RAKKOMANDAZZJONI TAL-KUNSILL

tas-16 ta’ Ġunju 2022

dwar approċċ Ewropew għall-mikrokredenzjali għall-apprendiment tul il-ħajja u għall-impjegabbiltà

(2022/C 243/02)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikoli 149 u 292, 165 u 166 tiegħu,

Wara li kkunsidra l-proposta tal-Kummissjoni Ewropea,

Billi:

Fl-Ewropa hemm għadd dejjem akbar ta’ persuni li jridu jaġġornaw u jtejbu l-għarfien, il-ħiliet u l-kompetenzi tagħhom sabiex jitnaqqas id-distakk bejn l-edukazzjoni formali u t-taħriġ tagħhom, u l-ħtiġijiet ta’ soċjetà u suq tax-xogħol li qegħdin jinbidlu b’rata mgħaġġla. L-irkupru mill-pandemija tal-COVID-19 u t-tranżizzjoni diġitali kif ukoll dik ekoloġika ħaffew il-pass tal-bidla fil-mod kif ngħixu, nitgħallmu u naħdmu. Enfasizzaw ukoll il-ħtieġa li n-nies ikunu mgħammra aħjar biex jindirizzaw l-isfidi attwali u futuri. Il-pandemija affettwat il-prospetti tal-karriera kemm taż-żgħażagħ kif ukoll tal-adulti. Żiedet ukoll il-qgħad u għamlet ħsara lill-benesseri fiżiku, mentali u emozzjonali ta’ mijiet ta’ miljuni ta’ persuni fl-Ewropa.

Waħda mill-isfidi ewlenin li qegħdin jiffaċċaw in-negozji u l-impjegaturi Ewropej hija provvista insuffiċjenti ta’ ħiliet rilevanti fis-suq tax-xogħol tal-UE. Fl-istess waqt, il-ħaddiema qed jiffaċċaw bidliet mingħajr preċedent fil-mod kif jiġi organizzat ix-xogħol. Barra minn hekk, il-profili tal-kompiti u r-rekwiżiti tal-ħiliet qegħdin jinbidlu b’mod fundamentali minħabba t-tranżizzjoni ekoloġika u dik diġitali. Kif deskritt fid-Deċiżjoni tal-Kunsill (UE) 2021/1868 tal-15 ta’ Ottubru 2021 dwar linji gwida għall-politiki dwar l-impjiegi tal-Istati Membri (1), “l-Istati Membri u l-Unjoni jridu jaħdmu biex tiġi żviluppata strateġija kkoordinata għall-impjiegi u b’mod partikolari biex tiġi promossa forza tax-xogħol b’ħiliet, imħarrġa u adattabbli, kif ukoll swieq tax-xogħol li jkunu orjentati lejn il-ġejjieni u jwieġbu għat-tibdil ekonomiku”. Titjib u tiġdid kontinwi tal-ħiliet huma essenzjali għall-ħaddiema biex jiġu indirizzati l-ħtiġijiet tal-impjieg attwali tagħhom jew għat-tranżizzjoni għal impjiegi ġodda u setturi li qegħdin jespandu, bħas-setturi ekoloġiċi u diġitali, b’mod partikolari fil-kuntest tat-tixjiħ demografiku.

In-nies iridu aċċess għal tagħlim u apprendiment ta’ kwalità pprovduti b’modi u f’ambjenti differenti, sabiex jiżviluppaw l-għarfien, il-ħiliet u l-kompetenzi personali, soċjali, kulturali u professjonali tagħhom. Kien hemm appelli biex is-sistemi tal-edukazzjoni u t-taħriġ isiru aktar flessibbli u biex jinstabu soluzzjonijiet li jipprovdu apprendiment aktar iċċentrat fuq l-istudent, aċċessibbli u inklużiv għal firxa usa’ ta’ profili. Il-fornituri mhux formali tal-edukazzjoni u t-taħriġ qegħdin jindirizzaw ukoll din il-ħtieġa billi jipprovdu opportunitajiet ġodda u innovattivi għat-titjib u t-tiġdid tal-ħiliet.

Kultura effettiva ta’ apprendiment tul il-ħajja hija kruċjali sabiex jiġi żgurat li kulħadd ikollu l-għarfien, il-ħiliet u l-kompetenzi li jeħtieġ sabiex jirnexxi fis-soċjetà, fis-suq tax-xogħol u fil-ħajja personali tiegħu. Huwa essenzjali li n-nies ikunu jistgħu jaċċessaw edukazzjoni u taħriġ rilevanti u ta’ kwalità, titjib u tiġdid tal-ħiliet matul ħajjithom. L-opportunitajiet ta’ apprendiment tul il-ħajja għandhom ikunu parti mill-istrateġija fit-tul tal-istituzzjonijiet tal-edukazzjoni u t-taħriġ sabiex itejbu r-rispons tagħhom għall-ħtiġijiet tal-impjegaturi u tal-istudenti li jinbidlu b’rata mgħaġġla. Dan ser jippermetti lil korp aktar divers ta’ studenti (inkluż il-gradwati ta’ dawn l-istituzzjonijiet u studenti adulti oħrajn) itejbu u jġeddu l-ħiliet. Hu rakkomandat li l-istituzzjonijiet tal-edukazzjoni għolja, l-istituzzjonijiet tal-edukazzjoni u t-taħriġ vokazzjonali (VET), il-fornituri tat-tagħlim għall-adulti u fornituri oħrajn ta’ mikrokredenzjali, inkluż impjegaturi, jikkooperaw u jintegraw l-aħħar sejbiet tar-riċerka fit-tfassil u fl-aġġornament tal-opportunitajiet ta’ apprendiment.

Il-mikrokredenzjali jistgħu jgħinu sabiex jiġu ċċertifikati l-eżiti ta’ esperjenzi żgħar ta’ apprendiment imfassla apposta. Dawn jagħmlu possibbli l-kisba mmirata u flessibbli tal-għarfien, il-ħiliet u l-kompetenzi sabiex jiġu ssodisfati ħtiġijiet ġodda u emerġenti fis-soċjetà u fis-suq tax-xogħol u jagħmluha possibbli għall-individwi biex jeliminaw in-nuqqasijiet fil-ħiliet li jeħtieġu biex jirnexxu f’ambjent li qed jinbidel b’rata mgħaġġla, mingħajr ma jissostitwixxu l-kwalifiki tradizzjonali. Fejn xieraq, jistgħu jikkomplementaw kwalifiki eżistenti u jipprovdu valur miżjud filwaqt li ma jdgħajfux il-prinċipju ewlieni ta’ programmi ta’ lawrja sħiħa f’edukazzjoni inizjali u f’taħriġ. Il-mikrokredenzjali jistgħu jitfasslu u jinħarġu minn fornituri varji f’ambjenti ta’ apprendiment differenti (ambjenti formali, mhux formali u informali).

Minkejja l-użu dejjem akbar tagħhom, ma hemm l-ebda definizzjoni jew standard komuni għall-mikrokredenzjali fl-Ewropa. Dan jillimita l-fehim u l-adozzjoni tal-mikrokredenzjali, u għalhekk idgħajjef il-potenzjal tal-mikrokredenzjali li jiffaċilitaw apprendiment u perkorsi tal-karriera flessibbli. Din ir-rakkomandazzjoni għandha l-għan li tappoġġa l-bini tal-fiduċja fil-mikrokredenzjali madwar l-Ewropa fost dawk kollha involuti, kemm fornituri kif ukoll benefiċjarji.

Fl-ewwel prinċipju tiegħu, il-Pilastru Ewropew tad-Drittijiet Soċjali (2) jiddikjara li kulħadd għandu d-dritt għal edukazzjoni, taħriġ u apprendiment tul il-ħajja ta’ kwalità u inklużivi sabiex iżomm u jikseb ħiliet li jippermettu parteċipazzjoni sħiħa fis-soċjetà u maniġġar b’suċċess ta’ tranżizzjonijiet fis-suq tax-xogħol, fl-Unjoni Ewropea kollha. Ir-raba’ prinċipju tal-Pilastru Ewropew tad-Drittijiet Soċjali jiddikjara li kulħadd għandu d-dritt għal assistenza f’waqtha u mfassla apposta għat-titjib tal-prospetti tiegħu tal-impjieg jew tal-impjieg indipendenti. Dan id-dritt għall-assistenza jinkludi d-dritt li jingħata appoġġ għat-taħriġ u għall-kwalifikazzjoni mill-ġdid. Il-Pjan ta’ Azzjoni tal-Pilastru Ewropew tad-Drittijiet Soċjali jirreferi għall-mikrokredenzjali bħala strument innovattiv li “jista’ jiffaċilita perkorsi ta’ apprendiment flessibbli u jappoġġa lill-ħaddiema fuq l-impjieg tagħhom jew matul tranżizzjonijiet professjonali”. Il-mikrokredenzjali jista’ jkollhom rwol fit-twettiq tal-miri ewlenin tal-UE li għandhom jintlaħqu sal-2030, inkluż mira li 60 % tal-adulti kollha jipparteċipaw f’taħriġ kull sena u rata ta’ impjieg ta’ mill-anqas 78 %. Dawn iż-żewġ miri ntlaqgħu tajjeb mill-mexxejja tal-UE, mis-sħab soċjali u mis-soċjetà ċivili, fis-Summit Soċjali ta’ Porto u mbagħad mill-Kunsill Ewropew fil-laqgħa tiegħu fl-24-25 ta’ Ġunju 2021 (3).

B’mod parallel mal-Pjan ta’ Azzjoni, il-Kummissjoni adottat Rakkomandazzjoni dwar appoġġ attiv effettiv għall-impjiegi wara l-kriżi tal-COVID-19 (ir-Rakkomandazzjoni “EASE”) (4). Ir-Rakkomandazzjoni toffri gwida politika konkreta lill-Istati Membri dwar l-iżvilupp ta’ pakketti ta’ politika koerenti sabiex jiffaċilitaw it-tranżizzjonijiet minn impjieg għal ieħor u jrawmu rkupru mill-COVID-19 li jwassal għall-ħolqien abbundanti ta’ impjiegi. Il-gwida ta’ politika tkopri opportunitajiet għat-titjib u għat-tiġdid tal-ħiliet u miżuri ta’ appoġġ.

L-Aġenda għall-Ħiliet għall-Ewropa (5) ħabbret, fost it-12-il azzjoni ewlenija tagħha, inizjattiva ġdida dwar approċċ Ewropew għall-mikrokredenzjali. Din l-inizjattiva ġdida għandha l-għan li tappoġġa l-kwalità, it-trasparenza u l-adozzjoni tal-mikrokredenzjali fl-UE. L-Aġenda għall-Ħiliet ħabbret ukoll inizjattiva dwar kontijiet individwali tal-apprendiment li tista’ tgħin fit-tnaqqis ta’ distakki eżistenti fl-aċċess għall-edukazzjoni u t-taħriġ għall-adulti fl-età tax-xogħol u tippermetti lin-nies jimmaniġġaw it-tranżizzjonijiet fis-suq tax-xogħol b’suċċess. Il-mikrokredenzjali jistgħu jintużaw bħala parti mill-edukazzjoni u t-taħriġ magħmula disponibbli għan-nies sabiex isostnu t-tħaddim ta’ dawn il-kontijiet individwali ta’ apprendiment.

10.

Il-Komunikazzjoni tal-Kummissjoni dwar il-kisba sal-2025 taż-Żona Ewropea tal-Edukazzjoni (6) ħabbret li l-Kummissjoni ser taħdem lejn l-iżvilupp ta’ approċċ Ewropew għall-mikrokredenzjali, biex tgħin twessa’ l-opportunitajiet ta’ tagħlim u ssaħħaħ ir-rwol kemm tal-istituzzjonijiet tal-edukazzjoni għolja kif ukoll tal-istituzzjonijiet tal-edukazzjoni u t-taħriġ vokazzjonali fl-apprendiment tul il-ħajja.

11.	Ir-Rakkomandazzjoni tal-Kunsill dwar l-edukazzjoni u t-taħriġ vokazzjonali (VET) għall-kompetittività sostenibbli, il-ġustizzja soċjali u r-reżiljenza (7) titlob lill-Kummissjoni biex “tesplora l-kunċett u l-użu tal-mikrokredenzjali”.

12.

Ir-Riżoluzzjoni tal-Kunsill dwar qafas strateġiku għall-kooperazzjoni Ewropea fl-edukazzjoni u t-taħriġ lejn iż-Żona Ewropea tal-Edukazzjoni u lil hinn (2021-2030) (8) tippreżenta l-esplorazzjoni tal-kunċett u l-użu tal-mikrokredenzjali bħala waħda mill-kwistjonijiet u azzjonijiet konkreti għaż-żona tal-prijorità 2 tal-qafas strateġiku (Tagħlim tul il-ħajja u mobbiltà).

13.

Il-konklużjonijiet tal-Kunsill dwar l-inizjattiva tal-Universitajiet Ewropej – Inqarrbu l-edukazzjoni għolja, ir-riċerka, l-innovazzjoni u s-soċjetà: Inwittu t-triq għal dimensjoni ġdida fl-edukazzjoni għolja Ewropea (9) jenfasizzaw li “għalkemm ma jiddevjawx mill-prinċipju ewlieni ta’ programmi ta’ lawrja sħiħa u lanqas ma jdgħajfuh, il-mikrokredenzjali jistgħu jgħinu jwessgħu l-opportunitajiet ta’ apprendiment biex jakkomodaw studenti mhux tradizzjonali u d-domanda għal ħiliet ġodda fis-suq tax-xogħol; jagħmlu l-esperjenza ta’ apprendiment aktar flessibbli u modulari; jappoġġaw l-aċċess għall-edukazzjoni għolja; u jinvolvu lill-istudenti, irrispettivament mill-kwalifiki preċedenti jew mill-kuntest tagħhom, filwaqt li jippromwovu opportunitajiet ta’ taħriġ mill-ġdid u ta’ titjib tal-ħiliet u jiżguraw edukazzjoni ta’ kwalità”.

14.

Il-Ministri għall-Edukazzjoni taż-Żona Ewropea tal-Edukazzjoni Għolja impenjaw ruħhom fil-Komunikat ta’ Ruma dwar il-Proċess intergovernattiv ta’ Bolonja (10) sabiex jgħinu lill-istituzzjonijiet tal-edukazzjoni għolja tagħhom: (i) jiddiversifikaw l-offerta ta’ apprendiment tagħhom; u (ii) jinnovaw fil-kontenut edukattiv u l-modi ta’ provvediment. Minbarra l-programmi ta’ lawrja sħiħa, u filwaqt li jżommu d-dritt tagħhom li jfasslu programmi ta’ studju u li jirregolaw kwistjonijiet ta’ trasferiment ta’ kreditu b’mod indipendenti, ħafna istituzzjonijiet tal-edukazzjoni għolja joffru jew qegħdin jippjanaw li joffru unitajiet iżgħar ta’ apprendiment. Dawn l-unitajiet iżgħar jistgħu jgħinu lill-istudenti jiżviluppaw jew jaġġornaw il-ħiliet u l-kompetenzi kulturali, professjonali u trasversali tagħhom f’diversi stadji f’ħajjithom. Il-kooperazzjoni fi ħdan il-proċess ta’ Bolonja ser tesplora kif, u kemm, dawn l-unitajiet iżgħar u flessibbli ta’ apprendiment – inkluż dawk li jwasslu għall-mikrokredenzjali – jistgħu jiġu definiti, żviluppati, implimentati u rikonoxxuti bl-użu ta’ għodod komuni.

15.

Is-sistemi tal-edukazzjoni u t-taħriġ għandhom jipprevedu l-ħtiġijiet, l-abbiltajiet u l-kapaċitajiet individwali differenti tal-istudenti kollha. Għandhom joffru wkoll opportunitajiet ta’ apprendiment lil kulħadd, inkluż f’ambjenti mhux formali u informali kif enfasizzat fil-konklużjonijiet tal-Kunsill dwar l-ekwità u l-inklużjoni fl-edukazzjoni u t-taħriġ sabiex jiġi promoss is-suċċess edukattiv għal kulħadd (11). Il-mikrokredenzjali mfassla tajjeb jistgħu jintużaw bħala parti minn miżuri mmirati sabiex jappoġġaw l-inklużjoni u l-aċċessibbiltà għall-edukazzjoni u t-taħriġ għal firxa usa’ ta’ studenti. Din il-firxa usa’ ta’ studenti tinkludi gruppi żvantaġġati u vulnerabbli (bħal persuni b’diżabilità, anzjani, persuni b’livell baxx ta’ kwalifiki/ħiliet, minoranzi, persuni bi sfond ta’ migrazzjoni, refuġjati u persuni b’anqas opportunitajiet minħabba l-pożizzjoni ġeografika tagħhom u/jew is-sitwazzjoni soċjoekonomika żvantaġġata tagħhom). Il-mikrokredenzjali jistgħu jintużaw ukoll biex jgħinu lill-istudenti jorjentaw ruħhom u biex jiffaċilitaw l-aċċess għall-apprendiment u t-taħriġ, u s-suċċess fihom, u biex jingħata appoġġ għat-tranżizzjoni mill-iskola għax-xogħol. It-tkabbir mistenni fl-għadd ta’ refuġjati u applikanti għall-ażil ser jirrikjedi l-iżvilupp ta’ strateġiji sabiex dawn il-gruppi jiġu integrati b’mod effettiv fis-sistemi tal-edukazzjoni, tat-taħriġ u tax-xogħol. Il-gwida u l-apprendiment reċiproku fl-UE b’rabta mat-tfassil u l-ħruġ tal-mikrokredenzjali jistgħu jrawmu l-inklużjoni u jiżguraw li l-istudenti mill-gruppi kollha tas-soċjetà jkunu jistgħu jaċċessaw il-benefiċċji tagħhom.

16.	Il-mikrokredenzjali jistgħu jappoġġaw ukoll l-iżvilupp professjonali u l-mobbiltà tal-ħaddiema, inkluż nies f’forom ta’ impjieg mhux standard, bħal dawk fl-ekonomija tal-pjattaformi (12), li jista’ jkollhom diffikultajiet biex jaċċessaw taħriġ skont l-istatus fl-impjieg tagħhom (13).

17.

Il-mikrokredenzjali jista’ jkollhom rwol attiv fit-twettiq ta’ inizjattivi ta’ politika tal-UE sabiex javvanzaw it-tranżizzjonijiet diġitali u ekoloġika. Il-mikrokredenzjali jistgħu: (i) isostnu l-għanijiet tal-Pjan ta’ Azzjoni dwar l-Edukazzjoni Diġitali 2021-2027 (14) sabiex jgħinu fl-għoti ta’ opportunitajiet ta’ apprendiment flessibbli u aċċessibbli għall-ħiliet diġitali; u (ii) jilħqu l-miri tal-pjan “Kumpass Diġitali 2030” tal-Kummissjoni sabiex sal-2030 tiġi żviluppata popolazzjoni b’ħiliet diġitali kif ukoll professjonisti diġitali b’ħiliet għolja fl-Ewropa. Il-mikrokredenzjali jistgħu jaqdu wkoll rwol fit-twettiq tal-Patt Ekoloġiku Ewropew (15) li huwa l-istrateġija ta’ tkabbir tal-Ewropa li għandu l-għan li jittrasforma l-ekonomija u s-soċjetà tagħha u jpoġġihom fi triq aktar sostenibbli.

18.

Ir-Rakkomandazzjoni tal-Kunsill dwar il-Qafas Ewropew tal-Kwalifiki għat-tagħlim tul il-ħajja u li tħassar ir-Rakkomandazzjoni tal-Parlament Ewropew u tal-Kunsill tat-23 ta’ April 2008 dwar l-istabbiliment ta’ Qafas Ewropew tal-Kwalifiki għat-tagħlim tul il-ħajja (16) tipprevedi qafas komuni ta’ referenza biex tgħin lin-nies u lill-organizzazzjonijiet iqabblu kemm sistemi ta’ kwalifika differenti kif ukoll il-livelli ta’ kwalifika minn dawk is-sistemi. Bħala qafas ta’ referenza Ewropew, il-Qafas Ewropew tal-Kwalifiki (QEK) huwa miftuħ għat-tipi u l-livelli kollha ta’ kwalifiki u jirrappreżenta r-referenza standard komuni għat-trasparenza, il-portabbiltà u l-komparabbiltà. Il-QEK huwa miftuħ ukoll għall-mikrokredenzjali jekk u fejn huma l-ewwel inklużi fl-oqfsa nazzjonali tal-kwalifiki.

19.

Ir-Rakkomandazzjoni tal-Kunsill tal-20 ta’ Diċembru 2012 dwar il-validazzjoni tat-tagħlim mhux formali u informali (17) stiednet lill-Istati Membri jistabbilixxu sal-2018 – skont iċ-ċirkostanzi u l-ispeċifiċitajiet nazzjonali u kif iqisu xieraq – arranġamenti għall-validazzjoni tal-apprendiment mhux formali u informali. Dawn l-arranġamenti għall-validazzjoni jfissru li n-nies jista’ jkollhom il-validazzjoni tal-għarfien, il-ħiliet u l-kompetenzi li jkunu kisbu permezz ta’ apprendiment mhux formali u informali. Dawn l-arranġamenti għall-validazzjoni jippermettu wkoll lin-nies jiksbu kwalifika sħiħa jew, fejn applikabbli, kwalifika parzjali. L-evalwazzjoni tal-2020 tar-Rakkomandazzjoni (18) talbet għal aktar żvilupp tar-rabtiet bejn il-validazzjoni u l-mikrokredenzjali.

20.

Id-Deċiżjoni (UE) 2018/646 tal-Parlament Ewropew u tal-Kunsill tat-18 ta’ April 2018 dwar qafas komuni għall-għoti ta’ servizzi aħjar għall-ħiliet u l-kwalifiki (Europass) u li tħassar id-Deċiżjoni Nru 2241/2004/KE (19) tistabbilixxi l-bażi għall-għoti ta’ għodod online biex in-nies ikunu jistgħu jimmaniġġaw il-karriera u l-apprendiment tul il-ħajja tagħhom b’servizzi ta’ awtentikazzjoni għall-kredenzjali li jagħmlu l-mikrokredenzjali portabbli.

21.

Ir-rilevanza, l-iżvilupp u l-aġġornament tal-mikrokredenzjali jiddependu fuq:

i)	il-kooperazzjoni u l-kollaborazzjoni bejn l-awtoritajiet reġjonali u nazzjonali, l-organizzazzjonijiet tal-edukazzjoni u tat-taħriġ u;

ii)	djalogu soċjali settorjali u transindustrijali (dan id-djalogu soċjali għandu jinvolvi organizzazzjonijiet li jirrappreżentaw lill-ħaddiema u lill-impjegaturi kemm mis-settur privat kif ukoll minn dak pubbliku, intrapriżi żgħar u medji (SMEs), u persunal professjonali u maniġerjali).

22.

Din ir-Rakkomandazzjoni tirrispetta bis-sħiħ il-prinċipji tas-sussidjarjetà u l-proporzjonalità, il-prinċipji tal-awtonomija istituzzjonali u l-libertà akkademika, u r-responsabbiltà tal-Istati Membri għall-kontenut u l-organizzazzjoni tal-edukazzjoni u t-taħriġ vokazzjonali f’konformità maċ-ċirkostanzi nazzjonali, u f’kooperazzjoni mill-qrib mal-partijiet ikkonċernati rilevanti kollha.

23.	Din ir-Rakkomandazzjoni hi mingħajr preġudizzju għad-Direttiva 2005/36/KE kif emendata bid-Direttiva 2013/55/UE dwar ir-rikonoxximent ta’ kwalifiki professjonali u r-reġim ta’ rikonoxximent awtomatiku previsti fiha,

ADOTTA DIN IR-RAKKOMANDAZZJONI li għandha tiġi implimentata f’konformità mal-leġiżlazzjoni u l-prijoritajiet reġjonali, nazzjonali u tal-Unjoni, iċ-ċirkostanzi nazzjonali u r-riżorsi disponibbli, inkluż is-sitwazzjoni soċjoekonomika u l-karatteristiċi tas-sistemi nazzjonali tal-edukazzjoni, it-taħriġ, l-apprendiment tul il-ħajja u l-impjiegi, u f’kooperazzjoni mill-qrib mal-partijiet ikkonċernati rilevanti kollha:

Objettivi

Huwa rrakkomandat li l-Istati Membri jadottaw approċċ Ewropew għall-mikrokredenzjali bl-objettiv li:

l-individwi jkunu jistgħu jiksbu, jaġġornaw u jtejbu l-għarfien, il-ħiliet u l-kompetenzi li jeħtieġu sabiex jirnexxu f’suq tax-xogħol u f’soċjetà li qegħdin jevolvu, sabiex jibbenefikaw bis-sħiħ minn irkupru soċjalment ġust u minn tranżizzjonijiet ġusti għall-ekonomija ekoloġika u diġitali u biex ikunu mgħammra aħjar biex jindirizzaw sfidi attwali u futuri;

b)	tiġi appoġġata t-tħejjija tal-fornituri ta’ mikrokredenzjali biex itejbu l-kwalità, it-trasparenza, l-aċċessibbiltà u l-flessibbiltà tal-offerta ta’ apprendiment sabiex l-individwi jingħataw is-setgħa li jsawru perkorsi personalizzati ta’ apprendiment u tal-karriera;

c)	jitrawmu l-inklużività, l-aċċess u opportunitajiet indaqs u jkun hemm kontribut għall-kisba tar-reżiljenza, il-ġustizzja soċjali u l-prosperità għal kulħadd, f’kuntest ta’ bidliet demografiċi u soċjetali u matul il-fażijiet kollha taċ-ċikli ekonomiċi.

Huwa rrakkomandat li l-Istati Membri jużaw il-mikrokredenzjali, fejn xieraq, bħala għodda biex isaħħu u jikkomplementaw l-opportunitajiet ta’ apprendiment eżistenti, iżidu l-parteċipazzjoni fl-apprendiment tul il-ħajja u jgħinu biex tintlaħaq il-mira li 60 % tal-adulti kollha jipparteċipaw fit-taħriġ kull sena kif stabbilit fil-Pjan ta’ Azzjoni tal-Pilastru Ewropew tad-Drittijiet Soċjali u kif milqugħ mill-mexxejja tal-UE u approvat bir-Riżoluzzjoni tal-Kunsill dwar aġenda Ewropea ġdida għat-tagħlim għall-adulti 2021-2030 (20).

Kamp ta’ applikazzjoni

Din ir-Rakkomandazzjoni tkopri l-mikrokredenzjali, kif ukoll il-politiki li jistgħu jappoġġaw it-tfassil, il-ħruġ u l-użu effettiv tagħhom.

Il-mikrokredenzjali jistgħu jintużaw biex jikkomplementaw u jtejbu l-edukazzjoni, it-taħriġ, l-apprendiment tul il-ħajja u l-ekosistemi tal-impjegabbiltà. Il-miżuri deskritti f’din ir-Rakkomandazzjoni għandhom l-għan li jsaħħu l-opportunitajiet għall-apprendiment u l-impjegabbiltà mingħajr ma jfixklu s-sistemi tal-edukazzjoni inizjali, l-edukazzjoni għolja, l-edukazzjoni u t-taħriġ vokazzjonali, u mingħajr ma jdgħajfu u jissostitwixxu l-kwalifiki u l-lawrji eżistenti. Il-miżuri jirrakkomandaw l-istabbiliment ta’ approċċ Ewropew komuni għall-għoti kontinwu u emerġenti ta’ mikrokredenzjali fl-Unjoni Ewropea u jistabbilixxu definizzjoni u gwida għat-tfassil, il-ħruġ u d-deskrizzjoni tal-mikrokredenzjali biex jittejbu l-kwalità u t-trasparenza tagħhom u tiġi ffaċilitata l-adozzjoni tagħhom.

Definizzjonijiet

Għall-finijiet ta’ din ir-Rakkomandazzjoni, għandhom japplikaw dawn id-definizzjonijiet:

“Mikrokredenzjali” tfisser ir-rekord tal-eżiti tal-apprendiment li student ikun kiseb wara volum żgħir ta’ apprendiment. Dawn l-eżiti tal-apprendiment ikunu ġew ivvalutati skont kriterji trasparenti u ddefiniti b’mod ċar. L-esperjenzi ta’ apprendiment li jwasslu għall-mikrokredenzjali huma mfassla biex jipprovdu lill-istudent b’għarfien, ħiliet u kompetenzi speċifiċi li jirrispondu għall-ħtiġijiet tas-soċjetà, personali, kulturali jew tas-suq tax-xogħol. Il-mikrokredenzjali huma proprjetà tal-istudent, jistgħu jiġu kondiviżi u huma portabbli. Dawn jistgħu jkunu indipendenti jew ikkombinati fi kredenzjali akbar. Dawn huma sostnuti b’assigurazzjoni tal-kwalità skont standards miftiehma fis-settur jew fil-qasam rilevanti ta’ attività.

“Fornituri ta’ mikrokredenzjali” tfisser istituzzjonijiet u organizzazzjonijiet tal-edukazzjoni u t-taħriġ, sħab soċjali (jiġifieri organizzazzjonijiet li jirrappreżentaw lill-ħaddiema u lill-impjegaturi), impjegaturi u industrija, organizzazzjonijiet tas-soċjetà ċivili, servizzi pubbliċi tal-impjiegi u awtoritajiet reġjonali u nazzjonali, u tipi oħra ta’ atturi li jfasslu, jipprovdu u joħorġu l-mikrokredenzjali għal apprendiment formali, mhux formali u informali. Dan huwa mingħajr preġudizzju għal-leġiżlazzjoni u ċ-ċirkostanzi reġjonali u nazzjonali.

c)	“Ambjenti ta’ apprendiment” tfisser il-postijiet, il-kuntesti u l-kulturi differenti fiżiċi, online, imħallta (21), virtwali u diġitali, li fihom in-nies jitgħallmu, li jinkludu l-kuntesti kollha li fihom jista’ jseħħ apprendiment formali, mhux formali u informali.

“Apprendiment formali” tfisser apprendiment li jsir f’ambjent organizzat u strutturat, speċifikament dedikat għall-apprendiment u tipikament iwassal għall-għoti ta’ kwalifika, ġeneralment f’forma ta’ ċertifikat jew ta’ diploma; dan jinkludi sistemi tal-edukazzjoni ġenerali, edukazzjoni u taħriġ vokazzjonali tal-bidu, ulterjuri u terzjarji, u l-edukazzjoni għolja (22).

e)	“Apprendiment mhux formali” tfisser apprendiment li jsir barra mill-edukazzjoni u mit-taħriġ formali permezz ta’ attivitajiet pjanati f’termini tal-objettivi tal-apprendiment u ż-żmien tal-apprendiment u fejn ikun hemm xi forma ta’ appoġġ għall-apprendiment (23).

“Apprendiment informali” tfisser apprendiment li jirriżulta minn attivitajiet ta’ kuljum u esperjenzi li mhumiex organizzati jew strutturati f’termini ta’ objettivi, ta’ żmien jew ta’ appoġġ għall-apprendiment; jista’ jkun mhux intenzjonat mill-perspettiva tal-istudent (24). Dan ma jwassalx awtomatikament għal mikrokredenzjali iżda jista’ jitqies fil-kuntest ta’ arranġamenti ta’ validazzjoni li jistgħu jidentifikaw, jiddokumentaw, jivvalutaw u/jew jiċċertifikaw l-eżiti tal-apprendiment ta’ individwu.

“Portabbiltà” tfisser il-kapaċità li detentur ta’ kredenzjali jaħżen il-mikrokredenzjali tiegħu f’sistema tal-għażla tiegħu, li jaqsam il-kredenzjali ma’ parti tal-għażla tiegħu (kemm jekk nazzjonali kif ukoll jekk transfruntier) u sabiex il-partijiet kollha fl-iskambju jkunu jistgħu jifhmu l-kontenut u jivverifikaw l-awtentiċità tal-kredenzjali. Dan jippermetti l-portabbiltà bejn u fi ħdan is-setturi tal-edukazzjoni u t-taħriġ, fis-suq tax-xogħol u bejn il-pajjiżi.

“Kumulabbiltà” tfisser il-possibbiltà, fejn rilevanti, li jiġu kkombinati mikrokredenzjali differenti u li wieħed jibnihom b’mod loġiku fuq xulxin. Id-deċiżjonijiet dwar kif ser jiġu “kkumulati” jew kkombinati l-kredenzjali huma f’idejn l-organizzazzjoni li tilqa’ (pereżempju l-istituzzjonijiet tal-edukazzjoni u t-taħriġ, l-impjegaturi eċċ) bi qbil mal-prattiki tagħhom u għandhom jappoġġaw il-miri u l-ħtiġijiet tal-istudent. L-ikkumular ma joħloqx intitolament awtomatiku għal kwalifika jew lawrja. Tali deċiżjonijiet jittieħdu minn awtoritajiet jew istituzzjonijiet reġjonali u nazzjonali f’konformità mal-proċessi tal-għoti tagħhom.

“Valutazzjoni” tfisser il-proċess jew il-metodu użat għall-evalwazzjoni, għall-kejl u eventwalment għad-deskrizzjoni tal-eżiti tal-apprendiment miksuba mill-individwi permezz ta’ ambjenti formali, mhux formali jew informali. Il-valutazzjoni titwettaq mill-fornitur jew minn fornituri tal-valutazzjoni rikonoxxuti oħrajn.

Definizzjoni u elementi standard Ewropej għad-deskrizzjoni ta’ mikrokredenzjali

Huwa rrakkomandat li l-Istati Membri jadottaw u jippromwovu l-użu ta’:

a)	id-definizzjoni ta’ mikrokredenzjali kif stabbilita fil-paragrafu 5(a);

l-elementi standard Ewropej biex jiddeskrivu mikrokredenzjali (kif deskritti fl-Anness I) inkluż l-elementi obbligatorji li ġejjin:

i)	l-identifikazzjoni tal-istudent

ii)	it-titolu tal-mikrokredenzjali

iii)	il-pajjiż(i)/ir-reġjun(i) tal-emittent

iv)	il-korp(i) tal-għoti

v)	id-data tal-ħruġ

vi)	l-eżiti tal-apprendiment

vii)	l-ammont ta’ xogħol nozzjonali meħtieġ biex jinkisbu l-eżiti tal-apprendiment (fis-Sistema Ewropea għall-Akkumulazzjoni u t-Trasferiment ta’ Krediti – ECTS, fejn possibbli)

viii)

il-livell (u ċ-ċiklu, jekk applikabbli) tal-esperjenza tal-apprendiment li twassal għall-mikrokredenzjali (il-Qafas Ewropew tal-Kwalifiki, l-Oqfsa tal-Kwalifiki fiż-Żona Ewropea tal-Edukazzjoni Għolja), jekk applikabbli

ix)	it-tip ta’ valutazzjoni

x)	il-forma ta’ parteċipazzjoni fl-attività ta’ apprendiment

xi)	it-tip ta’ assigurazzjoni tal-kwalità użata biex tirfed il-mikrokredenzjali

c)	Il-prinċipji Ewropej għat-tfassil u l-ħruġ tal-mikrokredenzjali (kif deskritti fl-Anness II).

Żvilupp tal-ekosistema għall-mikrokredenzjali

Huwa rrakkomandat li, fejn xieraq, l-Istati Membri jiffaċilitaw l-iżvilupp kontinwu u emerġenti tal-mikrokredenzjali f’ambjenti ta’ apprendiment formali, inkluż billi:

jappoġġaw l-esplorazzjoni minn istituzzjonijiet tal-edukazzjoni għolja tar-rwol tal-mikrokredenzjali li joffru opportunitajiet ta’ apprendiment lil diversi studenti, b’mod partikolari billi titwessa’ offerta ta’ attivitajiet ta’ apprendiment tul il-ħajja attraenti, aċċessibbli, inklużivi u ċċentrati fuq l-istudent, inkluż permezz tal-attivitajiet tal-alleanzi tal-“Universitajiet Ewropej” (25), fejn applikabbli;

jappoġġaw l-esplorazzjoni mill-istituzzjonijiet tal-edukazzjoni u t-taħriġ vokazzjonali u fornituri oħrajn tal-VET tar-rwol tal-mikrokredenzjali fit-tkomplija tal-edukazzjoni u t-taħriġ vokazzjonali fl-appoġġ tat-titjib u t-tiġdid tal-ħiliet tal-adulti, inkluż permezz tal-attivitajiet taċ-Ċentri tal-VET ta’ Eċċellenza Vokazzjonali, fejn applikabbli;

jikkunsidraw li jagħtu finanzjament pubbliku, skont iċ-ċirkostanzi nazzjonali, għall-iżvilupp u l-provvediment ta’ attivitajiet żgħar ta’ edukazzjoni u taħriġ li jwasslu għall-mikrokredenzjali fil-livelli kollha tal-edukazzjoni u t-taħriġ, filwaqt li titqies l-awtonomija istituzzjonali li tippermetti d-diversità u l-kreattività.

Huwa rrakkomandat li, fejn xieraq, l-Istati Membri jappoġġaw l-iżvilupp kontinwu u emerġenti tal-mikrokredenzjali f’ambjenti ta’ apprendiment mhux formali u informali, inkluż billi:

jappoġġaw it-tfassil u l-ħruġ ta’ mikrokredenzjali minn fornituri għajr dawk fil-paragrafu 7 (dawn il-fornituri jistgħu jinkludu: kumpanniji, sħab soċjali, organizzazzjonijiet tas-soċjetà ċivili, awtoritajiet lokali, ċentri komunitarji, assoċjazzjonijiet professjonali, organizzazzjonijiet tar-riċerka u l-innovazzjoni u fornituri privati), inkluż il-promozzjoni tad-diversità tas-sorsi ta’ finanzjament;

b)	jippromwovu l-iżvilupp ta’ mikrokredenzjali mfassla u maqbula mir-rappreżentanti tal-impjegaturi u tal-ħaddiema permezz ta’ djalogu soċjali, fejn xieraq;

c)	jikkunsidraw li jadattaw il-proċeduri għar-rikonoxximent tal-apprendiment minn qabel u l-validazzjoni tal-apprendiment mhux formali u informali biex jippermettu l-għoti ta’ mikrokredenzjali.

L-Istati Membri huma mħeġġa jappoġġaw il-kwalità u t-trasparenza tal-mikrokredenzjali, fejn xieraq inkluż billi:

a)	japplikaw, jadattaw u jiżviluppaw mekkaniżmi ta’ assigurazzjoni tal-kwalità għall-mikrokredenzjali maħruġa minn tipi differenti ta’ fornituri, bl-użu ta’ mekkaniżmi eżistenti, kull fejn ikun possibbli (ara l-Anness 2);

b)	jappoġġaw l-użu ta’ sistemi ta’ “informazzjoni dwar il-ħiliet” biex jiġu analizzati l-ħtiġijiet tas-suq tax-xogħol u l-bidliet demografiċi bl-għan li tkun tista’ tiġi identifikata kwalunkwe ħtieġa għall-iżvilupp jew għall-aġġornament tal-mikrokredenzjali;

c)	jħeġġu lill-fornituri biex jippubblikaw katalgi tal-mikrokredenzjali li joffru, li jinkludu, fejn rilevanti, il-politika tagħhom dwar ir-rikonoxximent tal-mikrokredenzjali maħruġa minn fornituri oħrajn;

d)	jintegraw il-mikrokredenzjali fl-oqfsa u fis-sistemi nazzjonali tal-kwalifiki. Id-deċiżjonijiet biex jiġu integrati l-mikrokredenzjali f’oqfsa jew sistemi reġjonali u nazzjonali jittieħdu mill-awtoritajiet jew l-istituzzjonijiet nazzjonali f’konformità maċ-ċirkostanzi nazzjonali.

10.

L-Istati Membri huma mħeġġa jippromwovu u jappoġġaw, fejn xieraq, esperimentazzjoni, kooperazzjoni, governanza u sħubijiet effettivi bejn:

i)	istituzzjonijiet tal-edukazzjoni u tat-taħriġ;

ii)	sħab soċjali;

iii)	impjegaturi u l-industrija;

iv)	organizzazzjonijiet ta’ riċerka u innovazzjoni;

v)	organizzazzjonijiet tas-soċjetà ċivili;

vi)	servizzi ta’ impjiegi u inklużjoni soċjali u;

vii)	awtoritajiet lokali, reġjonali u nazzjonali.

Din l-esperimentazzjoni, il-kooperazzjoni, il-governanza u s-sħubija huma importanti għall-identifikazzjoni tal-ħtiġijiet għall-mikrokredenzjali, l-iżvilupp konġunt tal-mikrokredenzjali, u l-aġġornament tal-mikrokredenzjali, kif ukoll għall-valutazzjoni tal-impatt fuq it-titjib u t-tiġdid tal-ħiliet u t-taħriġ, l-apprendiment tul il-ħajja u l-iżvilupp tal-karriera.

Twettiq tal-potenzjal tal-mikrokredenzjali

11.

Huwa rrakkomandat li, fejn xieraq, l-Istati Membri jintegraw il-mikrokredenzjali kemm fis-sistemi tal-edukazzjoni kif ukoll f’dawk tat-taħriġ u fil-politiki dwar il-ħiliet, inkluż billi:

a)	jħeġġu l-inklużjoni ta’ offerti ta’ edukazzjoni u taħriġ li jwasslu għal mikrokredenzjali f’katalgi ta’ opportunitajiet ta’ edukazzjoni u taħriġ li huma offruti;

jużaw il-mikrokredenzjali biex jittejjeb l-aċċess għall-edukazzjoni u t-taħriġ għall-istudenti kollha, inkluż gruppi żvantaġġati u vulnerabbli (bħal persuni b’diżabilità, anzjani, persuni b’livell baxx ta’ kwalifiki/ħiliet, minoranzi, persuni bi sfond ta’ migrazzjoni, refuġjati u persuni b’anqas opportunitajiet minħabba l-pożizzjoni ġeografika tagħhom u/jew is-sitwazzjoni soċjoekonomika żvantaġġata tagħhom), fejn xieraq;

c)	jużaw il-mikrokredenzjali biex jiġu appoġġati perkorsi ta’ apprendiment flessibbli u t-tranżizzjoni minn edukazzjoni sekondarja għolja jew VET għal edukazzjoni terzjarja u l-edukazzjoni għall-adulti fejn rilevanti;

d)	jużaw il-mikrokredenzjali li jistgħu jiġu integrati fi programmi ta’ lawrji jew li jistgħu jikkomplementawhom, fejn rilevanti;

e)	jużaw il-mikrokredenzjali bħala mezz ieħor biex jittejbu l-ħiliet u l-kompetenzi diġitali bażiċi u avvanzati ta’ firxa usa’ ta’ studenti, f’konformità mal-Pjan ta’ Azzjoni għall-Edukazzjoni Diġitali u l-Pjan ta’ Azzjoni tal-Pilastru Ewropew tad-Drittijiet Soċjali;

f)	jużaw il-mikrokredenzjali biex jiġi appoġġat l-iżvilupp tal-apprendiment għat-tranżizzjoni ekoloġika u l-iżvilupp sostenibbli bħala parti mill-implimentazzjoni nazzjonali tar-Rakkomandazzjoni tal-Kunsill dwar l-apprendiment għat-tranżizzjoni ekoloġika u l-iżvilupp sostenibbli;

jippromwovu l-użu ta’ mikrokredenzjali minn istituzzjonijiet tal-edukazzjoni u t-taħriġ u minn fornituri oħrajn – f’kooperazzjoni mal-ekosistema tal-għarfien u tal-innovazzjoni tal-madwar tagħhom – sabiex tingħata spinta lir-rilevanza u jiżdied l-impatt pożittiv potenzjali tal-mikrokredenzjali fuq l-ekonomija fil-livell lokali u reġjonali;

h)	jippromwovu l-fehim u l-użu tal-mikrokredenzjali permezz ta’ żvilupp professjonali kontinwu għall-għalliema u għal min iħarreġ, għall-konsulenti ta’ gwida (eż. fil-kuntest tal-Akkademji tal-Għalliema tal-Erasmus+), kif ukoll għall-akkademiċi, ir-riċerkaturi u persunal relatat ieħor;

i)	jippromwovu l-użu tal-mikrokredenzjali għat-trasferiment fil-pront tal-aktar sejbiet reċenti tar-riċerka f’opportunitajiet ta’ apprendiment, filwaqt li jsaħħu s-sinerġiji bejn iż-Żona Ewropea tal-Edukazzjoni u ż-Żona Ewropea tar-Riċerka;

j)	jesploraw l-użu tal-mikrokredenzjali fiż-Żona Ewropea tal-Edukazzjoni biex jiġu sfidati l-ġeneru u sterjotipi diskriminatorji oħrajn li jikkonċernaw l-għażliet ta’ studju u li huma fi ħdan il-prattiki u l-materjali edukattivi.

12.

Huwa rrakkomandat li, fejn xieraq, l-Istati Membri jintegraw il-mikrokredenzjali fil-politiki tagħhom dwar l-impjieg u fil-politiki attivi tas-suq tax-xogħol (jiġifieri s-servizzi għall-impjiegi, l-appoġġ għat-taħriġ u l-inċentivi għall-impjiegi), inkluż billi:

jużaw il-mikrokredenzjali, kif rilevanti, biex:

i)	jindirizzaw l-ispariġġ fil-ħiliet u l-konġestjonijiet f’setturi u f’reġjuni ekonomiċi partikolari u

ii)	itejbu u jġeddu l-ħiliet tal-ħaddiema għal ħiliet u impjiegi li huma mfittxija fis-suq tax-xogħol, b’mod partikolari fil-kuntest tat-tranżizzjonijiet ekoloġiċi u diġitali.

b)	jinkludu taħriġ li jwassal għal mikrokredenzjali f’opportunitajiet ta’ taħriġ rikonoxxuti li jistgħu jkunu marbuta ma’ kontijiet individwali ta’ apprendiment, fejn jeżistu, u sistemi oħrajn għall-appoġġ tat-taħriġ;

c)	jippromwovu l-użu tal-mikrokredenzjali bħala mezz biex jiġu aġġornati u mtejba l-ħiliet tal-ħaddiema li jaħdmu għal rashom u tal-ħaddiema mhux standard, inkluż l-persuni li jaħdmu permezz ta’ pjattaformi u SMEs;

jesploraw l-użu tal-mikrokredenzjali f’inizjattivi mmirati biex jappoġġaw u jimmotivaw gruppi żvantaġġati u vulnerabbli (bħal riċevituri ta’ introjtu minimu, persuni b’diżabilità, persuni qiegħda fit-tul u persuni b’livell baxx ta’ kwalifiki) biex jerġgħu jidħlu fis-suq tax-xogħol jew ikomplu impjieg;

e)	jesploraw ir-rwol tal-mikrokredenzjali fi ħdan is-sistemi għall-implimentazzjoni tal-Garanzija għaż-Żgħażagħ imsaħħa biex jiġu appoġġati ż-żgħażagħ, inkluż fit-taħriġ preparatorju u l-offerti ta’ kwalità tajba ta’ edukazzjoni jew taħriġ kontinwu;

f)	jesploraw ir-rwol tal-mikrokredenzjali bħala parti mill-implimentazzjoni nazzjonali tar-Rakkomandazzjoni dwar appoġġ attiv effettiv għall-impjiegi wara l-kriżi tal-COVID-19 (EASE);

g)	jesploraw l-użu tal-mikrokredenzjali biex jiġi appoġġat l-iżvilupp professjonali tal-ħaddiema u jiġu ssodisfati r-rekwiżiti obbligatorji għat-titjib u t-tiġdid tal-ħiliet f’ċerti impjiegi u tipi ta’ xogħol (eż. għal-liċenzji, għat-taħriġ meħtieġ u għall-permessi).

13.

Huwa rrakkomandat li, fejn xieraq, l-Istati Membri jħeġġu u jappoġġaw in-Network Ewropew ta’ Ċentri Nazzjonali ta’ Informazzjoni u ċ-Ċentri Nazzjonali ta’ Informazzjoni dwar ir-Rikonoxximent Akkademiku (networks ENIC-NARIC) jew korpi adegwati biex jiżviluppaw, fejn rilevanti, proċeduri ta’ rikonoxximent trasparenti għall-mikrokredenzjali maħruġa minn tipi differenti ta’ fornituri. Dan għandu jsir f’kooperazzjoni mal-partijiet ikkonċernati rilevanti msemmija fil-paragrafu 10, inkluż permezz tal-esplorazzjoni tal-fattibbiltà possibbli tar-rikonoxximent awtomatiku tal-mikrokredenzjali (26).

14.

Huwa rrakkomandat li, fejn xieraq, l-Istati Membri jiżguraw li l-informazzjoni u l-pariri dwar l-identifikazzjoni u l-għażla tal-mikrokredenzjali jiġu inkorporati fis-servizzi ta’ gwida għall-apprendiment tul il-ħajja. Dan jinkludi servizzi ta’ gwida f’ċentri tal-karriera tal-istituzzjoni tal-edukazzjoni għolja, f’servizzi pubbliċi tal-impjiegi, f’servizzi privati tal-impjiegi, f’servizzi soċjali u f’servizzi oħrajn ta’ gwida (impjiegi, karriera, edukazzjoni u taħriġ, ikkowċjar). L-inkorporazzjoni ta’ gwida dwar il-mikrokredenzjali f’dawn is-servizzi għandha taqdi l-ħtiġijiet tal-istudenti kollha, inkluż l-istudenti żvantaġġati u vulnerabbli.

15.

Huwa rrakkomandat li, fejn xieraq, l-Istati Membri:

jiddefinixxu miżuri billi jibnu fuq l-arranġamenti nazzjonali u l-oqfsa finanzjarji rilevanti eżistenti biex jimplimentaw din ir-Rakkomandazzjoni. Dan jista’ jinkludi rabtiet ma’ kontijiet individwali tal-apprendiment, fejn jeżistu (b’kunsiderazzjoni dovuta għar-responsabbiltà u l-awtonomija tal-organizzazzjonijiet tal-edukazzjoni, tat-taħriġ u tas-suq tax-xogħol fil-kuntest nazzjonali).

b)	jagħmlu l-aħjar użu mill-fondi u mill-istrumenti tal-Unjoni sabiex jappoġġaw ir-riformi meħtieġa, mill-qafas ta’ abilitazzjoni għall-iżvilupp u l-użu tal-mikrokredenzjali.

Appoġġ mill-Kummissjoni

Il-Kunsill jilqa’ b’sodisfazzjon l-intenzjoni tal-Kummissjoni, b’kunsiderazzjoni xierqa tas-sussidjarjetà u ċ-ċirkostanzi nazzjonali u f’kooperazzjoni mill-qrib mal-Istati Membri, li:

16.

tiżviluppa u tadatta, fejn rilevanti, l-għodod u s-servizzi eżistenti tal-Unjoni biex tappoġġa l-iżvilupp tal-mikrokredenzjali mit-tipi kollha ta’ fornituri, inkluż billi:

a)	tappoġġa l-iżvilupp ta’ linji gwida dwar kif tista’ titrawwem it-trasparenza u jiġu applikati l-istrumenti attwali tal-UE u ta’ Bolonja fil-qasam tal-edukazzjoni għolja għall-assigurazzjoni tal-kwalità interna u esterna tal-mikrokredenzjali;

b)	tesplora kif tista’ tiġi adattata l-gwida tal-utent tas-Sistema Ewropea għall-Akkumulazzjoni u t-Trasferiment ta’ Krediti fil-qasam tal-edukazzjoni għolja biex jiġu integrati l-mikrokredenzjali;

c)	tesplora kif jistgħu jiġu adattati u żviluppati l-għodod tal-UE għall-ħiliet u għall-kwalifiki biex jiġu integrati l-mikrokredenzjali fis-sistemi tal-VET;

d)	trawwem ir-rwol tal-ENIC-NARIC u korpi adegwati oħrajn fir-rikonoxximent tal-mikrokredenzjali għal aktar studji u/jew għal finijiet ta’ impjieg inkluż bl-iżvilupp ta’ gwida u taħriġ;

e)	tappoġġa diskussjoni strutturata dwar il-possibbiltà li jiġu inklużi l-mikrokredenzjali fl-Oqfsa Nazzjonali tal-Kwalifiki (QNK);

f)	tesplora l-iżvilupp tal-inizjattiva tal-Karta Ewropea tal-Istudenti biex l-istudenti jkunu jistgħu jaqsmu l-eżiti tal-mikrokredenzjali miksuba barra mill-pajjiż waqt l-istudji tagħhom, b’mod sigur ma’ istituzzjonijiet oħrajn tal-edukazzjoni u t-taħriġ.

17.

tappoġġa l-kooperazzjoni bejn l-Istati Membri u l-partijiet ikkonċernati inkluż billi:

tappoġġa l-kondiviżjoni ta’ informazzjoni bejn l-awtoritajiet reġjonali u nazzjonali dwar inizjattivi ta’ politika reġjonali u nazzjonali rilevanti u evidenza dwar l-impatt tagħhom, filwaqt li tagħmel l-aħjar użu mill-qafas strateġiku għall-kooperazzjoni Ewropea fl-edukazzjoni u t-taħriġ lejn iż-Żona Ewropea tal-Edukazzjoni u lil hinn minnha;

b)	tippromwovi l-kooperazzjoni Ewropea dwar l-assigurazzjoni tal-kwalità tal-mikrokredenzjali, u b’hekk tibni fiduċja reċiproka;

tinċentiva l-esperimentazzjoni bil-mikrokredenzjali u l-użu tagħhom minn istituzzjonijiet tal-edukazzjoni għolja u istituzzjonijiet tal-edukazzjoni u t-taħriġ vokazzjonali, inkluż l-alleanzi tal-“Universitajiet Ewropej” u ċ-Ċentri ta’ Eċċellenza tal-VET għall-promozzjoni u l-inkoraġġiment tal-użu tal-mikrokredenzjali mill-komunità usa’ tal-edukazzjoni u t-taħriġ;

d)	tippromwovi l-involviment b’rabta mal-mikrokredenzjali fl-Akkademji tal-Għalliema tal-Erasmus+ u fornituri oħrajn tal-edukazzjoni għall-għalliema u tat-taħriġ għall-għalliema biex jiġu indirizzati l-ħtiġijiet tal-għalliema għal żvilupp professjonali kontinwu, fejn xieraq;

tesplora l-involviment b’rabta mal-mikrokredenzjali minn sħab soċjali, minn impjegaturi u l-industrija, inkluż permezz tal-Patt għall-Ħiliet u inizjattivi ta’ kooperazzjoni marbuta bħall-Pjan ta’ Azzjoni għal Kooperazzjoni Settorjali dwar il-Ħiliet, l-Alleanza Ewropea għall-Apprendistati msaħħa u l-Koalizzjoni għall-Ħiliet u l-Impjiegi Diġitali;

f)	tappoġġa l-kooperazzjoni u l-iskambju tal-aħjar prattiki bejn is-servizzi pubbliċi tal-impjiegi u l-impjegaturi dwar kif għandhom jintużaw il-mikrokredenzjali biex tiġi appoġġata l-impjegabbiltà fil-kuntest tan-Network tas-servizzi pubbliċi tal-impjiegi;

tiffaċilita proġetti ta’ kooperazzjoni fost is-sħab soċjali u istituzzjonijiet tal-edukazzjoni u tat-taħriġ dwar kif għandhom jintużaw u jiġu implimentati l-mikrokredenzjali biex jiġu ssodisfati l-ħtiġijiet b’rabta mal-ħiliet fil-livell Ewropew, nazzjonali, lokali u reġjonali, u f’setturi differenti.

18.

tappoġġa l-implimentazzjoni teknika tar-Rakkomandazzjoni billi tesplora aktar żviluppi fil-pjattaforma tal-Europass biex tipprovdi, fejn rilevanti:

a)	informazzjoni dwar opportunitajiet ta’ apprendiment li jwasslu għall-mikrokredenzjali u dwar fornituri li jirrispettaw l-approċċ Ewropew għall-mikrokredenzjali;

b)	appoġġ għall-awtentikazzjoni tal-mikrokredenzjali permezz ta’ kredenzjali diġitali Ewropej għall-apprendiment;

c)	appoġġ għall-portabbiltà, il-kumulabbiltà, l-interoperabbiltà, l-iskambju u l-kondiviżjoni ta’ informazzjoni dwar il-mikrokredenzjali permezz ta’ standard miftuħ Ewropew li jispeċifika format komuni għall-mikrokredenzjali.

19.

tappoġġa aktar riċerka dwar:

i)	l-adozzjoni tal-approċċ Ewropew għall-mikrokredenzjali, inkluż dwar l-użu tagħhom mill-fornituri tal-edukazzjoni u t-taħriġ, mill-impjegaturi u mis-sħab soċjali;

ii)	eżiti u benefiċċji partikolari għall-istudenti;

iii)	il-valur miżjud tagħhom meta mqabbel ma’ lawrji jew kwalifiki sħaħ u b’mod komplementari għalihom u;

iv)	aktar evidenza dwar il-fatturi li jinfluwenzaw l-inċentivi u l-motivazzjoni tan-nies biex jibdew it-taħriġ.

20.

L-Istati Membri u l-Kummissjoni għandhom jaħdmu b’mod konġunt biex itejbu l-għan u r-rilevanza tal-ġbir eżistenti tad-data dwar il-mikrokredenzjali fil-livell tal-Unjoni.

Rapportar

21.

Huwa rrakkomandat li l-Istati Membri jimplimentaw din ir-Rakkomandazzjoni mill-aktar fis possibbli. Huma mistiedna jinfurmaw lill-Kummissjoni sa Diċembru 2023 dwar il-miżuri korrispondenti li għandhom jittieħdu fil-livell xieraq biex jappoġġaw l-objettivi ta’ din ir-Rakkomandazzjoni.

22.

Il-Kummissjoni hija mistiedna timmonitorja l-progress li sar fl-implimentazzjoni ta’ din ir-Rakkomandazzjoni permezz ta’ oqfsa rilevanti eżistenti ta’ monitoraġġ u rapportar tal-Unjoni, mingħajr l-ebda piż addizzjonali għall-Istati Membri, f’kooperazzjoni magħhom u wara li tikkonsulta lill-partijiet ikkonċernati, u tirrapporta lill-Kunsill fi żmien ħames snin mid-data tal-adozzjoni tagħha.

Magħmul fil-Lussemburgu, is-16 ta’ Ġunju 2022

Għall-Kunsill

Il-President

O. DUSSOPT

(1) ĠU L 379, 26.10.2021, p. 1.

(2) ĠU C 428, 13.12.2017, p. 10.

(3) “[...] il-Kunsill Ewropew jilqa’ l-miri ewlenin tal-UE tal-Pjan ta’ Azzjoni tal-Pilastru Ewropew tad-Drittijiet Soċjali, f’konformità mad-Dikjarazzjoni ta’ Porto”, il-konklużjonijiet tal-Kunsill Ewropew, 24-25 ta’ Ġunju 2021, EUCO 7/21.

(4) C(2021) 1372 final.

(5) COM(2020) 274 final.

(6) COM(2020) 625 final.

(7) ĠU C 417, 2.12.2020, p. 1.

(8) ĠU C 66, 26.2.2021, p. 1.

(9) ĠU C 221, 10.6.2021, p. 14.

(10) Komunikat Ministerjali ta’ Ruma tad-19 ta’ Novembru 2020.

(11) ĠU C 221, 10.6.2021, p. 3.

(12) “[...] il-kunċett tal-ekonomija tal-pjattaformi online jenħtieġ li jinftiehem li jkopri l-attività ekonomika kollha li tirriżulta minn tranżazzjonijiet kummerċjali attwali jew maħsuba fis-suq intern u ffaċilitata direttament jew indirettament minn pjattaformi online, b’mod partikolari servizzi tal-intermedjazzjoni online u magni tat-tiftix online”, Deċiżjoni tal-Kummissjoni tas-26 ta’ April 2018 dwar l-istabbiliment ta’ grupp ta’ esperti għall-Osservatorju dwar l-Ekonomija tal-Pjattaformi Online, C(2018) 2393 final, 26 ta’ April 2018, p. 1.

(13) Ir-Riżoluzzjoni tal-Parlament Ewropew tas-16 ta’ Settembru 2021 dwar kundizzjonijiet tax-xogħol ekwi, drittijiet u protezzjoni soċjali għall-ħaddiema tal-pjattaformi – forom ġodda ta’ impjieg marbuta mal-iżvilupp diġitali (2019/2186(INI)) talbet li l-edukazzjoni u t-taħriġ tal-ħaddiema tal-pjattaformi jiġu indirizzati fil-kuntest tal-approċċ tal-UE għall-mikrokredenzjali.

(14) COM(2020) 624 final.

(15) COM(2019) 640 final.

(16) ĠU C 189, 15.6.2017, p. 15.

(17) ĠU C 398, 22.12.2012, p. 1.

(18) SWD (2020) 121 final.

(19) ĠU L 112, 2.5.2018, p. 42.

(20) ĠU C 504, 14.12.2021, p. 9.

(21) “Apprendiment imħallat” fl-edukazzjoni u t-taħriġ formali huwa t-terminu użat għad-deskrizzjoni ta’ skola, edukatur jew student li jadotta aktar minn approċċ wieħed għall-proċess ta’ apprendiment.

(22) Definizzjoni abbażi tar-Rakkomandazzjoni tal-Kunsill tal-20 ta’ Diċembru 2012 dwar il-validazzjoni tat-tagħlim mhux formali u informali, ĠU C 398, 22.12.2012, p. 1.

(23) Id-definizzjoni meħuda mir-Regolament (UE) 2021/817 tal-Parlament Ewropew u tal-Kunsill tal-20 ta’ Mejju 2021 li jistabbilixxi Erasmus+: il-Programm tal-Unjoni għall-edukazzjoni u taħriġ, żgħażagħ u sport u li jħassar ir-Regolament (UE) Nru 1288/2013, ĠU L 189, 28.05.2021, p. 1.

(24) Id-definizzjoni meħuda mir-Regolament (UE) 2021/817 tal-Parlament Ewropew u tal-Kunsill tal-20 ta’ Mejju 2021 li jistabbilixxi Erasmus+: il-Programm tal-Unjoni għall-edukazzjoni u taħriġ, żgħażagħ u sport u li jħassar ir-Regolament (UE) Nru 1288/2013, ĠU L 189, 28.05.2021, p. 1.

(25) ĠU C 221, 10.6.2021, p. 14.

(26) Kif definit fir-Rakkomandazzjoni tal-Kunsill tas-26 ta’ Novembru 2018 dwar il-promozzjoni tar-rikonoxximent reċiproku awtomatiku ta’ kwalifiki tal-edukazzjoni għolja u tal-edukazzjoni u t-taħriġ fil-livell sekondarju għoli u l-eżiti tal-perjodi ta’ apprendiment barra mill-pajjiż, ĠU C 444, 10.12.2018, p. 1.

ANNESS II GĦALL-ANNESS

Prinċipji Ewropej għat-tfassil u l-ħruġ tal-mikrokredenzjali

L-10 prinċipji ppreżentati hawn taħt jispeċifikaw in-natura tal-mikrokredenzjali u joffru gwida lill-Istati Membri, lill-awtoritajiet pubbliċi u lill-fornituri dwar it-tfassil u l-ħruġ tal-mikrokredenzjali u tas-sistemi għall-mikrokredenzjali. Il-prinċipji jenfasizzaw il-karatteristiċi ewlenin tal-approċċ Ewropew għall-mikrokredenzjali li jistgħu jippermettu l-fiduċja fil-mikrokredenzjali u l-kwalità tagħhom. Il-prinċipji huma universali u jistgħu jiġu applikati f’kwalunkwe qasam jew settur, jekk xieraq.

Kwalità

Il-mikrokredenzjali huma suġġetti għall-assigurazzjoni tal-kwalità interna u esterna mis-sistema li tipproduċihom (eż il-kuntest tal-edukazzjoni, tat-taħriġ jew tas-suq tax-xogħol li fih jiġu żviluppati u pprovduti l-mikrokredenzjali). Il-proċessi tal-assigurazzjoni tal-kwalità jridu jkunu adegwati għall-użu, dokumentati b’mod ċar u aċċessibbli u jissodisfaw il-ħtiġijiet u l-aspettattivi tal-istudenti u tal-partijiet ikkonċernati.

Fornituri: L-assigurazzjoni tal-kwalità esterna tissejjes primarjament fuq il-valutazzjoni tal-fornituri (aktar milli fuq il-korsijiet individwali) u fuq l-effettività tal-proċeduri ta’ assigurazzjoni tal-kwalità interni tagħhom.

Il-fornituri għandhom jiżguraw li l-assigurazzjoni tal-kwalità interna tkopri l-elementi kollha li ġejjin:

—	il-kwalità ġenerali tal-mikrokredenzjali infushom, imsejsa fuq l-istandards imsemmija hawn taħt;

—	il-kwalità tal-kors, fejn applikabbli, li jwassal għall-mikrokredenzjali;

—	il-feedback tal-istudenti dwar l-esperjenza tal-apprendiment li twassal għall-mikrokredenzjali u;

—	il-feedback mill-pari, inkluż minn fornituri u minn partijiet ikkonċernati oħra, dwar l-esperjenza tal-apprendiment li twassal għall-mikrokredenzjali.

Standards: L-assigurazzjoni tal-kwalità esterna għandha titwettaq f’konformità ma’:

—	l-Anness IV tar-Rakkomandazzjoni tal-Qafas Ewropew tal-Kwalifiki, fejn applikabbli;

—	l-Istandards u l-Linji Gwida għall-Assigurazzjoni tal-Kwalità fiż-Żona Ewropea tal-Edukazzjoni Għolja, fejn applikabbli;

—	il-Qafas ta’ Referenza Ewropew għall-Assigurazzjoni tal-Kwalità (il-Qafas EQAVET) fil-qasam tal-edukazzjoni u t-taħriġ vokazzjonali, fejn applikabbli;

—	strumenti oħra ta’ assigurazzjoni tal-kwalità, inkluż reġistri u tikketti, biex tinbena l-fiduċja pubblika fil-mikrokredenzjali, fejn applikabbli.

Trasparenza

Il-mikrokredenzjali jistgħu jitkejlu, jitqabblu u jinftiehmu b’informazzjoni ċara dwar l-eżiti tal-apprendiment, dwar l-ammont ta’ xogħol, il-kontenut, il-livell u l-offerta tal-apprendiment, skont dak li jkun rilevanti.

Ammont ta’ xogħol

—

L-istituzzjonijiet tal-edukazzjoni għolja għandhom jużaw is-Sistema Ewropea għall-Akkumulazzjoni u t-Trasferiment ta’ Krediti (ECTS) u jikkonformaw mal-prinċipji fl-Anness V tar-Rakkomandazzjoni tal-QEK, fejn possibbli, biex juru l-ammont ta’ xogħol nozzjonali meħtieġ biex jinkisbu l-eżiti tal-apprendiment tal-mikrokredenzjali.

—	Il-fornituri li ma jużawx l-ECTS jistgħu jużaw sistemi jew tipi oħrajn ta’ informazzjoni li jistgħu jiddeskrivu b’mod effettiv l-eżiti tal-apprendiment u l-ammont ta’ xogħol, f’konformità mal-prinċipji fl-Anness V tar-Rakkomandazzjoni QEK.

Qafas/Sistemi tal-kwalifiki

—

Il-mikrokredenzjali jistgħu jiġu inklużi fl-oqfsa/sistemi nazzjonali tal-kwalifiki, fejn rilevanti, u konformi mal-prijoritajiet u mad-deċiżjonijiet nazzjonali. L-oqfsa/is-sistemi nazzjonali tal-kwalifiki huma msemmija fil-qafas Ewropew tal-kwalifiki u, għall-kwalifiki tal-edukazzjoni għolja, awtoċertifikati fil-qafas tal-kwalifiki taż-Żona Ewropea tal-Edukazzjoni Għolja, li jista’ jkompli jappoġġa t-trasparenza tal-mikrokredenzjali u l-fiduċja fihom.

Informazzjoni dwar l-offerta tal-mikrokredenzjali

Is-sistemi għall-mikrokredenzjali għandhom jipprovdu informazzjoni trasparenti u ċara, biex jirfdu s-sistemi ta’ gwida għall-istudenti, f’konformità mal-prattiki nazzjonali u mal-ħtiġijiet tal-partijiet ikkonċernati:

—

L-informazzjoni dwar il-fornituri tal-mikrokredenzjali tiġi ppubblikata fejn possibbli f’reġistri rilevanti eżistenti. Fejn hu possibbli l-fornituri tal-edukazzjoni għolja (u fornituri rilevanti oħra) għandhom jiddaħħlu fil-Bażi tad-data tar-Riżultati tal-Assigurazzjoni tal-Kwalità Esterna (DEQAR), imsejsa fuq l-assigurazzjoni tal-kwalità bi qbil mal-Istandards u mal-Linji Gwida għall-Assigurazzjoni tal-Kwalità fiż-Żona Ewropea ta’ Edukazzjoni Għolja (ESGQA);

—	L-informazzjoni dwar l-opportunitajiet ta’ apprendiment li jwasslu għall-mikrokredenzjali għandha tkun aċċessibbli u tingħadda faċilment permezz tal-pjattaformi rilevanti, fosthom il-Europass.

Rilevanza

Il-mikrokredenzjali għandhom jitfasslu u jinħarġu bħala kisbiet ta’ apprendiment immirati u distinti, u l-opportunitajiet ta’ apprendiment li jwasslu għalihom għandhom jiġu aġġornati skont il-ħtieġa, biex jissodisfaw il-ħtiġijiet ta’ apprendiment li jkunu ġew identifikati.

Titħeġġeġ il-kollaborazzjoni bejn l-organizzazzjonijiet tal-edukazzjoni u t-taħriġ, l-impjegaturi, is-sħab soċjali, il-fornituri l-oħrajn u l-utenti tal-mikrokredenzjali, biex tiżdied ir-rilevanza tal-mikrokredenzjali għas-suq tax-xogħol.

Valutazzjoni valida

L-eżiti tal-apprendiment tal-mikrokredenzjali huma vvalutati skont kriterji trasparenti.

Perkorsi ta’ apprendiment

Il-mikrokredenzjali huma maħsuba u maħruġa biex jappoġġaw perkorsi ta’ apprendiment flessibbli, inkluż il-possibbiltà li l-mikrokredenzjali jiġu ivvalidati, rikonoxxuti u “kkumulati” minn sistemi diversi.

Kumulabbiltà

Il-mikrokredenzjali huma mfassla biex ikunu modulari sabiex ikunu jistgħu jiżdiedu mikrokredenzjali oħra biex jinħolqu kredenzjali akbar. Id-deċiżjonijiet dwar kif ser jiġu “kkumulati” jew kombinati l-kredenzjali huma f’idejn l-organizzazzjoni li tilqa’ (pereżempju l-istituzzjonijiet tal-edukazzjoni u t-taħriġ, l-impjegaturi eċċ), bi qbil mal-prattiki tagħhom, u għandhom jappoġġaw il-miri u l-ħtiġijiet tal-istudent. L-ikkumular ma joħloqx intitolament awtomatiku għal kwalifika jew lawrja. Tali deċiżjonijiet jittieħdu minn awtoritajiet jew istituzzjonijiet reġjonali u nazzjonali f’konformità mal-proċessi tal-għoti tagħhom.

Validazzjoni tal-apprendiment mhux formali u informali

Il-kisba ta’ mikrokredenzjali hija possibbli wara valutazzjoni tal-eżiti ta’ apprendiment, miksuba permezz ta’ kors speċifiku li jwassal għall-mikrokredenzjali, jew abbażi tal-valutazzjoni tal-eżiti ta’ apprendiment li jirriżultaw minn apprendiment mhux formali u informali.

Rikonoxximent

Il-mikrokredenzjali għandhom valur ta’ sinjalar ċar tal-eżiti tal-apprendiment għal moduli iżgħar ta’ apprendiment. Ir-rikonoxximent iwitti t-triq għal offerta usa’ ta’ esperjenzi ta’ apprendiment bħal dawn b’mod komparabbli madwar l-UE.

Il-mikrokredenzjali huma rikonoxxuti, fejn possibbli, mill-awtoritajiet kompetenti, għal finijiet akkademiċi, ta’ taħriġ jew ta’ impjieg, abbażi tal-informazzjoni pprovduta skont l-elementi standard Ewropej (Anness I) u l-prinċipji għat-tfassil u l-ħruġ ta’ mikrokredenzjali (Anness II).

Meta l-mikrokredenzjali jinħarġu minn fornituri tal-edukazzjoni formali, dawn jiġu rikonoxxuti, fejn possibbli, abbażi ta’ proċeduri standard ta’ rikonoxximent użati fir-rikonoxximent ta’ kwalifiki barranin u perjodi ta’ apprendiment barra mill-pajjiż.

Dan huwa mingħajr preġudizzju għad-dritt tal-awtoritajiet kompetenti li jiddefinixxu l-proċeduri ta’ rikonoxximent jew li jivverifikaw l-awtentiċità tad-dokumenti.

Portabbiltà

Il-mikrokredenzjali huma l-proprjetà tad-detentur tal-kredenzjali (l-istudent) u jistgħu jinħażnu u jitqassmu faċilment mid-detentur tal-kredenzjali, inkluż permezz ta’ kartieri diġitali siguri (eż. il-Europass), f’konformità mar-Regolament Ġenerali dwar il-Protezzjoni tad-Data. L-infrastruttura għall-ħżin tad-data hija bbażata fuq standards miftuħa u mudelli tad-data. Dan jiżgura l-interoperabbiltà u l-iskambju bla xkiel tad-data, u jippermetti kontrolli bla xkiel tal-awtentiċità tad-data.

Iċċentrat fuq l-istudent

Il-mikrokredenzjali jitfasslu biex jissodisfaw il-ħtiġijiet tal-grupp tal-istudenti fil-mira. L-istudenti huma involuti fil-proċessi ta’ assigurazzjoni tal-kwalità interni u esterni u l-feedback tagħhom jitqies bħala parti mit-titjib kontinwu tal-mikrokredenzjali.

Awtentiċità

Il-mikrokredenzjali fihom biżżejjed informazzjoni biex jiġu vverifikati l-identità tad-detentur tal-kredenzjali (l-istudent), l-identità legali tal-emittent, id-data u l-post tal-ħruġ tal-mikrokredenzjali.

Informazzjoni u gwida

L-informazzjoni u l-pariri dwar il-mikrokredenzjali għandhom jiġu inkorporati fis-servizzi ta’ gwida għall-apprendiment tul il-ħajja u għandhom jilħqu l-akbar grupp ta’ studenti possibbli, b’mod inklużiv, u jappoġġaw l-edukazzjoni, it-taħriġ u l-għażliet tal-karriera.

Elementi obbligatorji:	Identifikazzjoni tal-istudent
	Titolu tal-mikrokredenzjali
	Pajjiż(i)/Reġjun(i) tal-emittent
	Korp(i) tal-għoti
	Data tal-ħruġ
	Eżiti tal-apprendiment
	Ammont ta’ xogħol nozzjonali meħtieġ biex jinkisbu l-eżiti ta’ apprendiment (espress fi krediti ECTS, kull fejn possibbli)
	Livell (u ċiklu, jekk applikabbli) tal-esperjenza ta’ apprendiment li twassal għall-mikrokredenzjali (QEK, QF-EHEA), jekk applikabbli
	Tip ta’ valutazzjoni
	Forma ta’ parteċipazzjoni fl-attività ta’ apprendiment
	Tip ta’ assigurazzjoni tal-kwalità użata biex tirfed il-mikrokredenzjali
Elementi fakultattivi, fejn rilevanti (lista mhux eżawrjenti)	Prerekwiżiti meħtieġa biex wieħed jirreġistra fl-attività ta’ apprendiment
	Superviżjoni u verifika tal-identità matul il-valutazzjoni (mingħajr superviżjoni u mingħajr verifika tal-identità, bis-superviżjoni u mingħajr verifika tal-identità, bis-superviżjoni online jew fuq il-post, b’verifika tal-identità)
	Grad miksub
	Opzjonijiet ta’ integrazzjoni/ ta’ kumulabbiltà (mikrokredenzjali awtonomu, indipendenti/integrat, kumulabbli għal ma’ kredenzjali oħra)
	Aktar informazzjoni