum mill-bniedem minn pajjiżi terzi jew reġjuni tagħhom, sabiex jiżgura li jikkonformaw mar-rekwiżiti applikabbli stabbiliti fir-regoli dwar is-sikurezza tal-ikel imsemmija fl-Artikolu 1(2)(a) tar-Regolament (UE) 2017/625 jew mar-rekwiżiti li huma rikonoxxuti bħala tal-inqas ekwivalenti. B’mod partikolari, id-dħul fl-Unjoni ta’ dawk l-oġġetti u l-annimali huwa soġġett għar-rekwiżit li dawn ikunu ġejjin minn pajjiż terz jew reġjun tiegħu li jkun inkluż f’lista f’konformità mal-Artikolu 126(2)(a) tar-Regolament (UE) 2017/625.

(2)

Ir-Regolament ta’ Implimentazzjoni tal-Kummissjoni (UE) 2021/405 (4) jistabbilixxi l-listi ta’ pajjiżi terzi u reġjuni tagħhom li minnhom huwa awtorizzat id-dħul fl-Unjoni ta’ ċerti annimali u oġġetti maħsuba għall-konsum mill-bniedem f’konformità mal-Artikolu 126(2)(a) tar-Regolament (UE) 2017/625.

(3)

Sabiex jiġi elenkat, pajjiż terz jew reġjun tiegħu jrid jikkonforma mar-rekwiżiti stabbiliti fl-Artikolu 127 tar-Regolament (UE) 2017/625 u ma’ dawk stabbiliti fl-Artikolu 4 tar-Regolament Delegat (UE) 2019/625.

(4)

L-Artikolu 4(f) tar-Regolament Delegat (UE) 2019/625 jistabbilixxi li l-eżistenza, l-implimentazzjoni u l-komunikazzjoni ta’ programm ta’ kontroll tar-residwi approvat mill-Kummissjoni, meta applikabbli, ikunu prerekwiżit għall-inklużjoni ta’ pajjiżi terzi jew reġjuni tagħhom fil-lista msemmija fl-Artikolu 126(2)(a) tar-Regolament (UE) 2017/625. Id-Deċiżjoni tal-Kummissjoni 2011/163/UE (5) approvat il-pjanijiet ta’ monitoraġġ tar-residwi sottomessi minn ċerti pajjiżi terzi dwar annimali u prodotti tal-annimali speċifiċi elenkati fl-Anness ta’ dik id-Deċiżjoni.

(5)

Id-Deċiżjoni ta’ Implimentazzjoni tal-Kummissjoni (UE) 2021/2315 (6) neħħiet l-approvazzjoni tal-pjan ta’ monitoraġġ tar-residwi tat-Tuneżija għall-kaċċa salvaġġa. Għaldaqstant, jenħtieġ li t-Tuneżija titneħħa mil-lista ta’ pajjiżi terzi awtorizzati għad-dħul fl-Unjoni ta’ ċerti għasafar tal-kaċċa salvaġġa maħsuba għall-konsum mill-bniedem, stabbiliti fl-Anness III tar-Regolament ta’ Implimentazzjoni (UE) 2021/405. It-Tuneżija ġiet infurmata b’dan.

(6)

Id-Deċiżjoni ta’ Implimentazzjoni (UE) 2021/2315 approvat il-pjan ta’ monitoraġġ għall-Ukrajna għall-gasteropodi tal-baħar fis-subkategorija “molluski”. Minħabba l-fatt li l-Ukrajna pprovdiet evidenza u garanziji xierqa li juru li tissodisfa r-rekwiżiti tal-leġiżlazzjoni tal-Unjoni għad-dħul fl-Unjoni ta’ kunsinni ta’ gasteropodi tal-baħar mill-akkwakultura, jenħtieġ li dak il-pajjiż terz jiżdied fil-lista ta’ pajjiżi terzi jew reġjuni tagħhom li minnhom huwa awtorizzat id-dħul fl-Unjoni ta’ kunsinni ta’ ċerti molluski bivalvi, ekinodermi, tunikati u gastropodi tal-baħar, stabbiliti fl-Anness VIII tar-Regolament ta’ Implimentazzjoni (UE) 2021/405. L-Ukrajna ġiet infurmata b’dan.

(7)

Id-Deċiżjoni ta’ Implimentazzjoni (UE) 2021/2315 qasmet il-kategorija “prodotti tal-akkwakultura” fl-Anness tad-Deċiżjoni 2011/163/UE f’erba’ subkategoriji “ħut bil-pinen”, “prodotti tal-ħut bil-pinen”, eż. kavjar, “krustaċji” u “molluski”. Għal raġunijiet ta’ konsistenza u ċarezza, huwa xieraq li l-Anness IX tar-Regolament ta’ Implimentazzjoni (UE) 2021/405 jiġi emendat sabiex jiġu speċifikati s-subkategoriji tal-prodotti tal-akkwakultura li għalihom huma awtorizzati l-pajjiżi terzi, fejn rilevanti.

(8)

Id-Deċiżjoni ta’ Implimentazzjoni (UE) 2021/2315 approvat il-pjanijiet ta’ monitoraġġ tar-residwi għall-prodotti tal-akkwakultura tal-Albanija, l-Arġentina, il-Belarussja, il-Bożnija-Ħerzegovina, iċ-Ċilì, il-Gżejjer Falkland, il-Gżejjer Faeroe, Isle of Man, Iżrael, il-Ġappun, il-Kenja, Mauritius, il-Moldova, Montenegro, New Zealand, il-Maċedonja ta’ Fuq, is-Serbja, Singapore, l-Iżvizzera, it-Tuneżija, it-Turkija, l-Uganda, l-Ukrajna, ir-Renju Unit u l-Urugwaj, fejn applikabbli, fost l-oħrajn, fir-rigward tas-subkategorija “ħut bil-pinen”. Għaldaqstant, huwa xieraq li l-Anness IX tar-Regolament ta’ Implimentazzjoni (UE) 2021/405 jiġi emendat sabiex jirrifletti dik l-approvazzjoni. Dawk il-pajjiżi terzi ġew infurmati b’dan.

(9)

Id-Deċiżjoni ta’ Implimentazzjoni (UE) 2021/2315 approvat il-pjanijiet ta’ monitoraġġ tar-residwi għall-prodotti tal-akkwakultura tal-Bangladesh, il-Brażil, il-Kanada, iċ-Ċina, il-Kolombja, il-Costa Rica, l-Ekwador, il-Honduras, l-Indja, l-Indoneżja, il-Malasja, il-Messiku, il-Marokk, il-Myanmar/Burma, il-Panama, il-Perù, il-Filippini, is-Sawdija Arabja, il-Korea t’Isfel, is-Sri Lanka, it-Tajwan, it-Tajlandja, l-Istati Uniti u l-Vjetnam, fejn applikabbli fost l-oħrajn, fir-rigward tas-subkategoriji “ħut bil-pinen” u “krustaċji”. Għaldaqstant, huwa xieraq li l-Anness IX tar-Regolament ta’ Implimentazzjoni (UE) 2021/405 jiġi emendat sabiex jirrifletti dik l-approvazzjoni. Dawk il-pajjiżi terzi ġew infurmati b’dan.

(10)

Id-Deċiżjoni ta’ Implimentazzjoni (UE) 2021/2315 approvat il-pjanijiet ta’ monitoraġġ tar-residwi għall-prodotti tal-akkwakultura tal-Belize, il-Brunei, Kuba, il-Gwatemala, il-Mozambique, New Caledonia, in-Nikaragwa, in-Niġerja, it-Tanzanija u l-Venezwela, fir-rigward tas-subkategorija “krustaċji”. Għaldaqstant, huwa xieraq li l-Anness IX tar-Regolament ta’ Implimentazzjoni (UE) 2021/405 jiġi emendat sabiex jirrifletti dik l-approvazzjoni. Dawk il-pajjiżi terzi ġew infurmati b’dan.

(11)

Id-Deċiżjoni ta’ Implimentazzjoni (UE) 2021/2315 approvat il-pjan ta’ monitoraġġ tar-residwi tal-Iran fir-rigward tas-subkategoriji “prodotti tal-ħut bil-pinen (il-kavjar)” u “krustaċji”. Minħabba l-fatt li l-Iran issa pprovda evidenza u garanziji xierqa li juru li jissodisfa r-rekwiżiti tal-leġiżlazzjoni tal-Unjoni għad-dħul fl-Unjoni ta’ kunsinni ta’ prodotti tal-ħut bil-pinen (kavjar) u ta’ krustaċji mill-akkwakultura, jenħtieġ li tiġi emendata l-entrata tiegħu fil-lista ta’ pajjiżi terzi jew reġjuni tagħhom awtorizzati għad-dħul fl-Unjoni ta’ kunsinni ta’ ċerti prodotti tas-sajd, stabbiliti fl-Anness IX tar-Regolament ta’ Implimentazzjoni (UE) 2021/405. L-Iran ġie infurmat b’dan.

(12)

Id-Deċiżjoni ta’ Implimentazzjoni (UE) 2021/2315 irtirat l-approvazzjoni tal-pjan ta’ monitoraġġ tar-residwi tal-Oman għall-ħut bil-pinen. Għaldaqstant, jenħtieġ li l-Oman jitneħħa mil-lista ta’ pajjiżi terzi jew reġjuni tagħhom awtorizzati għad-dħul fl-Unjoni ta’ kunsinni ta’ ċerti prodotti tas-sajd, stabbiliti fl-Anness IX tar-Regolament ta’ Implimentazzjoni (UE) 2021/405. L-Oman ġie infurmat b’dan.

(13)

L-Anness XI tar-Regolament ta’ Implimentazzjoni (UE) 2021/405 jistabbilixxi l-lista ta’ pajjiżi terzi jew reġjuni tagħhom li minnhom huwa awtorizzat id-dħul fl-Unjoni ta’ kunsinni ta’ koxox taż-żrinġijiet u tal-bebbux. Jenħtieġ li l-Georgia u r-Russja jiżdiedu f’dik il-lista għall-bebbux peress li pprovdew evidenza u garanziji xierqa li juru li jissodisfaw ir-rekwiżiti tal-leġiżlazzjoni tal-Unjoni għad-dħul fl-Unjoni ta’ kunsinni ta’ dawk l-oġġetti.

(14)

Id-Deċiżjoni tal-Kummissjoni 2007/82/KE (7) tirrikjedi lill-Istati Membri jipprojbixxu l-importazzjoni mill-Guinea tal-prodotti tas-sajd kollha maħsuba għal konsum mill-bniedem. Fl-2019, il-Kummissjoni wettqet awditu fil-Guinea, sabiex tevalwa s-sistemi ta’ kontroll fis-seħħ li jirregolaw il-prodotti tas-sajd maħsuba għal konsum mill-bniedem u għall-esportazzjoni lejn l-Unjoni. Fis-7 ta’ Mejju 2021, il-Kummissjoni infurmat lill-Guinea li l-informazzjoni pprovduta kienet sodisfaċenti u li l-awditu tal-2019 kien ingħalaq b’suċċess. Għaldaqstant, jenħtieġ li d-Deċiżjoni 2007/82/KE titħassar. Fid-dawl tal-eżitu tal-awditu, huwa xieraq li l-Guinea tibqa’ tiġi elenkata fl-Anness IX tar-Regolament ta’ Implimentazzjoni (UE) 2021/405 bħala pajjiż terz li minnu huwa awtorizzat id-dħul fl-Unjoni ta’ kunsinni ta’ ħut salvaġġ maqbud li ma jkun għadda mill-ebda operazzjoni ta’ preparat jew ta’ proċessar għajr il-qtugħ ta’ ras, l-evixxerazzjoni, it-tkessiħ jew l-iffriżar.

(15)

Għalhekk, jenħtieġ li l-Annessi III, VIII, IX u XI tar-Regolament ta’ Implimentazzjoni (UE) 2021/405 jiġu emendati skont dan.

(16)

Għal raġunijiet ta’ konsistenza mad-Deċiżjoni 2011/163/UE u fl-interess taċ-ċertezza legali, jenħtieġ li dan ir-Regolament jidħol fis-seħħ b’urġenza,

(17)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf.